Ndi Api Maonekero Anga Kuna Yahova?
1. Kodi Bhibhlya yalandana tani na supeyu?
1 Kodi imwe musayang’ana kazinji kene pa supeyu? Azinji a ife tisacita pyenepi ntsiku zonsene, thangwi pyenepi pisatiphedza kuona makhundu a maonekero athu akuti tisafunika kuasasanyira. Bhibhlya isalandaniswa na supeyu. Kuleri Mafala a Mulungu kusatiphedza kuona uunthu wathu wankati, ninga munationera Yahova. (1 Sam. 16:7; Tgo. 1:22-24) Mafala a Mulungu anakwanisa ‘kupangiza manyerezero na pifuno pya ntima.’ (Aheb. 4:12) Kodi kuleri Bhibhlya ntsiku zonsene na kunyerezera mwacidikhodikho pinaleri ife kunatiphedza tani toera kuona makhundu akuti tisafunika kuasasanyira toera kukhala amwazi mphangwa akuphindulisa?—Sal. 1:1-3.
2. Kodi Bhibhlya inatiphedza tani toera kudingika tekhene?
2 Phatisirani Bhibhlya Ninga Supeyu: Mbiri za atumiki akukhulupirika a Yahova zisatipfundzisa kuti ndi makhaliro api anakomerwa na Yahova. Mwacitsandzo, Dhavidhi apangiza kuti akhalemedza dzina ya Mulungu. (1 Sam. 17:45, 46) Mwacipapo, Izaiya aperekeka toera kumwaza mphangwa mu cisa cakunentsa. (Iza. 6:8, 9) Ufuni ukulu wa Yezu kuna Babace wakudzulu wancitisa kuona utumiki ninga pfuli ya ciwangiso na kutsandzaya, mbuto mwakuona basa ineyi ninga ntolo. (Jwau 4:34) Akristu a pyaka dzana yakutoma amwaza mphangwa mwaphinga, anyindira Yahova, pontho akhali akutonga kukhonda bwerera nduli. (Mach. 5:41, 42; 2 Akor. 4:1; 2 Tim. 4:17) Kunyerezera mwacidikhodikho pitsandzo pyenepi, kusatiphedza kudingika tekhene na cifuno ca kusasanyira ntundu wa basa yathu yakucena.
3. Thangwi yanji nee tisafunika kunyinyirika toera kucita macinjo akufunika?
3 Sasanyirani Madodo: Mwandimomwene, si pyadidi tayu kuyang’ana pa supeyu, mbatipwaza madodo anaona ife. Tinakwanisa kuphemba Yahova toera atiphedze kudingika tekhene mwakulinganira, na kutiphedza toera kucita macinjo akufunika. (Sal. 139:23, 24; Luka 11:13) Nakuti ndzidzi udasala ngung’ono, mbwenye umaso wa anthu uli pangozwi, nee tisafunika kunyinyirika toera kucita macinjo akufunika.—1 Akor. 7:29; 1 Tim. 4:16.
4. Ninji pinacitika kuna munthu anayang’ana mwacidikhodikho Mafala a Mulungu, mbacita pinthu mwakubverana na pinaona iye?
4 Uunthu wathu wankati—pinaona Yahova mwa ife—ndi pyakufunika kakamwe kupiringana maonekero athu akunja. (1 Ped. 3:3, 4) Ninji pinacitika kuna munthu anayang’ana mwacidikhodikho Mafala a Mulungu, mbacita pinthu mwakubverana na pinaona iye? Iye nee anakhala ‘nyakubva wakuduwala pyonsene, mbwenye anacita pyonsene pidabva iye, anadzakhala nyakutsandzaya pa kupicita.’ (Tgo. 1:25) Inde, ife tinadzakhala atumiki akutsandzaya na akuphindulisa, thangwi ‘ndife ninga supeyu inapangiza mbiri ya Yahova.’—2 Akor. 3:18.