Kodi Mukukhunganyika Cikumbuso?

Ikhali ntsiku 13 ya Nisane ya 33 N.W. Yezu akhadziwa kuti akhali masiku akumalisa kukhala na axamwali ace apantima mbadzati kuphiwa. Iye akhafunika kucita Paskwa yakumalisa na iwo mbatomesa masasanyiro mapswa, Cakudya Cancidodo ca Mbuya. Mwakukhonda penula, cakucitika ceneci cikhafunika kukhunganywa. Natenepa, iye atuma Pedro na Jwau toera kakhunganya Paskwa. (Luka 22:7-13) Kutomera pa ndzidzi unoyu, pyaka pyonsene Akristu anafuna kucita Cikumbuso ceneci asafunika kukhunganyika. (Luka 22:19) Ndi pinthu pipi pinafunika ife kucita toera kukhunganyika Cikumbuso cinafuna kucitwa pa ntsiku 3 ya Bwinja?

Pinafuna Kukhunganyika Akulu a Mpingo:

• Kucita masasanyiro akuphatisira Nyumba ya Umambo peno mbuto inango yakuthema. Mbuto ineyi isafunika kukhala na mipando yakukwana, ceza cadidi pontho mphepo yadidi. Kucita masasanyiro akucenesa mbuto ineyi mwanyapantsi.

• Kusankhula nyakucita nkhani wakuthema, muimiriri wakuthema na abale toera kucita phembero pidzindikiro mbipidzati kufambiswa.

• Khala mipingo mizinji inadzaphatisira mbuto ibodzi ene, mphyadidi kubverana mwanyapantsi ndzidzi wakutoma misonkhano na wakumalisa na mbuto yakuikha miotokala.

• Kusankhula akalindi na anafuna kufambisa pidzindikiro.

• Kukhunganyika mwanyapantsi pidzindikiro pyakuthema, maparato, makopo a vinyu, meza na nguwo yakuphimbira meza.

Pinafuna Kukhunganyika Amwazi Mphangwa:

• Kucita masasanyiro toera kuphata basa mwakukwana mu kampanya yakucemera anthu toera kugumanika pa Cikumbuso.

• Kucita ndandanda wa anyakupfundza Bhibhlya, acibale, andzanu akuxikola, andzanu akubasa na anthu anango anadziwa imwe toera kuacemera.

• Kuleri na kunyerezera mwacidikhodikho Malemba a ndzidzi wa Cikumbuso.

• Kuenda wakukhunganyika ku Cikumbuso toera kucita bweraniko alendo.