Ndiri Wakutsandzaya Thangwi ya Kutumikira Yahova

Mu caka ca 1959, pacitwa cidziwiso pa Bheteli ya Kanadha, kuti pakhafunika abale akuperekeka toera akatumikire ku Bheteli ya ku Afrika do Sul thangwi kukhafunika kuikhwa makina akudhinda mabukhu. Ine ndalembesa dzina yanga, pontho ndatsandzaya kakamwe pidasankhulwa ine. Pontho m’bale Dennis Leech, Bill McLellan na Ken Nordin akuti akhatumikira pa Bheteli ya Kanadha asankhulwambo toera kuenda katumikira ku Bheteli ya ku Afrika do Sul. Ife tapangwa kuti mbatidakhala kweneko mu ndzidzi uzinji.

Ine ndaligariri mama mbandimpanga kuti: “Mama, ndisafuna kukudziwisani kuti ndiri kuenda ku Afrika do Sul.” Mama akhali wakumatama, mbwenye iye akhali na cikhulupiro cakuwanga na uxamwali wakuwanga na Yahova. Natenepa pidandziwisa ine, iye nee alonga pinthu pizinji, mbwenye ndikhadziwa kuti iye akhaphedzera cisankhulo canga. Maseze baba na mama atsukwala thangwi yakuti mbidakhala kutali na iwo, iwo aphedzera cisankhulo canga.

INE NDAENDA KU AFRIKA DO SUL

Ine pabodzi na andzanga atatu pakutoma taenda ku Bheteli ya ku Brooklyn, kweneko ife tamala miyezi mitatu mbatipfundziswa kuphata basa na makina akudhinda mabukhu. Buluka penepo ife takwira navio ya mitolo mpaka ku Cidade de Cabo, Afrika do Sul. Pa ndzidzi unoyu ine ndikhali na pyaka 20 pyakubalwa. Pidafika ife ku Cidade de Cabo, namaulo takwira komboyo mbatienda ku Johannesburg. Mbuto yakutoma idalimira ife ikhali mu nzinda wa Karoo, nzinda unoyu ukhali na pfumbi, pontho ukhapisa. Ife tafungula majanela mbatiyang’ana mbuto ineyi mwakudzumatirwa. Pidaona ife mbuto ineyi, tadzudzumika kakamwe kuti tinakwanisa tani kucita basa idapaswa ife. Mukupita kwa ndzidzi, pidaenda ife pontho kaona nzinda unoyu tadzindikira kuti ukhali wakutsandzayisa kakamwe.

Mu pyaka pingasi ine ndikhaphata basa na makina akudzumatirisa kakamwe akhacemerwa linotipo, akuti tikhaaphatisira toera kudhinda marevista a Ncenjezi na Lamukani! Pa ndzidzi unoyu, Bheteli ya ku Afrika do Sul ikhadhinda marevista mu pilongero pizinji pya dziko ineyi kuphatanizambo madziko mazinji a mu Afrika. Ife tikhali akutsandzaya thangwi makina anewa akudhinda mabukhu akhaphatisirwa kakamwe.

Mukupita kwa ndzidzi, ine ndaphata basa mu Escritório da Fábrica yakuti ikhatsalakana basa yakudhindha, kutumiza mabukhu na kuthumburuza. Ine ndikhali na basa izinji, mbwenye ndikhali wakutsandzaya kakamwe.

KUMANGA BANJA NA KUPASWA BASA IPSWA

Mu caka ca 1968, ine ndamanga banja na mpainiya anacemerwa Laura Bowen wakuti akhakhala cifupi na Bheteli. Mu ndzidzi unoyu, iye akhaphatambo basa pa Bheteli mu dhepartamentu yakuthumburuza. Mbwenye mu ndzidzi unoyu, ale anamanga banja nee akhatawiriswa kukhala pa Bheteli, natenepa ife tacinjwa mbatienda katumikira ninga apainiya akupambulika. Ine ndikhali wakudzudzumika pang’ono. Thangwi ine ndikhadamala pyaka 10 pa Bheteli, pontho ndikhadadzolowera kupaswa cakudya na mbuto yakugona, natenepa ndikhali wakudzudzumika kuti mbidatsalakana tani umaso wathu na kobiri yakucepa ikhapaswa ife ninga apainiya akupambulika. Ife tikhapaswa marandi 25 miyezi yonsene, akuti mu ndzidzi unoyu ndikhaacinja na 35 dólar amerikano. Mbwenye ife tikhapaswa kobiri ineyi basi ene tingakwanirisa maora akhaphembwa ife, maulendo akubwereza na mabukhu akhagawira ife. Ife tikhafunika kuphatisira kobiri ineyi toera kulipa nyumba ikhakhala ife, kugula cakudya, passagem, kugula mitombwe na pinthu pinango.

