NSOLO WA REVISTA | KODI MULUNGU ASAKUTSALAKANANI?

Mulungu Asakuonerani

“Thangwi Mulungu asaona makhaliro a anthu mbaonera mafambiro awo ene.”​—YOBE 34:21.

THANGWI YANJI ANANGO ASAPENULA: Mwakubverana na basa yakufufudza idacitwa cincino, galasya yathu basi panango iri na maplaneta akukwana mabiliyau 100. Anthu anganyerezera pya kukula kwa kudzulu na pantsi, azinji asabvundza: ‘Thangwi yanji Mulungu wamphambvu zonsene asaona pinacita anthu akucepeseka pa dziko ino yakucepa kakamwe?’

MAFALA A MULUNGU ASAPFUNDZISANJI: Mulungu nee atipasa Bhibhlya, buluka penepo mbasiya kutitsalakana. Mbuto mwace, Yahova asatipasa cinyindiro: “Ndinakupangiza njira inatongwa iwe kutoweza; ndinakupfundzisa mbandikuonera.”​—Masalmo 32:8.

Nyerezerani Agare nkazi wa ku Ejito wa mu pyaka 2000 M. N. W. Agare nee apangiza cilemedzo kuna Sara, natenepa, Sara ampasa manyadzo, Agare athawa mbaenda nthando. Nakuti Agare adawa, kodi Mulungu asiya kuntsalakana? Bhibhlya isalonga: “Anju wa [Yahova], angumana.” Anju apasa cinyindiro Agare mbalonga: “[Yahova] abva nkhuwo wako.” Penepo, Agare alonga kuna Yahova: ‘Ndimwe Mulungu wakuona.’​—Genesi 16:4-13.

‘Mulungu wakuona’ asakuonanimbo. Mwacitsandzo: Mama wacifuno asaonera kakamwe anace ang’ono, thangwi mwana angakhala wang’ono kakamwe, iye asafunambo kakamwe citsalakano ca nyakubalace. Munjira ibodzi ene, Mulungu asatitsalakana kakamwe, makamaka mu ndzidzi unakhala ife akucepeseka na akusowa citsidzikizo. Yahova asalonga: “Ndisakhala kudzulu na pantsi pene, makamaka na anthu akukhurudzika na akuchepeseka towera ndiyawangise na kuapasa chikhulupiriro, iwo mbandikhulupirira.”​—Izaiya 57:15.

Ngakhale tenepo, panango munabvundza: ‘Kodi Mulungu asandionera tani? Kodi iye asanditonga mwakubverana na maonekero anga, peno asayang’ana pa dziko yapantsi mbabvesesa kuti ndine ani?’