Nhwehwɛmuɛ Ma Abrabɔ Ne Asɛnga Adesũa Nwomaa
© 2023 Watch Tower Bible and Tract Society of Pennsylvania
JANUARY 1-7
NYAMEƐ DWIRƐ NANU ASUADEƐ | YOB 32-33
Kyekye Bɛbɔ Adwenedwene Ahyɛ Bɛ So Ne Wora
it-1 710
Elihu
Né Elihu te ebie bɔ ɔkã nahorɛ, na wanyɛ y’adwene kyɛ ɔkɔhã edwirɛ bie bɔ ɔkɔyɛ mmenia so anu fɛ mbaen ɔ. Elihu maa Yob nwuni kyɛ ɔtte sona titire biala, na mmom ɔte kyɛ Yob ala. Ɔmaa ɔtele yebo kyɛ bemu bɛte nnɛterɛ, na Yehowa yeɛ Ɔbɔle bɛ ɔ. Ɔmaa onwuni kyɛ ɔte ye damvo bɔ okuro ye dwirɛ ɔ, na atẽe bɔ ɔfale so ne ye dwudwole nati, ɔmaa y’ahõne tɔle ye kunu. Afei koso, Elihu ngome twé yeɛ ɔbɔle Yob dumaa fa frɛle ye ɔ. Elifase, Bildade, ɔne Sofa de banyɛ sɔ.—Yob 32:21, 22; 33:1, 6.
w14 6/15 25 ¶8-10
Kyɛbɔ Yehowa Nwu Ɔhaw Bɔ Aliemaamɔ Fa Nu Ne, Sɔ Yeɛ Wɔkoso Enwu Ye Anaa?
Ɛnnɛ, yeliemamɔ pẽe yeɛ anwonyerɛ teetee bɛ ɔ. Benu biemɔ koso, b’abusũafoɛ nzõ Yehowa, na ebiemɔ wɔ berɛ a, adwenedwene ahyɛ bɛ so. Yede, nzu yeɛ ɔkɔboka yɛ maa yekonwu bɛ anwumvoin ɔ? Kae kyɛ, bɔ wato bɛ ne ebie kɔhora kɔto wɔ. Sɛ ɛmaa ɛhe tena w’adwene nu a, ɔkɔmaa ɛkɔyɛ bɔ ɛkɔhora biala kɔboka bɛ. Edwirɛ bɔ yɛkã ye, ebie tole Yisraelfoɛ nemɔ. Egyptfoɛ nemɔ tane bɛnye paa. Yeti, mmerɛ bɔ né waha kãa maa bedwu bɔhyɛ aseɛ naso ne, Yehowa hãhyirele bɛ kyɛ ‘nnɛmaa bɛ sa bo yɛ se’ wɔ beliemamɔ so. Né Yehowa nea atẽe kyɛ bɛkɔboka bɛbɔ bellé anwoserɛ, ɔne bɛbɔ wahia bɛ ne.—Deut. 15:7, 11; Lew. 25:35-38.
Sɛ yeliema bie nwo kyere ye a, nna bɔ ohia yeɛ ole kyɛ ekonwu nikyehorɛ tibɔ wamaa ɔhaw ne awa ye so ɔ. Anaa, nna sɔ mmerɛ ne yeɛ ɛkwaahã kyire ye kyɛ, ye bɔbɔ yeɛ wamaa ɔhaw ne awa ye so ɔ. Mmom ne, bɔ ohia paa yeɛ ole kyɛ ɛkɔboka ye maa ɔkɔfa anigye kɔsõ Yehowa ɔ. (Yob 33:6, 7; Mat. 7:1) Má yɛfa mvandoho he yehyirehyire edwirɛ nanu: Yɛfa ye kyɛ ebie afa moto afi ase maa bafa ye bahɔ hɔspitel. Sɛ bɛfa sona ne bedwu berɛ a, aso yenwo hia kyɛ dɔkotafoɛ nemɔ kobisa ye kyɛ, ye yeɛ ɔmaa asedɛnt ne wale anaa? Daabi, ofikyɛ sona ne owu. Yeti bɛkɔbɔ mmɔden kyɛ bɛkɔyɛ ye ayire ndɛ. Sɔ ala yeɛ yɛkoso, sɛ yeliema bie yɛ nikyee bie maa ɔkɔfa ɔhaw bato ye so po a, odikyɛ yɛfa Bible ne yɛkyekye ye wora. Ɛhẽne yeɛ odikyɛ yedimoa yɛyɛ ɔ.—Kenga 1 Tɛsalonikafoɛ 5:14.
Sɛ yɛfa yɛnye yɛto ase yɛnea bɔ ɔkɔso wɔ yeliemamɔ asetena nu a, ɔkɔboka yɛ maa yɛkɔte ɔhaw bɔ bɛfa nu nabo. Bɔ ɔkɔyɛ ná yate bɔ yɛka nabo ne, susu yeliema mmrasua bɔ behũmɔ nzõ Yehowa, ná bɛtane bɛnye nanwo nea. Sɛ enwu bɛ a, ɛkora nwu kyɛ bɛfɛ, na bedwirɛ yɛ anwumvo paa. Nakoso ɔmva yenwo ne bɔ bɛfa nu ne, ɛkora nwu kyɛ bele gyidie ne akokoduro. Sɛ enwu ye sɔ a, ɔmma wɔnye ngye anaa? Benu biemɔ koso, bɛ ne bɛ mmaamɔ ngome yeɛ bɛba adesũa ɔ, nakoso bɛndo adesũa nu. Sɛ enwu gyidie bɔ bele ye ne a, ɛyɛ a ɔnhyɛ wɔ ngunaen anaa? Na mmrandeɛ ne ndaluwa bɔ bɛkɔso bedi nahorɛ bɛma Yehowa, ɔmva yenwo kyɛ beyia ɔhaw wɔ sukuu nu ne koso ɛ? Sɛ yɛto yɛ boase yesusu bɔ bɛfa nu nanwo a, yekonwu kyɛ bɛte “gyidie nu anwonyafoɛ,” kyire kyɛ bele gyidie tekyɛ bɛbɔ nningyein kɔyé ma bɛ nala.—Yak. 2:5.
w20.03 23 ¶17-18
Mmerɛ Beni Yeɛ Odikyɛ Yedwudwo Ɔ?
Yob nnamvo nza bɔ bɛɛsrale ye ne, né Elihu boka so. Elihu bɔ yɛkã yenwo dwirɛ ne, né ofi Abraham abusũa nu. Mmerɛ bɔ Yob ne ye nnamvo nza nemɔ bedwudwo ne, ɔyɛle dinn tiele bɛ. Nzu yeɛ ɔmaa yenwu ye sɔ ɔ? Yeɛ ole kyɛ, ɔhora fale afutue bɔ ɔte kama mane Yob, na ɛhẽne yeɛ ɔbokale ye maa ɔsesãne adwene bɔ ɔttemayé bɔ né ole ye ne. (Yob 33:1, 6, 17) Sɛ yɛnea afutue bɔ Elihu famane Yob ne a, ɔmaa yenwu kyɛ bɔ né ohia ye paa yeɛ ole kyɛ ɔkɔhyɛ Yehowa animnyam. (Yob 32:21, 22; 37:23, 24) Elihu dwirɛ ne maa yenwu kyɛ sɛ ebie dwudwo a, odikyɛ yɛyɛ dinn yetie kora ná yadwudwo. (Yak. 1:19) Afei koso, sɛ yɛfa afutue yɛma ebie a, odikyɛ yɛfa yegyina Bible naso. Sɛ yɛyɛ sɔ a, okyire kyɛ yɛfa animnyam yɛma Yehowa. Ɛhẽne yeɛ odikyɛ yɛmaa yenwo hia yɛ paa ɔ.
Yehowa ama yɛ akyɛdeɛ bie, yeɛ ole kyɛbɔ yɛkora yedwudwo ne. Yede, yɛkɔyɛ sɛɛ ná yafa sɔ akyɛdeɛ ne yayɛ adwuma yé? Yeɛ ole kyɛ yekonwu mmerɛ bɔ odikyɛ yedwudwo ɔ. Edwirɛ biala bɔ yɛpena kyɛ yɛkã ne koso, odikyɛ yɛdwene yenwo yé kora ná yahã. Nyameɛ honhom hãne Solomon maa ɔhworɔle kyɛ: “Ɛkã edwirɛ wɔ mmerɛ bɔ ɔfata nu a, ɔte kyɛ sikaa kɔkorɛ bɔ bafa bali adwii bagua ɛdwetɛ nu ɔ.” (Any. 25:11) Sɛ ebie dwudwo na yɛto yɛ boase yetie, na yɛdwene edwirɛ bɔ yɛkɔhã nanwo yé a, yɛnoa dwirɛ kɔyɛ tekyɛ sikaa kɔkorɛ bɔ bafa bali adwii ɔ. Ɛhe kyire kyɛ yɛnoa dwudwolɛ kɔyɛ fɛ, na ɔkɔboka sona bɔ otie ne koso. Sɛ yɛfa sɔ afutue ne yɛyɛ adwuma a, ɔkɔmaa yɛnoa dwudwolɛ kɔhyɛ mmenia ngunaen, na Yehowa koso nye kɔgye. (Any. 23:15; Ɛfe. 4:29) Sɛ yɛyɛ sɔ a, okyire kyɛ akyɛdeɛ bɔ yeɛ ole dwudwolɛ bɔ Yehowa afa ama yɛ ne, yɛnye sɔ.
