Ahoboa Beni Yeɛ Ayɛ Ama Amaneɛnwunɛ Piri Bɔ Ɔba Ne Ɔ?

1. Nzuati yeɛ odikyɛ yɛboɔboa yɛnwo yesie yɛma atorɛngyɛm ɔ?

SƐ EDWIRƐ bie baasi na edimoa boɔboa wɔnwo sie a, ɔboka paa. Yenwo nneasoɛ yeɛ ole kyɛ, sɛ atorɛngyɛm bie si a, bɛbɔ baboɔboa bɛnwo basie ne, ɛyɛ a bɛtaa benya ngõa, na bɛboka mmeni foforɛ po. Kue bie bɔ bɛwɔ Europe bɔ sɛ atorɛngyɛm bie si a, bɛboka mmenia ne hãne kyɛ: “Mmenia bɔ bedimoa bɛboa bɛnwo kora na edwirɛ bie asi ne, ɛyɛ a ɔboka bɛ paa.”

2. Nzuati yeɛ odikyɛ yɛboɔboa yɛnwo yɛma amaneɛnwunɛ piri ne ɔ? (Mateo 24:44)

² Sɛ atorɛngyɛm bie si a, ɔkora fũ mmeni pẽe nala nu. Bɔ ɔmaa ɔba sɔ yeɛ ole kyɛ, ɛyɛ a né bɛyɛlle ahoboa biala. Sɔ ala yeɛ “amaneɛnwunɛ piri” ne koso kɔyɛ ɔ, okofũ mmeni pẽe nu. (Mat. 24:21) Nakoso bɛbɔ baboɔboa bɛnwo basie ne de, ongofũ benu. Bɔ yeti yeɛ ɔte sɔ yeɛ ole kyɛ, kɔyɛ afoɛ 2,000 ɛhe ne, Yesu hãhyirele bɛbɔ beli ye sĩ ne kyɛ bɛboɔboa bɛnwo bɛma sɔ amaneɛnwunɛ piri ne. (Kenga Mateo 24:44.) Yeti sɛ yɛboɔboa yɛnwo yesie a, ɔkɔhora kɔboka yɛ maa yekogyina bɔ okosisi sɔ mmerɛ ne noa. Afei koso, ɔkɔmaa yɛkɔboka afoforɛ maa bɛkoso bɛkɔyɛ sɔ.—Luka 21:36.

3. Subaen benimɔ yeɛ ɔkɔboka yɛ maa yekonya ngõa wɔ amaneɛnwunɛ piri nanu ɔ, na nzuati ɔ?

³ Subaen nzã bie wɔ berɛ bɔ ɔkɔboka yɛ maa yɛkɔboɔboa yɛnwo yɛkɔma amaneɛnwunɛ piri ne ɔ. Sɛ odwu amaneɛnwunɛ piri ne a, yɛkɔhã atemuo dwirɛ bɔ yenoa yɛhye yekohyire mmenia, na ɛhẽne ati, bɛkɔpɔ yɛ. (Nye. 16:21) Nakoso sɛ yemia yɛnye yɛkã sɔ dwirɛ ne, na yɛfa yɛnwo yɛto Yehowa so a, ɔkɔbɔ yɛnwo waen. Sɛ odwu sɔ mmerɛ ne a, ebia yeliemamɔ pẽe nala yeɛ b’agyapadeɛ kofi bɛsa ɔ. Sɛ ɔba sɔ a, nzu yeɛ odikyɛ yɛyɛ ɔ? (Hab. 3:17, 18) Odikyɛ yenwu bɛ anwumvoin, kyɛbɔ ɔkɔyɛ a, yɛkɔhora yɛkɔboka bɛ maa bɛsa kɔhã bɔ behia ɔ. Afei koso wɔ amaneɛnwunɛ piri nanu ne, maen biemɔ bɔ bahã bɛnwo babonu kɔto kowura yɛso. Sɛ ɔba sɔ a, ebia yɛne aliemaamɔ kɔbonu kɔɔfea nekaa bie kãa. (Hes. 38:10-12) Wɔ sɔ mmerɛ nanu ne, odikyɛ yɛdɔ aliemaamɔ, na yɛne bɛ yɛ kõ. Sɛ yɛyɛ sɔ a, ɔkɔmaa yɛne bɛ mukoraati konya ngõa.

