NSOLO WA REVISTA | THANGWI YANJI PINTHU PYAKUIPA PISACITIKA KWA ANTHU ADIDI?

Kodi Mulungu Anadzacitanji Thangwi Ya Uipi?

Bhibhlya isatipanga kuti Yahova na Mwanace, Yezu Kristu, anadzacitanji thangwi ya nyatwa zinacitiswa na Sathani Dyabo. Bhibhlya isalonga: “Mwana wa Mulungu aoneka pantsi pano towera afudze mabasa a [Dyabo.]” (1 Jwau 3:8) Makhaliro ano a pinthu aumbirimi, kuidana na uipi anadzafudzwa. Yezu apikira kuti Sathani Dyabo ‘nkadamu wa pantsi pano anathamangiswa.’ (Jwau 12:31) Mwakusowa manyengerero a Sathani, dziko ipswa yaulungami inadzakhazikiswa, pontho, dziko yapantsi inadzakhala mbuto yantendere.​—2 Pedro 3:13.

Ndiye tani ale anaumisa mitima yawo mbakhonda kucinja njira zawo, mbapitiriza kucita pinthu pyakuipa? Nyerezerani basi pikiro iyi yakuwangisa kakamwe: “Anyakulungama ndiwo anafuna kudzakhala pa dziko yapantsi, anyakusowa mulando ndiwo anafuna kusalikirapo. Mbwenye anyakuipa anadzafudzwa pa dziko yapantsi; anyakusandukira andzawo anadzabuluswamo.” (Misangani 2:21, 22, Tradução do Novo Mundo) Nkhabe kudzaonekabve anthu akuipa toera kunyengerera anango. M’makhaliro anewa antendere, mwapang’ono-pang’ono, anthu akubvera anadzasudzulwa mu ubitcu wakusowa ungwiro.​—Aroma 6:17, 18; 8:21.

Kodi Mulungu anadzamalisa tani uipi mu dziko ipswa? Iye nee anadzacita pyenepi mu kuapokosera ufulu wawo wakusankhula, mbaacitisa kukhala ninga maboneka. Mbuto mwace, iye anadzapfundzisa njira zace kuna anthu akubvera, na kuaphedza toera kusiya manyerezero na macitiro akuipa.

Kodi Mulungu anadzacitanji thangwi ya pidengwa pinacitika mwakukhonda dikhira? Iye apikira kuti mwakukhonda dembuka, utongi wa Umambo wace unadzatonga dziko. Mulungu akhazikisa Yezu Kristu ninga Mambo wa Umambo, iye ali na mphambvu toera kuwangisa mautenda. (Mateo 14:14) Pontho, Yezu ali na mphambvu toera kutonga mphambvu zacibaliro. (Marko 4:35-41) Natenepa, anthu nkhabe kudzathabukabve na pidengwa pinaoneka thangwi ya “pinthu pyakukhonda dikhira.” (Koelete 9:11, Tradução do Novo Mundo) Pantsi pa Utongi wa Kristu, anthu nkhabe kudzagwerwabve na pidengwa.​—Misangani 1:33.

Ndiye tanimbo pikwi na pikwi pya anthu adafa mwakusowa mathangwi? “Ine ndine kulamuka na moyo.” (Jwau 11:25) Yezu alonga mafala anewa ndzidzi pang’ono mbadzati kulamusa xamwali wace, Lazaro. Inde, Yezu ali na mphambvu toera kulamusa anyakufa, peno kubwezera umaso kwa ale adafa!

Khala musakomerwa na maonero akukhala mu dziko yakuti pinthu pyakuipa nkhabe kudzacitikabve kuna anthu adidi, thangwi yanji nkhabe kusaka kupfundza mphangwa zizinji zinalonga pya Mulungu wandimomwene na cifuniro cace kubulukira mu kupfundza Bhibhlya? Mboni za Yahova za mu cisa canu zinadzakomerwa kukuphedzani toera kukhala na cidziwiso ceneci. Tisakuphembani na ntima onsene toera kupita ncibverano na iwo peno kulembera asasanyi a revista ino.