Towezerani Citsandzo Ca Aprofeta—Amosi
1. Thangwi yanji citsandzo ca Amosi ndi phata ya ciwangiso kwa ife?
1 Kodi musapibva kukhala wakukhonda thema toera kumwaza mphangwa thangwi yakukhala na mapfundziro akucepa? Khala ndi tenepo, munakwanisa kugumana ciwangiso kubulukira ku citsandzo ca Amosi. Iye akhali nkumbizi wa mabira na nyakulima, mbwenye Yahova ampasa mphambvu toera kumwaza mphangwa zakufunika kakamwe. (Amo. 1:1; 7:14, 15) Mu njira ibodzi ene, lero Yahova asaphatisira anthu akucepeseka. (1 Akor. 1:27-29) Ndi pipfundziso pipi pya utumiki wathu pyakuti tinakwanisa kupfundza kubulukira kwa mprofeta Amosi?
2. Thangwi yanji tinakwanisa kukhala akuwanga pakuthimbana na mpingizo mu utumiki?
2 Khalani Akuwanga Pakuthimbana na Mpingizo: Mu ndzidzi wakuti Amasiya, nyantsembe akhalambira dzimunthu ya mwana wa ng’ombe kunkwiriro kwa madzindza khumi a umambo wa Israele, iye abva mphangwa za mprofeta Amosi, pisaoneka kuti iye atawira: ‘Ndoko kunyumba! Tisiye pyathu! Ife tiri na uphemberi wathu!’ (Amo. 7:12, 13) Amasiya alonga uthambi mu phembo yace kuna Mambo Yeroboamu toera kukhondesa basa ya Amosi. (Amo. 7:7-11) Mbwenye Amosi nee akhagopa. Lero, atsogoleri anango a mauphemberi asasaka ciphedzo ca anthu a ndale toera kutcinga mbumba ya Yahova. Natenepa, Yahova asatipasa cinyindiro cakuti nkhabepo cida cinafuna kudzacitwa toera kutiphekesa cinadzapembera.—Iza. 54:17.
3. Kodi ndi mphangwa zanji zinamwaza ife lero?
3 Dziwisani Kutonga Miseru kwa Mulungu na Nkhombo za Ntsogolo: Ngakhale kuti Amosi akhalonga pya kutongwa kwa madzindza khumi a umambo wa Israele, iye amalisa kulemba bukhu ya m’Bhibhlya inadziwika na dzina yace yakuti musagumanika pikiro ya Yahova yakubweresa papswa na nkhombo zizinji. (Amo. 9:13-15) Ife tisadziwisambo pya ‘ntsiku yakutonga miseru’ ya Mulungu inafuna kudza, mbwenye pyenepi ndi basi ene khundu ya ‘mphangwa zadidi za umambo’ zakuti tisafunika kuzimwaza. (2 Ped. 3:7; Mat. 24:14) Kufudza kwa Yahova kwa anthu akuipa pa Harmagedoni kunadzafungula njira toera kupita mu paradizu pa dziko yapantsi.—Sal. 37:34.
4. Ndi cinyindiro cipi ciri na ife cakuti tinakwanisa kukwanirisa cifuno ca Yahova?
4 Kumwaza mphangwa za Umambo mu dziko yakuti iri na apingizi azinji, mwandimomwene kusayesera kutonga kwathu toera kukwanirisa kuperekeka kwathu kuna Yahova na kucita cifuno cace. (Jwau 15:19) Ngakhale tenepa, tisanyindira kuti Yahova anapitiriza kutipasa pinafuna ife toera kukwanirisa cifuno cace, ninga pidacita Amosi.—2 Akor. 3:5.