Bible Nu Dwirɛ Titire
w13 1/15 19 ¶10
Kɔso Pingyé Yehowa
Yenu biala pena kyɛ yenwo yɛ nyemene. Nakoso sɛ yɛbɔ aworowaa a, kyɛbɔ yɛ nwonaen sesã ne, yɛngɔhora yɛngɔyɛ yenwo hwee. Yeti ɔnzɛkyɛ yɛha yɛnwo pẽe. Ofikyɛ sɔ nzakrayɛɛ ne biemɔ po wɔ berɛ a, ɔmaa mmenia bu yɛ, na ebie koso yɛ nyemene paa. Bible ne po kã kyɛ: “Egyein te animnyam abotire, sɛ ɔba kyɛ enya ye wɔ tenenee bra nu a.” (Any. 16:31) Ɛhe kyire kyɛ, sɛ yɛmaa y’abrabɔ yɛ kama a, ɛhẽne yeɛ ɔmaa yɛnwo yɛ nyemene wɔ Yehowa nye so ɔ. (Kenga 1 Petro 3:3, 4.) Sɛ sɔ yeɛ edwirɛ ne te de a, ɛnea a ɔte pá kyɛ yɛkɔha yɛnwo yɛkɔyɛ oprehyen, anaa yɛkɔnõ ayire bie kyɛbɔ ɔkɔyɛ a, yɛnwo naen kɔyɛ nyemene tekyɛ abrandeɛ anaa taluwa anaa? Sɛ yɛyɛ nikyee bie bɔ ɔte sɔ a, ɔkɔhora kɔfa ɔhaw pẽe po kɔbrɛ yɛ. Yemia sɛ ebie nde apɔ oo, y’afoɛ ahɔ anyunu oo, ɔkɔhora konya “AWURADE nu anigye,” anaa ɔkɔhora kɔsõ Yehowa maa yenye kɔgye. (Neh. 8:10) Sɛ yɛkɔ ewiase foforɛ nanu a, sɔ mmerɛ ne angome yeɛ yɛnwonaen kɔyɛ frɔmfrɔm, na yɛnwo ayɛ nyemene paa ɔ. (Yob 33:25; Yes. 33:24) Yeti kodwu kyɛ sɔ mmerɛ ne kɔwa ne, nnɛha wɔnwo pẽe wɔ wɔ nipadua nwo, na mmom anwoserɛ kãa bɔ ele ye ne, fa sõ Yehowa. Ofikyɛ ɛhẽne yeɛ mvasoɛ wɔ so paa ɔ.—1 Tim. 4:8.
JANUARY 8-14
NYAMEƐ DWIRƐ NANU ASUADEƐ | YOB 34-35
Mmerɛ Bɔ Besisi Wɔ Ɔ
wp19.1 8 ¶2
Subaen Beni Yeɛ Nyameɛ Le Ye Ɔ?
Bible ne kã kyɛ, “bɔne te nikyee bɔ Nyameɛ ngɔyɔ bie le ɔ, yeɛ amumuyɛɛ te nikyee bɔ Tuminiɛ ne ngɔyɔ bie le ɔ!” (Yob 34:10) Ɛhe kyire kyɛ Nyameɛ nyɛ bɔne. Dweintolɛfoɛ ne koso hãne Yehowa nwo dwirɛ kyɛ: “Ɛfa pɛpɛɛpɛyɛlɛ ebua maen maen mɔ ndɛen.” Ɛhe koso kyire kyɛ, Yehowa bua ndɛen turoloo. (Edwein 67:4) Yehowa “nea ahone nu,” yeti ɛngɔhora ngɔyɛ nikyee biala ngɔfea ye. Ɛhẽne ati yeɛ ɔkora bua ndɛen turoloo sɔ ne. (1 Samuel 16:7) Afei koso, bɛbɔ besisi mmenia ne, Yehowa nwu bɔ bɛyɛ namukoraati. Yeti wahyɛ bɔ kyɛ, ɔngɔhyɛ biala “okonua abɔnefoɛ boso kofi aseɛ naso.”—Anyandera 2:22.
w17.04 10 ¶5
Sɛ Nyameɛ Ahennie Ne Ba A, Nningyein Benimɔ Yeɛ Okofi Berɛ Ɔ?
Nzu yeɛ Yehowa kɔyɛ ɔ? Kesaalae, Yehowa ama abɔnefoɛ mmerɛ kyɛ bɛfa bɛsakyera b’adwene. (Yes. 55:7) Mmerɛ sõnne kyɛ Yehowa bua bɛ ndɛen ɔ. Nakoso ewiase bɔ Satan di so ne de, wabua ye ndɛen dada, yeti kyɛbɔ ɔte biala ɔkɔsɛkye ye. Yede, sɛ ebie annyɛ nzakrayɛɛ, na ɔkɔso yɛ nningyein bɔ ɔttemayé alaa kodwu amaneɛnwunɛ pirikua nanu a, nzu yeɛ ɔkɔto ye ɔ? Yehowa ahyɛ bɔ kyɛ ɔkɔsɛkye sɔ sona ne. (Kenga Edwein 37:10.) Ebiemɔ wɔ berɛ a, bayɛ bɔne ne bahyɛ, na bɛyɛ koso a, ebiala nnwu bɛ. Yeti ebia b’adwene kɔyɛ bɛ kyɛ bafa bɛnwo bali. (Yob 21:7, 9) Nakoso Bible ne maa yenwu kyɛ, Nyameɛ “nye li sona atẽe bɔ ɔnate so si, na onwu ye agyirɛ bɔ otu amukoraa. Awosii, anaa awosii kabii biala nne berɛ, bɔ bɔnefoɛ kɔfea nu bɔ ongonwu bɛ ɔ.” (Yob 34:21, 22) Yehowa nye tá nikyee biala bɔ ɔkɔso ɔ, yeti ebiala nne berɛ bɔ ɔkɔhora kɔlakalaka ye ɔ. Sɛ sona ne wura awosĩi kabii nu po, na ɔyɛ nikyee bie a, Nyameɛ konwu bɔ ɔyɛ namu. Amagedon kõɛ ne kɔsɛkye abɔnefoɛ mukoraati, yeti sɛ ɛpena bɛ boso a, engonwu bɛ kõ.—Edw. 37:12-15.
w21.05 7 ¶19-20
Ɛnnɛ, mmeni pẽe ndie nzɛmba bɔ yɛkã ne. Bɔ ɔmaa bɛyɛ sɔ yeɛ ole kyɛ yɛnyɛ amanyɔnzɛm, na yɛndo aba koso. Nakoso yɛse kyɛ, sɛ yɛye sona kyɛ oli yɛ so tumi a, ɔtekyɛ bɔ yapo Yehowa ne, na sɔ ala yeɛ Yehowa koso nwu ye ɔ. (1 Sam. 8:4-7) Benyane a, ahãa Yehowa asafo ne asisi sukuu ne hɔspitel, ná yayɛ mmenia adɔyɛ. Bɛ de, bɔ bekuro alaa yeɛ ole kyɛ yɛkɔboka maa nningyein kɔhɔ yé wɔ ewiase he anu ɔ. Yeti ɛyɛ a, bɛnde yebo kyɛ yɛfa yɛ mmerɛ mukoraati yɛkã nzɛmba ne ɔ.
Yɛkɔyɛ sɛɛ ná yaboka bɛ? (Kenga Mateo 7:21-23.) Adwuma bɔ Yesu fawurale yɛ sa kyɛ yɛyɛ ne, ɛhẽne yeɛ odikyɛ yɛyere yɛnwo yɛyɛ ɔ. (Mat. 28:19, 20) Ɔnzɛkyɛ yɛmaa amanyɔnzɛm, ɔne nningyein bɔ ɔkɔso wɔ ewiase nanu ne twẽtwẽ y’adwene. Yɛdɔ mmenia, na sɛ benwu amaneɛ a ɔha yɛ. Nakoso atẽe pá bɔ yɛkɔhora yɛkɔfa so yɛkɔboka bɛ yeɛ ole kyɛ, yɛkɔhã Nyameɛ Ahennie nanwo nzɛmba yekohyire bɛ, ná yaboka bɛ maa bafa Yehowa adamvoa ɔ.
