Iwo Aperekeka Na Ntima Onsene​—Ku Nova York

MU PYAKA pingasi pidapita, Cesar na nkazace, Rocio, akhali na umaso wadidi kakamwe mu Califôrnia. Cesar akhaphata basa kudziko ninga nyakutsalakana mitcini ya mphepo yakupisa na kutonthola, na ya ar-condicionado, Rocio akhaphata basa mu ndzidzi wakucepa ku ofesi ya dotoro. Iwo akhali na nyumba yawo, iwo nee akhali na ana. Mbwenye kwacitika cinthu cidacinja umaso wawo. Ninji pidacitika?

Mu nthanda ya Malandalupya ya caka 2009, ofesi ya filiali ku Estados Unidos yatumiza tsamba ku mipingo yonsene mu dziko ineyi, mbaphemba abale na alongo a maluso kuti aperekeke toera kutumikira ku Beteli mu ndzidzi wakucepa na kuphedzera basa yakuthimizira ofesi ya filiali ku Wallkill, Nova York. Ale akuti akhadapiringana pyaka pinaphembwa toera kuenda ku Beteli aphembwambo toera kuperekeka. Cesar na Rocio alonga: “Nakuti thunga yathu ikhadapita, tikhadziwa kuti mwai unoyu mbudakhala kabodzi basi mu umaso toera kutumikira ku Beteli. Ife nee tikhafuna kuluza mwai unoyu thangwi ya cinthu cinango!” Mwakucimbiza, banja ineyi yatumiza maphembo awo.

Mbwenye papita caka camumphu, Cesar na Rocio nee kucemerwa toera kuenda ku Beteli. Ngakhale tenepo, iwo asaka miyai inango toera kukwanirisa cifuno cawo, iwo alulupisa umaso wawo. Cesar alonga: “Tacinja mbuto inakoyera ife motokala mbikhala kwartu ibodzi toera tikwanise kulugarisi nyumba yathu. Buluka penepo, tabuluka n’nyumba yathu ikulu ya 200 m² ikhadamangisa ife mu pyaka pingasi nduli, mbatienda kakhala n’nyumba ing’ono ya 25 m². Kucita macinjo anewa kwatiphedza toera kutawira ncemerero wa kuenda ku Beteli ukhadikhira ife kutambira.” Buluka penepo, ninji pidacitika? Rocio alonga: “Mudapita nthanda ibodzi pakumala kuenda kunyumba yathu ing’ono, tatambira ncemerero toera kutumikira ku Wallkill mu ndzidzi wakucepa. Taona kuti mu kululupisa umaso wathu, tapasa mwai Yahova toera kutipasa nkhombo.”

NZIMU WAWO WAKUPEREKEKA UKUABWERESERA NKHOMBO

Ninga Cesar na Rocio, madzana mazinji a abale na alongo asaperekeka toera kucita khundu m’basa yakumanga yakuti ikucitwa ku Nova York. Anango mwa iwo, akuphedzera kuthimizirwa kwa ofesi ku Wallkill, mu ndzidzi wakuti anango azinji ali na mwai wakuphedza kumangwa kwa ofesi yathu ikulu ku Warwick.a Anyakumanga banja azinji asiya nyumba zawo zadidi, mabasa awo adidi, ngakhale pifuyo pyawo toera kutumikira Yahova mwakuthimizirika. Kodi Yahova asapasa nkhombo nzimu wawo wakuperekeka? Inde, iye akupasa nkhombo!

Mwacitsandzo, ku dziko ya Kansas, Way wakuti asatsalakana pya magesi, na Debra, akuti uwiri wawo ali nkati mwa pyaka 50 pyakubalwa, agulisa nyumba yawo na pinthu pyawo pizinji mbaenda ku Wallkill toera kutumikira ku Beteli mbakhala panyumba yawo.b Ngakhale kuti pyenepi pikhaphemba kucinja umaso wawo, iwo asaona kuti kuwangisira kwawo ndi kwakuphindulisa. Thangwi ya basa yace ku Beteli, Debra alonga: “Midzidzi inango ndisabva ninga ndiri m’mbuto ibodzi ya Paradizu inapangizwa mu pithundzithundzi pya mabukhu athu!”

