Njira Za Maperekero Aumboni

Toera Kutomesa Mapfundziro a Bhibhlya pa Sabudu Yakutoma mu Nthanda ya Madzalo

“Anthu anacedza na ife ali na maonero akusiyana-siyana thangwi ya Bhibhlya. Anango asakhulupira kuti iyo ndi Mafala a Mulungu, mbwenye anango asaiona ninga yakulandana na mabukhu anango. Ndi api maonero anu thangwi ya Bhibhlya?” Dikhirani ntawiro. Mpangizeni tsamba yakumalisa ya Ncenjezi 1 ya Madzalo, dingani pabodzi mphangwa zinagumanika pa mbvundzo wakutoma, pontho lerini lemba ibodzi mwa malemba anagumanika mu ndima ineyi. Perekani marevista, pontho citani masasanyiro akubwerera toera kudinga mbvundzo unatowerera.

Ncenjezi 1 ya Madzalo

“Anthu azinji asafuna pya kumala kwa nkhondo pa dziko yonsene. Musanyerezera kuti mphyakukwanisika kukhazikisa ntendere pa dziko yonsene? [Dikhirani ntawiro.] Onani pinapikira Bhibhlya. [Lerini Masalmo 46:9.] Mwakudzumisa, pinthu pinacitika kutomera pa Nkhondo Yakutoma Ya Dziko Yonsene Yapantsi mpaka lero, pisatipasa cinyindiro cakuti mwakukhonda dembuka, Mulungu anadzakwanirisa profesiya iyi yakumalisa nkhondo kwenda na kwenda. Revista iyi isafokotoza pyenepi.”

Despertai! de Fevereiro

“Tikucedza na anthu toera kulonga pya nyatwa inadzudzumisa anthu onsene. Pisaoneka kuti anthu nkhabe ndzidzi wakukwana toera kucita pyonsene pinafuna iwo. Musaona kuti ife nkhabe ndzidzi thangwi tiri na pizinji toera kucita, peno nee tisaphatisira mwadidi ndzidzi wathu uzinji? [Dikhirani ntawiro.] Anthu azinji nkhabe dziwa kuti Bhibhlya isatipasa uphungu wadidi toera tikwanise kuphatisira mwadidi ndzidzi. Citsandzo cibodzi ndi ici. [Lerini Afilipi 1:10a.] Revista iyi isapangiza njira zinai zidaphedza anthu azinji toera kuphatisira ndzidzi wawo mwandzeru.”