NSOLO WA REVISTA | THANGWI YANJI PINTHU PYAKUIPA PISACITIKA KWA ANTHU ADIDI?

Pinthu Pyakuipa Pisacitika Kwa Anthu Adidi Thangwi Yanji?

Nakuti Yahova Mulungua ndi Nciti wa pinthu pyonsene, na wamphambvu zonsene, anthu azinji asanyerezera kuti ndiye anacitisa pinthu pyonsene pa dziko, kuphatanizambo pinthu pyakuipa pyonsene. Mbwenye onani pinalonga Bhibhlya thangwi ya undimomwene wa Mulungu:

• Yahova “ngwakulungama m’mabasa ache onsene.”​—Masalmo 145:17.

• ‘Mabasa onsene a Mulungu mbakulungama. Iye ndi Mulungu wakulungama, cakuipa nee cibodzi cokha, njira zace zonsene ziri mu ulungami.’​—Deuteronomyo 32:4.

• Yahova “ngwadidi na wakubvera ntsisi kakamwe.”​—Tyago 5:11.

Mulungu nkhabe kucitisa pinthu pyakuipa. Mphapo, asakulumiza anthu toera kucita pinthu pyakuipa? Nee pang’ono pene. Bhibhlya isalonga: ‘Nee munthu m’bodzi alonge pa kupendiwa kuti: Anandipenda ndi Mulungu.’ Thangwi yanji? ‘Thangwi Mulungu nkhabe kupendiwa toera acite pyakuipa, iyembo hanapenda munthu tayu.’ (Tyago 1:13) Mulungu nkhabe kuyesera, peno kupenda munthu mu kuncitisa kupangiza makhaliro akuipa. Mulungu nkhabe kucitisa pinthu pyakuipa, peno kunyengerera anthu toera kucita pinthu pyakuipa. Mphapo, mbani anafunika kupaswa mulando pangaoneka pinthu pyakuipa?

KUGUMANIKA PA MBUTO YAKUIPA PA NDZIDZI WAKUIPA

Bhibhlya isapangiza thangwi ibodzi inacitisa anthu kuona nyatwa: “Ndzidzi na pinthu pyakukhonda dikhirwa pisagwera anthu onsene.” (Koelete 9:11, Tradução do Novo Mundo) Pingacitika pinthu pyakukhonda dikhirwa peno cidengwa, mwakukhonda tsalakana khala munthu anakhuyiwa peno nkhabe, kazinji kene pisanyindira mbuto inagumanika iye pa ndzidzi unacitika ipyo. Cifupi na pyaka 2000 nduli, Yezu Kristu alonga pya cidengwa cidapha anthu 18 pidagwerwa iwo na nyumba ikulu. (Luka 13:1-5) Iwo nee afa thangwi ya pyakuipa pikhadacita iwo mu umaso wawo; basi ene iwo akhali pantsi pa nyumba pa ndzidzi udagwa iyo. Mu nthanda ya Thongwe ya caka 2010, citeketeke cikulu cafudza dziko ya Haiti; utongi wa Haiti walonga kuti anthu akupiringana 300.000 afa. Anthu anewa onsene afa mwakukhonda tsalakana makhaliro a umaso wawo. Utenda usaphatambo munthu onsene mwakukhonda dikhira.

Anango anakwanisa kubvundza: ‘Kodi Mulungu nkhabe kwanisa kupingiza pinthu pyakuipa toera pikhonde kucitika? Thangwi yanji iye nkhabe kutsidzikiza anthu adidi ku pidengwa?’ Toera Mulungu acite pyenepi, pikhafunika kuti iye adziwe mwanyapantsi pinthu pyakuipa mbapidzati kucitika. Ngakhale kuti Mulungu ali na luso yakudziwa mwanyapantsi pinthu pyantsogolo, tisafunika kudinga mbvundzo uyu: Kodi Mulungu asasankhula kuphatisira mphambvu zace zonsene toera kudziwa mwanyapantsi pinthu pyenepi?​—Izaiya 42:9.

