Nzuati Yeɛ Odikyɛ Ɛkɔso Sua Yehowa Nwo Nikye Ɔ?

1. Sɛɛ yeɛ Bible ne bɔ ɛkɔhɔso kosua ne kɔboka wɔ ɔ?

Aprowaa biala nne yenwo kyɛ, Bible nu mvitiaseɛ ngyerɛkyerɛ bɔ yasusu yenwo ne amaa ɔdɔ bɔ ele ma Yehowa nanu ayɛ se. Odikyɛ ɛkɔso sua nikye kyɛbɔ ɔkɔyɛ a ɔdɔ bɔ anya ye nanu kɔhɔ so kɔyɛ se ɔ. (1 Petro 2:2) Anyelasoɛ bɔ ele ye kyɛ ekonya daa ngõa ne gyi Nyameɛpiri Dwirɛ ne bɔ ɛkɔhɔ so kosua na apingye ye naso.​—Kenga Yohane 17:3; Yuudu 21.

Mmerɛ bɔ ɛkɔso nya Nyameɛpiri nwo nimdeɛ ne, wɔ gyidie koso kɔyɛ piri. Gyidie kɔboka wɔ maa ɛkɔyɛ bɔ ɔsɔ Nyameɛpiri nye ɔ. (Hebrifoɛ 11:1, 6) Ɔkɔboka wɔ maa ɛkɔsesa na ayɛ nzakrae ahoroɛ bɔ yenwo hia wɔ w’asetena nu ɔ.​—Kenga Asomafoɛ Ne Nnwumaa 3:19.

2. Ɔkɔyɛ sɛɛ na afoforɛ anya Nyameɛpiri nwo nimdeɛ bɔ ele ye naso mvasoɛ ɔ?

Kyɛbɔ ebiala kuro kyɛ ɔkɔhã edwirɛ paa bie bɔ wate nwo dwirɛ kohyire ebie ne—sɔ ala yeɛ wɔnye kɔgye yenwo kyɛ ɛkɔhã bɔ asua ne bie kohyire afoforɛ ɔ. Mmerɛ bɔ ɛkɔ so sua Bible ne, ekonwu kyɛbɔ ɛkɔfa Bible ne kohyirehyire Yehowa nwo nikyee bɔ esua, ɔne gyidie bɔ anyae wɔ edwirɛ páa bɔ anwui nanu ɔ.​—Kenga Romanfoɛ 10:13-15.

Mmeni pẽe nala hyɛ yebo kã edwirɛ páa ne bie kyire bɛ nnamvomɔ ne b’abusuafoɛ. Ma wɔnye la berɛ. Kyɛ ahãa ɛkɔhã kohyire bɛ kyɛ bɛsoen ne ttemayée ne, kã Nyameɛpiri bɔhyɛ ahoroɛ nwo dwirɛ mmom. Bieku koso ne, hyɛ ye nzorɛ kyɛ sɛ yɛda suban paa adi a ɔkɔmaa mmenia nye kɔgye edwirɛ nanwo tra bɔ yɛkɔhã ɔ.​—Kenga 2 Timoteo 2:24, 25.

3. Abusuabɔ beni yeɛ ɛkɔhora ne Nyameɛpiri konya ɔ?

Sɛ esua Nyameɛpiri dwirɛ ne a, ɔkɔboka wɔ maa ekonyi wɔ honhom nu. Mmerɛ kɔ so ne, ɛne Yehowa konya abusuabɔ sorongo bie. Na ɛkɔhora koboka Yehowa abusua naso na aayɛ ye deɛ.​—Kenga 2 Korintofoɛ 6:18.

4. Ɛkɔyɛ sɛɛ na ahora anya ngɔsoɛ mmerɛ mukoraati?

Sɛ esua Nyameɛpiri Dwirɛ a, ɛkɔhora konya ngɔsoɛ wɔ ye soen nu. (Hebrifoɛ 5:13, 14) Kã kyire Yehowa Danzefoɛ bie, na ɔberɛ wɔ Dɛn na Yebetumi Asua Afi Bible Mu? nwomaa ne bie, na ɔboka wɔ ma ɛmɔsua Bible ne. Mmerɛ dodoɔ bɔ esua Nyameɛpiri Dwirɛ ne, dodoɔ nala yeɛ okosi wɔ ye wɔ w’abrabɔ nu ɔ.​—Kenga Edwein 1:1-3; 73:27, 28.

Edwirɛ páa ne fi Yehowa bɔ ɔte anigye Nyameɛpiri ne berɛ. Sɛ ɛne ye mmenia bɔ a, ɔkɔboka wɔ maa ekopingye ye paa. (Hebrifoɛ 10:24, 25) Sɛ ɛkɔ so ala bɔ mmɔden kyɛ ɛkɔyɛ bɔ ɔsɔ Yehowa nye a, na ekyire kyɛ ɛpena ngõa angasaa ne bie—daa ngoa ne. Naholɛ nu ne, bɔ ɔte páa tra biala yeɛ ole kyɛ ɛkɔpingye Nyameɛpiri ɔ.​—Kenga 1 Timoteo 1:11; 6:19.