4. Nzuati yeɛ Bible ne hyɛ yɛ ngunaen kyɛ yɛhɔso yenya subaen bie tekyɛ animia, anwumvoinnwunɛ, ɔne ɔdɔ ɔ?

⁴ Bible ne hyɛ yɛ ngunaen kyɛ yɛhɔso yenya subaen bie tekyɛ animia, anwumvoinnwunɛ, ɔne ɔdɔ. Luka 21:19 kã kyɛ: “Sɛ ɛmɔ gyina pindinn,” anaa ɛmɔmia ɛmɔ nye a, “yeɛ ɛmɔ konya ɛmɔ kra ɔ.” Afei Kolosefoɛ 3:12 kã kyɛ: “Ɛmɔfa . . .anwumvoinnwunɛ bɛbɔ ɛmɔ bra.” Yeɛ 1 Tɛsalonikafoɛ 4:9, 10 kã kyɛ: “Nyameɛ ahyirehyire ɛmɔ kyɛ ɛmɔ hurohuro ɛmɔnwo dwirɛ. . . . Nakoso, aliemaamɔ, yɛsrɛ ɛmɔ kyɛ, ɛmɔhɔso bɛyɛ ye mmorosoɛ.” Mmenia bɔ bɛhworɔle sɔ dwirɛ he bɛmane bɛ ne, né bele subaen tekyɛ animia, anwumvoinnwunɛ, ɔne ɔdɔ dada. Nakoso né odikyɛ bɛkɔso bɛda sɔ subaen ne ali. Yɛ koso, sɔ ala yeɛ odikyɛ yɛyɛ ɔ. Yɛbaanea kyɛbɔ tete Kristofoɛ nemɔ lale sɔ subaen ne ali. Afei yɛkɔnea kyɛbɔ yekosuesũa bɔ bɛyɛle ne ɔ. Sɛ yɛyɛ sɔ a, ɔkɔboka yɛ maa yɛkɔboa yɛnwo yɛkɔma amaneɛnwunɛ piri bɔ ɔba ne.

KƆSO MIA WƆNYE

5. Ɔhaw bɔ né tete Kristofoɛ nemɔ fa nu ne, nzu yeɛ ɔbokale bɛ maa begyinane yenoa ɔ?

⁵ Né odikyɛ tete Kristofoɛ nemɔ mia bɛnye paa. (Heb. 10:36) Bɔ ɔmaa ɔte sɔ yeɛ ole kyɛ, né bɛfa ɔhaw pẽe nu wɔ b’asetena nu. Afei koso, Yudafoɛ nyamesom mbanyi, Roman awaen ne, ɔne bɛbɔbɔ b’abusũafoɛ fale ɛpɔen wale bɛ so. (Mat. 10:21) Sɛ ɛhẽne la ahãmeɛ a, né odikyɛ tete Kristofoɛ nemɔ nea bɛnwo yé kyɛbɔ ɔkɔyɛ a, bɛbɔ bahwẽ bɛnwo bafi asafo nanwo, bɔ bɛkekã yenwo dwirɛ tɛ́ɛ bɛfa bɛsɛkye mmenia adwene ne, benngotie bɛ ngyerɛkyerɛ ne ɔ. (Aso. 20:29, 30) Nakoso, ɔmva yenwo ne ɔhaw bɔ sɔ Kristofoɛ nemɔ fale nu ne, bemiane bɛnye begyinane nu. (Nye. 2:3) Yede, nzu yeɛ ɔbokale bɛ maa bɛyɛle sɔ ɔ? Bɔ mmenia biemɔ tekyɛ Yob yɛle bɔ Bible ne kã yenwo dwirɛ ne, besusuli yenwo. (Yak. 5:10, 11) Nikyee foforɛ bɔ bɛyɛle yeɛ ole kyɛ, bɛbɔle mbaeɛ kyɛ Yehowa ma bɛ anwoserɛ. (Aso. 4:29-31) Afei koso, né bɛse kyɛ sɛ bemia bɛnye begyina ɔhaw nu a, Yehowa koyira bɛ.—Aso. 5:41.

