Lekani Kudembuka Kuphedza Anthu Anafuna Kubva Mphangwa Zadidi

1. Ndi mabvero api anakhala na anthu tingaamwazira mphangwa? (Mabasa 13:47, 48; 16:14, 15)

MU NDZIDZI wa apostolo, anthu azinji atawira undimomwene pidabva iwo mphangwa zadidi. (Lerini Mabasa 13:47, 48; 16:14, 15.) Munjira ibodzi ene, anthu azinji lero asatsandzaya angabva mphangwa zadidi pa ulendo wakutoma. Maseze anango nee asapangiza cifuno pakutoma, mbwenye mukupita kwa ndzidzi asakhala na cifuno cakutawira mphangwa zadidi. Tinacitanji tingagumana anthu akuti ‘asafuna kutawira undimomwene’?

2. Thangwi yanji basa yakucita anyakupfundza yalandaniswa na basa inacita nyakulima?

² Basa yakucita anyakupfundza yalandana na basa inacita munthu analima. Iye angaona kuti muti uli na misapo yakutokota, asafunika kuitcoda. Mbwenye iye asapitiriza kulima na kutsalakana miti inango yakuti iri na misapo yakuti idzati kutokota. Munjira ibodzi ene, tingagumana munthu anafuna kubva mphangwa zadidi, tisafunika kumphedza mwakucimbiza toera akhale nyakupfundza wa Kristu. Mbwenye tisafunikambo kupitiriza kuphedza ale akuti asakwata ndzidzi toera kubvesesa kufunika kwa pinthu pinapfundza iwo. (Juw. 4:35, 36) Tingabvesesa khala munthu ali na cifuno peno nkhabe, nee pinanentsa kugumana njira yakumphedza. Mu nsolo uno tinapfundza kuti tinaphedza tani anthu anabva mphangwa zadidi pa ulendo wakutoma toera apitirize kuthambaruka.

TINAPHEDZA TANI ANTHU AKUTI ASAFUNA KUBVA MPHANGWA ZADIDI?

3. Tinacitanji tingagumana munthu anapangiza cifuno pakumwaza mphangwa? (1 Akorinto 9:26)

³ Pakumwaza mphangwa, tingagumana munthu anapangiza cifuno tisafunika kumphedza mwakucimbiza toera apfundze thangwi ya Yahova mbakhala na uxamwali wakuwanga na iye. Natenepa, mungacedza na munthu pa ulendo wakutoma, mpangeni pya pfundziro ya Bhibhlya, pontho ncemereni toera agumanike pa misonkhano yathu.—Lerini 1 Akorinto 9:26.

4. Longani pinthu pidacitika na ntsikana wakuti akhafuna kupfundza Bhibhlya.

⁴ Tomesani pfundziro ya Bhibhlya. Anthu anango anacedza na ife thangwi ya mphangwa zadidi, asakhala dzololo toera kupfundza Bhibhlya. Mwacitsandzo, ntsiku inango n’Cinai, ntsikana unango wa ku Canadá afendedzera cifupi karinya ikhali na mabukhu, mbakwata bhruxura Tsandzayani na Umaso Kwenda na Kwenda! Mulongo akhali pa karinya acedza na ntsikana unoyu thangwi ya bhruxura ineyi, mbampanga kuti anakwanisa kupfundza Bhibhlya mwakukhonda lipa. Ntsikana unoyu akomerwa na mphangwa zenezi, pontho apasirana numero ya ntokodzi. Mukupita kwa ndzidzi pa ntsiku ibodzi ene, ntsikana unoyu atumiza mphangwa kuna mulongo, mbambvundza thangwi ya pfundziro ya Bhibhlya. Pidambvundza mulongo khala pinakwanisika agumanikane pakumala kwa sumana, iye atawira: “Ndiye tani mangwana? Ine nee ndinakhala wakuphatika.” Iwo atoma kupfundza Bhibhlya n’Cixanu; pakumala kwa sumana ineyi, iye agumanika paulendo wace wakutoma pa misonkhano, pontho apitiriza kuthambaruka mwakucimbiza.

5. Midzidzi inango, tisafunika kucitanji mbatidzati kutomesa pfundziro ya Bhibhlya? (Onanimbo mafoto.)

⁵ Ndimomwene kuti nee ndi onsene anatawira kupfundza Bhibhlya mwakucimbiza ninga ntsikana unoyu. Midzidzi inango tisafunika kukulisa cifuno ca munthu. Tinacita pyenepi tingacedza mphangwa zakuti iye asakomerwa nazo. Tingakhala na makhaliro adidi, mbatipangiza kuti tisafuna anthu, tinakwanisa kutomesa pfundziro ya Bhibhlya mwakucimbiza. Mphapo, tisafunika kulonganji pakutomesa pfundziro ya Bhibhlya? Tacita mbvundzo unoyu kuna abale na alongo akusiyana-siyana akuti nee asanentseka toera kutomesa mapfundziro a Bhibhlya. Tendeni tione pinthu pidalonga iwo.

