Phatisirani Matratado Toera Kumwaza Mphangwa Zadidi
1. Kodi matratado asaphatisirwa tani na atumiki a Mulungu?
1 Kutomera kalene matratado akubuluswa m’Bhibhlya asaphatisirwa na atumiki a Yahova toera kumwaza mphangwa zadidi. Mu caka 1880, M’bale C. T. Russell na andzace atoma kubulusa Tratados dos Estudantes da Bíblia [Matratado a Anyakupfundza Bhibhlya], matratado anewa akhapaswa anyakuleri a Watch Tower toera kugawira anthu. Matratado akhali akufunika kakamwe, natenepa mu caka 1884 pa ndzidzi udalembesa M’bale C. T. Russell nsoka wakudziwika wakukhonda kukhala na cifuno cakuwina kobiri, mbwenye na cifuno cakuendesa kutsogolo pifuno pya Umambo, fala yakuti “tratado” yaphatanizwa mu dzina, Sociedade de Tratados da Torre de Vigia de Sião, cincino isacemerwa Associação Torre de Vigia de Bíblias e Tratados. Cifupi na caka 1918, matratado akupiringana mamiliyau 300 akhadagawirwa na Anyakupfundza Bhibhlya. Matratado asapitiriza kukhala feramentu yadidi toera kupereka umboni.
2. Thangwi yanji matratado ndi akuphindulisa?
2 Thangwi Ndi Akuphindulisa: Matratado ndi akubalika ka- kamwe, pontho asatundusa maso. Mphangwa zacigwagwa zinagumanika m’matratado ndi zakuphata ntima na zisapereka cipfundziso. Iwo asakwanisa kutundusa anaciro nyumba akuti panango anadzumatirwa na mphangwa zizinji za mu revista peno bukhu. Matratado ndi akukhonda nentsa kugawira, ngakhale amwazi mphangwa apswa na anapiana anakwanisa kuagawira. Mwakuthimizira, matratado ndi pinthu ping’ono na pyakukhonda nentsa kukwata.
3. Longani cakugumana naco canu peno cidalembwa cinapangiza kufunika kwa matratado.
3 Anthu azinji asatoma kupfundza pya undimomwene kubulukira mu tratado. Mwacitsandzo, nkazi m’bodzi ku Haiti aona tratado yathu ibodzi mu nseu. Iye ailokota, aileri mbalonga “Ndaugumana undimomwene!” Buluka penepo, iye aenda ku Nyumba ya Umambo mbatoma kupfundza Bhibhlya na abatizwa—pyonsene pyacitika na mphambvu ya Mafala a Mulungu adagumanika mu tratado.
4. Kodi ndi cipi cifuno cathu pakugawira matratado pa nthanda?
4 Nyumba Na Nyumba: Nakuti matratado ndi feramentu yadidi kakamwe toera kupereka umboni, kazinji kene iwo anadzagawirwa mu nthanda zinango, kutomera mu nthanda ya Bingu. Cifuno cathu nee ndi cakugawira basi matratado ndzidzi onsene mwanaciro nyumba angatawira, mbwenye kuphatisira matratado toera kutomesa makani. Khala munthu apangiza cifuno paulendo wakutoma peno paulendo wakubwereza, tinakwanisa kupangiza macitiro a pfundziro ya Bhibhlya mu kuphatisira bukhu Biblya Isapfunzisanji peno bukhu inango ya pfundziro. Tinagawira tani matratado nyumba na nyumba? Tratado ibodzi na ibodzi ndi yakusiyana, natenepa, tisafunika kudziwa mwadidi matratado anagawira ife.
