Pyaka Dzana Pya Kudziwisa Umambo!
1. Kodi atumiki a Yahova awangiswa toera kucitanji cifupi na pyaka dzana pidapita?
1 “Onani, Mambo akutonga! Imwe ndimwe anyakumwaza mphangwa zace. Natenepa, dziwisani, dziwisani, dziwisani Mambo na umambo wace.” Na mafala anewa akuwangisa kakamwe adalongwa na M’bale Rutherford cifupi na pyaka dzana nduli, atumiki a Yahova awangiswa toera kudziwisa mphangwa za Umambo kutali kakamwe m’mbuto zizinji. Ndi pyenepi pidacita ife! Ninga Akristu a pyaka dzana yakutoma, ife tamwaza mphangwa zadidi za Umambo “kuli pinthu pyonsene pidachitwa pantsi pa thambo.” (Akol. 1:23) Tingayang’ana nduli mu pyaka dzana pidapita, ninji pidacita ife toera kudziwisa Umambo wa Mulungu? Tinapitiriza tani kudziwisa Umambo munakwanirisa ife pyaka 100 pya kukhazikiswa kwa Umambo?
2. Kodi mabukhu athu asaphedzera tani Umambo wa Mulungu?
2 Kuyang’ana Nduli: Mu pyaka pizinji, mabukhu athu asaphedzera Umambo wa Mulungu. Kutomera mu caka 1939 revista yathu yakufunika kakamwe iri na nsolo uyu: Ncenjezi Wakudziwisa Umambo Wa Yahova. Mwakubwereza-bwereza, revista ineyi isalonga pya Umambo na pinafuna kudzakwanirisa iwo. Revista ya Despertai!, isagomezerambo kuti Umambo wa Mulungu ndiwo basi unafuna kubweresa cidikhiro cadidi kwa anthu. Ndi pyakuthema kakamwe kuti marevista anewa ndiwo basi anathumburuzwa kakamwe mbagawirwa pa dziko yonsene!—Apok. 14:6.
3. Ndi zipi njira zingasi zidaphatisira ife toera kudziwisa Umambo?
3 Atumiki a Yahova asaphatisira njira zakusiyana-siyana toera kudziwisa Umambo. Pidatoma ife kwene, tikhaphatisira miotokala ya mitcini yakugaluza mafala, nyumba ya mphepo ya radyo, na magramafone a m’manja. Njira zenezi zatiphedza toera kumwaza mphangwa zadidi kwa anthu azinji pa ndzidzi wakuti amwazi a mphangwa za Umambo akhali akucepa kakamwe. (Sal. 19:4) Mu pyaka pyacincino, tisabulusa mphangwa mu site jw.org, natenepa tisamwaza Umambo kwa pikwi na pikwi pya anthu—kuphatanizambo ale anakhala m’madziko akuti basa yathu isakhondeswa.
4. Ndi masasanyiro api akupambulika adacita ife?
4 Atumiki a Yahova asacitambo masasanyiro akupambulika toera kumwaza mphangwa za Umambo. Mwacitsandzo, kutomera pakati pa pyaka 1990, tawangisira toera kuthimizira basa yathu ya nyumba na nyumba mu kupereka umboni m’mbuto zapakweca, mbuto zinakoyerwa miotokala, na mbuto zamalonda. Cincino, tacita masasanyiro akupambulika toera kupereka umboni m’mizinda mikulu pa dziko yonsene. Kusiyapo pyenepi, mipingo mizinji ikucita khundu mu kupereka umboni mu pisa pyawo mu kuphatisira meza za mabukhu na makarinya akuti asaikhwa pa m’mbuto zinapita na anthu azinji. Mbwenye basa ya nyumba na nyumba isapitiriza ninga njira yathu yakufunika kakamwe yakumwaza mphangwa za Umambo.—Mach. 20:20.
5. Kodi caka cipswa ca basa cinadzapereka miyai yanji kwa azinji a ife?
5 Kuyang’ana Kutsogolo: Na kutoma kwa caka cipswa ca basa mu nthanda ya Nyenzi, azinji anadzatoma kutumikira ninga apainiya a ndzidzi onsene. Munakwanisambo kukhala m’bodzi wawo? Khala nkhabe, munakwanisa kutumikira ninga mpainiya wakuphedza? Khala munakwanisa kutumikira ninga mpainiya peno nkhabe, Yahova anadzakupasani nkhombo thangwi ya kuwangisira konsene kunacita imwe toera kucita khundu mwakukwana m’basa yakudziwisa Umambo.—Mal. 3:10.
6. Thangwi yanji nthanda ya Malandalupya ya caka 2014 inadzakhala yakupambulika?
6 Nthanda ya Malandalupya ya caka 2014 inadzakwanirisa pyaka 100 pya kukhazikiswa kwa Umambo. Mphyakuthema kakamwe kuti revista ya Ncenjezi ya anthu onsene ya nthanda ineyi inadzagomezera pya Umambo wa Mulungu. Thangwi yanji nkhabe kuwangisira toera kugawira revista ineyi kwa anthu azinji kakamwe? Munayanga’ana ife ntsogolo, tendeni tonsene tipitirize ‘kumwaza mphangwa zadidi za Umambo wa Mulungu’ kwa anthu onsene anafuna kudzatibvesera.—Mach. 8:12.