Bhibhlya isalonga: ‘Mulungu wathu ali kudzulu, mbacita pyonsene pinafuna iye.’ (Masalmo 115:3) Yahova asacita pinthu pinaona iye kuti mphyakufunika kucita​—iye nkhabe kucita pyonsene pyakuti anakwanisa kupicita. Pyenepi ndi sawasawa na pinatonga iye kudziwa mwanyapantsi. Mwacitsandzo, pidadzala uipi m’mizinda ya Sodoma na Gomora, Mulungu apanga Abrahamu: ‘Ndinatcitha toera ndione khala macitiro awo ndi sawasawa na nkhuwo udakwira mpaka kuna ine. Khala simomwene tayu, ndinadzapidziwa.’ (Genesi 18:20, 21) Pa ndzidzi unoyu, Yahova asankhula kukhonda dziwa kunjipa kwa uipi m’mizinda ineyi. Munjira ibodzi ene, Yahova anakwanisa kusankhula kukhonda kudziwa mwanyapantsi pinthu pyonsene. (Genesi 22:12) Mbwenye pyenepi nee pisapangiza kuti iye ndi wakusowa ungwiro, peno wakufewa. Nakuti “mabasa ache mbakulungama [peno aungwiro,]” Mulungu asaphatisira luso yace mwakulinganira toera kudziwa mwanyapantsi pinthu pya ntsogolo mwakubverana na cifuniro cace; iye cipo asakakamiza anthu toera kucita pinthu.b (Deuteronomyo 32:4) Mphapo tisapfundzanji? Tisapfundza kuti Mulungu asasankhula kuphatisira luso yace yakudziwa pinthu mwanyapantsi munjira yakulinganira.

KODI NYATWA ZISACITISWA NA ANTHU?

Khundu inango, mulando wa nyatwa zinaoneka ndi thangwi ya anthu. Onani pinalonga Bhibhlya thangwi inatsogolera anthu toera kucita pinthu pyakuipa: ‘Kunapenda munthu ndi kusirira kwace, kunansosa mbakunkwekweta. Penepo munthu angatawirisa, kusirira kwace kule kunabala muntima mwace madawo. Mbwenye madawo angakula, anabala kufa.’ (Tyago 1:14, 15) Anthu angacita pinthu mwakubverana na pifuno pyakuipa, peno angakudwa na cilepelepe cakuipa, iwo asathabuka. (Aroma 7:21-23) Ninga pinaoneka m’mbiri ya anthu, anthu asacita pinthu pyakuipa kakamwe mbabweresa nyatwa zizinji. Kusiyapo pyenepi, anthu akuipa anakwanisa kunyengerera anango toera kukhalambo akuipa, mbapitiriza kucita pinthu pyakuipa.​—Misangani 1:10-16.

Kodi Mulungu asafunika kukhondesa anthu kucita pinthu pyakuipa? Nyerezerani njira idacitirwa anthu. Bhibhlya isalonga kuti Mulungu acita munthu mwakulandana na Iye, peno mwakulandana na Mulungu. Natenepa, anthu ali na luso yakupangiza makhaliro a Mulungu. (Genesi 1:26) Anthu apaswa luso yakusankhula, munjira ineyi, iwo anakwanisa kusankhula kufuna Mulungu na kukhala akukhulupirika kwa iye mu kucita pinthu pyakulungama pamaso pa Mulungu. (Deuteronomyo 30:19, 20) Mulungu angakakamiza anthu toera kutowezera njira inafuna iye, pyenepi mbipidapangiza kuti iye akuapokosera mwai wawo wakusankhula. Thangwi yanji? Thangwi anthu mbadakhala ninga mitcini, mbacita basi ene pinthu pinafunika iwo kucita! Pyenepi ndi sawasawa na cipfundziso cakuti pyonsene pinacitika pyalembwa kale kuti mbipidacitika kwa ife. Mbwenye mwakutsandzayisa, Mulungu asatipasa ntengo mu kutitawirisa kucita pisankhulo pyathu pyene! Mbwenye nee pisabveka kuti nyatwa zinaoneka thangwi ya madodo na pisankhulo pyakuipa pinacita anthu pinadzapitiriza kuthabusa anthu kwenda na kwenda.