5. Tinagawira tani matratado nyumba na nyumba?
5 Maperekero athu aumboni asafunika kucinjwa mwakubverana na cisa, pontho mwakubverana na tratado inaphatisira ife. Tinakwanisa kutoma makani mu kupasa mwanaciro nyumba tratado. Tsamba yakutoma ya tratado ndi yakutundusa yakuti inakwanisa kugalamusa cifuno ca mwanaciro nyumba. Peno tinakwanisa kupangiza matratado akusiyana-siyana mbatiphemba mwanaciro nyumba toera kusakhula tratado inafuna iye. Tingaphata basa mu cisa cakuti anthu asanyinyirika kufungula nsuwo, tinakwanisa kuphata tratado mu njira yakuti mwanaciro nyumba anakwanisa kuona tsamba yakutoma, peno tinakwanisa kumphemba toera kupitisa tratado na pantsi pa nsuwo, pontho tinadzafuna kudziwa maonero ace thangwi ya tratado. Khala nsolo wa tratado ndi mbvundzo, tinakwanisa kumbvundza toera alonge maonero ace pa mbvundzo unoyu. Peno tinakwanisa kucita mbvundzo wathu wene wakuti unagalamusa cifuno na kutomesa makani. Buluka penepo, tinakwanisa kuleri pyankati mwa tratado na mwanaciro nyumba, mbatilimira panagumana ife mbvundzo mu ndima na mbitiphemba mwanaciro nyumba toera alonge maonero ace. Malemba akufunika tinakwanisa kualeri m’Bhibhlya. Pakumala kudinga mphangwa zingasi, tinakwanisa kumalisa kucedza, mbaticita masasanyiro toera kubwerera. Khala kazinji kene mpingo usasiya mabukhu panyumba zakuti anaciro nyumba abulukapo, tinakwanisa kusiya tratado mu njira yakuti anango nee anadzaiona.
6. Kodi matratado anaphatisirwa tani pakupereka umboni mu nseu?
6 Kupereka Umboni Mu Nseu: Mwaphatisira kale matratado pakupereka umboni mu nseu? Anthu anango anagwanda cifupi na ife nkhabe ndzidzi, pontho nee asafuna kulimira toera kucedza na ife. Panango, pinakhala pyakunentsa kudziwa khala iwo ali na cifuno candimomwene. Mbuto mwakuapasa marevista mapswa mwakukhonda kudziwa khala iwo anadzaaleri, thangwi yanji nkhabe kuapasa tratado mbuto mwa marevista? Nakuti tsamba yakutoma ya tratado ndi yakutundusa, pontho mphangwa zace ndi zacigwagwa, kufuna kudziwa kunacitisa anthu kuleri tratado angadzakhala na ndzidzi. Mwandimomwene, khala anthu ali na ndzidzi, tinakwanisa kudinga nawo mphangwa zingasi za nkati mwa tratado.
7. Longani pyakugumana napyo pinapangiza kuti tinaphatisira tani matratado pakupereka umboni wantsusukano.
7 Umboni Wantsusukano: Ndi kwakukhonda nentsa kupereka umboni wantsusukano mu kuphatisira matratado. M’bale m’bodzi asaikha m’borosa matratado mangasi ndzidzi onsene unabuluka iye panyumba. Angagumanikana na munthu, ninga nyakugulisa mu loja, iye basi ene asaphemba toera kumpasa cinthu kuti aleri, buluka penepo asampasa tratado. Mu ndzidzi udaenda banja ibodzi ku Nzinda wa Nova York toera kaona mbuto zinango zakubalika, iwo adzindikira kuti mbadagumanikana na anthu akubuluka ku madziko akusiyana-siyana. Natenepa, iwo akwata kabukhu kakuti Boas Novas na matratado mazinji mu pilongero pyakusiyana-siyana. Buluka penepo, mukhabva iwo munthu mbalonga cilongero cakunja wakuti akhagulisa pinthu nkhundu mwa nseu peno akhakhala cifupi na iwo mu parki peno mu restauranti, iwo akhakwanisa kugawira tratado mu cilongero cace.
8. Kodi ndi mu njira ipi matratado ndi akulandana na mbeu?
8 ‘Bzwala Mbeu Yako’: Matratado anakwanisa kulandaniswa na mbeu. Nyakulima asawaza mbeu yace mwakukhonda kusakhula, thangwi iye nkhabe kudziwa kuti ndi mbeu zipi zinafuna kudzamera na kukula. Lemba ya Koelete 11:6 isalonga: “Ndoko ukhabzwale mbeu yako na machibese, uibzwale pontho na mawulo, thangwi iwe hunadziwa tayu mbeu zipi zinafuna mera, peno za machibese peno za mawulo peno zonsene.” Natenepa, tendeni tipitirize ‘kupfundzisa pya ndzeru’ mu kuphatisira feramentu ineyi yakuphindulisa kakamwe toera kupereka umboni.—Mis. 15:7.
[Ntsonga ikulu pa tsamba 3]
Nakuti matratado ndi feramentu yadidi kakamwe toera kupereka umboni, kazinji kene iwo anadzagawirwa mu nthanda zinango, kutomera mu nthanda ya Bingu.