6. Tinacitanji toera munthu apitirize kukhala na cifuno ca kucedza na ife?

⁶ Abale na alongo anewa alonga kuti m’mbuto zinango pakulonga thangwi ya pfundziro ya Bhibhlya tisafunika kucalira kulonga mafala ninga awa: “Pfundziro,” “kursu ya Bhibhlya” peno “ine ndinakupfundzisa.” M’mbuto mwace, iwo adzindikira kuti mphyadidi kulonga mafala ninga awa: “Kucedza” na “kubvesesa Bhibhlya.” Toera munthu apitirize kucedza na imwe, munakwanisa kulonga mafala ninga awa: “Mphyakudzumisa kakamwe kuona kuti Bhibhlya, isatawira mibvundzo yakufunika mu umaso wathu,” peno “Bhibhlya, nee ndi yakufunika basi ene kuna anthu anaphembera, iyo isatipasambo uphungu wakuti usatiphedza ntsiku na ntsiku.” Tinakwanisa kulonga: “Imwe nee munabvunga ndzidzi uzinji toera kupfundza. Mu mphindi 10 peno 15, munapfundza pinthu pizinji pyakuti pinakuphedzani mu umaso wanu.” Toera tikhonde kudzudzumisa munthu, tisafunika kucalira kulonga mafala ninga awa: “Tisafunika kupfundza masumana onsene.”

7. Ndi mu ndzidzi upi wakuti anango anabvesesa undimomwene unapfundza iwo? (1 Akorinto 14:23-25)

⁷ Ncemereni toera agumanike pa misonkhano. Mu ntsiku za mpostolo Paulu, panango anthu anango akhabvesesa undimomwene ukhapfundza iwo angagumanika pa misonkhano. (Lerini 1 Akorinto 14:23-25.) Pyenepi pisacitikambo lero. Azinji mwa anyakupfundza Bhibhlya asathambaruka mwakucimbiza angagumanika pa misonkhano. Ndi ndzidzi upi wakuthema toera kucemera munthu agumanike pa misonkhano? Bukhu Tsandzayani na Umaso Kwenda na Kwenda! iri na ncemerero pa nsolo 10. Mbwenye nee musafunika kudikhira kufika pa nsolo unoyu toera kucemera munthu kuti agumanike pa misonkhano. Mungacedza na munthu paulendo wakutoma, munakwanisa kuncemera toera agumanike pa misonkhano ya kumala kwa sumana. Cedzani naye thangwi ya nsolo wa nkhani ya pakweca peno mphangwa zinafuna kupfundzwa pa Pfundziro ya Ncenjezi.

8. Tisafunika kulonganji tingacemera munthu toera agumanike pa misonkhano? (Izaiya 54:13)

⁸ Mungacemera munthu adapangiza cifuno, nfokotozereni kuti misonkhano yathu ndi yakusiyana na pinaona iye m’mauphemberi anango. Nyakupfundza m’bodzi adagumanika pa ulendo wace wakutoma pa Pfundziro ya Ncenjezi, abvundza anampfundzisa Bhibhlya: “Nyakutsogolera asadziwa madzina a anthu onsene muno?” Mulongo ampanga kuti ninga tisadziwa madzina a anthu a pa banja pathu, ife tisawangisirambo toera kudziwa madzina a abale na alongo athu. Nyakupfundza alonga kuti nee ndi pyenepi pinacitika ku gereja kwace. Kusiyana kunango ndi cifuniro ca misonkhano yathu. (Lerini Izaiya 54:13.) Ife tisasonkhana toera kulambira Yahova, kupfundza thangwi ya iye na kuwangisana unango na ndzace. (Aheb. 2:12; 10:24, 25) Ndi thangwi yace misonkhano yathu isacitwa munjira yadidi, pontho nee tisatowezera misambo ya mauphemberi anango. (1 Akor. 14:40) Nyumba zathu za Umambo zacitwa munjira yakuti isatiphedza toera tipfundze mwadidi. Nakuti nee tisacita khundu ya dziko, ife nee tisaphedzera pinthu pya ndale, pontho nee tisasaka kudziwa maonero a anthu anango thangwi ya pinthu pyenepi. Pinakhala mwadidi kakamwe kupangiza nyakupfundza vidhyu yakuti Ninji Pinacitwa pa Nyumba ya Umambo? mbadzati kugumanika pa misonkhano yathu. Natenepa, iye anadziwa pinacitwa kweneko mbadzati kuendako.