Melvin na Sharon akuti asakhala Kubangwe kwa dziko ya Carolina, agulisa nyumba yawo na pinthu pyawo toera akwanise kuphedza basa ku Warwick. Maseze macinjo anewa akhali akunentsa, banja ineyi isaona kuti ndi mwai kucita khundu m’basa ineyi m’mbiri yathu. Iwo alonga: “Kukomerwa kunakhala na ife thangwi yakudziwa kuti tikucita cinthu cakuti cinadzaphindulisa gulu yonsene pa dziko yapantsi, ndi kukulu kakamwe.”

Kenneth, nyakumanga nyumba wakuti akutambira phanceni pabodzi na Maureen ali mu pyaka 50 pyakubalwa, iwo abuluka ku Califôrnia toera kuphedza basa yakumanga ku Warwick. Toera kucinja, iwo acita masasanyiro na mulongo m’bodzi pa mpingo wawo toera atsalakane nyumba yawo, mbaphemba acibale awo toera kuaphedza kutsalakana pai wa Kenneth wakuti ndi wakugwesera. Kodi iwo asatsumbikika thangwi ya macinjo awo toera kutumikira ku Beteli? Nkhabe! Kenneth alonga: “Ife tikuphindula kakamwe. Nkhubveka kuti nkhabe pinentso? Mwandimomwene nkhabe, mbwenye tiri na umaso wakuphindulisa kakamwe, ife tisafuna na ntima onsene kuti anango acitembo basa ineyi.”

KUKUNDA PINENTSO

Ale adaperekeka asafunika kuwangisira toera kukunda pinentso. Mwacitsandzo, William na Sandra, akuti ali nkati mwa pyaka 60 pyakubalwa akhali na umaso wadidi ku Pensilvânia. Iwo akhali na ntcini wadidi pa komponi yawo yakuti ikhali na anyabasa 17. Iwo akhatumikira pa mpingo ubodzi ene kubulukira mu uwana wawo, pontho acibale awo azinji akhali mu cisa ceneci. Natenepa, pidaona iwo mwai toera kutumikira ku Wallkill uku mbakhala panyumba yawo, iwo adzindikira kuti pyenepi mbapidaphemba kusiyana na anthu azinji na pinthu pizinji pikhadadzolowera iwo. William alonga: “Mwakukhonda penula, cinentso cikulu kwa ife ndi kusiya cisa cathu cadidi.” Mbwenye pakumala kucita phembero kazinji kene, banja ineyi yatonga kucinja​—iwo nkhabe kutsumbikika na cisankhulo ceneci. William alonga: “Kutsandzaya kunakhala na ife thangwi ya kutsogolerwa na kutumikira pabodzi na banja ya Beteli nkhabe kulandaniswa na cinthu cinango. Ine na Sandra tiri akutsandzaya kupiringana kale!”

Ricky wakuti ndi ntsogoleri wa basa yakumanga nyumba ku Havaí, acemerwa toera kutumikira ninga m’bodzi wa banja ya Beteli mbakhala panyumba yace toera kuphedza basa yakumanga ku Warwick. Nkazace Kendra, akhafuna kuti mamunace atawire ncemerero. Mbwenye iwo akhali na thangwi yakuthema ikhaadzudzumisa: Kutsalakana Jacob, mwanawo wa pyaka 11 pyakubalwa. Iwo akhadzudzumika khala pikhali pyandzeru kuenda na banja yawo ku Nzinda wa Nova York, pontho khala mwanawo mbadakwanisa kudzolowera makhaliro mapswa akusiyana kakamwe na akhadziwa iye.

Ricky alonga: “Cifuno cathu cakutoma cikhali kugumana mpingo wakuti ukhali na anang’ono akuti akhathambaruka mwauzimu. Tikhafuna kuti Jacob akhale na axamwali azinji adidi.” Mbwenye mpingo udagumana iwo nee ukhali na ana azinji, mbwenye ukhali na atumiki azinji a ku Beteli. Ricky alonga: “Pakumala kwa nsonkhano wathu wakutoma, ndabvundzisa Jacob kuti akhabva tani thangwi ya mpingo upswa, makamaka thangwi yakuti nee ukhali na ana azinji a thunga yace. Iye andipanga: ‘Baba, lekani kudzudzumika. Axamwali anga anadzakhala aphale anatumikira ku Beteli.’”

