Tsandzayani Pakupfundza Bukhu Kodi Mwandimomwene Bhibhlya Isapfundzisanji?

¹ Bukhu Kodi Mwandimomwene Bhibhlya Isapfundzisanji? isagumanika n’Cisena. Tisaiphatisira kakamwe mu utumiki wathu, makamaka pakucitisa mapfundziro a Bhibhlya. Natenepa, tisafunika kuidziwa mwadidi bukhu ineyi. Pyenepi pinakwanisika thangwi tinadzaipfundza pa Pfundziro ya Bhibhlya ya Mpingo, kutomera sumana 19 ya Malandalupya ya 2015.

² Nyakucitisa pfundziro anadzacita mibvundzo yakutoma inagumanika pa nsolo ubodzi na ubodzi. Buluka penepo, pfundziro inadzacitwa mukuphatisira mibvundzo iri pantsi pa tsamba. Malemba adaikhwa cidzindikiro cakuti “lerini” asafunika kulerwi na kudingwa, pontho bokosi yakuti “Pinapfundzisa Bhibhlya” inagumanika kunkhomo kwa misolo yonsene inaphedza toera kubwerezera pidapfundzwa, thangwi iyo iri na matawiro a Bhibhlya a mibvundzo yakutoma ya nsolo. Imwe nee munadzanentseka toera kutawira thangwi bukhu ineyi isalonga ntsonga munjira yakukhonda nentsa, yakubveka mwadidi na yakuphata ntima.

³ N’thimiziro wa bukhu ineyi usapangiza mphangwa zakusiyana-siyana. Tinakwanisa kuphatisira mphangwa zenezi anyakupfundza Bhibhlya angafuna kudziwa pizinji. Midzidzi inango, makhundu a n’thimiziro anadzadingwa pa Pfundziro ya Bhibhlya ya Mpingo. Khala ndzidzi ulipo, mphangwa zonsene za nsolo ubodzi wa n’thimiziro, zinadzalerwi na nyakuleri pa pfundziro ya Bhibhlya, pontho misolo yakulapha inadzadingwa m’makhundu. N’thimiziro nkhabe mibvundzo, mbwenye nyakucitisa pfundziro anadzacita mibvundzo inaphemba matawiro a ntsonga zikulu.

⁴ Pfundziro ya Bhibhlya ya Mpingo inadzacitwa mwakucimbiza, mwakusiyana na munaphatisira ife bukhu ineyi pakupfundza na anango, makamaka khala iwo nkhabe cidziwiso ca Bhibhlya. (Mach. 26:28, 29) Mu ndzidzi unacitisa ife mapfundziro a Bhibhlya a panyumba tisafunika kufokotoza malemba, misangani na pinthu pinango. Natenepa, khalani na cifuno cakugumanika masumana onsene na kutawira pa Pfundziro ya Bhibhlya ya Mpingo mukuphatisira bukhu Kodi Mwandimomwene Bhibhlya Isapfundzisanji?.