Ife tatumizwa toera kaphata basa pabodzi na nsoka ukhagumanika cifupi na nzinda wa Durban, ku Oceano Índico. Mbuto ineyi ikhagumanika anthu azinji a ku Indiya, pontho azinji mwa iwo akhadaenda kweneku toera kaphata basa mu Fábrica ya xuka mu caka ca 1875. Maseze mu ndzidzi unoyu akhacita mabasa anango, iwo akhapitiriza na misambo yawo, yakuti ikhaphatanizambo njira ikhaphika iwo pyakudya. Kusiyapo pyenepi, pikhali pyakukhonda nentsa kumwaza mphangwa kuna iwo thangwi akhalonga Cingerezi.

Apainiya akupambulika akhaphembwa toera kupereka maora 150 pa mwezi, natenepa ine na Laura tacita masasanyiro toera kucita maora 6 pa ntsiku yakutoma. Ife nee tikhali na maulendo akubwereza na mapfundziro a Bhibhlya, natenepa tikhafunika kucita maora anewa 6 mukumwaza mphangwa nyumba na nyumba. Mu ndzidzi ukhamwaza ife mphangwa, ine ndayang’ana rolojo yanga mbandiona kuti tikhadamwaza mphangwa basi ene 40 minutu. Natenepa ndabvundzika, kodi tinakwanisadi kutumikira ninga apainiya akupambulika?

Mwakukhonda dembuka, ife tacita masasanyiro. Ntsiku zonsene, ife tikhaphika cakudya, pontho tikhacita sopa peno kafee mbatimuikha mu termo. Tingafuna kupuma, tikhatsamisa karu yathu pa nthundzi, pontho midzidzi inango tikhazungulirwa na ana akubalika kakamwe Aciindiya mbatiyang’ana thangwi iwo akhadzumatirwa na ife. Pidapita ntsiku zingasi, ife tadzindikira kuti tingaphata basa maora mawiri peno matatu mbatipuma tisaona kuti ntsiku isamala mwakucimbiza kakamwe.

Ife tikhali akutsandzaya kakamwe kupfundzisa undimomwene wa Bhibhlya anthu a mu cisa ceneci. Ife taona kuti anthu anewa akhali acilemedzo kakamwe, akupereka takhuta, pontho akhafuna Mulungu. Aindu azinji akhakomerwa na mphangwa zikhamwaza ife. Iwo akhafuna kakamwe kupfundza pya Yahova, Yezu, Bhibhlya, dziko ipswa ya ntendere na cidikhiro cakulamuswa kwa anthu muli akufa. Pakumala kwa caka, ife tikhali na anyakupfundza a Bhibhlya akukwana 20. Ntsiku zonsene tikhadya pabodzi na banja ibodzi ikhapfundzisa ife Bhibhlya. Ife tikhali akutsandzaya kakamwe.

Mwakukhonda dembuka, ine na nkazanga ndaphembwa toera tiende katumikira ninga muyang’aniri wa cisa mu cisa cakubalika cikhagumanika nkhundu-nkhundu mwa Oceano Índico. Masumana onsene ife tikhafikira m’manyumba mwa abale akhacedzera ife, pontho tikhamwaza mphangwa pabodzi na abale na alongo toera kuaawangisa. Iwo akhatitsalakana ninga anthu a pabanja pawo, pontho tikhakomerwa kusendzeka na anawo pabodzi na pifuyo pyawo. Ife tacita basa ineyi mu pyaka piwiri, buluka penepo taligarirwi na abale a ku Bhetheli. Iwo alonga: “Tisakufunani toera mubwerere pontho ku Bheteli.” Ine ndatawira: “Ife tiri kukomerwa kakamwe na basa inacita ife kuno.” Mbwenye ife tikhali dzololo toera kucita basa yonsene inapaswa ife.