Mwandimomwene, aphale anatumikira ku Beteli asapangiza kukhala axamwali a Jacob. Kodi pyenepi pisankhuya tani? Ricky alonga: “Ntsiku inango camasiku, ndikhapita cifupi na kwartu ya mwananga mbandiona kuti magesi akhapitiriza kugaka. Ndikhadikhira kuti panango akhasendzeka na game, mbwenye iye akhaleri Bhibhlya! Pidambvundzisa ine kuti akhacitanji, Jacob atawira: ‘Ndikutoma kukhala mphale anatumikira ku Beteli, pontho ndisafuna kuleri Bhibhlya yonsene mu caka cibodzi basi.’” Kulonga nkhulunga, Ricky na Kendra ali akutsandzaya kakamwe, tayu basi thangwi yakuti Ricky asakwanisa kucita khundu m’basa yakumanga ku Warwick, mbwenye thangwi yakuti kucinja kwawo kusaphedza mwanawo toera kukula mwauzimu.​—Mis. 22:6.

KUKHONDA DZUDZUMIKA NA UMASO WA NTSOGOLO

Basa yakumanga ku Wallkill na ku Warwick inadzamala, natenepa, ale adacemerwa toera kuphedza, asadziwa kuti basa yakutumikira ku Beteli ndi ya ndzidzi wakucepa. Kodi abale na alongo anewa ali akudzudzumika kakamwe kuti anadzaenda kupi peno anadzacitanji? Nee pang’ono pene! Azinji ali na mabvero mabodzi ene na a banja yakuti iri cifupi na kugwesera idabuluka ku Florida. John, wakuti ndi m’bodzi wa anyakumanga, pabodzi na nkazace, Carmen, asatumikira ninga anyakuperekeka a ndzidzi wakucepa ku Warwick. Iwo alonga: “Mpaka pano, tisaona kuti Yahova asatsalakana kakamwe pyakufuna pyathu. Tisanyerezera kuti mwandimomwene Yahova nee atibweresa kuno pa ndzidzi uno toera pakumalisa atisiye tekhene.” (Sal. 119:116) Luis, wakuti asatsalakana pyombo pyakuthimisa napyo moto, pabodzi na nkazace, Quenia, asatumikira ku Wallkill. Iwo alonga: “Tisaona djanja ya Yahova mbikatipasa mwakukwana pinthu pyakumanungo pinafuna ife. Maseze nee tisadziwa kuti tinadzakhala tani, peno tinadzakhala kupi, ife tisanyindira kuti iye anadzapitiriza kutitsalakana.”​—Sal. 34:10; 37:25.

‘NKHOMBO MPAKA KUKHONDA KUDZAONEKABVE CAKUSOWA’

Azinji mwa ale adaphedza basa yakumanga ku Nova York, pakutoma mbadakwanisa kusaka mathangwi toera kukhonda kuperekeka. Mbwenye iwo ayesera Yahova ninga pinaphemba iye kwa m’bodzi na m’bodzi wa ife toera kucita: “Ndaphata miyendo, ndiyesereni munjira ineyi, toera muone khala sinadzakufungulirani tayu misuwo yakudzulu, na kukupasani nkhombo mpaka kukhonda kuonekabve cakusowa.”—Mal. 3:10, Tradução do Novo Mundo.

Kodi imwe munadzayeserambo Yahova mbamuona nkhombo zace zikulu? Citani phembero mbamudinga kuti munakwanisa tani kucita khundu m’basa yakutsandzayisa inacitwa ku Nova York peno m’mabasa anango Acikristu akumanga nyumba, mbamuona mwekhene nkhombo zinafuna kudzatambira imwe.​—Marko 10:29, 30.

