Masasanyiro a Mulungu toera Kupulumusa Anthu

Mulungu apikira Abrahamu munthu wakukhulupirika kuti “mbeu” idalongwa kale mbidakhala m’bodzi wa dzindza yace. Kubulukira kwa munthu unoyu, ‘madzindza onsene’ mbadagumana nkhombo. (Genesi 22:18) Mu kupita kwa ndzidzi, ndzukulu wa Abrahamu, Yakobe, aenda ku Ejito, kule kwakuti banja yace yathambaruka mbikhala dzindza yakale ya Israele.

Mu kupita kwa ndzidzi, ntongi wakuipa wa dziko ya Ejito, Farao acitisa Aisraele kukhala mabitcu mpaka mu ndzidzi wakuti Mulungu asankhula mprofeta Mose, wakuti atsogolera mbumba ya Israele kubuluka mu dziko mu njira ya cirengo yakuwambuka Bara Yakufwira. Buluka penepo, Mulungu apasa Aisraele miyambo, kuphataniza Mitemo Khumi toera kuatsogolera na kuatsidzikiza. Miyambo ineyi ikhalonga pya kupereka ntsembe toera kulekererwa madawo. Mu kupumirwa na Mulungu, Mose apanga Aisraele kuti Mulungu mbadatuma mprofeta unango kwa iwo. Mprofeta unoyu mbadakhala “mbeu” yakupikirwa.

Pyaka pyakupiringana 400 nduli, Mulungu apikira Mambo Dhavidhi kuti “mbeu” ineyi idalongwa kale m’munda mwa Edeni inadzatonga mu umambo wakuti unadzakhala kwenda na kwenda. “Mbeu” ineyi yadzakhala Mesiya, Mpulumusi adasankhulwa na Mulungu toera kupulumusa anthu na kubweresa papswa Paradizu pa dziko yapantsi.

Kubulukira mwa Dhavidhi na aprofeta anango, mwapang’ono-pang’ono Mulungu alonga pinthu pizinji pya Mesiya. Iwo alongeratu kuti iye mbadakhala wakucepeseka, wakukoma ntima, pontho mu utongi wace nkhabe kudzaoneka njala, kusowa ulungami na nkhondo. Anthu onsene anadzakhala mu ntendere unango na ndzace ngakhale na pinyama. Utenda, nyatwa na kufa nkhabe kucita khundu mu cifuniro cakutoma ca Mulungu, natenepa pinadzamala, pontho anyakufa anadzalamuswa mbakhala pa dziko yapantsi.

Kubulukira mwa mprofeta Mikeya Mulungu alongeratu kuti Mesiya mbadabalwa m’Betelehemu, pontho kubulukira mwa mprofeta Dhanyeli alonga kuti iye mbadaphiwa. Mbwenye Mulungu mbadalamusa Mesiya mwa akufa na kumuikha ninga Mambo kudzulu. Dhanyeli aonambo kuti Umambo wa Mesiya mbudapitira mbuto mautongi anango onsene. Kodi Mesiya abweradi ninga mudalongerwa ipyo?

​—Yabuluswa pa Genesi kapitulu 22-50, Eksodo, Deuteronomyo, 2 Samwele, Masalmo, Izaiya, Danyele, Mikeya, Zakariya 9:9.