6. Sɛ ɛfá ɔhaw bie nu a, sɛɛ yeɛ bɔ Merita yɛle ne kɔhora kɔboka wɔ ɔ?

⁶ Mmenia biemɔ miane bɛnye gyinane amaneɛnwunɛ nu. Sɔ mmenia nemɔ nwo dwirɛ wɔ Bible ne, ɔne asafo nwomaa ahoroɛ nu. Sɛ yɛdwenedwene bɔ bɛyɛle nanwo a, ɔkɔboka yɛ paa. Aliemaa brasua bie bɔ bɛfrɛ ye Merita bɔ ɔwɔ Albania ne yɛle sɔ, na ɔbokale ye paa. Ye abusũafoɛ fale ɛpɔen bɛwale ye so. Ɔhãne kyɛ: “Yob nwo dwirɛ bɔ ɔwɔ Bible nanu ne, ɔhyɛle me ngunaen. Yob nwuni amaneɛ paa, na né ɔnze sonahorɛ bɔ wafa sɔ ɔhaw ne wawa ye so ɔ. Nakoso ɔhãne kyɛ: ‘Me nahorɛlilɛ de, mengɔyakyi nu kɔpem kyɛ ngowu ɔ!’ (Yob 27:5) Bɔ né wato me ne, sɛ mefa metoto Yob deɛ nanwo a, né menwu ye kyɛ me deɛ ne te kãa bie. Amaneɛ bɔ né Yob nwu ye ne, né ɔnze nekaa bɔ ofi ɔ, nakoso mede mese nekaa bɔ ofi ɔ.”

7. Sɛ ɔhaw biala tolle yɛ pó a, nzuati yeɛ odikyɛ yɛkɔso yɛbɔ mbaeɛ ɛnnɛ ɔ?

⁷ Sɛ ɔhaw bie to yɛ a, nikyee kõ bɔ ɔkɔboka yɛ maa yekomia yɛnye yekogyina yenoa yeɛ ole kyɛ, yɛkɔhã bɔ yɛfa nu nanwo dwirɛ yekohyire Yehowa. (Flp. 4:6; 1 Tɛs. 5:17) Nná mmerɛ bɔ ɔhaw bie ato yɛ ne ngõme yeɛ odikyɛ yɛbɔ mbaeɛ ɔ, na mmom odikyɛ yɛyɛ sɔ mmerɛ bɔ y’abanu abu anaakyɛ edwirɛ bie ahyɛ yɛ so ne. Sɛ ɛkã ɔhaw ahoroɛ bɔ ɛfa nu ɛnnɛ nanwo dwirɛ kyire Nyameɛ a, ɔkɔboka wɔ maa kyẽabie sɛ ɔhaw bie bɔ enu yɛse to wɔ a, ɛkɔfa wɔnwo kɔto ye so. Sɛ ɛyɛ sɔ a, gyidie bɔ ele ye kyɛ ɔhaw bie to wɔ a, Yehowa kɔboka wɔ ne, enu kɔyɛ se.—Edw. 27:1, 3.

8. Sɛɛ yeɛ Mira dwirɛ ne boka yɛ maa yenwu kyɛ sɛ yemia yɛnye yegyina ɔhaw noa ɛnnɛ a, ɔkɔboka yɛ kyẽabie ɔ? (Yakobo 1:2-4) (Nea foto ne koso.)

