Paulu Atumizwa ku Roma

Paulu amalisa ulendo wace wacitatu wakumwaza mphangwa ku Yerusalemu. Iye amangwa mbaikhwa nkaidi. Namasiku, Yezu aonekera kuna Paulu m’masomphenya mbampanga: ‘Iwe unadzaenda ku Roma toera kamwaza mphangwa kweko.’ Paulu akwatwa ku Yerusalemu mbaendeswa ku Sezareya. Kweneko akhala pyaka piwiri nkaidi. Mu ndzidzi ukhatongwa Paulu na Ntongi Festo, iye alonga: “Ndisaphemba toera nditongwe na Sezari.” Festo atawira: “Nakuti waphemba toera utongwe na Sezari; unaenda katongwa na Sezari.” Natenepa Paulu akwizwa m’bote mbaenda ku Roma pabodzi na Akristu awiri, Luka na Aristarko.

Pikhacita iwo ulendo na bote, paoneka condzi cikulu mu ntsiku zizinji. Onsene m’bote akhanyerezera kuti anafa. Mbwenye Paulu alonga: ‘Amunamwe, anju andipanga mu ndoto: Paulu, leka kugopa. Iwe unafika mwadidi ku Roma pabodzi na onsene ali m’bote.’ Paulu apanga amuna akhacita ulendo: ‘Khalani na cipapo! Nee tinafa.’

Condzi capitiriza mu ntsiku 14. Mukupita kwa ndzidzi, iwo aona ntsuwa ya Malta mbabverana kuenda kweneko. Mbadzati kufika pa ntsuwa, bote yamenya pantsi mbigwandika mapindi-mapindi. Mbwenye onsene akukwana 276 apulumuka. Anango asambirira, mbwenye anango akhakwira mapindi a bote toera kufika pa ntsuwa. Pidafika iwo pa ntsuwa ya Malta, anthu a kweneko aatsalakana mwadidi, pontho agasa moto toera awothe.

Pakumala miyezi mitatu, anyankhondo akwata Paulu m’bote inango mbaenda naye ku Roma. Pidafika iye ku Roma, abale aenda kamuona. Pidaona iye abale, Paulu apereka takhuta kuna Yahova mbakhala wacipapo. Maseze Paulu akhali nkaidi, iye akhatawiriswa kukhala panyumba yakulugari mbakaonerwa na nyankhondo. Iye akhala kweneko pyaka piwiri. Pikhaenda anthu kaona Paulu, iye akhaamwazira mphangwa za Umambo wa Mulungu mbaapfundzisa pya Yezu. Paulu alembambo matsamba mbaatumiza ku mipingo ya Azya Menori na Yudeya. Yahova aphatisira Paulu toera kumwaza mphangwa zadidi kuna anthu a madzindza onsene.