Bible Nu Dwirɛ Titire
w17.04 29 ¶3
Sɛ Yefi Y’ahõne Mukoraati Nu Yɛsõ Yehowa A, Ɔmaa Yenye Gye
Elihu bisale Yob kyɛ: “Sɛ ɛtengyɛ a, nzikyɛ mvasoɛ yeɛ ɛfa ma ye ɔ, yeɛ nzikyɛ mvasoɛ yeɛ onya fi wɔ berɛ ɔ?” (Yob 35:7) Yehowa amvɛ Elihu so yaa kyɛ obisale sɔ dwirɛ ne ɔ. Aso né Elihu pena kyire kyɛ, sɛ yɛyere yɛnwo yɛsõ Yehowa a, mvasoɛ nne so anaa? Daabi, nna sɔ koraa yeɛ né ɔpena kyire ɔ. Na mmom bɔ né ɔpena kyire yeɛ ole kyɛ, Yehowa le tumi dada. Yeti sɛ yɛsõ ye a, ye tumi ne, onnya bie mmoka so, yeɛ sɛ yanzõ ye koso a, ye tumi ne, ebie mvi so. Nakoso, anwoserɛ bɔ yele ye, ɔne nikyee biala bɔ yɛkora yɛyɛ ne, Yehowa yeɛ ɔfama yɛ ɔ. Yeti, sɛ yɛfa sɔ nningyein ne yɛsõ ye a, ɔmaa yenye gye.
JANUARY 15-21
NYAMEƐ DWIRƐ NANU ASUADEƐ | YOB 36-37
Nzuati Paa Yeɛ Edé Di Kyɛ Nyameɛ Kɔhora Kɔma Wɔ Daa Ngõa Ɔ?
w15 10/1 13 ¶1-2
NYAMEƐ WƆ BERƐ AFEBƆƆ: Bible ne kã kyɛ, Nyameɛ wɔ berɛ ‘fi tete kodwu afebɔɔ.’ (Edwein 90:2) Sɔ dwirɛ ne kyire kyɛ Nyameɛ llé ahyɛaseɛ, yeɛ ollé ayieleɛ koso. Kuro sona de, yɛ ngõa te tikaapẽ. Ɛhẽne ati yeɛ ‘ye afoɛ somaa ne, ɔbo yɛ ndeaseɛ so’ ne. —Yob 36:26.
Kyɛbɔ ɔkɔboka wɔ ɔ: Nyameɛ ahyɛ bɔ kyɛ, sɛ esũa yenwo nikye na ɛfa bɔ wɔ bra a, ɔkɔma wɔ daa ngõa. (Yoh. 17:3) Nyameɛ bɔ ɔte “daa daa Hene” ne, ye ngome twé yeɛ ɔkɔhora kɔma yɛ daa ngõa ɔ.—1 Timoteo 1:17.
w20.05 22 ¶6
Nningyein Bɔ Yehowa Afa Ama Yɛ Ne, Aso Wɔnye Sɔ?
Atẽe bɔ ɔla aseɛ ɔne eyia b’afĩa ne, ɔte kama paa. Bɔ ɔmaa yɛkã sɔ yeɛ ole kyɛ, sɛ aseɛ ne pingyéle eyia ne kãa bie bokale so a, ahãa aseɛ naso kɔyɛ hye alaa maa nzue bɔ ɔwɔ so namukoraati kɔwewe. Yeti ahãa sona, mmakaa, ɔne ngaka biala ngɔhora ngɔtena aseɛ naso. Yeɛ sɛ aseɛ ne tele yenwo kãa fili eyia nanwo a, ahãa aseɛ naso kɔyɛ frɔlɔɔ alaa maa ɔkɔkakyi blɔg. Nekaa bɔ Yehowa fale aseɛ ne tole ne, ɔte kama paa, na ɛhẽne ati yeɛ nzue kora di akɔneaba wɔ aseɛ naso ne. Yede, sɛɛ yeɛ nzue di akɔneaba wɔ aseɛ naso ɔ? Sɛ eyia bɔ a, ɔmaa nzue bɔ ɔwɔ ɛpo, ɔne aseɛ naso ne yɛ hye. Sɛ ɔyɛ hye sɔ a, ndutue bɔ ɔwɔ nu ne, ɔkɔ anwuro na ɔkɔkakyi munungum. Afoɛ biala, ndutue bɔ ofi aseɛ naso kɔ anwuro ne, sɛ ɔte asue bɔ ɔla aseɛ naso a, ahãa ye piri kɔtra ɛkwaa bɔ ɔwɔ ewiase mukoraati bɔ bahã babonu ɔ. Sɛ tutue ne kɔ anwuro a, odi kɔyɛ ɛlɛburu wɔ berɛ kora né wakakyi nzue watɔ wagua aseɛ naso. Sɛ nzue ne tɔ gua aseɛ naso a, ɔtengyɛ kogua ɛpo nanu. Sɛ okogua ɛpo nanu a, osa kakyi ndutue kɔ anwuro, ná wasa watɔ. Ɛhẽne ati yeɛ daabiala yenya nzue wɔ aseɛ naso ne. Kyɛbɔ nzue di akɔneaba wɔ aseɛ naso ne, ɔmaa yenwu kyɛ Yehowa se nworɛ, na ole tumi koso.—Yob 36:27, 28; Nwo. 1:7.
w22.10 28 ¶16
Anyelasoɛ Bɔ Ele Ye Kyɛ Kristoniɛ Ne, Má Enu Yɛ Se
Anyelasoɛ bɔ yele kyɛ yekonya daa ngõa ne, ɔte akyɛdeɛ bɔ ɔsombo paa bɔ Yehowa afa ama yɛ ɔ. Yɛnea atẽe kyɛ yɛkɔtena ase daa, na kyɛbɔ ɔte biala, ɔkɔwa nu. Anyelasoɛ bɔ yele ye ne, ɔtekyɛ sɛkyɛ. Ɛhe kyire kyɛ, sɛ bɛtane yɛnye, anaa bɛkã kyɛ bekohũ yɛ po a, anyelasoɛ bɔ yele ye nati, ɔmaa yɛkora yegyina yenoa. Afei koso, anyelasoɛ bɔ yele ye ne, ɔte kyɛ buralɛ kyerɛ bɔ ɔbɔ y’adwene nwo waen ɔ. Ɔboka yɛ maa yɛtwẽ yɛnwo yefi nningyein bɔ ɔttemayé nwo, na yɛyɛ nningyein bɔ ɔte pá ɔ. Sɔ anyelasoɛ bɔ Yehowa nate Bible naso amaa yanya ye ne, ɔboka yɛ maa yɛtwẽ yepingyé ye, na ɔmaa yenwu kyɛ ɔdɔ yɛ. Sɛ yele gyidie kyɛ anyelasoɛ bɔ yele ye ne kɔwa nu a, ɔkɔboka yɛ paa.
Bible Nu Dwirɛ Titire
it-1 492
Amaneɛbɔ
Tete ne, sɛ edwirɛ bie si a, né bele atẽe pẽe bɔ bɛfa so maa mmenia te yenwo dwirɛ ɔ. Sɔ mmerɛ ne, né fon anaa radio biala nne berɛ. Yeti sɛ edwirɛ bie si na bɛpena kyɛ mmenia bɔ bɛwɔ kuro nanu te yenwo dwirɛ a, né bɛfrɛfrɛ bɛ maa beyia nu, ná babɔ bɛ amaneɛ. Bɛbɔ bɛwɔ kuro foforɛ so ne koso, né bɛsoma ebie maa ɔkɔbɔ bɛ amaneɛ. (2Sa 3:17, 19; Yob 37:20) Sɛ bɛkɔ a, né bɛtaa bɛtena afupɔngɔ so, na odwu mmerɛ bie koso a, né bɛtena ɛlɛen nu. Sɛ atẽe ne wale a, né begyina atẽe so bedidi, na né bɛpena nzue bɛnõ. Nekaa bɔ né bɛtaa bɛfa bɛkɔ nguro bɔ ɔwɔ Asia, Africa, ɔne Europe ne, yeɛ ole Palestine. Bɛkɔ a, ɛberɛ ala yeɛ bɛfa ɔ, yeɛ bɛba koso a, ɛberɛ ala yeɛ bɛnate ɔ. Yeti mmenia bɔ né bɛte Palestine ne de, edwirɛ biala bɔ okosi kuro foforɛ so ne, né ɔnyɛ se koraa kyɛ bɛkɔte yenwo dwirɛ ɔ. Sɛ bedwu kuro naso a, nekaa bɔ ne bɛtaa bɛfa amaneɛbɔ ne bɛto dwaa yeɛ ole nekaa bɔ bedi dwaa ne. Yemia ɛberɛ de daa mmenia wɔ berɛ.
