Towezerani Citsandzo Ca Aprofeta—Yona
1. Ndi makhaliro api adidi adapangiza Yona?
1 Musakumbukanji munganyerezera pya mprofeta Yona? Anango anakwanisa kumuona ninga munthu wakugopa peno wakuuma ntima. Mbwenye iye apangiza pakweca kucepeseka, cipapo, na nzimu wakuperekeka. ‘Tinatowezera tani citsandzo’ ca makhaliro adidi a Yona?—Tgo. 5:10.
2. Tinatowezera tani kucepeseka kwa Yona?
2 Kucepeseka: Pakutoma, Yona athawa mbaenda kunango kusiyapo ku cisa cidatumwa iye. Pyenepi si pyakudzumisa tayu thangwi anthu a ku Asirya akhadziwika ninga auphanga, pontho, Ninive wafika pa kudziwika ninga “nzinda wakuipa [peno wa ciropa].” (Nah. 3:1-3) Mbwenye Yahova apfundzisa Yona, wakuti apangiza kucepeseka mu kutawira kucita basa mudapangwa iye kaciwiri. (Mis. 24:32; Yona 3:1-3) Ngakhale kuti pakutoma athawa, iye acita cifuno ca Yahova. (Mat. 21:28-31) Kodi ifembo tiri dzololo toera kumwaza mphangwa zadidi, ngakhale kuti tapaswa ciphedzo peno tikumwaza mphangwa mu cisa cakunentsa?
3. Ndi makhundu api a utumiki wanu akuti asaphemba cipapo na nzimu wakuperekeka?
3 Cipapo Na Nzimu Wakuperekeka: Mudaona Yona kuti cisankhulo cace cakuipa mbacidaikha pangozwi umaso wa anyakufambisa paketi, iye akhali dzololo toera kupereka umaso wace. (Yona 1:3, 4, 12) Mukupita kwa ndzidzi, pakukwanirisa basa yace mu dziko ya Ninive, iye aenda mpaka pakati pa nzinda, panango toera kusaka mbuto yadidi kuti amwaze mphangwa za kutonga kwa Yahova. Anewa nee akhali mabasa a munthu wakugopa, mbwenye mabasa a mprofeta wacipapo wa Mulungu! (Yona 3:3, 4) Ndiye tanimbo kwa ife lero? Cipapo cakubuluka kwa Mulungu ndi cakufunika toera kupereka umboni mwacipapo pakuthimbana na mpingizo. (Mach. 4:29, 31) Nzimu wakuperekeka ndi wakufunika toera kuphatisira ndzidzi wathu na mpfuma zathu mu utumiki.—Mach. 20:24.
4. Thangwi yanji tisafunika kukhala na ndzidzi toera kunyerezera citsandzo cadidi ca aprofeta a Yahova?
4 Mu ndzidzi unaleri imwe pya mbiri ya aprofeta a Yahova, munadzaphindula munganyerezera kuti ndimwe munacita khundu pa cakucitika ceneci. Bvundzikani: ‘Kodi mbidacita tani? Ndinatowezera tani makhaliro ace adidi mu umaso wanga?’ (Aheb. 6:11, 12) Misolo inango ya mu Utumiki Wathu Wa Umambo inadzadinga maphindu anango akufunika akuti tinakwanisa kuapfundza kubulukira kwa aprofeta anango akukhulupirika a Yahova.