KUBWERERA KU BHETELI YA KU AFRIKA DO SUL

Pidafika ife ku Bheteli ine ndapangwa toera ndikaphate basa mu Dhepartamentu ya Basa, pontho mu dhepartamentu ineyi ine ndikhali na mwai wakuphata basa pabodzi na abale azinji a maluso na akukola mwauzimu. Mu ndzidzi unoyu, muyang’aniri wa cisa angamala kucedzera mpingo, iye akhatumiza relatório ku Bheteli. Buluka penepo, Dhepartamentu ya Basa ikhatumiza tsamba mwakubverana na relatório idatumiza muyang’aniri wa cisa. Matsamba anewa akhawangisa abale, pontho akhapereka pitsogolero kuna iwo. Munthu akhalemba matsamba anewa akhali na basa kakamwe thangwi iye akhafunika kuthumburuza Xhosa, Zulu na pilongero pinango pya mu Afrika kubulukira mu Cingerezi, pontho akhafunika kuthumburuza Cingerezi kubulukira mu pilongero pinango pya mu Afrika. Ine ndikhapereka takhuta thangwi ya mabasa akhacita athumburuzi anewa, pontho pikhandiphedza toera kubvesesa nyatwa zikhathimbana na abale na alongo athu a mu Afrika.

Pa ndzidzi unoyu, utongi wa ku Afrika do Sul ukhakulumiza anthu toera kusankhulana madzindza. Natenepa anthu a ntundu unango nee akhafunika kukhala pa cisa cibodzi cene na anthu a ntundu unango, pontho iwo nee akhacedza pabodzi. Abale na alongo athu akupswipa akhalonga cilongero cawo, akhamwaza mphangwa mu cilongero cawo, pontho akhasonkhana m’mipingo ya cilongero cawo.

Ine nee ndikhadziwa abale na alongo azinji akupswipa, thangwi mpingo wathu ukhali Wacingerezi. Buluka penepo, ine ndikhali na mwai wakupfundza makhaliro na misambo ya mu Afrika. Pyenepi pyandiphedza toera kudziwa pinentso pikhathimbana na abale na alongo thangwi ya misambo na pikhulupiro pya mauphemberi. Iwo akhali acipapo kakamwe thangwi akhakhonda kucita pinthu pyakuti nee pikhabverana na malemba, pontho akhapirira kutcingwa na acibale, kuphatanizambo anthu a pa cisa thangwi yakukhonda kucita pinthu pyamizimu. M’mbuto zinango anthu akhali akutcerenga kakamwe. Azinji nee akhadapfundza kakamwe kuxikola, mbwenye iwo akhalemedza Bhibhlya.

Ine ndakhala na mwai wakuphedzera kutongwa kwa miseru inalonga pya ufulu wakulambira na kukhonda kucita khundu ya ndale za dziko. Pikhali pyakuwangisa cikhulupiro kakamwe kuona cipapo na cikhulupiro ca aphale na atsikana a Mboni za Yahova akuti akhabuluswa kuxikola thangwi yakukhonda kucita maphembero na kuimba hino nacional.

Abale na alongo athimbanambo na pinentso pinango mu dziko ing’ono ya mu Afrika yakuti cincino isacemerwa Eswatini. Pidafa Mambo Sobhuza II anthu onsene apangwa toera acite misambo inango yaciriro thangwi ya kufa kwa mambo unoyu. Amuna akhafunika kupala tsisi yawo, akazi akhafunika kucinga tsisi yawo. Abale na alongo azinji akhatcingwa thangwi yakukhonda kucita khundu m’misambo ineyi. Kukhulupirika kwawo kuna Yahova kwatitsandzayisa kakamwe. Ife tapfundza pizinji thangwi yakukhulupirika na kupirira kwa abale na alongo anewa, pontho pyenepi pyawangisa cikhulupiro cathu.

NDATOMA PONTHO KUPHATA BASA YAKUDHINDA MABUKHU

Mu caka ca 1981, ndapaswa basa yakudhindha mabukhu mukuphatisira komputadhori. Ndzidzi unoyu ukhali wakutsandzayisa kakamwe. Njira zikhaphatisirwa toera kudhinda mabukhu zikhadacinja kakamwe. Anyakugulisa malonda a pa cisa apereka makina akudhinda kuna Bheteli toera tiyesere kuaphatisira mwakukhonda lipa. Pyenepi pyaticitisa kuti tibuluse makina mapfemba akale akhali na ife a ntundu wa linotipo mbatiikha makina mapswa maxanu adapaswa ife. Pyenepi pyaphedza toera basa yakudhinda mabukhu icitwe mwakucimbiza kakamwe.

