Masomphenya Adaoneswa Juwau

Pikhali mpostolo Juwau nkaidi pa ntsuwa ya Patimo, Yezu ampangiza masomphenya akukwana 16 a pinthu pya ntsogolo. Masomphenya anewa apangiza kuti Yahova anadzacenesa tani dzina yace, Umambo wace unadzabwera tani, pontho cifuniro cace cinadzacitika tani pa dziko yapantsi ninga kudzulu.

M’masomphenya, Juwau aona Yahova pa mpando wa Umambo kudzulu. Mpando unoyu, ukhadazungulirwa na akulu a mpingo akukwana 24 akuti akhadabvala nguwo zakucena na nthimba za ouro. Pontho iye aona kucetuma na kudhima kwa njazi pa mpando unoyu. Akulu a mpingo 24 agodama patsogolo pa Yahova mbamulambira. M’masomphenya anango, Juwau aona mwinji ukulu wa anthu wa madzindza onsene, mbumba zonsene na pilongero pyonsene mbakalambira Yahova. Natenepa, Yezu wakuti ndi Mwanabira, atsogolera mwinji unoyu mpaka kuna madzi akupasa umaso. Buluka penepo, Juwau aona masomphenya anango akuti Yezu atoma kutonga ninga Mambo kudzulu pabodzi na akulu a mpingo akukwana 24. Kusiyapo pyenepi, Juwau aonambo Yezu mbakamenyana na nyoka ikulu, yakuti ndi Sathani na madimonyo ace. Yezu aathamangisa kudzulu mbabwera pa dziko yapantsi.

Buluka penepo, Juwau aona masomphenya anapangiza Mwanabira na anthu akukwana 144.000 mbakalimira Paphiri ya Sioni. Iye aonambo anju m’bodzi mbakamburuka pa dziko yapantsi, mbapanga anthu toera agope Mulungu na kumpasa mbiri.

Pa masomphenya anango adatowera, nkhondo ya Armajedhoni yatoma. Mu ndzidzi wa nkhondo ineyi, Yezu na anyankhondo ace amalisa makhaliro akuipa a dziko ino ya Sathani. Pa masomphenya akumalisa, Juwau aona ntendere pa dziko yapantsi ninga kudzulu. Yahova afudziratu Sathani na dzindza yace. Anthu onsene kudzulu na pantsi asalemedza dzina ya Yahova, pontho asalambira iye basi.