Sasanyirani Uxamwali Wanu na Yahova

PYAKA pyonsene mabira mazinji a Yahova asabwezereswa mu mpingo. Kusaoneka “kutsandzaya kakamwe kudzulu” nyakudawa m’bodzi angatcunyuka. (Luka 15:7, 10) Khala imwe mwabwezereswa mu mpingo, khalani na cinyindiro cakuti Yezu, aanju na Yahova asatsandzaya kakamwe thangwi yakubwerera pontho mu mpingo. Mbwenye mu ndzidzi unasasanyira imwe uxamwali wanu na Yahova, panango munathimbana na pinentso. Ndi pinentso pipi pyakuti panango munathimbana napyo, pontho ninji pinafuna kukuphedzani?

NDI PINENTSO PIPI PYAKUTI PANANGO MUNATHIMBANA NAPYO?

Abale na alongo azinji asapitiriza kutsukwala maseze abwezereswe mu mpingo. Panango musadziwa mabvero akhali na mambo Dhavidhi. Maseze iye akhadalekererwa madawo ace, iye alonga: ‘Madodo anga ndi mazinji kakamwe.’ (Masal. 40:12; 65:3) Munthu angabwerera kuna Yahova, asapitiriza kupasika mulando peno kukhala na manyadzo mu pyaka pizinji. Isabelle wakuti akhala kunja kwa mpingo mu pyaka pyakupiringana 20a alonga: “Kuna ine pikhali pyakunentsa kakamwe toera kukhulupira kuti Yahova andilekerera.” Mungakhala akutsukwala, munakhala pontho akufewa mwauzimu. (Mis. 24:10) Lekani kutawirisa kuti pyenepi picitike kuna imwe.

Anango asadzudzumika kuti panango nee anakwanisa kucita pinthu pyonsene pinafunika toera akhale pontho na uxamwali wakuwanga na Yahova. Pakumala kubwezereswa mu mpingo, Antoine alonga: “Ine ndikhadaduwala pinthu pizinji pidapfundza ine na pikhacita ine mbandidzati kubuluswa mu mpingo.” Azinji asapibva munjira ineyi, na thangwi ineyi iwo nee asawangisira toera kutumikira Yahova.

Mwacitsandzo, khala nyumba ya munthu yagwa na condzi peno na citeketeke panango iye anatsukwala anganyerezera ndzidzi unafuna kubvunga iye toera kuimanga pontho. Munjira ibodzi ene, khala uxamwali wanu na Yahova wamala thangwi mwacita madawo makulu, pyenepi pinaphemba kuti muwangisire kakamwe toera musasanyire uxamwali wanu na iye. Mbwenye imwe nee musafunika kucita pyenepi mwekhene.

Yahova alonga kuti: ‘Bwerani titongesane toera timalise nseru uli pakati pathu.’ (Iza. 1:18) Imwe mwawangisira kale toera ‘kumalisa miseru.’ Yahova asakufunani kakamwe thangwi yakucita pyenepi. Nakuti mwabwerera kuna Yahova, iye anakwanisa kuphatisira citsandzo canu toera kupangiza kuti Dyabo ndi nyauthambi.—Mis. 27:11.

Kubwerera kuna Yahova kwakuphedzani toera munfendedzere cifupi, pontho iye asapikira kuti anakufendedzeranimbo cifupi. (Tiya. 4:8) Ndi pyadidi kuna anango kuona kuti imwe mwabwerera mu mpingo wa Yahova, mbwenye musafunika kupitiriza kuwangisa ufuni wanu kuna Babanu na Xamwali wanu Yahova. Mphapo munacita tani pyenepi?

KHAZIKISANI PIFUNO PYAKUTI MUNAKWANISA KUPIKWANIRISA

Yeserani kukhazikisa pifuno pyakuti munakwanisa kupikwanirisa. Imwe muciri kukumbuka pinthu pidapfundza imwe thangwi ya Yahova na pikiro idacita iye thangwi ya Paraizu. Mbwenye cincino imwe musafunika kumwaza mphangwa ndzidzi onsene, kugumanika pa misonkhano mwakukhonda phonya na kucedza pabodzi na abale na alongo anu. Onani pifuno pingasi pyakuti munakwanisa kupikhazikisa.