JANUARY 22-28
NYAMEƐ DWIRƐ NANU ASUADEƐ | YOB 38-39
Aso Edé Mmerɛ Dwenedwene Nningyein Bɔ Yehowa Abɔ Nanwo?
w21.08 9 ¶7
Mmerɛ bɔ Bible ne kã kyɛbɔ Yehowa bɔle aseɛ nanwo dwirɛ ne, ɔhãne kyɛ, “ɔtole nyamaa susuli,” osili “ye nyinasoɛ,” na “ɔtole ye ndweasoɛ nyɔboɛ.” (Yob 38:5, 6) Na mmerɛ bɔ ɔbɔle aseɛ ne yiele ne, ɔtole ye boase nea ne, na onwuni kyɛ ɔte pá. (Gye. 1:10, 12) Afei mmerɛ bɔ ɔbɔle nningyein amukoraa yiele ne, osa tole ye boase neane ye biekũ, na onwuni kyɛ ‘ɔte pá paa.’ (Gye. 1:31) Nzu yeɛ ɛhe maa yenwu ye ɔ? Kyɛbɔ Yehowa tole ye boase bɔle nningyein, na osa tole ye boase neane ne, ɔmaa yenwu kyɛ, nna ngyẽa kãa bie yeɛ ɔfa bɔle aseɛ ne ɔ, na mmom afoɛ pẽe. Abɔfo nemɔ koso, mmerɛ bɔ Yehowa bɔ aseɛ ne, né bɛwɔ berɛ. Yeti mmerɛ bɔ benwuni kyɛbɔ Yehowa ahyehyɛ nikyee biala wɔ aseɛ naso kama ne, nea kyɛbɔ né bɛnye kɔgye ɔ! Bible ne po maa yenwu kyɛ “belili ahurusi.”—Yob 38:7
w20.08 14 ¶2
Yehowa limoa bɔle Yesu, na Yesu koso bokale ye maa ɔbɔle nningyein bɔ waha ne. Bible ne maa yenwu kyɛ, ‘bɛnate ye so yeɛ bɛbɔle nningyein amukoraa ɔ.’ Abɔfo miliɔn pẽe bɔ bɛwɔ anwuro ne koso boka so bie. (Kol. 1:16) Yesu nye gyele paa kyɛ onyane yenwo atẽe ne Yehowa bɔle nu yɛle adwuma ɔ. (Any. 8:30) Abɔfo nemɔ koso, yɛkɔhora yɛkɔhã kyɛ bɛnye gyele paa. Bɔ ɔmaa yɛkã sɔ yeɛ ole kyɛ, mmerɛ bɔ Yehowa ne Yesu bɛbɔ nningyein bɔ ɔwɔ anwuro, ɔne aseɛ he aso ne, benwuni ye. Yede, nzu yeɛ abɔfo nemɔ yɛle ɔ? Bible ne maa yenwu kyɛ, mmerɛ bɔ Yehowa bɔle aseɛ ne, “belili ahurusi.” (Yob 38:7; Any. 8:31.) Na ɔkɔhora kɔwa kyɛ, nikyee biala bɔ Yehowa kɔbɔ ne, né bedi yenwo ahurusi. Na ebia bɛyɛle sɔ alaa kodwu kyɛ Yehowa bɔle sona ɔ. Nningyein bɔ Yehowa abɔ ne, enu biala maa yenwu kyɛ ɔte ɔdɔ, na ɔse nworɛ.—Edw. 104:24; Rom. 1:20.
w23.03 17 ¶8
Sũa Yehowa Nwo Nikyee Fi Nningyein Bɔ Wabɔ Nanu
Yehowa te ebie bɔ yɛfa yɛnwo yɛto yeso a, ɔyɛ yé ɔ. Yehowa bokale Yob maa onyane yenu gyidie. (Yob 32:2; 40:6-8) Ɔyɛle ye sɛ́? Mmerɛ bɔ ɔne Yob bɛbɔ ngɔmmɔ ne, ɔhwẽne y’adwene siele nningyein bɔ wabɔ naso. Sɔ nningyein nemɔ bie yeɛ ole nzramaa, munungum, ɔne agralaa. Afei koso, Yehowa hãne ngaka bie tekyɛ torɔen, ɔne pɔngɔ nwo dwirɛ. (Yob 38:32-35; 39:9, 19, 20) Sɔ nningyein bɔ Yehowa abɔ ne maa yenwu kyɛ ole tumi paa. Nna ɛhẽne angome, na mmom ɔmaa yenwu kyɛ ɔte ɔdɔ, na ɔse nworɛ koso. Ɔwɔ nu kyɛ né Yob le Yehowa nu gyidie dada de, nakoso mmerɛ bɔ ɔne Yehowa bɔle sɔ ngɔmmɔ ne yiele ne, ye gyidie ne yɛle piri paa. (Yob 42:1-6) Sɔ ala yeɛ yɛkoso, sɛ yɛdwenedwene nningyein bɔ Yehowa abɔ nanwo a, ɔmaa yenwu kyɛ ole tumi, na ɔse nworɛ. Yeti sɛ yɛfa yɛnwo yɛtoto yenwo a, yendwu ye nekafee. Afei koso, ɔhaw bɔ yɛfa nu ne, ole tumi bɔ ɔkɔfa kɔye yemukoraati kofi berɛ ɔ. Amba, sɛ yɛto yɛ boase yesusu nningyein bɔ Yehowa abɔ nanwo a, ɔkɔboka yɛ maa gyidie bɔ yele ye wɔ ye nu ne, ɔkɔyɛ piri paa.
Bible Nu Dwirɛ Titire
it-2 222
Ebie Bɔ Ɔhyehyɛ Mmraa
Kyɛbɔ Yehowa ahyehyɛ Mmraa ɔ. Yehowa ngome twé yeɛ ɔfata kyɛ ɔhyehyɛ Mmraa wɔ anwuro, ɔne aseɛ he aso ɔ. Nningyein bɔ Yehowa abɔ ne, benu biala le mmraa bɔ bedi so ɔ. Sɛ yɛnea ɛpo sɔa a, sɛ oyi a, ole nekaa bɔ okodwu ɔ, ɔndra brɛ. (Yob 38:4-38; Edw 104:5-19) Ngaka koso, bele mmerɛ bɔ bɛfa bɛwo ɔ, na benu biemɔ koso le mmerɛ bɔ bɛfa betu befi nekaa kõ bɛkɔ nekaa foforɛ ɔ. (Yob 39:1-30) Afei má yɛnea sona koso. Sɛ odwu nɔsoa a, yɛse kyɛ odikyɛ yɛda. Nakoso, sona de yɛse nworɛ, na yɛkora yesusu nningyein nwo. Afei koso, yɛse kyɛ yehia Yehowa wɔ y’asetena nu. Ɛhe ati, Yehowa ahyehyɛ mmraa ahoroɛ wɔ Bible nanu bɔ sɛ yedi so a, ɔmaa y’abrabɔ yɛ kama ɔ. Sɔ mmraa ahoroɛ ne de, sona ngome twé yeɛ Yehowa ahyehyɛ ama yɛ ɔ, ngaka ne nningyein bɔ baha ne de, bɛbokka so. (Rom 12:1; 1Ko 2:14-16) Abɔfo nemɔ koso ɛ? Bɛkoso, Yehowa ahyehyɛ mmraa ama bɛ.—Edw 103:20; 2Pe 2:4, 11.
Nningyein bɔ Yehowa abɔ tekyɛ eyia, ɛsraen, ɔne nzramaa ne, bedi mmraa bɔ Yehowa ahyehyɛ ama bɛ naso pɛpɛɛpɛ. Yeti bɛbɔ bɛyɛ abɔdeɛ nu nhwehwɛmuɛ ne, bɛkora bɛnea sɔ nningyein naso benwu mmerɛ bɔ nzue kɔtɔ, ɔne mmerɛ bɔ wawa kɔpẽ ɔ. Yede, sɛ ebie bu mmraa bɔ Yehowa ahyehyɛ wama yɛ naso a, nzu yeɛ okofi nu kɔwa ɔ? Ɔngɔfa yenwo ngoli llé. (Yer 33:20, 21) Ofikyɛ, sɛ odikyɛ ebie da, na wanna a, ɔkɔmaa yeti kɔpakye ye. Sɛ ɔtaa yɛ sɔ a, ɔkɔhora kɔmaa anwonyerɛ pirikua bie kɔbɔ ye, na ɔkɔhora kowu po. Nakoso Yehowa mmraa bɔ ɔfa abrabɔ nwo bɔ ɔwɔ Bible nanu ne de, sɛ ebie bu so a, ebia y’adwene kɔyɛ ye kyɛ wafa yenwo wali. Ofikyɛ, ebia ongonya yenwo asotwẽ wɔ ɛberɛ ala. Nakoso, Bible ne kã kyɛ, ɛngɔhora “ngɔgoro Nyameɛ nwo. Ofikyɛ bɔ sona dua ne ala yeɛ okobu ɔ.”—Gal 6:7; 1Ti 5:24.
JANUARY 29–FEBRUARY 4
NYAMEƐ DWIRƐ NANU ASUADEƐ | YOB 40-42
Bɔ Yesũa Yefi Edwirɛ Bɔ Ɔtole Yob Nanu Ɔ
w10 10/15 3-4 ¶4-6
“Nwa Yeɛ Ɔse Awurade Ti Anu Dwirɛ Ɔ?”
Kyɛbɔ Yehowa si yɛ ye nikyee ne, odwu mmerɛ bie na yɛdwenedwene yenwo a, yɛngɔte yebo llé. Yeti odikyɛ yɛnea yé na yammu ye atɛn, anaa yanga kyɛ atẽe bɔ ɔfa so yɛ ye nikyee ne, ɔttemayé. Ɛhe ati yeɛ Yehowa hãne ye wɔ Edwein 50:21 kyɛ: “Ɛdwene kyɛ nde kyɛ wɔ ala” ne. Ebie bɔ wasũa Bible nanwo nikye wahɔ sĩɛ hãne nikyee bie fale edwirɛ bɔ yɛkã he anwo. Ɔhãne sɔ dwirɛ ne, kɔyɛ afoɛ 175 apɛ nu. Ɔhãne kyɛ: “Mmenia taa bu Nyameɛ atɛn, na begyina bɛbɔbɔ deinn bɛ ndeaseɛ, ɔne bɔ besusu kyɛ ɔte pá ma bɛ naso yeɛ bɛyɛ sɔ ɔ.”
