Phatisirani Web Site Yathu Toera Kupfundzisa Ananu
1. Ndi cipi cifuniro ca khundu ya Web site yathu ya nsolo wakuti “Crianças”?
1 Web Site yathu, jw.org, yacitwa toera kutundusa anthu a mathunga onsene. Khundu ya Web Site ya nsolo wakuti, “Crianças” (ndokoni pa Ensinos Bíblicos > Crianças) isaphedza anang’ono na anyakubala awo toera kufendedzerana unango na ndzace, pontho na Yahova. (Deut. 6:6, 7) Munaphatisira tani khundu ineyi toera kupfundzisa ananu?
2. Munakwanisa tani kusankhula mphangwa zakuthema toera kupfundza na ananu mwakubverana na thunga yawo?
2 Khalani Wakucinja: Mwana m’bodzi na m’bodzi ali na pyakufuna pyace. (1 Akor. 13:11) Munakwanisa tani kusankhula mphangwa zakuthema toera kupfundza na ananu mwakubverana na thunga yawo? Bvundzikani: ‘Ninji pinafuna kukomerwa na ananga? Kodi anakwanisa kubvesera pyonsene? Ndi ndzidzi ungasi unakwanisa iwo kukhala akubvesera? Na anapiana a pyaka pitatu pyakubalwa peno pyakucepa, munakwanisa kudinga mphangwa zinagumanika pantsi pa nsolo wakuti “Minhas Primeiras Lições Da Bíblia.” Mabanja anango asatsandzaya na mbiri za m’Bhibhlya zinagumanika mu nkhundu “Ensine Seus Filhos.” Pontho, dingani maonero anatowerera.
3. Kodi anyakubala anaphatisira tani mbiri na mabasa anango anagumanika pa “Projetos para Adoração em Família”?
3 Masasanyiro a Kulambira Kwa Banja: Masasanyiro anewa ndi maferamentu toera kuphedza misolo ya banja kupfundza na anawo. Toera kupfundza kuti tinaphatisira tani makhundu a mbiri za m’Bhibhlya na mabasa, pfinyani butau ya download, pontho lerini “Guia para os Pais” pya masasanyiro onsene. Phatisirani pithundzithundzi, ninga kupintari pithundzithundzi pinagumanika pa tsamba, toera kupfundzisa ananu ang’ono. Phedzani ananu athunga toera kumalisira kucita mabasa a pfundziro. Mabasa onsene a masasanyiro a pfundziro ibodzi na ibodzi asafokotoza mbiri ibodzi ene ya Bhibhlya peno pfundziro, natenepa ana a mathunga onsene akwanisa kucita khundu m’masasanyiro mabodzi ene akulambira kwa banja.
4. Ndi ninji pinagumanika mu khundu “Torne-Se Amigo de Jeová”?
4 Khalani Xamwali Wa Yahova: (Torne-Se Amigo de Jeová.) Mavidyu, nyimbo, na mabasa a khundu ineyi ya mu Web Site, asaphedza anyakubala toera kupfundzisa anawo Mafala a Mulungu mu uwana wawo. (Deut. 31:12) Vidyu ibodzi na ibodzi ya ndzidzi wakucepa isapfundzisa ntsonga yakufunika kakamwe. Mabasa ninga sakani-na-gumanani masendzekero asagomezera kufunika kwa mapfundziro anewa. Nakuti anapiana asakomerwa kakamwe na kuimba, natenepa nyimbo zisaphedza anapiana toera kukumbuka pidapfundza iwo. Nyimbo za Umambo na nyimbo zakupambulika zinalemberwa anang’ono zisaikwa ndzidzi onsene.
5. Thangwi yanji anyakubala asafunika kuphemba Yahova toera kuaphedza kupfundzisa anawo undimomwene?
5 Anyakubala, Yahova asafuna kuti imwe mukhale amai na ababa akupembera. Natenepa, mphembeni toera akuphedzeni kupfundzisa ananu undimomwene. (Aton. 13:8) Na ciphedzo ca Yahova, munakwanisa kupfundzisa ananu toera kukhala na ‘ndzeru zakupulumuka pa kutawira [peno kukhulupira] Kristu Yezu.’—2 Tim. 3:15; Mis. 4:1-4.