NSOLO WA REVISTA | KODI UMAMBO WA MULUNGU—USABVEKANJI KWA IMWE?
Kodi Umambo Wa Mulungu—Unadzabvekanji Kwa Imwe?
Mwakukhonda penula, kubulukira mu nsolo udamala, imwe mwabvesesa kuti Umambo wa Mulungu ndi wakufunika kakamwe kwa Mboni za Yahova. Panango mwadzuma nkhombo zingasi zinafuna kubweresa Umambo wa Mulungu ntsogolo. Mu ndzidzi ubodzi ene, panango mwanyerezera kuti nkhombo zenezi ntsadidi kakamwe zakuti nkhabe kudzakwanirisika.
Mbuto mwa kutawira pinthu pyonsene pinabva imwe, mphyadidi kukhala munthu waudziwisi. (Misangani 14:15) Munjira inango, udziwisi unakwanisa kulandaniswa na pidacita anthu akhakhala ku nzinda wakale wa Bereya.a Pidapangwa iwo paulendo wakutoma pya mphangwa zadidi za Umambo, anthu a ku Bereya azitawira, mbwenye tayu basi ene thangwi yakuti akhafuna kuti zikhale za undimomwene. Mbuto mwace, iwo adinga Malemba mwacidikhodikho ‘toera kuona khala ndimomwene.’ (Machitiro 17:11) Munjira inango, anthu a ku Bereya alandanisa mphangwa zadidi zidabva iwo na pikhalonga Malemba. Mukupita kwa ndzidzi, iwo adzakhala na cinyindiro cakuti mwandimomwene, mphangwa zadidi zikhabverana na Bhibhlya.
Mboni za Yahova zisakuphembani na ntima onsene toera kucita pibodzi pyene. Kubulukira m’masasanyiro athu akupfundza Bhibhlya, tisakupasani mwai toera kulandanisa pinakhulupira Mboni za Yahova thangwi ya Umambo wa Mulungu na pire pinapfundzisa Bhibhlya.
Kusiyapo kudziwa pizinji thangwi ya Umambo wa Mulungu, pfundziro ya Bhibhlya inakuphedzanimbo toera kugumana matawiro a mibvundzo mingasi yakufunika kakamwe mu umaso.
• Kodi ife tabuluka kupi?
• Ndi cipi cifuniro ca umaso?
• Thangwi yanji Mulungu asalekerera nyatwa?
• Ninji pinacitika tingafa?
• Kodi dziko yapantsi inadzafudzwa?
• Ninji cinacitisa kukhala na umaso wakutsandzaya m’banja?
Mwa pyonsene, kupfundza Bhibhlya kunadzakuphedzani toera ‘kufendedzera Mulungu.’ (Tyago 4:8) Munjira ineyi, mungafendedzera cifupi kakamwe Mulungu, imwe munadzaona kuti Umambo wa Mulungu unadzabveka pinthu pyadidi kakamwe kwa imwe, tayu basi lero, mbwenye kwenda na kwenda. Yezu alonga kuna Babace mu phembero idacita iye: “Umaso wakukhonda mala ndi uyu, anthu akudziweni imwe mwekha Mulungu wandimomwene, adziwembo Yezu Kristu ule adatuma imwe.”—Jwau 17:3, Tradução do Novo Mundo.
Mboni za Yahova zinakwanisa kuphatisira bukhu iyi toera kupfundza Bhibhlya na imwe.
Toera kuphemba pfundziro ya Bhibhlya, longani na m’bodzi wa Mboni za Yahova, peno kucita phembo mu Interneti pa www.jw.org/seh. (Onani PHEMBANI PFUNDZIRO YA BHIBHLYA YAKUKHONDA LIPA pa tsamba yakutoma)
[Cidzindikiro capantsi]
a Bereya ukhali nzinda wa ku Masedonya wakale.
[Bokosi pa tsamba 9]
Umambo Wa Mulungu Usabvekanji Kwa Iye?
Mu pyaka pyacincino, ntsikana wa pyaka khumi pyakubalwa anacemerwa Folake aphembwa toera kulemba mphangwa za kuxikola mu kuphatisira nsolo wakuti: “Ninji Cinafuna Ine Kakamwe Mu Dziko Ino.” Folake asankhula kulemba kuti thangwi yanji asafuna kakamwe kudziwisa anango pya Umambo wa Mulungu.
Folake afokotoza: “Umambo wa Mulungu ndi utongi wandimomwene. Mbwenye iwo nkhabe kuoneka na maso—ngakhale munthu abvale maorko!”
Folake apitiriza kulemba thangwi ya nkhombo za Umambo zakuti asazidikhira kakamwe ntsogolo. Mukulonga pya nyatwa zingasi zakuti Umambo unadzazimalisa, iye alemba: “Ndisatsukwala ndingaona anthu akusowa pakukhala mbakhala m’miseu” kuphatanizambo “anang’ono anathabuka mbafa na njala pa dziko yonsene.” Iye athimiza: “Ndisakomerwambo ndingaleri Izaiya 65:21.” Mukulonga pya anthu anafuna kudzakhala pantsi pa utongi wa Umambo wa Mulungu, vesi ineyi isalonga: ‘Munthu onsene nyumba inamanga iye njace ene kwenda na kwenda, munda wa mauva unatceka iye, vinyu yace inadzamwiwa na iye.’
Folake alonga kuti iye asadikhirambo ndzidzi wakuti Mulungu, kubulukira mu Umambo wace, anadzamalisa mautenda onsene. Mu mphangwa zidalemba iye, Folake aphatisira mafala a Apokalipse 21:4. Lemba ineyi isalonga kuti Mulungu ‘anadzapukuta misozi yonsene m’maso mwawo. Kufa hakunadzakhalapo pontho tayu, nee kutsukwala, nee kulira, nee nyatwa.’ Iye amalisa tsamba yace mu kugomezera kuti cinthu cinafuna iye kakamwe mu dziko ino ndi kulonga pya Yahova na Umambo wace. Mwandimomwene, Umambo wa Mulungu uli pa mbuto yakufunika kakamwe muntima mwa ntsikana uyu!