9-10. Tisafunika kulonganji kuna anthu akuti asagopa kugumanika pa misonkhano yathu? (Onanimbo foto.)

⁹ Anthu anango asanyerezera kuti angagumanika pa misonkhano yathu, anakakamizwa toera akhale Mboni za Yahova. Natenepa, pangani munthu kuti tisatsandzaya kutambira anthu pa misonkhano yathu, pontho nee tisaakakamiza toera kulonga peno kucita pinthu mu ndzidzi wa misonkhano. Anthu onsene a pabanja pace, kuphatanizambo anapiana asatawiriswa kugumanika pa misonkhano yathu. Pa misonkhano yathu, anapiana asakhala pabodzi na anyakubala awo mbapfundza pabodzi. Natenepa, anyakubala asadziwa kuti anapiana awo ali na ani, pontho asapfundzanji. (Dheu. 31:12) Nee tisacita nsonkho-nsonkho. Ife tisatowezera pidalonga Yezu kuti: “Imwe mwapaswa pezi, pasanimbo pezi.” (Mat. 10:8) Mpangeni kuti nee asafunika kubvala nguwo zakudhula kakamwe toera agumanike pa misonkhano yathu. Mulungu, nee asaona maonekero a kunja mbwenye asaona muntima.—1 Sam. 16:7.

¹⁰ Munthu angagumanika pa misonkhano, citani pyonsene toera iye akhale wakusudzuka. Mpangizeni kuna akulu a mpingo na kuna abale na alongo anango. Iye angakhala wakutsandzaya, pyenepi pinancitisa toera agumanike pontho. Khala iye nee ali na Bhibhlya, onani pabodzi na iye Bhibhlya yanu. Kusiyapo pyenepi, mpangeni kuti musacitanji toera kubvesesa mwadidi nkhani yapakweca na Pfundziro ya Ncenjezi.

MUNAPHEDZA TANI MUNTHU ADATOMA KUPFUNDZA BHIBHLYA?

11. Munapangiza tani kuti musalemedza ndzidzi na ndandanda ya nyakupfundza wanu?

¹¹ Tisafunika kucitanji tingatomesa pfundziro ya Bhibhlya? Tisafunika kulemedza ndzidzi na ndandanda ya nyakupfundza. Mwacitsandzo, mungabverana ndzidzi ukwaniriseni, ngakhale kuti anthu anango mu cisa canu ali na nsambo wakudembuka. Kusiyapo pyenepi, panango mphyadidi kuti pfundziro yanu yakutoma ikhonde kumala ndzidzi uzinji. Amwazi mphangwa anango a maluso alonga kuti mphyadidi kumalisa pfundziro nakweru, ngakhale kuti nyakupfundza asafuna pitiriza kupfundza. Citani mphole-mphole toera mukhonde kulonga pinthu pizinji. Siyani nyakupfundza kuti akhale wakusudzuka toera kulonga.—Mis. 10:19.

12. Ndi cipi cifuniro cathu tingatoma kupfundza Bhibhlya na munthu?

¹² Mungapfundza Bhibhlya na munthu, cifuno canu ndi kumphedza toera adziwe Yahova na Yezu na kukulisa ufuni wace kuna iwo. Ife tinakwanisa kucita pyenepi tingapfundzisa pinalonga Bhibhlya, tayu maonero athu. (Mabasa 10:25, 26) Mpostolo Paulu acitambo pibodzi pyene. Pikhapfundzisa iye anthu, iye akhalonga pya Yezu Kristu kuti abwera pa dziko yapantsi toera kuphedza anthu kuti adziwe Yahova na kunfuna. (1 Akor. 2:1, 2) Paulu apangizambo kuti ndi pyakufunika kakamwe kuphedza anyakupfundza apswa toera kukulisa makhaliro adidi, akuti asalandaniswa na ouro, parata na miyala ya ntengo ukulu. (1 Akor. 3:11-15) Makhaliro anewa asaphataniza cikhulupiro, udziwisi, luso yakudzindikira na kugopa Yahova. (Mas. 19:9, 10; Mis. 3:13-15; 1 Ped. 1:7) Towezerani njira yakupfundzisa ya mpostolo Paulu, pontho phedzani anyakupfundza anu kuthimizira cikhulupiro cawo na kuwangisa uxamwali wawo na Yahova.—2 Akor. 1:24.

