KODI IMWE MUKHAPIDZIWA?

Kodi Dziko Ya Israele Ikhali Na Misitu Mizinji Ninga Munalonga Bhibhlya?

Mwakubverana na Bhibhlya, mbuto zinango za Dziko Yakupikirwa zikhali na misitu mizinji na ‘miti yakunjipa.’ (1 Am. 10:27; Yos. 17:15, 18) Mbwenye nakuti lero mbuto zizinji nkhabe miti, anyakupenula anakwanisa kupokanya khala mwandimomwene kukhali misitu.

Bukhu yakuti A Vida em Israel nos Tempos Bíblicos isafokotoza kuti kale “mbuto za misitu zikhali zizinji kakamwe kupiringana lero.” Mapiri mazinji akhaphimbirwa na miti inacemerwa pinheiros-de-alepo, carvalhos-da-palestina na terebintos. Miti ya sikomoro ikhalipo kakamwe ku Sefelá, cisa cinaphataniza mapiri a pakati na ku gombe ya bara ya Mediterrânio.

Mwakubverana na bukhu Plantas da Bíblia, m’mbuto zinango ku Israele, nee kusagumanika miti lero. Thangwi yanji? Bukhu ineyi isafokotoza kuti pyenepi pyacitika mwapang’ono pang’ono: “Anthu akhaphatisira mwakubwereza-bwereza miti na tsanga, makamaka toera kuthimizira minda yawo na mbuto za kudyesa pifuyo, pontho toera kuona miti na pinango pyakumanga napyo nyumba na nkhuni toera kugasa moto.”