Cedzani na Yahova kazinji kene. Yahova asabvesesa kuti mungapitiriza kupasika mulando thangwi ya pinthu pyakuipa pidacita imwe pinakhala pyakunentsa kucita phembero kuna iye. (Aroma 8:26) Natenepa “pitirizani kucita phembero” mbamupanga Yahova kuti imwe musafuna kakamwe kukhala axamwali ace. (Aroma 12:12) Andrej alonga: “Ine ndikhapasika mulando kakamwe, pontho ndikhali na manyadzo. Mbwenye pakumala kucita phembero mabvero anewa akhapunguka. Natenepa ndikhakwanisa kukhala pontho na ntendere wa m’manyerezero.” Khala imwe nee musadziwa pinthu pinafuna kulonga imwe m’phembero, onani maphembero anapangiza kutcunyuka kwa Mambo Dhavidhi anagumanika m’bukhu ya Masalmo 51 na 65.

Pfundzani Bhibhlya ndzidzi onsene. Pyenepi pinakuphedzani toera kukhala na cikhulupiro cakuwanga, pontho pinakuphedzani toera kufuna kakamwe Yahova. (Masal. 19:7-11) Felipe alonga: “Nakuti nee ndikhali na ndandanda yakuleri na kupfundza Bhibhlya ine ndatoma kufewa mwauzimu mbanditsukwalisa Yahova. Natenepa ine ndawangisira toera kucita pfundziro ya munthu paekha mwakukhonda phonya thangwi nee ndikhafuna kutsukwalisa pontho Yahova.” Imwe munakwanisambo kucita pyenepi. Khala imwe musafuna ciphedzo toera kusankhula misolo yakuti munaiphatisira pa pfundziro yanu ya munthu paekha, munakwanisa kuphemba xamwali wanu wakuwanga mwauzimu toera akuphedzeni.

Sasanyirani uxamwali wanu na abale na alongo. Abale na alongo anango angabwezereswa mu mpingo, asadzudzumika kuti anango anaaona mwakuipa. Larissa alonga: “Ine ndikhali na manyadzo kakamwe. Ine ndikhapibva ninga ndatsukwalisa abale na alongo mu mpingo. Ine ndakhala na mabvero anewa mu ndzidzi uzinji.” Khalani na cinyindiro cakuti akulu a mpingo na abale anango akukola mwauzimu ali dzololo toera kukuphedzani kusasanyira uxamwali wanu na Yahova. (Onani bokosi ya nsolo wakuti “Kodi Akulu a Mpingo Asafunika Kucitanji?”) Iwo atsandzaya kakamwe thangwi yakubwerera kwanu kuna Yahova, pontho asafuna kuti imwe mukhale akutsandzaya.—Mis. 17:17.

Munakwanisa tani kukhala na uxamwali wakuwanga na abale na alongo mu mpingo? Citani mwakukwana mabasa onsene anacita abale na alongo pa mpingo, ninga kugumanika pa misonkhano na kumwaza mphangwa mwakukhonda phonya. Kodi pyenepi pinaphedza? Felix alonga: “Abale na alongo mu mpingo anditambira mwadidi pidabwezereswa ine. Iwo andiphedza toera kubvesesa kuti ndisacita pontho khundu ya mpingo, kuti ndalekererwa na Yahova, pontho pyenepi pyandiphedza toera ndipitirize kutumikira Yahova.”—Onani bokosi ya nsolo wakuti “Kodi Imwe Musafunika Kucitanji?”

LEKANI KUBWERERA NDULI!

Sathani anapitiriza kukubwereserani nyatwa toera afewese cikhulupiro canu mu ndzidzi unasasanyira imwe uxamwali wanu na Yahova. (Luka 4:13) Khalani akutonga toera mupitirize kukhala akuwanga mwauzimu.

Thangwi ya mabira ace, Yahova alonga: ‘Ine ndinadzasaka bira idatayika, ndinadzabweza ire idathaukirana na nkumbi, ire idaphekeka ndinadzaipyangirira na nguwo, pontho ndinadzawangisa bira idasowa mphambvu.’ (Ezek. 34:16) Yahova aphedza abale na alongo azinji toera kusasanyira uxamwali wawo na iye. Khalani na cinyindiro cakuti iye asafuna kukuphedzani toera mupitirize kukhala na uxamwali wakuwanga kakamwe na iye.

Kodi Akulu a Mpingo Asafunika Kucitanji?

