Lekani Kuikha Madire Kwa Imwe—Pakuthimbana Na Ndandanda Wakudzala Na Mabasa
1. Thangwi yanji anango asalangalira kugawira pfundziro ya Bhibhlya?
1 Anango asalangalira kugawira pfundziro ya Bhibhlya thangwi ali na ndandanda wakudzala na mabasa. Kutsalakana nyakupfundza Bhibhlya kusaphemba ndzidzi uzinji. Ndzidzi ndi wakufunika toera kukhunganyika pfundziro, kucitisa pfundziro, na kuphedza nyakupfundza toera kukula mwauzimu. Mpostolo Paulu alonga kuti apereka moyo wace toera kuphedza anthu a ku Tesalonika kuti akwanise kudziwa Yahova. (1 Ates. 2:7, 8) Tinakwanisa tani kucitisa pfundziro ya Bhibhlya ngakhale kuti tiri na ndandanda wakudzala na mabasa?
2. Kodi kufuna kwathu Yahova kunakhuya tani njira inaphatisira ife ndzidzi wathu?
2 Kulambira Yahova Kusaphemba Ndzidzi: Undimomwene ndi wakuti ulambiri usaphemba ndzidzi. Mwacitsandzo, mwakukhonda phonya tisakhazikisa ndzidzi toera kugumanika pa misonkhano, kuenda mu utumiki, kuleri Bhibhlya, na kucita phembero. Munthu wakumanga banja wakuti ali na mabasa mazinji, anadzatsandzaya kukhazikisa ndzidzi toera kukhala pabodzi na nkazace peno mamunace. Mwakupiringana pyenepi, ife tinadzatsandzaya ‘kubandza peno kugula ndzidzi’ toera kulambira Yahova thangwi tisanfuna. (Aef. 5:15-17; 1 Jwau 5:3) Mwakubverana na Yezu, khundu yakufunika kakamwe ya ulambiri wathu ndi basa yakucita anyakupfundza. (Mat. 28:18, 19) Kunyerezera pyenepi mwacidikhodikho kunadzatiphedza kutawira basa yakucitisa pfundziro ya Bhibhlya mwakukhonda kunyinyirika.
3. Tinatsalakana tani nyakupfundza Bhibhlya khala makhaliro aticimwanisa kuenda mu utumiki?
3 Mbwenye ndiye tani khala tisaphata basa kudziko, tisanentseka na ungumi, peno tisatsalakana mabasa mazinji auzimu? Amwazi mphangwa anango akuti kazinji kene asacita ulendo asacitisa mapfundziro awo a Bhibhlya mu kuphatisira ntokodzi wa m’manja peno kucedza mu kuphatisira n’tcini wa ndzeru. Ale akuti ali na ndandanda wakunentsa thangwi ya nyatwa za ungumi asacita masasanyiro toera nyakupfundza aende kunyumba kwawo toera kupfundza Bhibhlya. Anango asasaka m’mwazi mphangwa unango toera aaphedze kucitisa pfundziro pa ndzidzi wakuti aphatika na mabasa.
4. Ndi nkhombo zipi zinaoneka pakucita khundu m’basa yakucitisa pfundziro ya Bhibhlya?
4 Paulu atsandzaya kakamwe thangwi yakuphatisira ndzidzi wace na mphambvu zace toera kuphedza anango kupfundza undimomwene. (Mach. 20:35) Mu ndzidzi ukhanyerezera iye anthu onsene adaphedza iye ku Tesalonika, Paulu akulumizika kupereka takhuta kuna Yahova. (1 Ates. 1:2) Kutsandzaya na kukomerwa kwathu mu utumiki kunathimizirika tingakhonda kutawirisa kuti ndandanda wakudzala na mabasa uticimwanise kucita khundu m’basa yakucitisa pfundziro ya Bhibhlya.