Yahova Atsidzikiza Yosafate

Yosafate akhali mambo wa ku Yuda. Iye afudza maguwa a Bhaale na madzimunthu. Iye akhafuna kuti anthu adziwe mitemo ya Yahova. Natenepa, iye asankhula amuna akuti akhadziwa mwadidi mitemo ya Yahova toera kupfundzisa mbumba.

Madziko akhali cifupi na Ayuda akhagopa kumenyana na iwo, thangwi akhadziwa kuti Ayuda akhali mbumba ya Yahova. Madziko anewa apereka miyoni kuna Mambo Yosafate. Mbwenye Amoabhe, Aamoni na anthu akhali ku cisa ca Seiri aenda kamenyana na Ayuda. Yosafate akhadziwa kuti akhafuna ciphedzo ca Yahova. Natenepa iye apanga Ayuda onsene, amuna, akazi na ana toera aende ku Yerusalemu. Yosafate alimira patsogolo pa Ayuda mbaphembera: ‘Yahova, mungakhonda kutiphedza ife nee tinawina. Taphata miyendo, tipangeni pinafunika ife kucita.’

Yahova atawira phembero ineyi mbaapanga: ‘Lekani kugopa, ndinakuphedzani. Khalani mu mbuto zanu, khalani dzololo, pontho onani kuti ndinadzakupulumusani tani.’ Kodi Yahova aapulumusa tani?

Mangwana mwace namacibese, Yosafate asankhula anyakuimba mbaapanga kuti akhale kutsogolo kwa anyankhondo. Iwo abuluka ku Yerusalemu mbakaimba mpaka ku Tekoa, mbuto ikhafuna kucitirwa nkhondo.

Mu ndzidzi ukhaimba iwo mwakutsandzaya na mwakugaluza, Yahova akhatsidzikiza mbumba yace. Iye acitisa kuti Aamoni na Amoabhe atome kuphana okha-okha. Mbwenye Yahova akhatsidzikiza mbumba ya Yuda, anyankhondo na anyantsembe. Anthu onsene akhali cifupi abva pyonsene pidacita Yahova, pontho adziwa kuti iye akhapitiriza kutsidzikiza mbumba yace. Kodi Yahova asatsidzikiza tani mbumba yace? Iye asaphatisira njira zizinji. Iye nee asafunika kuphedzwa na anthu toera kutsidzikiza mbumba yace.