⁸ Sɛ yemia yɛnye yedi nahorɛ yɛma Yehowa ɛnnɛ a, ɔkɔboka yɛ maa yekogyina ɔhaw biala bɔ ɔkɔto yɛ wɔ amaneɛnwunɛ piri nanu ne noa. (Rom. 5:3) Nzuati yeɛ yɛkã sɔ ɔ? Aliemaamɔ pẽe anwu kyɛ, sɛ bemia bɛnye begyina ɔhaw bɔ bɛfa nu ne noa a, ɔboka bɛ maa bɛkora begyina ɔhaw foforɛ bɔ ɔkɔto bɛ ne noa. Animia bɔ ɔte sɔ ne, ɔboka bɛ maa bɛ gyidie yɛ se. Afei, ɔmaa bɛkɔso bɛfa bɛnwo bɛto Yehowa so, ofikyɛ bɛse kyɛ ɔkɔboka bɛ. Yeti sɛ ɔhaw bie to bɛ a, bɛmma b’abanu mmu. (Kenga Yakobo 1:2-4.) Aliemaa brasua Mira te atẽepakyelɛniɛ wɔ Albania. Omiane yenye gyinane ɔhaw bie bɔ ɔtole ye ne noa. Ɛhẽne ati, kesaalae sɛ ɔhaw bie to ye a, onzuro. Né y’adwene yɛ ye kyɛ ye ngome yeɛ onwu amaneɛ wɔ ye asetena nu ɔ. Nakoso sɛ ɔkae kyɛbɔ Yehowa aboka ye kɔyɛ afoɛ 20 ɛhe ne a, ɔhyɛ ye ngunaen paa. Yeti ɛyɛ a ɔkã kyire yenwo kyɛ: ‘Ngɔhɔso ngoli nahorɛ, na mengɔma afoɛ pẽe bɔ Yehowa afa aboka me ne ngɔyɛ mbaen llé.’ Wɔ koso, kyɛbɔ Yehowa aboka wɔ maa agyina ɔhaw ahoroɛ noa wɔ w’asetena nu ne, nnɛmaa wɔ wora fi ye llé. Kae kyɛ mmɔden biala bɔ ɛbɔ kyɛ ekogyina ɔhaw ahoroɛ noa ne, Yehowa nwu ye mukoraati, na okoyira wɔ paa. (Mat. 5:10-12) Afei Yehowa kɔboka wɔ maa ekonya akokoduro. Sɛ amaneɛnwunɛ piri ne ba a, sɔ akokoduro ne kɔboka wɔ maa ekomia wɔnye kogyina ɔhaw biala bɔ ɔkɔto ne noa.

NWU MMENIA ANWUMVOIN

9. Aliemaamɔ bɔ né bɛwɔ Antiokia bɔ ɔwɔ Siria ne, nzu yeɛ bɛyɛle bɔ okyire kyɛ benwu beliemaamɔ anwumvoin ɔ?

⁹ Tete Kristofoɛ nemɔ aberɛ so ne, ɛhɔen pirikua bie wale Yudea maen nanu mukoraati. Mmerɛ bɔ asafo bɔ ɔwɔ Antiokia bɔ ɔwɔ Siria ne tele ɛhɔen bɔ wawa nanwo dwirɛ ne, beliemamɔ bɔ bɛwɔ Yudea ne dwirɛ ne yɛle bɛ anwumvo. Ɛhẽne maa bɛyɛle b’adwene kyɛ bɛkɔyɛ nningyein biemɔ bɛkɔfa bɛkɔboka bɛ. “Yeti asuafoɛ nemɔ yɛle kyɛ, benu biala ɔkekã yesa ase kãa kyɛbɔ ɔkɔhora ɔ, ná bɛfa bɔ bekonya ye ne bɛɛboka aliemaamɔ bɔ bɛwɔ Yudea ne.” (Aso. 11:27-30) Sɛ efi Antiokia ɛkɔ Yudea a, né atẽe ne wale paa. Nakoso aliemaamɔ bɔ né bɛwɔ Antiokia ne yɛle bɔ bɛkɔhora biala bɛɛbokale beliemamɔ bɔ né bahɔ anwokyere nu ne.—1 Yoh. 3:17, 18.

10. Sɛ atorɛngyɛm bie si maa yeliemamɔ kɔ anwokyere nu a, yɛkɔyɛ sɛɛ na yahora yala anwumvoinnwunɛ ali yahyire bɛ? (Nea foto ne koso.)