Dale wakuti ndi enginheiro civil pabodzi na Cathy abuluka ku Alabama, iwo asawangisa anango toera kupita m’basa ineyi. Iwo aperekeka toera kuphedza basa ku Wallkill. Iwo alonga: “Mungakhala na cipapo cakubuluka mu cisa canu cadidi, imwe munadzakhala na mwai wakuona kuti nzimu wa Yahova usaphata tani basa!” Ninji pinafunika toera mukwanise kuperekeka? Dale alonga: “Lulupisani, lulupisani, na lulupisani mwakuthimizirika. Imwe cipo munadzatsumbikika!” Gary, adabuluka Kunkwiriro kwa dziko ya Carolina ali m’basa yakumanga mu pyaka 30. Iye na nkazace Maureen, alonga kuti ibodzi mwa nkhombo zinakhala na iwo ku Warwick ndi “kudziwana na kuphata basa pabodzi na abale na alongo azinji akuti asaphatisira umaso wawo mu kutumikira Yahova ku Beteli.” Gary athimiza: “Toera kutumikira ku Beteli, musafunika kukhala na umaso wakusowa pizinji, unoyu ndi umaso wadidi kakamwe toera kukhala nawo m’makhaliro ano a pinthu.” Jason adaphata basa ninga nyakutsalakana magesi, pabodzi na Jennifer adabuluka ku nzinda wa Illinois, alonga kuti kuphata basa ku Wallkill m’basa ya kuthimizira Beteli ndi “cinthu cadidi kakamwe cakuti cinacitisa munthu kunyerezera umaso wa mu dziko ipswa.” Jennifer athimiza: “Mphyakudzumisa kakamwe kuona kuti cinthu consene cinacita iwe cisakomeresa Yahova, pontho ciri na ntengo ukulu wakukhonda mala pamaso pace. Yahova asaona kuti uli wakupfuma mwakupiringana midida.”

[Pidzindikiro pyapantsi]

[Bokosi pa tsamba 7]

MUNAKWANISA KUPEREKEKA?

‘Ntima’ wa Mambo Dhavidhi ‘ukhafuna’ kakamwe kumangira Yahova nyumba. (1 Pya dziko. 22:7) Cinthu cikhafuna Dhavidhi cikhali basi ene kucita khundu m’basa yakumanga templo yakuti mbidaphatisirwa toera kusimba na kupasa mbiri Mulungu. Mbidakhala Dhavidhi ali maso lero, mbadaona tani basa ikulu yakumanga yakuti ikucitwa mu ndzidzi wathu?

Mu ndzidzi wakuti amwazi mphangwa a Umambo akuthimizirika, pontho tiri cifupi na kumala kwa makhaliro a dziko ya Sathani, pasafunika kumangwa nyumba zizinji mwakucimbiza. (Iza. 60:22; Hab. 2:3) Nyumba zenezi zisaphataniza maofesi a filiali, Nyumba za Misonkhano, Nyumba za Umambo, Nyumba Zakuthumburuzira, na nyumba zinango za cipfundziso Cacikristu m’madziko mazinji. Kumanga nyumba zenezi zonsene pisaphemba anyakuperekeka akuti ali na maluso akufunika toera kumalisa mwadidi mabasa anewa. Mabasa anewa na pyonsene pinafunika pisaphemba kobiri izinji, anthu a maluso ninga arquitetura, desenho arquitetônico, enginheria, anyakudziwa mwanyapantsi ntsama ya kobiri inafunika, anyakuyang’anira basa, anyakumanga, mecânicos instaladores, instalações hidráulicas, anyakutsalakana magesi, carpinteiros, operadores de máquinas pesadas, anyakusasanyira pinthu, anyakusasanya pithundzithundzi pya nyumba zinafuna kumangwa, na anyakumalisa mabasa onsene.

Ciphedzo cisafunika m’mabasa akumanga mu dziko yanu. Kusiyapo pyenepi, pasafunika anthu azinji a maluso toera kutumikira m’madziko akunja. Kodi imwe munakwanisa kuperekeka? Khala munakwanisa, uno ndi ndzidzi toera kucedza na akulu a mpingo wanu. Abvundzeni kuti munakwanisa tani kuthema toera kupita m’basa ineyi.

Aphale, atsikana pabodzi na akulu ene asakhala akutsandzaya thangwi yakucita khundu m’basa ineyi yakutsandzayisa kakamwe yakumanga nyumba. Phatanizani pyenepi m’maphembero anu. Imwe munakwanisambo kukulisa ‘ntima wakufuna’ kuphedza mabasa akumanga nyumba zakuti zisapasa mbiri dzina ya Yahova. Khalani na cinyindiro cakuti cipo munadzatsumbikika!