“Ipi Pichiteni” Cikumbuso Cinafuna Kudzacitwa pa Ntsiku 5 ya Nthanda ya Bwinja

1. Thangwi yanji kucita Cikumbuso ndi kwakufunika?

¹ “Ipi pichiteni towera mundikumbukire.” (Luka 22:19) Na mafala anewa, Yezu akulumiza anyakutowerace kukumbuka ntsembe yakufa kwace. Na thangwi ya pinthu pyonsene pidakwanirisika kubulukira ku ciomboli, nkhabebve ntsiku yakufunika kakamwe kwa Akristu kupiringana ntsiku ya Cikumbuso cinacitwa pa caka. Nakuti caka cino Cikumbuso cinafuna kudzacitwa pa ntsiku 5 ya Bwinja ciri cifupi, tinapangiza tani kupereka takhuta kuna Yahova?—Akol. 3:15.

2. Tinapangiza tani kupereka takhuta ku Ciomboli kubulukira ku pfundziro na kunyerezera mwacidikhodikho?

² Khunganyikani: Kazinji kene tisakhunganyika ku pinthu pinaona ife kukhala pyakufunika. Tinakwanisa kukhunganya mitima yathu ku Cikumbuso mu kupfundza pabodzi ninga banja pinthu pidacitika mu ntsiku zakumalisa mu umaso wa Yezu pa dziko yapantsi na kupinyerezera mwacidikhodikho. (Esdra 7:10) Ndandanda wa Malemba a pyakucitika pya Yezu usagumanika mu kalendaryo na mu Examine as Escrituras Diariamente, mbwenye ndandanda wakukwana wa malemba anewa akubverana na makapitulu a m’bukhu O Maior Homem usagumanika pa A Sentinela ya 1.° de Fevereiro de 2011, matsamba 23-24.

3. Tinapangiza tani kupereka takhuta ku Cikumbuso mu kuthimizira kucita kwathu khundu mu utumiki?

³ Mwazani Mphangwa: Tinapangizambo kupereka kwathu takhuta ku Ciomboli mu kucita khundu mwakukwana mu utumiki. (Luka 6:45) Kutomera n’Sabudu, ntsiku 17 ya Murope, tinadzakhala na kampanya mu dziko yonsene yapantsi toera kucemera anthu anango kuti agumanike pa Cikumbuso. Munakwanisa kucinja ndandanda wanu toera kuphatisira ndzidzi uzinji mu utumiki, panango kukhala mpainiya wakuphedza? Thangwi yanji nkhabe kucedza pyenepi na piwalo pya banja pa Kulambira kwanu kwa Banja namaulo kunafuna kudza?

4. Ndi maphindu api anatambira ife pa kugumanika pa Cikumbuso?

⁴ Tisaphindula kakamwe thangwi yakugumanika kwathu pa Cikumbuso caka na caka! Kutsandzaya kwathu na kufuna kwathu Mulungu kusathimizirika munanyerezera ife mwacidikhodikho kupasa mwakudzala manja kwa Yahova mu kupereka Mwanace m’bodzi ekha ninga ciomboli. (Jwau 3:16; 1 Jwau 4:9, 10) Pyenepi pisatikulumiza tayu basi ene kukhala maso toera kucita pifuno pyathu. (2 Akor. 5:14, 15) Pisakulumizambo cifuno cathu cakusimba Yahova pakweca. (Sal. 102:19-21) Mwandimomwene, atumiki akupereka takhuta a Yahova akudikhira mwakutsandzaya mwai wakugumanika pa Cikumbuso pa ntsiku 5 ya Bwinja toera ‘kudziwisa anthu kufa kwa Mbuya.’—1 Akor. 11:26.