Nyanyi Wakuipa Atcunyuswa

Mambo Akabu akhaona munda wa mauva wa Nabhoti na pa janela ya nyumba yace ku Yezrieli. Akabu akhafuna munda unoyu. Natenepa apanga Nabhoti toera an’gulisire. Mbwenye Nabhoti akhonda thangwi Mwambo wa Yahova ukhakhondesa. Nabhoti acita pinthu pyadidi. Kodi Akabu aona tani pyenepi? Iye aipirwa kakamwe mpaka kukhonda kudya mbaenda kagona.

Yezabheli, nkazi wa Akabu wakuti akhali Nyanyi wakuipa alonga: ‘Kodi imwe nee ndimwe mambo wa Izraeli? Munakwanisa kucita pinthu pinafuna imwe. Pontho ine ndinakuphedzani kukwata munda unoyu.’ Yezabheli alemba matsamba mbatumiza kuna akulu a nzinda, mbaapanga kuti Nabhoti atikana Mulungu, pontho asafunika kuphiwa. Akulu a nzinda acita pidalonga Yezabheli. Buluka penepo, Yezabheli apanga Akabu: ‘Nabhoti afa! Cincino munda wa mauva ndi wanu.’

Nabhoti nee akhali munthu wakutoma adaphiwa mwakusowa mulando na Yezabheli. Iye apha anthu anango azinji akhalambira Yahova. Yezabheli akhalambira madzimunthu, pontho akhacita pinthu pinango pyakuipa. Yahova akhaona pinthu pyonsene pyakuipa pikhacita iye. Kodi Yahova acitanji na Yezabheli?

Pidafa Akabu, Yeoramu mwana wa Akabu adzakhala mambo. Yahova atuma mamuna akhacemerwa Jeu toera aende katcunyuse Yezabheli na banja yace.

Jeu akwira ngolo yace mbaenda ku Yezrieli kukhali Yezabheli. Yeoramu abwera na ngolo toera kagumanikana na Jeu. Pidagumanikana iwo, Yeoramu abvundza: ‘Pana ntendere pakati pathu?’ Jeu atawira: ‘Unaoneka tani ntendere pakati pathu, thangwi mai wako Yezabheli akucita pinthu pyakuipa.’ Yeoramu azungunusa ngolo yace toera kuthawa. Mbwenye, Jeu alasa Yeoramu na pswimo, mbafa.

Buluka penepo, Jeu aenda kunyumba ya Yezabheli. Pidabva Yezabheli kuti Jeu ali kubwera, iye aikha makiyaje, asasanyira tsisi yace mbaenda pa janela ya padzulu. Pidafika Jeu, Yezabheli antsalakana mwakuipa. Jeu akhuwira atumiki a Yezabheli akhali cifupi na iye mbalonga: ‘Mponyeni pantsi!’ Iwo akwekweta Yezabheli mbam’ponya na pa janela. Iye agwa pantsi mbafa.

Pakumala pyenepi, Jeu apha ana 70 a Akabu mbafudza ulambiri wa Bhaale mu dziko ya Izraeli. Tisapfundzanji na pyenepi? Tisapfundza kuti Yahova asadziwa pyonsene pinacitika, pontho pa ndzidzi wakuthema iye anafudza ale anacita pinthu pyakuipa.