Anju Gabhriyeli Alonga na Mariya

Mu nzinda wa Nazareti ku Galileya kukhali na ntsikana akhacemerwa Mariya. Iye akhali wacibale wa Elizabheti, pontho akhabanyirana na Zuze wakuti akhali nyakupala matabwa. Pikhali Elizabheti na mimba ya miyezi mitanthatu, anju Gabhriyeli aenda kalonga na Mariya. Iye alonga: ‘Ntendere ukhale na iwe Mariya. Iwe udadzala na nkhombo za Yahova.’ Mariya nee abvesesa mabvekero a mafala adalonga Gabhriyeli. Buluka penepo anju ampanga: ‘Unadzakhala na mimba mbubala mwana wamamuna, usafunika kumpasa dzina yakuti Yezu. Iye anadzakhala Mambo, pontho Umambo wace unadzakhala kwenda na kwenda.’

Mariya alonga: ‘Pyenepi pinakwanisika tani, thangwi ine cipo ndapita m’mabonde na mamuna?’ Gabhriyeli antawira: ‘Mariya kuna Mulungu pyonsene mphyakukwanisika. Na ciphedzo ca nzimu wakucena, iwe unabala mwana wamamuna. M’bale wako Elizabheti ali na mimba.’ Buluka penepo Mariya alonga: “Ndine bitcu wa Yahova! Mbapicitike kuna ine ninga mudapilongera imwe.”

Mariya aenda kaona Elizabheti. Pidamwanyika iye Elizabheti, mwana akhali m’mimba mwa Elizabheti anumpha. Na ciphedzo ca nzimu wakucena, Elizabheti alonga: ‘Mariya, Yahova akupasa nkhombo. Ndi nkhombo kwa ine kudzaoniwa na mama wa Mbuyanga.’ Mariya alonga: ‘Ndisasimba Yahova na ntima wanga onsene.’ Mariya akhala na Elizabheti miyezi mitatu, buluka penepo, iye abwerera ku Nazareti.

Zuze pidadziwa iye kuti Mariya akhali na mimba, akhafuna kunsiya. Mbwenye anju aonekera kuna Zuze mu ndoto mbalonga: ‘Leka gopa kukwata Mariya toera akhale nkazako. Thangwi iye nee acita cinthu cakuipa.’ Natenepa, Zuze akwata Mariya mbaenda naye kunyumba kwace toera akhale nkazace.