Akulu a mpingo anakwanisa kucita pizinji toera kuphedza amwazi mphangwa adabwezereswa mu mpingo kuti awangise uxamwali wawo na Yahova. Onani pinthu pingasi pyakuti iwo asafunika kupicita.

Apaseni cinyindiro. Mpostolo Paulu akhadziwa kuti munthu adabwezereswa mu mpingo anakwanisa ‘kukundwa na kutsukwala kakamwe.’ (2 Akor. 2:7) Panango iye anapasika mulando kazinji kene. Paulu apanga abale mu mpingo kuti: “Musafunika kumulekerera na ntima onsene, mbamum’balangaza.” Anthu adabwezereswa mu mpingo asafunika kupaswa cinyindiro cakuti Yahova pabodzi na abale na alongo mu mpingo asaafuna kakamwe. Akulu a mpingo angaasimba na kuaphedza kazinji kene, pyenepi pinaaphedza toera akhonde kutsukwala.

Citani phembero pabodzi na iwo. “Phembero yakudembetera inacitwa na munthu wakulungama isaphedza kakamwe.” (Tiya. 5:16) Larissa adalongwa mu nsolo uno alonga: “Ine ndapanga akulu a mpingo pinthu pikhapenula ine na pikhagopa ine. Iwo acita phembero pabodzi na ine, pontho thangwi ya ine. Buluka penepo ine ndabvesesa kuti akulu a mpingo nee akhadaipirwa na ine. Mbwenye iwo akhafuna kundiphedza toera ndikhale pontho na uxamwali wakuwanga na Yahova.” Theo alonga: “Maphembero a akulu a mpingo andipasa cinyindiro cakuti mwandimomwene Yahova asandifuna, pontho asaona pinthu pyadidi pinacita ine, tayu basi ene pinthu pyakuipa.”

Citani uxamwali na iwo. Anthu Adabwezereswa asafuna axamwali mu mpingo. Nkulu wa mpingo anacemerwa Justin alonga: “Pingakwanisika, aphembeni toera amwaze mphangwa pabodzi na imwe, pontho ndokoni kaaone m’manyumba mwawo. Ndi pyakufunika kakamwe kucita uxamwali na iwo!” Nkulu wa mpingo unango anacemerwa Henry alonga: “Abale na alongo angaona kuti akulu a mpingo ali kucita uxamwali na anthu adabwezereswa mu mpingo, iwo anayeserambo kucita pibodzi pyene.”

Aphedzeni toera apfundze Bhibhlya ndzidzi onsene. Xamwali wakuwanga mwauzimu, anakwanisa kuphedza munthu adabwezereswa mu mpingo toera akhale na nsambo wakupfundza Bhibhlya ndzidzi onsene. Nkulu wa mpingo unango anacemerwa Darko alonga: “Ine ndisakomerwa na kupanga anango pinthu pinapfundza ine pa pfundziro yanga ya munthu paekha, pontho ndisaapanga kuti ndisakomerwa kakamwe na kupfundza Bhibhlya. Kusiyapo pyenepi, ine ndisasankhula nsolo ubodzi wa kuwangisa toera kupfundza nawo pabodzi.” Nkulu wa mpingo unango anacemerwa Clayton alonga: “Ine ndisaawangisa toera apfundze mphangwa za m’Bhibhlya zinalonga pya anthu akuti acitikirwambo na pinthu pyakulandana na pyawo, pontho toera aone kuti pyenepi pinaaphedza tani.”

Khalani nkumbizi wadidi. Anthu adabwezereswa mu mpingo akhaona akulu a mpingo ninga anyakutonga miseru. Mbwenye cincino iwo asafunika kuaona ninga akumbizi. (Yer. 23:4) Abvesereni mwakucimbiza, pontho asimbeni. Cedzani nawo kazinji kene. Onani pinacita nkulu wa mpingo unango anacemerwa Marcus angacedzera abale na alongo. Iye alonga: “Ife tisaleri lemba ibodzi, tisaasimba, pontho tisaapasa cinyindiro cakuti ife tiri akutsandzaya kakamwe thangwi ya kuwangisira kwawo toera kubwerera kuna Yahova, pontho Yahova ali wakutsandzayambo kakamwe. Tingamala kucedzera m’bale m’bodzi na m’bodzi, ife tisampanga ntsiku inafuna ife kuncedzera pontho.”

a Madzina anango mu nsolo uno acinjwa.