Sɛ Ɛkɔ JW.ORG So A, Nningyein Bɔ Ɔwɔ Mvitiaseɛ Berɛ Ne, Fa Yɛ Adwuma Wɔ Asɛnga Nu

Sɛ ɛkɔ jw.org wɛbsait naso a, vidio ne nningyein pẽe yeɛ bafa bagua mvitiaseɛ berɛ ɔ. Bayɛ sɔ nningyein ne wɔ atẽe bie so bɔ ɔkɔmaa mmenia bɔ bekuro nahorɛ ne, bɛnye kɔgye yenwo ɔ. (Aso 13:48) Edwirɛ bɔ wasisi ɛlɛsaen wɔ ewiase nanu, bɔ ɛyɛ a mmenia bɔ yenwo ngɔmmɔ ne, bɛtaa bɛfa bɛto mvitiaseɛ berɛ.

Nningyein bɔ ɔwɔ jw.org mvitiaseɛ berɛ ne, ɛkɔyɛ sɛɛ ná afa aboka mmenia wɔ asɛnga nu?

• Ɛyɛ a taa kɔ wɛbsait naso. Bɔ mmɔden nwu nningyein bɔ bafa bagua berɛ ɛlɛsaen ne, na nea kyɛbɔ ɛkɔfa kɔboka ebie bɔ yenye gye nahorɛ nanwo ɔ. (Sɛ ɛpena kyɛ enwu nningyein bɔ bafa bagua berɛ ɛlɛsaen ne a, mia anaa klik “Nea Edwirɛ Hemɔ Koso.”) Sɛ ɛtaa kɔ wɛbsait naso a, ɔkɔboka wɔ maa daabiala ekonya edwirɛ foforɛ bɔ ɛkɔfa kɔboka mmenia wɔ asɛnga nu ɔ.

• Vidio ne edwirɛ ahoroɛ bɔ ɔwɔ mvitiaseɛ berɛ ne, ɛyɛ a fa hyɛ ngɔmmɔbɔ bo wɔ asɛnga nu. Nningyein bɔ ogua berɛ ne, ɔboka yɛ maa yenwu edwirɛ bɔ yɛkã ye wɔ asɛnga nu a mmenia nye kɔgye yenwo ɔ.

• Ɛyɛ a, fa mvitiaseɛ berɛ dwirɛ ne kyire mmenia wɔ asɛnga nu. Fa nningyein bɔ ogua berɛ ne bie kyire sona ne, na kyire ye kyɛbɔ ye bɔbɔ kɔhora kɔhɔ berɛ ɔ.

• Ɛyɛ a fa link ne sɛnde mmenia. Mmeni pẽe nguro kyɛ bɛne yɛ kɔbɔ ngɔmmɔ, nakoso bɛnye gye yenwo kyɛ bɛkɔhɔ yɛ wɛbsait naso. Yeti bɛbɔ bɛnye gye Bible nu dwirɛ nanwo ne, ɛyɛ a bɔ mmɔden fa mvitiaseɛ berɛ link ne sɛnde bɛ. Afei koso, vidio ne nningyein ahoroɛ bɔ ɔwɔ berɛ ne, ɛkɔhora kɔfa enu bie nwo link kɔsɛnde bɛ.