Kutawirwa Kwa Mibvundzo Ya Bhibhlya

Kodi anyakumanga banja anakwanisa tani kukhala akutsandzaya?

Uphungu wa Bhibhlya unalonga pya kukhala na banja yakutsandzaya usaphata basa thangwi usabuluka kwa Ntomesi wa banja, Yahova Mulungu. Usatipfundzisa toera tikhale na makhaliro akuti anacitisa banja kukhala yakutsandzaya na usaticenjeza pya makhaliro akuti anakwanisa kufudza banja. Usatipfundzisambo pya macedzero adidi akuti asakulisa kutsandzaya m’banja.​—Lerini Akolose 3:8-10, 12-14.

Amuna na akazi asafunika kulemedzana. Uwiri wawo angatawira mabasa adapaswa iwo na Mulungu m’banja, iwo anakwanisa kukhala akutsandzaya.​—Lerini Akolose 3:18, 19.

Ninji cinacitisa banja kukhala yakuwanga?

Anyakumanga banja anakwanisa kukhala pabodzi khala iwo asafunana. Mulungu asatipfundzisa kuti tinapangiza tani ufuni. Iye na Mwanace, Yezu, ndi pitsandzo pyadidi pya kuperekeka okhene mwaufuni.​—Lerini 1 Jwau 4:7, 8, 19.

Amuna na akazi angalemedza banja ninga masasanyiro a Mulungu, iwo anadzakhala pabodzi. Mulungu acita banja toera kukhala pabodzi kwenda na kwenda pakati pa mamuna na nkazi kuti banja ikhale yakutsidzikizika. Banja inakwanisa kukhala yakuwanga thangwi Mulungu acita amuna na akazi toera kuphedzana mu pinthu pyakumanungo na pya m’manyerezero. Pontho, iye aacita mwakulandana na iye, na luso yakusangizira ufuni wace.​—Lerini Genesi 1:27; 2:18, 24.