13. Tingapfundza Bhibhlya na munthu tinakhala tani wakupirira na wakulinganira? (2 Akorinto 10:4, 5) (Onanimbo foto.)

¹³ Pakupfundzisa, khalani wakupirira na wakulinganira ninga Yezu. Calirani kucita mibvundzo yakuti inacitisa nyakupfundza kutsukwala. Khala nyakupfundza nee ali kubvesesa khundu ibodzi, pitirizani na pfundziro, mungamala sakani ndzidzi unango toera kupfundza pontho khundu idakhonda iye kubvesesa. M’mbuto mwakukakamiza nyakupfundza kutawira pinapfundza iye, mpaseni ndzidzi toera undimomwene ukhuye ntima wace. (Juw. 16:12; Akol. 2:6, 7) Bhibhlya, isalandanisa pipfundziso pya uthambi na citsidzikizo cakuti tiri kuyesera kucifudza. (Lerini 2 Akorinto 10:4, 5) Mbatidzati kupokanya pinthu pinakhulupira nyakupfundza wathu, tisafunika kumphedza kunyindira Yahova ninga pakuthawira pace.—Mas. 91:9.

TINAPHEDZA TANI MUNTHU ADATOMA KUGUMANIKA PA MISONKHANO?

14. Tinatsalakana tani ale anatoma kwene kugumanika pa misonkhano yathu?

¹⁴ Yahova asafuna kuti tikhale akusowa tsankhulo na akukoma ntima kuna anthu onsene, mwakukhonda tsalakana misambo yawo, khala ali na kobiri peno nkhabe, peno cisa cidabalwa iwo. (Tiya. 2:1-4, 9) Mphapo, tinapangiza tani ufuni kuna ale anatoma kugumanika pa misonkhano?

15-16. Tinaphedza tani ale anagumanika pa ulendo wakutoma pa misonkhano yathu toera akhale akusudzuka?

¹⁵ Anango asagumanika pa misonkhano yathu toera kuona kuti tisapfundzanji, peno acemerwa na amwazi mphangwa a mpingo unango. Mungaona munthu adatoma kugumanika pa misonkhano, cedzani naye, pontho nciteni bweraniko. Mbwenye citani mphole-mphole toera kutsandzaya kwanu kukhonde kuntsukwalisa. Mphembeni toera akhale pabodzi na imwe, mbamuphatisira Bhibhlya na mabukhu pabodzi, peno phembani mabukhu toera kumpasa. Kusiyapo pyenepi, yeserani kubvesesa mabvero ace. Mamuna m’bodzi adagumanika pa misonkhano, apanga m’bale adantambira kuti ali wakutsukwala thangwi nee abvala mwadidi ninga anthu anango. M’bale amphedza toera akhale wakusudzuka, mbafokotoza kuti ife Mboni za Yahova, nee ndife anthu akupambulika. Mukupita kwa ndzidzi, mamuna unoyu abatizwa. Mbwenye iye cipo aduwala mafala adalonga m’bale. Pakulonga na mulendo misonkhano mbidzati kutoma peno ingamala, kumbukani kuti tisafunika kupangiza kuti tisantsalakana, mbwenye nee tisafunika kumpasa manyadzo.—1 Ped. 4:15.

¹⁶ Pali na njira inango yakuphedza ale anagumanika pa misonkhano yathu. Mungalonga pya anthu anakhonda kutumikira Yahova pakupereka mitawiro, peno pakucita makhundu, longani mwacilemedzo ndzidzi onsene. Calirani kulonga peno kucita pinthu pyakuti pinacitisa munthu kukhonda kugumanika pontho pa misonkhano. (Tito 2:8; 3:2) Mwacitsandzo, nee tisafunika kupokanya peno kulonga mwakuipa pinakhulupira anango. (2 Akor. 6:3) Abale anacita nkhani zapakweca, asafunika kucita mphole-mphole na pyenepi. Kusiyapo pyenepi, abale anewa asafunika kupangiza citsalakano na kufokotoza mafala akuti ale anagumanika pa misonkhano nee asaabvesesa.

17. Tisafunika kucitanji tingagumana anthu anafuna kugumana “nsuwo unatsogolera ku umaso”?

¹⁷ Basa yakucita anyakupfundza, isafunika kucitwa mwakucimbiza kakamwe. Ife tinapitiriza kusaka ‘anthu anafuna kutawira undimomwene unapasa umaso wakukhonda mala.’ (Mabasa 13:48) Tingaagumana, nee tisafunika kudembuka kuapanga thangwi ya pfundziro ya Bhibhlya na kuacemera toera agumanike pa misonkhano. Natenepa, tinakwanisa kuaphedza kugumana “nsuwo unatsogolera ku umaso.”—Mat. 7:14.