Malimwe—Inadzakhala Nthanda Yakupambulika ya Basa!

1. Ndi kampanya ipi yakupambulika inafuna kudzacitwa pa dziko yonsene munafendedzera ife pyaka 100 pya kukhazikiswa kwa Umambo wa Mulungu?

¹ Tiri cifupi na pyaka 100 pya kukhazikiswa kwa Umambo wa Mulungu. Ndi kwakuthema kakamwe kupasa mbiri Yahova kubulukira mu kampanya yakupambulika! Mu nthanda ya Malimwe, tinadzacita khundu mu kugawira tratado ipswa pa dziko yonsene, ya nsolo wakuti: “Tinagumana Kupi Matawiro A Mibvundzo Mikulu Thangwi Ya Umaso?” Tratado ineyi isawangisa anyakuleri kuti aphatisire Bhibhlya toera kugumana matawiro, pontho isafokotoza kuti site jw.org inaaphedza tani.

2. Tinakwanisa tani kuphedzera kubvekeswa kwa ‘fala ikulu yakusimba’ Yahova mu nthanda ya Malimwe?

² Fala Ikulu Yakusimba: Toera kuphedza amwazi mphangwa kuthimizira utumiki wawo, masasanyiro akupambulika acitwa kwa onsene anafuna kutumikira ninga apainiya akuphedza mu nthanda ya Malimwe. Mu nthanda ineyi, amwazi mphangwa akubatizwa, anadzatawiriswa kutumikira ninga apainiya akuphedza mbapereka midzidzi 30 pa nthanda. Nakuti nthanda ya Malimwe iri na ntsiku zixanu za Cixanu, Masabudu maxanu, na Madimingu maxanu, amwazi mphangwa azinji anaphata basa kudziko, peno ale anaenda kuxikola pakati pa sumana, anakwanisa kutumikira ninga apainiya akuphedza. Khala muli na nyakupfundza Bhibhlya wakuthambaruka, peno mwana wakuti asafuna kukhala m’mwazi mphangwa, longani na m’bveranisi wa akulu a mpingo mwakukhonda dembuka. Pinadzakhala pyakutsandzayisa kakamwe kucita khundu na anthu anewa ninga amwazi mphangwa mu nthanda ineyi yakupambulika! Ngakhale kuti apainiya azinji a ndzidzi onsene asabulusa ferya mu nthanda ya Malimwe angamala kukwanirisa midzidzi inaphembwa iwo pacaka, iwo anakwanisa kucita masasanyiro a ndandanda yawo toera kucita khundu mwakukwana mu kampanya ineyi yakupambulika. Uno ndi ndzidzi toera mabanja acedze kuti anakwanisa tani kuphedzera kubvekeswa kwa ‘fala ikulu yakusimba’ Yahova mu nthanda ya Malimwe.​—Esd. 3:11; Mis. 15:22.

3. Tisadikhiranji mu kampanya ineyi yakupambulika?

³ Ngakhale kuti tacita kale khundu m’makampanya ninga anewa mu pyaka pya nduli, tisadikhira kuti kampanya inafuna kudza inadzasiyana na makampanya onsene. Kodi tinakwanisa kukhala na kuthimizirika kupswa kwa midzidzi, amwazi mphangwa, na apainiya akuphedza mu nthanda ya Malimwe? Tisadikhira kuti munamalisa ife caka ca basa ca 2014, Yahova anadzapasa nkhombo kuwangisira kwa atumiki ace pa dziko yonsene toera kucitisa nthanda ya Malimwe kukhala nthanda ikulu kakamwe yakupereka umboni kupiringana nthanda zonsene m’mbiri ya basa yathu!​—Mat. 24:14.