Odikyɛ yɛnea yé, ná yaangyire Yehowa bɔ odikyɛ ɔyɛ ɔ. Nzuati yeɛ ɛhe anwo hia ɔ? Ɔnate kyɛ bɔne wɔ yɛnwo nati, sɛ yesũa Bible na yenwu nikyee bie bɔ Yehowa yɛle a, ebia yekonya adwene kyɛ ɔttemayé kyɛ ɔyɛle sɔ ɔ. Tete Yisraelfoɛ nemɔ nyane sɔ adwene ne bie, benyane adwene kyɛ Yehowa ne bɛ anni ye yé. Ɔwale sɔ ne, nea edwirɛ bɔ Yehowa hãhyirele bɛ ɔ. Ɔhãne kyɛ: “Nakoso ɛmɔnwa: ‘AWURADE atẽe ndengyɛ.’ O Yisrael awuro ama, nzaade ɛ́mɔtie e: Aso m’atẽe ndengyɛ anaa? Aso nna ɛmɔ atẽe mmom yeɛ ɔndengyɛ ɔ?”—Hes. 18:25.
Yede, yɛkɔyɛ sɛɛ né yammu Yehowa atɛn? Odikyɛ yɛkae kyɛ, nna kuro sona adwene yeɛ ole Nyameɛ adwene. Yɛde bɔne wɔ yɛnwo, na Yehowa se nworɛ tra yɛ. Yeti sɛ yɛfa yɛnwo yɛtoto yenwo a ɔnyɛ yé. Né yenwo hia kyɛ Yob te sɔ dwirɛ nabo. Mmerɛ bɔ ne Yob nwu amaneɛ ne, ɔmaa y’abanu buli, na bɔ né ohia ye alaa yeɛ ole kyɛ ye haw ne kofi berɛ ɔ. Yob hãne edwirɛ bie po bɔ okyire kyɛ Yehowa yeɛ wafa ɔhaw ne wawa ye so ɔ. Ɔnate kyɛ né Yehowa dɔ ye nati, ɔbokale ye maa ɔsesãne y’adwene. Yehowa bisale Yob edwirɛ ngokõ-ngokõ kɔbo aburasoo (70), nakoso Yob angora anye enu kõ po noa. Yehowa maa Yob nwuni kyɛ, nna nningyein bɔ wayɛ namu yeɛ ɔkɔhora kɔte yebo ɔ. Ɛhẽne sĩ ne, Yob brɛle yenwo ase, na ɔsesãne y’adwene.—Kenga Yob 42:1-6.
w17.06 25 ¶12
Ɔhaw bɔ ɔtole Yob ne, ɔhora gyinane yenoa. Nakoso mmerɛ bɔ wandwudwo yé ne, Yehowa tengyɛle ye so. Aso ɛhe kyire kyɛ Yehowa ne ye anni ye yé anaa? Daabi. Yob po annya sɔ adwene ne. Ɔmva yenwo ne bɔ ɔtole Yob namukoraati ne, nziɛen edwirɛ bɔ ɔhãne ne maa yenwu kyɛ né wale ye mvomsoɛ wato nu. Yob hãne kyɛ: “Manu me nwo, na me nwo yɛ me nya, na mafa mvuture ne nzoen magua me nwo.” Ɔwɔ nu kyɛ ndeɛnsoɛ bɔ Yehowa famane Yob ne, né yenoa yɛ hye de, nakoso ɔbokale ye maa ɔyɛle nzakrayɛɛ. (Yob 42:1-6) Afei koso, né abrandeɛ Elihu alimoa amaa wanwu kyɛ adwene bɔ ole ye ne, ɔttemayé. (Yob 32:5-10) Yob lɛle afutue bɔ Yehowa famane ye ne tole nu, na ɔsesãne y’adwene. Ɛhe ati, Yehowa maa Yob nnamvo nemɔ nwuni kyɛ nahorɛ bɔ Yob li mane ye ne, yenye sɔ.—Yob 42:7, 8.
w22.06 25 ¶17-18
“Ma Wɔ Nye La AWURADE So”
Somafoɛ Pɔɔlo hworɔle edwirɛ bie ɔɔmane Hebrifoɛ nemɔ. Ɔmaa yenwu kyɛ nna Yob ngome yeɛ ɔfale akokoduro gyinane ɔhaw noa ɔ. Mmom ne, Yehowa asomvoɛ pẽe yeɛ bɛhora bɛyɛle sɔ ɔ. Pɔɔlo hãne kyɛ bɛte “adanzefoɛ pembepembe.” (Heb. 12:1) Ɔhaw bɔ benu biala yiale ne, né ɔtte bɛtɛɛ koraa, nakoso bɛhɔle so belili nahorɛ bɛmane Yehowa oodwuli ayieleɛ. (Heb. 11:36-40) Animia bɔ bɛfa begyinane bɛ haw ne noa ne, aso bɛfɛ beguale mbaen anaa? Ɔtte sɔ koraa! Ɔwɔ nu kyɛ mmerɛ bɔ né bɛte ase ne, baanwu kyɛ Yehowa bɔhyɛ mukoraati banu de, nakoso bɛhɔle so bɛfale bɛnwo bɛtole Yehowa so. Bɔ ɔmaa bɛyɛle sɔ yeɛ ole kyɛ, né bedé bedi paa kyɛ kyɛbɔ ɔte biala, ye bɔhyɛ mukoraati kɔwa nu kyẽabie, na ɛhẽne kɔmaa bekonya nhyiraa pẽe. Afei koso, né bɛse kyɛ mmɔden bɔ bɛbɔle ne, Yehowa nye sɔ. (Heb. 11:4, 5) Sɛ yesusesũa bɔ bɛyɛle ne a, ɔkɔboka yɛ maa yɛkoso yɛkɔfa yɛnwo yɛkɔto Yehowa so daa biala.
Ɛnnɛ, nningyein sɛkye alaa yeɛ ɔsɛkye ɔ. (2 Tim. 3:13) Na nzɔhwɛ bɔ Satan fa ba bɛbɔ bɛsõ Yehowa naso ne, ɔyakyilli. Afei, yɛse kyɛ yekoyia nzɔhwɛ pẽe kyẽabie. Yeti odikyɛ yɛyere yɛnwo yɛsõ Yehowa, na “yɛfa yɛnye yɛto Nyameɛ teasefoɛ” naso. (1 Tim. 4:10) Kae kyɛ, mmerɛ bɔ Yob miane yenye gyinane ɔhaw bɔ oyiale ne noa ne, Yehowa yirale ye. Ɛhe maa yenwu kyɛ, “Awurade anwumvoinnwunɛ sone, na osa le tema maa ɔbo so.” (Yak. 5:11) Yɛ koso, ɛmɔma yɛyere yɛnwo kyɛ yekoli nahorɛ yɛkɔma Yehowa, ná yenya gyidie kyɛ “oyira bɛbɔ bɛnye aboro bɛpena ye boso” ne.—Kenga Hebrifoɛ 11:6.
Bible Nu Dwirɛ Titire
it-2 808
Ngorohoɛ
Yob nnamvo nza nemɔ gorole yenwo paa, nakoso ɔhɔle so lili nahorɛ mane Yehowa, na ɔyɛle nningyein bɔ ɔte pá ɔ. Mmerɛ bɔ né oyia ɔhaw ne, ahyɛaseɛ ne de, ɔhãne edwirɛ biemɔ bɔ né ɔttemayé ɔ. Ɛhe ati, Elihu hãne yenwo dwirɛ kyɛ: ‘Sona beni koraa yeɛ ɔte kyɛ Yob, bɔ ɔnõ musue dwirɛ kyɛ nzue ye?’ (Yob 34:7) Yob buli yenwo kyɛ gyemia ɔtengyɛ po tra Nyameɛ. Afei koso, né ɔpena kyɛ ebiala nwu kyɛ ɔyɛlle bɔne biala yeɛ onwu amaneɛ ɔ. (Yob 35:2; 36:24) Nahorɛ bɔ ɔwɔ edwirɛ nanu paa yeɛ ole kyɛ, nna Yob yeɛ né ye nnamvo nemɔ bɛgoro yenwo ɔ, na mmom né ɔte Nyameɛ. Nakoso Yob lɛle edwirɛ ne mane yenwo. Kyɛbɔ yɛse ne, sɛ bɛgoro ebie nwo a, ɔtte nikyee bɔ ɔmaa sona ne nye gye ɔ. Nakoso Yob de, olɛle edwirɛ ne mane yenwo tekyɛ bɔ wanya nzue fɔnnwoo bie bɔ ɔnõ ne. Nziɛen Yehowa bokale ye maa ɔsesãne y’adwene. Yehowa maa Yob tele yebo kyɛ edwirɛ bɔ ye nnamvo nza nemɔ hãne ne, ɔmva yenwo koraa. Mmom ne, ye Yehowa yeɛ bɛgoro yenwo ɔ, na edwirɛ bɔ bɛhãne ne koso, ɔtte nahorɛ. (Yob 42:7) Né Yob dwirɛ ne tekyɛ Samuel deɛ ne pɛpɛɛpɛ. Mmerɛ bɔ Yisraelfoɛ nemɔ hãne kyɛ ɔma bɛ ɔhene má oli bɛ so ne, Yehowa hãhyirele ye kyɛ: “Nna wɔ yeɛ bapo wɔ ɔ, na mmom me yeɛ bapo me kyɛ nnde bɛ so hene kõ ɔ.” (1Sa 8:7) Yesu koso hãhyirele ye asũafoɛ nemɔ kyɛ: “Ɔnate me dumaa ti maen maen amukoraa bɛkɔpɔ ɛmɔ.” (Mat 24:9) Yesu maa bɛtele yebo kyɛ, sɛ mmenia tane bɛnye a, nnɛmaa bedé bɛmma bɛnwo. Yɛ koso, odikyɛ yɛmaa sɔ dwirɛ bɔ yasusu yenwo ne tena y’adwene nu. Sɛ mmenia goro yɛnwo a, nnɛmaa yedé yɛmma yɛnwo, na mmom yɛkae kyɛ Yehowa yeɛ bɛgoro yenwo ɔ. Na sɛ yemia yɛnye yegyina nu a, Yehowa koyira yɛ.—Luk 6:22, 23.
