Pitirizani Kuthambaruka Ninga Ntumiki
1. Ndi pitsandzo pipi pya mu pyaka dzana yakutoma pinapangiza kuti tisafunika kuthambaruka ninga atumiki?
1 Akristu asafunika kuthambaruka ninga atumiki. Ndi thangwi yace Yezu apitiriza kupereka cipfundziso kuna atowereri ace m’basa yakumwaza mphangwa. (Luka 9:1-5; 10:1-11) Na thangwi ineyi Akila na Prisila acemerambo Apolo kunyumba kwawo ‘mbantcululiratu njira ya Mulungu.’ (Mach. 18:24-26) Na thangwi ibodzi ene, Paulu awangisa m’mwazi mphangwa waluso Timoti toera apitirize kuphatisira cipfundziso cace kuti kuthambaruka kwace ‘kuonekere pamaso pa anthu onsene.’ (1 Tim. 4:13-15) Mwakukhonda tsalakana ndzidzi udatumikira ife Mbuya ninga amwazi mphangwa zadidi, ife tisafunika kupitiriza kuthimizira maluso athu akumwaza mphangwa.
2. Tinapfundza tani kubulukira kwa anango?
2 Pfundzani Kwa Anango: Njira ibodzi toera kuthimizira maluso athu ndi kupfundza kwa anango. (Mis. 27:17) Natenepa, bveserani mwadidi mu ndzidzi unapereka umboni amwazi mphangwa andzanu. Phembani maonero akufunika kwa ale ali na maluso akucedza na anthu mu utumiki, pontho bveserani mwadidi pinalonga iwo. (Mis. 1:5) Kodi musanentseka kucita maulendo akubwereza, kutomesa pfundziro ya Bhibhlya peno kucita makhundu anango mu utumiki? Khalani wakutoma kusaka ciphedzo kuna muyang’aniri wa nsoka wanu peno m’mwazi mphangwa unango waluso. Kumbukanimbo kuti nzimu wakucena wa Yahova unakwanisa kuthimizira maluso athu tingauphemba mwakukhonda phonya.—Luka 11:13.
3. Tisafunika kupangiza makhaliro api tingatambira ciphedzo, ngakhale kuti nee taciphemba?
3 Khala mwatambira ciphedzo cakuti munathambaruka tani, lekani kuipirwa ngakhale kuti nee mwaciphemba. (Koel. 7:9) Ninga Apolo, tambirani ciphedzo mwakucepeseka na mwakukomerwa. Kucita pyenepi kusapangiza udziwisi.—Mis. 12:15.
4. Ndi thangwi ipi ikulu kakamwe idalonga Yezu ya kuthambaruka ninga m’mwazi mphangwa?
4 Kuthambaruka Kusapasa Mbiri Mulungu: Mukuphatisira misangani, Yezu awangisa atowereri ace toera kuthambaruka ninga atumiki. Iye alandanisika ekhene ninga muti wa vinyu na atowereri ace akudzodzwa ninga nthawi. Iye alonga kuti Baba anasadzula nthawi yonsene inabala misapo “towera ibale misapo mizinji ene.” (Jwau 15:2) Natenepa, ninga nyakulima miti ya vinyu asakhala na cifuno cakuti nthawi za miti yace ya vinyu ibale misapo mizinji, Yahova asafuna kuti tipitirize kukulisa maluso athu toera tibale ‘misapo ya milomo yathu.’ (Aheb. 13:15) Ndi maphindu api akutsandzayisa anagumanika tingathambaruka ninga m’mwazi mphangwa? Yezu atipasa ntawiro: ‘Baba wanga anapaswa mbiri mungabala misapo mizinji.’—Jwau 15:8.