Khunganyikani Cikumbuso Na Ntima Wakukomerwa
1. Ndzidzi wa Cikumbuso ndi wakupambulika toera kucitanji?
1 Cikumbuso cinafuna citwa n’Cipiri, ntsiku 26 ya Murope, cisatipasa mwai wadidi kakamwe toera kutsandzaya na pidacita Mulungu toera kutipulumusa. (Iza. 61:10) Mbidzati kufika ntsiku ineyi, nzimu wakukomerwa unadzatiphedza toera kukhunganyika mwadidi. Tinakhunganyika tani?
2. Ninji pinatikulumiza toera kukhunganyika Cikumbuso?
2 Kukhunganyika Cikumbuso: Cakudya Cancidodo ca Mbuya ndi cinthu cakufunika kakamwe, pontho cisacitwa mu njira yakukhonda nentsa. Ngakhale tenepo, cisaphemba kukhunganyika mwanyapantsi toera pinthu pyakufunika pikhonde duwalika. (Mis. 21:5) Pasafunika kukhazikisa ndzidzi na kusankhula mbuto yadidi. Pasafunikambo pidzindikiro pyakuthema. Mbuto inafuna citirwa cikumbuso isafunika kupswairwa na kubalikiswa. Nyakucita nkhani asafunika kukhunganyika mwadidi, pontho anyakupereka pidzindikiro na akalindi asafunika kupaswa pitsogolero pyakubveka mwadidi. Mwakukhonda penula pinthu pizinji pyamala kucitwa kale. Kupereka takhuta thangwi ya mphambvu ya cipulumuso ca ciomboli kunatikulumiza toera kukhunganyika mwadidi ndzidzi unoyu wakupambuluka.—1 Ped. 1:8, 9.
3. Tinakhunganya tani ntima wathu ku Cakudya Cancidodo ca Mbuya?
3 Kukhunganya Ntima: Mphyakufunikambo kukhunganya ntima wathu toera kubvesesa mwakukwana cifuniro ca Cikumbuso. (Esd. 7:10) Toera kucita pyenepi, tisafunika kupambula ndzidzi toera kuleri malemba a Bhibhlya analonga pya Cikumbuso, mbitinyerezera mwacidikhodikho ntsiku zakumalisa za umaso wa Yezu pa dziko yapantsi. Kunyerezera mwacidikhodikho pya nzimu wakudzimana wa Yezu, kunadzatikulumiza toera kunsangizira.—Agal. 2:20.
4. Ndi phindu ipi ya ciomboli yakuti isakutsandzayisani kakamwe?
4 Kufa kwa Kristu kusakuza Yahova ninga wakuthema kutonga. Kusatisudzula ku madawo na kufa. (1 Jwau 2:2) Kusafungula njira toera kukhala na uxamwali na Mulungu, pontho toera kukhala na umaso wa kwenda na kwenda. (Akol. 1:21, 22) Kusatiphedzambo kuwangisa kutonga kwathu toera kukhala maso mwakubverana na kuperekeka kwathu kwa Yahova na kukhala dzololo ninga anyakupfundza a Kristu. (Mat. 16:24) Mu ndzidzi unakhunganyika imwe toera kugumanika pa Cikumbuso, kukomerwa kwanu mbakuthimizirike!