FEBRUARY 5-11
NYAMEƐ DWIRƐ NANU ASUADEƐ | EDWEIN 1-4
Tá Nyameɛ Ahennie Ne Sĩ
w21.09 15 ¶8
“Ngɔwoso Maen Maen Mukoraa”
Nzɛmba bɔ yɛkã ne, sɛɛ yeɛ mmenia yɛ bɛ nikyee wɔ yenwo ɔ? Mmeni pẽe wɔ berɛ a, bendie. (Kenga Edwein 2:1-3.) Bɛbɔ bedi tumi ne po de, sɛ bɛte nzɛmba bɔ yɛkã ne a, ná bafɛ yaa. Benguro kyɛ ɔhene bɔ Yehowa aye ne, okoli bɛ so. Ahennie nanwo “nzɛmba” bɔ yɛkã ne, benwu ye kyɛ mvasoɛ biala nne so. Yeti maen biemɔ wɔ berɛ a, awaen ne abra asɛnga adwuma ne wɔ berɛ. Benu biemɔ wɔ berɛ a, bɛ yeɛ bɛnwa bɛsõ Nyameɛ ɔ, yeti odikyɛ ahãa ɔhene bɔ Nyameɛ aye ne, bedé ye bɛto nu. Nakoso tumi bɔ bedi ne, ɔyɛ bɛ fɛ alaa maa benguro kyɛ okofi bɛ sa. Bɛbɔ ne bedi tumi wɔ Yesu aberɛ so ne, bɛtanene Yesu asuafoɛ nemɔ nye, na sɔ alaa yeɛ ɛnnɛ koso ɔkɔso ɔ. Ɛhe maa yenwu kyɛ bɛnye ngye yenwo kyɛ Nyameɛ aye Kristo kyɛ oli yɛ so ɔ.—Aso. 4:25-28.
w16.04 29 ¶11
Nnɛtá Amanyɔkue Biala Sĩ
Anwonyadeɛ. Sɛ yɛmaa esikaa, ɔne anwonyadeɛ nwo hia yɛ sõma a, yannea yé a ɔkɔmaa yɛkɔtá amanyɔkue bie sĩ. Sɔ dwirɛ bɔ yɛkã ye, ofi afoɛ 1970 bɔ ɔba ne, ebie tole aliemaamɔ bɔ bɛwɔ Malawi ne. Aliemaa brasua bie bɔ bɛfrɛ ye Ruth hãne kyɛ: “Sɔ mmerɛ ne, ɔnate kyɛ aliemaamɔ anda amanyɔkue biala sĩ nati, bɛpɛle bɛ asue. Nekaa bɔ bɛfale bɛ bɛhɔle ne, né asetena nu yɛ se paa. Yeti benu biemɔ sesãne b’adwene, na besa bɛwale bekuro bɛɛtale amanyɔkue ne sĩ.” Nakoso aliemaamɔ pẽe wɔ berɛ a, bayɛ b’adwene kyɛ bɛngɔta amanyɔkue biala sĩ. Sɛ ebia ɛhe kɔmaa bɛnwo kɔhyere bɛ, anaa b’anwonyadeɛ amukoraa kofi bɛsa po a, ɔmva benu.—Heb. 10:34.
Bible Nu Dwirɛ Titire
it-1 425
Afafu
Sɛ besó ɛmo anaa aburoo nwo beyie, na sɛ behuhu so a, efĩɛ bɔ mvrama hu ye kɔ ne, yeɛ bɛfrɛ ye afafu ne. (Wɔ Twi nu ne, bɛfrɛ ye ntɛtɛ.) Wɔ Bible nu ne, odwu mmerɛ bie a, bɛfa afafu begyina berɛ bɛma nningyein ahoroɛ biemɔ. Afei koso, Bible ne maa yenwu kyɛ sɛ né bɛpɛ aleɛ bie tekyɛ hwiit a, né bele nekaa bɔ bɛfa bekogua, ná bayeye afafu ne bafi yenwo ɔ. Afafu de benni, yeti sɛ bɛyeye befi hwiit nanwo a, ná bagyi bagua. Ɛhẽne ati yeɛ Bible ne fa afafu gyina berɛ ma nikyee bɔ mvasoɛ biala nne so ne.
Yede, sɛ bɛpɛ aburoo anaa hwiit, na bɛpena kyɛ afafu ne fi yenwo a, nzu yeɛ bɛyɛ ɔ? Bɔ olimoa, bɛboro. Sɛ bɛboro beyie a, ná bahu so. Sɛ behuhu so a, ɔnate kyɛ afafu nanu yɛ nyera nati, mvrama hu ye kɔ. (Nea WINNOWING.) Ɛhẽne ati yeɛ abɔnefoɛ, ɔne maen ahoroɛ bɔ bedwɔso betia bɛbɔ bɛsõ Yehowa ne, Bible ne fa bɛtoto afafu nwo ne. Yehowa kɔye bɛ kofi berɛ tekyɛ afafu bɔ mvrama hu ye kɔ ɔ. (Yob 21:18; Edw 1:4; 35:5; Yes 17:13; 29:5; 41:15; Hos 13:3) Nyameɛ Ahennie ne kɔnyoko abɔnefoɛ tekyɛ afafu bɔ mvrama hu ye kɔ ɔ, na bɛboso komini.—Dan 2:35.
Sɛ behuhu hwiit naso beyie maa mvrama hu afafu ne kɔ a, nzu biekũ yeɛ bɛyɛ ɔ? Bɛboɔboa hwiit ne noa kama. Afafu ne koso, bɛpra ye mukoraati bɛboa yenoa, ná bafa sẽe bayera ye. Sɛ baanyera ye, na sɛ mvrama tu a, okosa kɔɔfra hwiit ne. Asubɔlɛniɛ Yohane hãne kyɛ ɔngɔhyɛ biala Yesu kɔyɛ sɔ adwuma ne bie. Yesu kɔboɔboa ateneneefoɛ bɔ bɛtekyɛ hwiit ne noa. Nakoso abɔnefoɛ bɔ bɛte kyɛ ‘afafu ne de, ɔkɔfa sẽe bɔ onnua llé kɔyera bɛ.’—Mat 3:7-12; Luk 3:17; Nea THRESHING.
FEBRUARY 12-18
NYAMEƐ DWIRƐ NANU ASUADEƐ | EDWEIN 5-7
Sɛ Ebie Yɛ Nikyee Maa Ɔyɛ Wɔ Yea Po A, Kɔso Di Nahorɛ Ma Yehowa
w21.03 15 ¶7-8
Kyɛbɔ Bible Ne Kɔhora Kɔboka Wɔ Ɔ
Aso wɔ damvo anaa w’abusũaniɛ bie ayɛ nikyee maa wayɛ wɔ yea le? Sɛ sɔ a, ɛyɛ a dwenedwene bɔ ɔtole Ɔhene Dawide nanwo. Sɛ ɛyɛ sɔ a, ɔkɔhora kɔboka wɔ. Ɔwa Absalom yɛle nikyee bie maa ɔyɛle ye yea paa. Ɔbɔle mmɔden kyɛ okole ahennie ne kofi ye baba sa nu.—2 Sam. 15:5-14, 31; 18:6-14.