KODI NYATWA ZISAONEKA THANGWI YA KARMA?

Mungacita mbvundzo unagumanika pa tsamba yakutoma ya revista ino kuna munthu wa uphemberi wa Hindu peno Budista, panango anatawira kuti: “Pinthu pyakuipa pisacitika kuna anthu adidi thangwi ya ntemo wa Karma. Iwo akubvuna misapo ya pinthu pidacita iwo mu umaso wawo nduli.”c

Thangwi ya cipfundziso ca Karma, mphyadidi kuona pinalonga Bhibhlya thangwi ya kufa. M’munda wa Edeni, mbuto idatoma anthu kukhala, Mulungu apanga mamuna wakutoma, Adhamu: ‘Dya misapo yonsene ya m’munda muno. Mbwenye, leka kudya nsapo wa muti wakudziwa pyadidi na pyakuipa, thangwi ntsiku inadzaudya iwe, unadzafa.’ (Genesi 2:16, 17) Khala Adhamu abvera Mulungu mbakhonda kucita madawo, iye mbadakhala maso kwenda na kwenda. Kufa kwabwera ninga nkandzo wakukhonda kubvera ntemo wa Mulungu. Natenepa, mudabalwa anawo, “kufa kwapita mwa anthu onsene.” (Aroma 5:12) Na thangwi ineyi tinakwanisa kulonga kuti “madawo anapasa anthu kufa.” (Aroma 6:23) Bhibhlya isafokotozambo: “Munthu adafa apulumuswambo mwa madawo.” (Aroma 6:7) Munjira inango, pakumala kufa, anthu nee asapitiriza kuthabuka thangwi ya madawo awo.

Lero, pikwi na pikwi pya anthu asalonga kuti anthu asaona nyatwa thangwi ya Karma. Anyakukhulupira cipfundziso ceneci, asatawira kuthabuka kwawo na kwa anango mbakhonda kudzudzumika kakamwe na nyatwa zenezi. Mbwenye maonero anewa nkhabe kubweresa cidikhiro ca kumala kwa pinthu pyakuipa. Iwo asakhulupira kuti njira ibodzi basi toera munthu abuluke mu nyatwa ndi kusiya kubalwa mwakubwereza-bwereza kubulukira m’makhaliro akutawirika kwa anthu, na kukhala na cidziwiso cakupambulika. Mbwenye maonero anewa ndi akusiyana kakamwe na pinalonga Bhibhlya.d

NYAMALWA WANKULU!

Nyamalwa wankulu kakamwe anabweresa nyatwa, si munthu tayu. Sathani Dyabo, anju wakuti pakutoma akhali wakukhulupirika wa Mulungu, “nee apitiriza dzololo mu undimomwene,” mbabweresa madawo pa dziko yapantsi. (Jwau 8:44, NM) Iye atsogolera upanduki m’munda wa Edeni. (Genesi 3:1-5) Yezu alonga kuti iye ndi ‘nyakuipa’ na “nkadamu wa pantsi pano.” (Mateo 6:13; Jwau 14:30) Anthu azinji asatowezera Sathani mu kutawira mikulumizo yace toera kupwaza njira zadidi za Yahova. (1 Jwau 2:15, 16) Lemba ya 1 Jwau 5:19 isalonga: “Anthu onsene, anadzadza pantsi pano, ali m’manja mwa [Dyabo.]” Kuna aanju anango adasankhula kukhala akuipa mbakhala kukhundu ya Sathani. Bhibhlya isapangiza kuti Sathani na mademonyo ‘akunyengerera anthu onsene pantsi pano,’ mbabweresa “dzedze [peno nyatwa] pantsi pano.” (Apokalipse 12:9, 12) Natenepa, mulando ukulu thangwi ya uipi usafunika kupaswa Sathani Dyabo.

Mwandimomwene, Mulungu nkhabe mulando na pinthu pyakuipa pinacitika kuna anthu; iye nkhabe kuthabusa anthu. Mbuto mwace, ninga pinapangizwa mu nsolo unatowerera, iye asapikira kuti anadzamalisa uipi.

[Pidzindikiro pyapantsi]