Makomputadhori atiphedza toera kuphatisira njira zipswa zakucita mabukhu zinacemerwa MEPS yakuti ndi Sistema de Editoração Eletrônica Multilíngue. Tekinolojiya yathambaruka kakamwe kutomera mu ndzidzi udabuluka ine ku Bheteli ya ku Kanadha pabodzi na andzanga atatu mbatienda kaphata basa ku Bheteli ya Afrika do Sul. (Iza. 60:17) Mbwenye tonsene mu unai wathu tamanga banja na apainiya adidi akuti asafuna kakamwe Yahova. Ine na Bill tikhapitiriza kutumikira pa Bheteli. Mbwenye Ken na Dennis akhali na ana, pontho akhakhala cifupi na Bheteli.

Basa yadzathimizirika kakamwe pa Bheteli. Mabukhu akhathumburuzwa na kudhindwa mu pilongero pizinji, pontho akhatumizwa m’mabheteli anango. Na thangwi ineyi, pakhafunika kumangwa nyumba inango toera kuthimizira Bheteli. Abale amanga nyumba ineyi ku mbuto yakubalika kakamwe cifupi na Johannesburg, pontho yanagurariwi mu caka ca 1987. Pikhali pyakutsandzayisa kakamwe kuphedzera kuthimizirwa kwa Bheteli ya ku Afrika do Sul na kutumikira ninga m’bodzi wa Komiti ya Filiali mu pyaka pizinji.

BASA INANGO IPSWA

Ife tadzumatirwa kakamwe mu caka ca 2001 pidacemerwa ine toera kuenda katumikira ninga m’bodzi wa Komiti ya Filiali ya ku Estados Unidos yakuti ikhadamala kwene kukhazikiswa. Maseze ife tatsukwala thangwi yakusiya axamwali na basa ikhacita ife ku Afrika do Sul, ife tatsandzaya kakamwe thangwi yakutoma umaso upswa mbatikhala pabodzi na banja ya Bheteli ya ku Estados Unidos.

Mbwenye ife tikhadzudzumika thangwi mbatidakhala kutali na mai wace Laura wakuti akhaduwala. Ife nee mbidakwanisa kum’phedza munjira zizinji bulukira ku Nova York, mbwenye abale ace Laura atatu aperekeka toera kum’phedza m’makhundu onsene. Iwo alonga: “Ife nee tinakwanisa kutumikira m’basa ya ndzidzi onsene, mbwenye tinakwanisa kuphedza mama toera imwe mupitirize m’basa ya ndzidzi onsene.” Ife tisapereka takhuta kakamwe kuna iwo.

Munjira ibodzi ene, m’bale wanga na nkazace akuti asakhala ku Toronto mu dziko ya Kanadha, aperekekambo toera kuphedza mai wanga wakuti ndi nzice. Mu ndzidzi unoyu, mai wanga akhakhala na iwo mu pyaka pyakupiringana 20. Ife tisapereka takhuta kakamwe thangwi ya ufuni wawo na citsalakano cikhapangiza iwo kuna mama mpaka kufa kwace. Ndi mwai ukulu kakamwe kukhala na acibale akuti akhawangisira kakamwe toera kuphedza anyakubala athu akuti akhathimbana na pinentso.

Basa yakutoma ikhacita ine ku Estados Unidos ndi yakudhinda mabukhu, yakuti mu ndzidzi unoyu ikhacitwa munjira yakukhonda nentsa. Cincino, ine ndisaphata basa mu Departamento de Compras. Ndi pyakutsandzayisa kakamwe kutumikira pa Bheteli ino ikulu mu pyaka 20 yakuti iri na mabhetelita akupiringana 5.000 na makomiyuta akukwana 2.000.

Mu pyaka 60 nduli, ine nee ndikhadikira kuti mbandidacita mabasa anewa onsene. Laura andiphedza kakamwe mu pyaka pyenepi pyonsene. Umaso wanga ndi wakutsandzayisa kakamwe. Ife tisakomerwa na mabasa onsene anapaswa ife na anthu onsene anaphata na ife basa, kuphatanizambo ale adadziwana na ife m’mabheteli mazinji adacedzera ife m’mbuto zakusiyana-siyana pa dziko yonsene. Nakuti cincino ndiri na pyaka pyakupiringana 80 pyakubalwa, nee ndisacitabve mabasa mazinji thangwi pali na abale akuti ndi aphale adapfundziswa toera kucita mabasa anewa.

Nyamasalmo alemba: ‘Yakutsandzaya ndi dzindza yakuti Mulungu wawo ndi Yahova.’ (Masal. 33:12) Mafala anewa ndi andimomwene. Ine ndiri wakutsandzaya kakamwe thangwi yakutumikira Yahova pabodzi na atumiki ace akutsandzaya.