Bɔ mbaeɛ. Mmerɛ bɔ Dawide dwirɛ ne wɔ w’adwene nu ne, kã kyɛbɔ edwirɛ ne asi ayɛ wɔ yea namukoraati kyire Yehowa. (Edw. 6:6-9) Ɛyɛ a nnɛfa nikyee biala fea ye. Afei srɛ Yehowa kyɛ ɔboka wɔ má enwu Bible nu dwirɛ bie bɔ ɔkɔboka wɔ maa ekogyina bɔ ɛfa nu ne noa ɔ.
w20.07 8-9 ¶3-4
Nya Gyidie Kyɛ Nahorɛ Ne Ala Yeɛ Anwu Ye Ne
Ɔdɔ bɔ ɔwɔ Kristofoɛ nu ne, ɔmaa yɛ gyidie yɛ piri. Nakoso ɔdɔ bɔ aliemaamɔ le ma yɛ ne, sɛ ɛhẽne angome ati yeɛ yɛsõ Yehowa de a, odikyɛ yɛnea yé. Nzuati yeɛ yɛkã sɔ ɔ? Yɛfa ye kyɛ, aliemaa bie ayɛ bɔne pirikua bie watia Yehowa, ebia sona ne po te asafo nu panyi anaa atẽepakyelɛniɛ. Anaa ebia aliemaa bie ayɛ nikyee maa wayɛ wɔ yea. Anaa yɛfa ye kyɛ aliemaa bie afi asafo nanu, na ɔkekã kyɛ nna Yehowa Adanzefoɛ sõen yeɛ ɔte nahorɛ ɔ. Sɛ nikyee bie bɔ ɔte sɔ to wɔ a, aso ɛkɔyakyi Yehowa sõen anaa? Bɔ yesũa yefi nu ɛhe: Bɔ aliemaamɔ yɛ angome yeɛ yɛnea so yɛsõ Yehowa de a, yede sɛ yannea yé a, bɛ subaen kɔhora kɔto yɛ sundidua maa yekofi asafo nanu. Bɔ ohia paa yeɛ ole kyɛ yɛne Yehowa adamvoa nanu kɔyɛ se ɔ. Ɔwɔ nu, aliemaamɔ subaen kɔhora kɔboka yɛ maa yɛ gyidie kɔyɛ piri. Nakoso odikyɛ yɛyere yɛnwo kyɛ yekonya adanzeɛ bɔ okyire kyɛ bɔ yedé yedi ne te nahorɛ. Yeti, yere wɔnwo sũa nikye. Sɛ ɛyɛ sɔ a, ɔkɔmaa ekonya adanzeɛ bɔ okyire kyɛ, bɔ Bible ne kyirekyire fa Yehowa nwo ne, ɛhẽne yeɛ ɔte nahorɛ ɔ.—Rom. 12:2.
Yesu hãne kyɛ, sɛ ebiemɔ te nahorɛ ne a, bekole bɛkɔto nu “anigye so,” nakoso sɛ nahorɛ nati benwu amaneɛ a, ɔkɔto bɛ sundidua. (Kenga Mateo 13:3-6, 20, 21.) Ebia bɛnze kyɛ Yesu ahã ato berɛ kyɛ sɛ ebie badi yesĩ a, okonwu amaneɛ. (Mat. 16:24) Anaa ebia b’adwene yɛ bɛ kyɛ sɛ ebie bayɛ Kristoniɛ a, nhyiraa kobu ye so, na ɔhaw de ebie ngɔto ye llé. Nakoso, ewiase he anu de, sɛ ɛte nwa po a, ekoyia ɔhaw. Nningyein kora sesã komaapɛ, yeti sɛ ɛnnɛ yeɛ wɔnye agye a, ongyire kyɛ daa wɔnye kɔgye.—Edw. 6:6; Nwo. 9:11.
Bible Nu Dwirɛ Titire
it-1 995
Ewue Kumaa
Wɔ Romanfoɛ 3:13 ne, somafoɛ Pɔɔlo hwene adwene siele edwirɛ bɔ ɔwɔ Edwein 5:9 naso. Ɛberɛ ne, abɔnefoɛ ɔne bɛbɔ bɛlakalaka mmenia ne, ɔfale bɛ komvi totole “asieleɛ kumaa bɔ ɔla berɛ too” nwo. Sɔ dwirɛ bɔ ɔhãne ne, okyire sɛɛ? Sɛ bɛpɛ kumaa wɔ asieleɛ so a, efuin yeɛ bɛfa ye bɛto nu ɔ. Yeti asieleɛ kumaa de, nningyein bɔ waporɔ ngome yeɛ ogua nu ɔ. Sɔ alaa yeɛ abɔnefoɛ, ɔne bɛbɔ bɛlakalaka mmenia ne koso, bɛnga edwirɛ bɔ mvasoɛ wɔ so ɔ, na mmom edwirɛ bɔ waporɔ ngome yeɛ ofi bɛnoa nu ba ɔ.—Fatoto Mat 15:18-20 nanwo.
FEBRUARY 19-25
NYAMEƐ DWIRƐ NANU ASUADEƐ | EDWEIN 8-10
“AWURADE, Ngɔfa M’ahone Amukoraa Ngɔla Wɔ Ase”!
w21.08 3 ¶6
Yehowa siesiele aseɛ ne mane yɛ kyɛ yɛtena so. Mmerɛ bɔ Yehowa bɔle aseɛ ne, osiesiele so kama, na afoɛ pẽe sĩ ne, ɔbɔle sona kyɛ ɔtena so. (Yob 38:4-6; Yer. 10:12) Yehowa dwene yɛnwo, na ɔse nningyein bɔ yehia ɔ. Ɛhe ati, ɔbɔle nningyein pẽe guale aseɛ naso bɔ ɔmaa yɛnye gye ɔ. (Edw. 104:14, 15, 24) Mmerɛ bɔ né Yehowa bɔ nikyee ne, odwu mmerɛ bie a, né ɔto ye boase nea nningyein bɔ wabɔ ne, na “onwuni kyɛ ɔte pá.” (Gye. 1:10, 12, 31) Mmerɛ bɔ Yehowa bɔle sona ne, ɔfale ‘nningyein amukoraa wurale ye gya bo,’ kyire kyɛ nningyein bɔ ɔwɔ aseɛ naso ne, ɔnea so. (Edw. 8:6) Ɛhe maa yenwu kyɛ Yehowa kuro sona dwirɛ paa. Bɔ ogyi Yehowa nye so yeɛ ole kyɛ, adwuma bɔ wafa wawura sona sa ne, kyẽabie ɔkɔfa anigye kɔyɛ ye daa ɔ. Ɛyɛ a, ɛda Yehowa ase wɔ ɛhe anwo anaa?
w20.05 23 ¶10
Aso Wɔnye Sɔ Akyɛdeɛ Bɔ Yehowa Afa Ama Wɔ Ne?
Akyɛdeɛ bɔ Yehowa afa ama yɛ ne, enu kõ yeɛ ole dwudwolɛ. Yede, yɛkɔyɛ sɛɛ ná yafa sɔ akyɛdeɛ ne yayɛ adwuma yé? Ebiemɔ wɔ berɛ a, benné benni kyɛ Nyameɛ yeɛ ɔbɔle nikye ɔ, na bɛkã kyɛ sona po fi ngaka nu. Yeti sɛ yɛboka bɛ maa benwu kyɛ Yehowa yeɛ ɔbɔle nikyee biala a, né okyire kyɛ yɛfa sɔ akyɛdeɛ bɔ wafa wama yɛ ne yɛyɛ adwuma yé. (Edw. 9:1; 1 Pet. 3:15) Bɛbɔ benné benni kyɛ Yehowa yeɛ ɔbɔle nikye ne, bɛpena kyɛ yedé yɛto nu kyɛ aseɛ ne, ɔne nningyein bɔ ɔwɔ so ne, ye bɔbɔ ye ɔwale ɔ, na nna ebiala yeɛ ɔbɔle ɔ. Yɛde, yedé yedi paa kyɛ Yehowa yeɛ ɔbɔle anwuro, aseɛ, ɔne nningyein bɔ ɔwɔ so namukoraati ɔ. Ɛhe ati, bɛbɔ bɛnye gye yenwo kyɛ bekotie sɔ nahorɛ dwirɛ bɔ ɔwɔ Bible nanu ne, yɛkɔhora yɛkɔfa Bible ne yɛkɔboka bɛ.—Edw. 102:25; Yes. 40:25, 26.
w22.04 7 ¶13
Fi w’ahõne nu to dwein. Sɛ yɛ́to asafo dwein a, bɔ yenwo hia paa yeɛ ole kyɛ, yɛkɔfa yɛkɔye Yehowa ayɛ ɔ. Aliemaa brasua bie bɔ bɛfrɛ ye Sara kuro paa kyɛ ɔto dwein ye Yehowa ayɛ. Nakoso obu yenwo kyɛ ɔnze dwein to. Ɛhe ati, sɛ ósũa nikyee bɔ yekosũa ye wɔ asafo nhyiamu bo ne a, ɛyɛ a osũa dwein bɔ yɛkɔto ne koso boka so. Sɛ ósũa a, ɛyɛ a ɔnea kyɛbɔ dwein nanu dwirɛ ne fa bɔ yekosũa wɔ asafo nhyiamu bo nanwo ɔ. Afei sɛ ɔte berɛ a, ná ɔto edwein ne ngakã, yeti asafo nhyiamu ne kodwu so ne, ná wanwu ye to paa. Aliemaa brasua ne kã kyɛ: “Ɛhe aboka me maa sɛ meto dwein ne a, memva m’adwene menzie kyɛbɔ ngɔto ye naso, na mmom mefa m’adwene mesie enu dwirɛ naso.”
