Ndisafunika Kucita Phembero Kuna Anthu Akulemedzeka?

Ntawiro wa Bhibhlya

Nkhabe. Bhibhlya isalonga kuti basi ene tisafunika kucita phembero kuna Mulungu mu dzina ya Yezu. Yezu apanga anyakupfundzace: “Mbwenye imwe longani maphembero ninga tenepa: ‘Baba wathu muli kudzulu, dzina yanu ikhale na mbiri.’” (Mateu 6:9, Biblya Chisena) Iye nee apanga anyakupfundzace toera kucita phembero kuna anthu akulemedzeka, aanju, peno munthu unango kusiyapo Mulungu.

Yezu apangambo atowereri ace: “Ine ndine njira na udidi na moyo. Nkhabepo munthu [m’bodzi] anafika kuna Baba mbakhonda kupita pana ine.” (Juwau 14:6, Biblya Chisena) Basi ene ndi Yezu adatawiriswa na Mulungu toera kutibvunulira.—Ahebheri 7:25.

Mphapo ninji pinafuna kucitika ndingacita phembero kuna Mulungu na kuna anthu akulemedzeka?

Khundu ibodzi ya matongero khumi, Mulungu alonga: “Ine ndine Mbuya, Mulungu wako. Sinatawira mpikisano na unango tayu.” (Eksodo 20:5, Biblya Chisena) Ndi munjira ipi Mulungu nkhabe tawira “mpikisano”? Fala yakuti mpikisano mu Tradução do Novo Mundo yathumburuzwa “Mulungu wantcanje.” Mulungu asafuna kuti ulambiri wathu kuphatanizambo maphembero athu, tisafunika kuacita basi ene kuna iye.—Izaiya 48:11.

Ife tingacita phembero kuna anthu anango ninga anthu akulemedzeka, peno aanju, ife tinatsukwalisa Mulungu. Mpostolo Juwau pidayesera iye kulambira anju, anju an’khondesa mbampanga: “Leka kucita pyenepi! Inembo ndine bitcu ninga iwe na abale ako, akuti ali na basa yakupereka umboni unalonga pya Yezu. Lambira Mulungu.”—Apokalipse 19:10.