Phatisirani Mwadidi Mafoto

M’mabukhu athu muli na mafoto mazinji akuti asatipfundzisa pinthu pyakufunika. Mphapo munaphatisira tani mwadidi mafoto anewa pakupfundza?

• Mbamudzati kuleri nsolo, tomani na kuona mafoto. Panango iwo anakucitisani kukhala na cifuno cakudziwa pizinji. Mwacitsandzo, mungaona cakudya cadidi, musakhala na cifuno toera kucidya. Munjira ibodzi ene, kuona mafoto “kunaticitisa kufuna kudziwa pizinji.” Natenepa bvundzikani: ‘Ninji pinaona ine’ m’mafoto anewa?—Amosi 7:7, 8.

• Mu ndzidzi unaleri imwe, bvundzikani kuti thangwi yanji mafoto anewa aikhwa mu nsolo unoyu. Pingakwanisika lerini mafala anafokotoza foto. Nyerezerani kuti mafoto anewa asabverana tani na nsolo, pontho mwapfundzanji nawo.

• Mungamala kuleri, phatisirani mafoto toera kukumbuka ntsonga zakufunika. Buluka penepo, kumbukani foto ibodzi na ibodzi na mphangwa zidapfundza imwe na mafoto anewa.

• Musaona tani kucita pyenepi mu revista ino? Onani pontho mafoto, buluka penepo yeserani kukumbuka ntsonga zidapfundza imwe.