Bible Nu Dwirɛ Titire
it-1 832
Asaa Mmɛseka
Bible ne kã Yehowa nwo dwirɛ kyɛ ɔfale yesa yɛle nningyein biemɔ. Má yɛnea sɔ nningyein nemɔ bie. Bible ne maa yenwu kyɛ, Yehowa fale yesa mmɛseka yeɛ ɔhworɔle Mmraa Dwirɛ ne guale nyɔboɛ so ɔ. (Ɛks 31:18; Deu 9:10) Afei koso, ɔmaa yenwu kyɛ ɔfa yesa yɛle anwanwadeɛ ahoroɛ biemɔ. (Ɛks 8:18, 19) Na ɛhẽne ala koso yeɛ ɔfa bɔle anwuro ɔ. (Edw 8:3) Yede, Nyameɛ “sa” bɔ ɔfa yɛle sɔ nningyein ne, ogyi berɛ ma nzu? Ogyi berɛ ma ye Honhom Krongron ne. Bɔ ɔmaa yenwu sɔ yeɛ ole kyɛ, Gyenesise nwomaa ne maa yenwu kyɛ, mmerɛ bɔ Yehowa bɔle nzue ne, né ye Honhom ne di akɔneaba wɔ nzue naso. (Gye 1:2) Kristofoɛ Greek tworɔnzɛm, anaa bɔ bɛfrɛ ye apam foforɛ ne maa edwirɛ nanu da berɛ paa. Mateo nwomaa ne maa yenwu kyɛ, “Nyameɛ Sunzum” yeɛ ɔfa bokale Yesu maa ɔhora tuli sunzummɔne ɔ. Nakoso Luka nwomaa ne kã kyɛ, “Nyameɛ sa mmɛseka” yeɛ ɔfa bokale ye ɔ. Ɛhe maa yenwu kyɛ Nyameɛ sa noa, anaa yesa mmɛseka bɔ tworɔnzɛm ne hãne yenwo dwirɛ ne, ɛhẽne ala yeɛ ole ye honhom krongron ne.—Mat 12:28; Luk 11:20.
FEBRUARY 26–MARCH 3
NYAMEƐ DWIRƐ NANU ASUADEƐ | EDWEIN 11-15
Fa Ye Kyɛ Ɛwɔ Ewiase Foforɛ Bɔ Asomdwee Wɔ Nu Nanu
w06 5/15 18 ¶3
Edwein Nwomaa Nanu Dwirɛ Titire
11:3—Fapem beni yeɛ bekodwiri bekogua ase ne? Ɛhẽne yeɛ ole mmraa, ɔne ahyɛdeɛ bɔ bɛfa bebu maen ahoroɛ wɔ ewiase he anu ne. Sɛ sɔ mmraa ne ahyɛdeɛ ne nyɛ adwuma yé a, ɔmaa mmenia yɛ basabasa, na besisi mmenia koso. Sɛ ɔba sɔ a, “sona bɔ ɔtengyɛ ne” odikyɛ ɔfa yenwo to Nyameɛ so.—Edwein 11:4-7.
wp16.4 11
Ewiase Bɔ Basabasayɔlɛ Biala Nne Nu Ɔ, Aso Ɛnea A Ɔkɔhora Kɔyɛ Yé?
Bible ne hyɛ bɔ kyɛ ɔngɔhyɛ biala, Nyameɛ kɔye Basabasayɔlɛ amukoraa kofi aseɛ he aso. Ewiase he bɔ Basabasayɔlɛ abu so ne, Yehowa “fa nwondɛ ndɛenbualɛ ne amumuyɛɛfoɛ kyẽa ne.” (2 Petro 3:5-7) Sɛ Nyameɛ ye basabasayɔlɛ fi berɛ a, ebiala ngonwu amaneɛ kõ. Nzu yeɛ ɔmaa yedé yedi kyɛ Yehowa kɔye basabasayɔlɛ kofi berɛ ɔ?
Bible ne kã kyɛ, Nyameɛ “kra kyi sona bɔ okuro basabasayɔlɛ ɔ.” (Edwein 11:5) Yehowa bɔ ɔbɔle yɛ ne de, okuro asomdwee, na obua ndɛen turoloo. (Edwein 33:5; 37:28) Ɛhẽne ati yeɛ bɛbɔ bɛyɛ basabasa ne, ɔngɔnea maa bɛngɔtena berɛ daa ne.
w17.08 6 ¶15
Aso Ekonya Aboterɛ Kɔnwondɛ Yehowa?
Wɔ Edwein 13:1, 2 ne, Dawide bisale Yehowa pɛen nna kyɛ: “Kyinzu?” Yede, nzu yeɛ ɔbokale ye maa onyane aboterɛ nwondɛle Yehowa ɔ? Ɔtoale ye dwirɛ naso kyɛ: “Na me de, mafa me nwo mato wɔ dɔ bɔ onni ngasi ne aso; na wɔ ngoalelɛ ne, ngoli ahurusi wɔ nu. Ngɔto dwein ngɔye AWURADE ayɛ, ofikyɛ walo me paa.” (Edw. 13:5, 6) Dawide fale yenwo tole Yehowa dɔ bɔ onni ngasi naso. Afei koso, ɔdwenedwenene kyɛbɔ Yehowa bokale ye mmerɛ bie bɔ wapɛ nu nanwo, na ɛhẽne maa onyane gyidie kyɛ Yehowa kole ye ngõa. Né ole gyidie paa kyɛ sɛ onya aboterɛ nwondɛ Yehowa a, ɔkɔboka ye.
kr 236 ¶16
Bɔ Nyameɛ Abɔ Ye Tianu Kyɛ Ɔkɔyɛ Ne, Ahennie Ne Kɔmaa Ɔkɔwa Nu
Anwobamɔ. Sɛ yɛkɔ ewiase foforɛ nanu a, edwirɛ bɔ ɔwɔ Yesaya 11:6-9 ne, ɔkɔwa nu maa ebiala konwu ye. Sɔ mmerɛ ne, mmrienzua, mmrasua ɔne ngwalaa kɔhora kɔhɔ nekaa biala bɔ bekuro ɔ, na bengosuro nikyefee. Afei yengosuro sona ɔne kaka biala. Wɔde, pɛ ɛhe anwo foto wɔ w’adwene nu nea. Sɔ mmerɛ ne, aseɛ he aso nekaa biala kɔyɛ w’awuro. Ɛkɔhora kobia asue, ɛkwaa ɔne ɛpo nu bɔ engosuro ɔ. Ɛkɔhora kohyini mmokaa, ɔne aseɛ he aso nekaa biala, na engosuro hwee. Afei sɛ odwu kɔngɔen koso a, engosuro nikyefee. Sɔ mmerɛ ne, edwirɛ bɔ ɔwɔ Hesekiel 34:25 ne kɔwa nu. Bɛbɔ bɛsõ Nyameɛ ne, “bɛkɔtena ɛserɛ ne aso asomdwee nu, ná balela ɛhɔayeɛ nemɔ anu.”
Bible Nu Dwirɛ Titire
w13 9/15 19 ¶12
Sɛ ebie di mmraa so wɔ ewiase he anu a, bebu ye kyɛ yenye bukyelle, anaa ye dwirɛ te twann. Ɛhe yɛ aworabɔ paa. Awofoɛ ne tikyafoɛ pẽe kã kyɛ, sona biala le yenwo, yeti ɔnzɛkyɛ ɛmaa ebie kyire wɔ bɔ odikyɛ ɛyɛ ɔ. Yeti bɔ ɛse kyɛ ɔte pá ma wɔ ne, ɛhẽne yeɛ odikyɛ ɛyɛ ɔ. Bɛbɔ bɛnwa bɛsõ Nyameɛ po ne, bɛkoso bele sɔ adwene ne bie. Bɛyɛ bɔ bɛbɔbɔ bekuro ɔ, na bɛmva Nyameɛ mmraa bɛnyɛ huu. (Edw. 14:1) Nahorɛ Kristofoɛ koso, sɛ yannea yé a, yɛkɔhora yekosuesũa sɔ subaen tɛ́ɛ ne bie. Ebia bɛfa akwangyerɛ bɛma yɛ a, yɛngɔfa yɛngɔyɛ adwuma, anaa yɛkɔkekã yenwo dwirɛ bɔ ɔttemayé po. Odwu mmerɛ bie po a, bɔ ebiemɔ yeɛ ole kyɛ, sɛ bɛnye gye akwangyerɛ nanwo a, bɛkɔfa bɛkɔyɛ adwuma, na sɛ bɛnye ngye yenwo de a, ná bapia bato ahameɛ. Sɔ akwangyerɛ nemɔ bie yeɛ ole bɔ ɔfa nningyein bɔ yɛfa yɛgyegye yɛnye, intanɛt bɔ yɛfa yedi dwumaa, ɔne sukuu bɔ yɛkɔhɔ yɛkɔhɔ sĩɛ nanwo ne.