Atẽe Beni Aso Yeɛ Yenya Bible Nnyinasoɛdwirɛ So Mvasoɛ Ɔ?

1. Nzuati yeɛ yehia akwangyerɛ ɔ?

Yɛ bɔfoɛ ne se nworɛ tra yɛ. Ɔnate kyɛ ɔte Baba bɔ ole ɔdɔ nati ɔdwene yɛnwo. Afei koso wammɔ yɛ kyɛ yɛhwẽ yɛnwo yefi yenwo na yɛyɛ bɔ yɛbɔbɔdeinn yekuro ɔ. (Yeremia 10:23) Kyɛbɔ ngwalaa hia b’awofoɛ akwangyerɛ ne, sɔ ala yeɛ yɛ mukoraati koso yehia Nyameɛpiri akwangyerɛ ɔ. (Yesaia 48:17, 18) Bible nnyinasoɛdwirɛ maa yenya akwangyerɛ, ɛhe te akyɛdeɛ bɔ ofi Nyameɛpiri berɛ ɔ.​—Kenga 2 Timoteo 3:16.

Yehowa mmaraa ne ye nnyinasoɛdwirɛ boka yɛ maa yenwu kyɛbɔ yɛkɔbɔ yɛ bra ɛnnɛ, ɔne bɔ yɛkɔyɛ na yanya daa ngoã kyẽabie ɔ. Ɔnate kyɛ Nyameɛpiri yeɛ ɔbɔle yɛ nati, odikyɛ yede ye akwangyerɛ yɛto nu na yekyire yenwo anisɔ.​—Kenga Edwein 19:7, 11; Nyekyire 4:11.

2. Bible nnyinasoɛdwirɛ yeɛ ole nzu?

Bible nnyinasoɛdwirɛ te naholɛ dwirɛ bɔ ɔnzesa. Nakoso mmaraa de, ɔkã nikyee pɔtee bie ngome nwo dwirɛ. (Deuteronomium 22:8) Odikyɛ yɛfa y’adwene yedi dwumaa na yahora yanwu kyɛbɔ yɛkɔfa nnyinasoɛdwirɛ bie yɛkɔyɛ adwuma wɔ tebea pɔtẽe bie nu ɔ. (Anyandera 2:10-12) Kyɛ nneasoɛ ne, Bible ne kã kyɛ ngõa te akyɛdeɛ bɔ ofi Nyameɛpiri berɛ. Sɔ nnyinasoɛdwirɛ he kɔhora kɔboka yɛ wɔ adwuma nu, awuro nu, ɔne mmerɛ bɔ yetu atẽe ɔ. Ɔboka yɛ maa mmerɛ biala yenea yɛnwo yé.​—Kenga Asomafoɛ Ne Nnwumaa 17:28.

3. Nnyinasoɛdwirɛ nyɔ beni yeɛ yenwo hia paa ɔ?

Yesu hãne nnyinasoɛdwirɛ nyɔ bie bɔ yenwo hia paa nwo dwirɛ. Bɔ olimoa ne maa yenwu y’asetena atirimbɔ—yeɛ ole kyɛ yekonwu Nyameɛpiri, yɛkɔlɔ ye, na yasõ ye naholɛ nu. Odikyɛ yesusu sɔ nnyinasoɛdwirɛ bɔ olimoa he nwo wɔ yɛ gyinaeɛ biala bɔ yekosi nu ɔ. (Anyandera 3:6) Bɛbɔ bɛfa sɔ nnyinasoɛdwirɛ he bɛyɛ adwuma ne bayɛ Nyameɛpiri nnamvo, benya naholɛ anigye, ɔne daa ngõa koso.​—Kenga Mateo 22:36-38.

Nnyinasoɛdwirɛ bɔ ɔtɔ so nyɔ ne maa yɛne afoforɛ tena asomdwee nu. (1 Korintofoɛ 13:4-7) Sɛ yɛkɔhora yɛkɔfa nnyinasoɛdwirɛ bɔ ɔtɔ so nyɔ he yɛkɔyɛ adwuma a, sana yesuasua kyɛbɔ Nyameɛpiri ne mmenia di ne.​—Kenga Mateo 7:12; 22:39, 40.

4. Sɛɛ yeɛ yenya Bible nnyinasoɛdwirɛ so mvasoɛ ɔ?

Bible nnyinasoɛdwirɛ boka mmusua maa benwu kyɛbɔ bɛkɔbɔ nu bɛkɔtena ɔdɔ nu ɔ. (Kolosefoɛ 3:12-14) Nnyinasoɛdwirɛ bie wɔ Nyameɛpiri Dwirɛ nu bɔ ɔbɔ mmusua nwo nwaen ɔ, yeɛ ole kyɛ odikyɛ agyaafoɛ kɔ so tena berɛ daa.​—Kenga Genesis 2:24.

Sɛ yɛfa Bible nu dwirɛ yɛyɛ adwuma a, ɔkɔhora kɔboka yɛ wɔ awoɔnaen nu, na wamaa y’ahone atɔ yɛ kunu. Kyɛ nneasoɛ ne, adwumawuramɔ nye taa gye mmenia bɔ bɛfa Bible nnyinasoɛdwirɛ bɛyɛ adwuma, maa yeti bedi naholɛ na bɛmva b’adwuma benni angorɛ nwo paa. (Anyandera 10:4, 26; Hebrifoɛ 13:18) Nyameɛpiri Dwirɛ ne sa kyirekyire yɛ kyɛ yɛma yɛnye sɔ bɔ yele ye ɔ, na yɛma yɛne Nyameɛpiri afĩa abiangoɛ ne nwo hia yɛ ɔtra awoɔnaen nu nningyein.​—Kenga Mateo 6:24, 25, 33; 1 Timoteo 6:8-10.

Sɛ yɛfa Bible nnyinasoɛdwirɛ yɛbɔ yɛ bra a, ɔkɔhora kɔbɔ y’akwanwosaen nwo nwaen koso. (Anyandera 14:30; 22:24, 25) Kyɛ nneasoɛ ne, sɛ yɛfa Nyameɛpiri mmaraa bɔ ɔfa nzãa nonɛ nwo ne yɛyɛ adwuma a, ɔkɔhora kɔbɔ yɛnwo waen kofi ewue anwoyerɛ, ɔne asiane ahoroɛ nwo. (Anyandera 23:20) Yehowa nzi y’atẽe wɔ nzãa bɔ yɛkɔno nanwo, nakoso ɔmbena kyɛ yɛno maa ɔbo so. (Edwein 104:15; 1 Korintofoɛ 6:10) Nyameɛpiri nnyinasoɛdwirɛ boka yɛ maa yɛnea yɛ nneyɛɛ ɔne yɛ nzusuyɛɛ yé. (Edwein 119:97-100) Nakoso, nná kyɛbɔ naholɛ Kristofoɛ kɔfa Nyameɛpiri gyinapɛn kɔbɔ bɛ bra na waboka bɛ ngome ti yeɛ bɛyɛ sɔ ɔ, mmom ne, bɛyɛ sɔ bɛfa bɛhyɛ Yehowa animnyam.​—Kenga Mateo 5:14-16.