Lekani Kukhondera Anango Udidi!
1 Mu kukhala waphinga m’basa ya kumwaza mphangwa zadidi za Umambo wa Mulungu, ife nkhabe ‘kukhondera’ pyadidi ale ali mu cisa cidapaswa ife towera tiphate basa. (Mis. 3:27) Nkhabepo mphangwa zinango zadidi zakugawana na anango kupiringana za ndzidzi wadidi unabwera pantsi pa utongi wa Mulungu. Ngakhale kuti musacita kakamwe khundu mu kumwaza cidikhiro ca Umambo mu kupereka umboni wantsusukano peno kugawira mabukhu, thangwi yanji musafunika kukhala na cifuno ca kucitisa pfunziro ya Biblya, khala nee muli nayo?
2 M’midzidzi inango, mpingizo ukulu towera kucitisa pfunziro ya Biblya ndi mabvero athu. Anango asanyinyirika kucitisa pfunziro ya Biblya thangwi yakupibva kukhala akukhonda thema peno thangwi ya kuinjipirwa na mabasa. Maonero akutowerera awa anakwanisa kukhala akuphedza kwa imwe towera mukhonde kunyinyirika kucita khundu m’basa ya kucitisa pfunziro ya Biblya.—Mat. 28:19; Mach. 20:20.
3 Kusowa Cinyindiro: Panango imwe hamudapfunza maka tayu ku xikola ya dziko peno thangwi ya cinthu cinango ndi cinakucitisani kukhala wakusowa cinyindiro cakuti muli na luso yakucitisa pfunziro ya Biblya. Atumiki Acikristu akudziwa kupfunzisa a piaka dzana yakutoma akhali ‘anthu akukhonda kupfunziswa pya mabukhu na pya xikola.’ Kodi ndi ninji cidaacitisa kukwanisa kupfunzisa anango undimomwene? Iwo “akhali anyakupfundza a Yezu.” (Mach. 4:13) Iwo apfunza kwa Pfunzisi Wankulu, Yezu, wakuti pipfunziso na mapfunzisiro ace tapikoyerwa m’Malemba. Ngakhale kuti hamudapfunza maka tayu ku xikola ya dziko, imwe muli kutambira cipfunziso cauzimu cakuti nkhabe landanisika na cipfunziso cinango.—Iza. 50:4; 2 Akor. 3:5.
4 M’midzidzi inango Yahova akhaphatisira aprofeta towera kusandika atongi akudawa peno anango akuti akhali na cidzo. Anango, ninga Amosi, akhali na makuziro akucepeseka. Amosi atawira: ‘Ine sine mulongeri tayu,’ mbwenye ndine nyakutsalakana ng’ombe na ‘nyakuceka masambvu’ a miti ya sikomoro. (Amosi 7:14) Ngakhale tenepa, Amosi hadanyinyirika tayu kulonga mphangwa za kutonga kwa Yahova nyantsembe Amasiya wakuti akhalambira mwana ng’ombe. (Amosi 7:16, 17) Ndzidzi onsene tisafunika kukumbuka kuti ife tikucita basa ya Mulungu na iye anacitisa kuti tikhale na luso towera ticite basa idatipasa iye.—2 Tim. 3:17.
5 Kuinjipirwa Na Mabasa: Ngakhale kuti muli na mabasa akuinjipa, imwe mungakwanise kukoya ndzidzi towera kucita khundu mu utumiki mwakukhonda phonya. Kucitisa pfunziro ya Biblya kungakwanise kukhala khundu yakutsanzayisa kakamwe ya utumiki. Ndi pyakukomeresa kuona Mafala a Yahova mbakabala misapo mu umaso wa munthu. (Aheb. 4:12) Yahova asakomerwa munawangisira ife kuphedza munthu towera “adziwembo mapfundisiro adidi” a undimomwene. (1 Tim. 2:4) Ngakhale aanju asakomerwa munthu angatcinyuka ku makhaliro ace akale mbakula mwauzimu.—Luka 15:10.
6 Cifuno ca Mulungu ndi cakuti “anthu onsene apulumuke, adziwembo mapfundisiro adidi” a undimomwene. (1 Tim. 2:4) Ndi mwai tani uli na ife towera kuphata basa mwakubverana na cifuno ca Mulungu, mbitikhonda kunyinyirika kucitisa mapfunziro a Biblya!
[Study Questions]
1. Kodi ndi mu njira ipi ife nkhabe ‘kukhondera’ anango udidi?
2. Kodi ndi ninji cingakwanise kuticimwanisa kutomesa pfunziro ya Biblya?
3. Thangwi yanji ife tisakwanisa kupfunzisa Biblya?
4. Kodi tinakwanisa kupfunzanji ku citsanzo ca Amosi?
5. Thangwi yanji tisafunika kuwangisira towera kutomesa pfunziro ya Biblya ngakhale tiri akuinjipirwa na mabasa?
6. Kodi ndi mwai upi wakupambulika uli na ife mukucita cifuno ca Mulungu?