Kodi Munakwanisa Kuphindula Mungakhala Na Cisa Canu Cene?

1. Kodi ninji cisa ca munthu paekha?

¹ Kodi ninji cisa ca munthu paekha? M’mipingo yakuti iri na cisa cikulu, ndi cisa cinaphemba munthu, panango cakuti ciri cifupi na nyumba yace. Bukhu ya Organizados, pa tsamba 103 isafokotoza: “Kukhala na cisa cakuti ciri cifupi na nyumba yanu kunadzakuphedzani toera kuphatisira ndzidzi uzinji m’basa ya m’munda. Pontho, munakwanisa kuphemba m’mwazi mphangwa unango toera kuphata basa pabodzi mu cisa canu.”

2. Kodi cisa ca munthu paekha cinaphatisirwa tani toera kuphedzera kupereka umboni ninga nsoka?

² Toera Kuphedzera Kupereka Umboni Ninga Nsoka: Mungakhala na cisa canu cene cifupi na pa mbuto yanu ya basa, munakwanisa kupereka umboni pa ndzidzi wakupuma toera kudya peno mungakotoka mbamudzati kuenda kunyumba. Panango munakwanisa kucita pyenepi pabodzi na m’mwazi mphangwa wakuti asaphata basa cifupi. Mungaphemba cisa cakuti ciri duzi na nyumba yanu, imwe na banja yanu munakwanisa kuciphatisira toera kupereka umboni namasiku. Mbwenye khala nee mwaenda ku nsonkhano wa basa ya m’munda, ndi pyakuthema kucita phembero toera kuphemba citsogolero ca Yahova mbamudzati kutoma kumwaza mphangwa. (Afil. 4:6) Kusiyapo pyenepi, musafunika kuona mwadidi ndzidzi unaphatisira imwe toera kumwaza mphangwa mu cisa canu na ule unaphatisira imwe toera kuphedzera masasanyiro akumwaza mphangwa pabodzi na mpingo. Makamaka pakumala kwa sumana, pa ndzidzi wakuti azinji asagumanyikana toera kuenda m’basa ya m’munda, mphyadidi kuphedza nsoka wanu wa basa ya m’munda.

3. Kodi ndi maphindu api akukhala na cisa ca munthu paekha?

³ Maphindu: Khala muli na cisa canu cene, muli na mbuto toera kumwaza mphangwa pa ndzidzi onsene unakwanisa imwe. Munakwanisa kukhala na ndzidzi uzinji toera kumwaza mphangwa, pontho munaphatisira ndzidzi wakucepa toera kufika pacisa. Pyenepi pisaphedza anango kutumikira ninga apainiya akuphedza peno a ndzidzi onsene. Nakuti anaciro nyumba anapangiza cifuno ali cifupi na nyumba yanu, nee pinanentsa kubwerera toera kucita maulendo akubwereza na kucitisa mapfundziro a Bhibhlya. Anthu azinji asaona kuti kumwaza mphangwa mu cisa ca munthu paekha kusaaphedza kudziwana mwadidi na anaciro nyumba na kukulisa cinyindiro cawo, makamaka khala cisa ceneci cinakwaniswa kumwazwa mphangwa kazinji kene mbicidzati kuperekwa toera anango aciphembembo. Kodi kuphata basa mu cisa canu cene kunakuphedzani na banja yanu toera kukwanirisa makhundu onsene a utumiki wanu?​—2 Tim. 4:5, Tradução do Novo Mundo.