Phatisirani Mwadidi Malemba Anabverana na Mavesi Anango

Malemba anabverana na mavesi anango anagumanika m’Bhibhlya ya Dziko Ipswa asapangiza kuti Bhibhlya isalonga pibodzi pyene. Iwo asapangiza mavesi analonga pinthu pibodzi pyene, pontho asalonga mphangwa zakuthimizirika. Toera kugumana malemba anabverana na mavesi anango, sakani letra ing’ono inagumanika patsogolo pa mafala anango. Buluka penepo, khala muli kuphatisira Bhibhlya yakudhindwa, sakani letra ibodzi ene pakati pa tsamba toera kugumana mavesi anabverana na mphangwa zenezi. Mbwenye khala muli kuphatisira saiti jw.org peno aplikativo JW Library^®, pfinyani letra toera kuona mavesi analonga mphangwa zibodzi zene.

Malemba anabverana na mavesi anango, anakwanisa kukuphedzani toera kugumana mphangwa zakusiyana-siyana. Mwacitsandzo, imwe munakwanisa kugumana:

Mphangwa zakulandana: Imwe munakwanisa kugumana mphangwa zibodzi zene, mbwenye m’mabukhu anango a Bhibhlya. Mwacitsandzo, onani 2 Samweli 24:1 na 1 Kronika 21:1.

Mafala adalongwa kale: Imwe munagumana mafala peno fala yakuti yalembwa kale m’mbuto inango. Mwacitsandzo, onani Mateu 4:4 na Dheuteronomyo 8:3.

Profesiya na kukwanirisika kwayo: Imwe munagumana vesi inapangiza profesiya na vesi inango inapangiza kukwanirisika kwayo. Mwacitsandzo, onani Mateu 21:5 na Zakariya 9:9.