¹⁰ Yɛ koso, sɛ yeliemamɔ kɔ anwokyere nu, tekyɛ mmerɛ bɔ atorɛngyɛm bie asi ne a, odikyɛ yenwu bɛ anwumvoin, na yɛboka bɛ. Bɔ yɛkɔhora yɛkɔyɛ ne bie yeɛ ole kyɛ, yekobisa yenwo atẽe yekofi asafo nu mbanyi nemɔ berɛ, na yaaboka bɛbɔ atorɛngyɛm ne ato bɛ ne. Afei yɛkɔhora yɛkɔye ndoboa, anaakyɛ yɛkɔbɔ mbaeɛ yɛkɔma yeliemamɔ bɔ bahɔ anwokyere bɔ ɔte sɔ nu ne.b (Any. 17:17) Ɛhe anwo nneasoɛ yeɛ ole kyɛ, wɔ 2020 nu ne, asafo ne yele Atorɛngyɛm Mmerɛ Nu Bokafoɛ Boayikue kɔbo 950 wɔ ewiase mukoraati kyɛ bɛboka aliemaamɔ bɔ COVID-19 anwonyerɛ ne amaa bɛnwo ahyere bɛ ne. Aliemaamɔ mmrienzua ne mmrasua bɔ bɛyɛ adwuma bɛboka sɔ kue he ne, yɛnye sɔ adwuma serɛ bɔ bɛyɛ ne paa. Ɔnate kyɛ beliemaamɔ Kristofoɛ dwirɛ yɛ bɛ anwumvo nati, bɛmane bɛ nningyein bɔ behia ɔ. Afei koso, bɛfale Bible nanu dwirɛ bɛkyekyele bɛ wora. Sɛ odwu mmerɛ bie koso a, besiesie aliemaamɔ awuro bɔ atorɛngyɛm asɛkye ye ne. Afei koso, besiesie nekaa ahoroɛ bɔ yeyia nu yɛsõ Yehowa ne.—Fatoto 2 Korintofoɛ 8:1-4 nwo.

11. Sɛ yenwu yeliemamɔ anwumvoin, na yɛboka bɛ a, sɛɛ yeɛ ɔhyɛ Yehowa animnyam ɔ?

¹¹ Sɛ atorɛngyɛm bie si na yenwu yeliemamɔ anwumvoin anaa yɛboka bɛ a, mmeni pẽe nwu bɔ yɛyɛ ne. Ɛhe anwo nneasoɛ yeɛ ole kyɛ, wɔ 2019 nu ne, mvrama pirikua bie tuli, na ɔsɛkyele Ahennie Asa bie wɔ Bahamas. Mmerɛ bɔ né besá besi sɔ Ahennie Asa ne, aliemaamɔ fale adwuma ne bie bewurale kɔntrata bie sa. Né ɔtte Yehowa Danzeniɛ, yeti bebisale ye kyɛ okole bɛ sɛ? Bĩaa ne hãne kyɛ: “Mepena kyɛ mefa . . . me nningyein, ɔne m’awonserɛ meboka adwuma ne, yeti mengollé ɛmɔ hwee. . . . Ofikyɛ atẽe bɔ ɛmɔ fa so bɛyɛ ɛmɔ adwuma ne, menye agye yenwo, na wahã m’ahõne paa.” Mmeni pẽe bɔ bɛwɔ ewiase nanu ne, bɛnzõ Yehowa. Nakoso nningyein bɔ Yehowa Adanzefoɛ yɛ bɛfa bɛboka mmenia ne de, benwu ye. Yeti sɛ yeliemamɔ kɔ anwokyere nu, na yenwu bɛ anwumvoin yɛboka bɛ a, ɔkã mmenia bɔ bɛnzõ Yehowa ne ahõne. Afei koso, ɔmaa bɛye Yehowa, “Nyameɛ bɔ ye anwumvoinnwunɛ sõne ne ayɛ,” na ɛhe maa yɛnye gye paa!—Ɛfe. 2:4.

12. Sɛ yenwu mmenia anwumvoin ɛnnɛ a, sɛɛ yeɛ ɔkɔboka yɛ wɔ amaneɛnwunɛ piri nanu ɔ? (Nyekyire 13:16, 17)

¹² Sɛ odwu amaneɛnwunɛ piri nanu a, nzuati yeɛ yenwo kohia kyɛ yɛda anwumvoinnwunɛ ali ɔ? Bible ne maa yenwu kyɛ ofi sɔ mmerɛ he kodwu kyɛ amaneɛnwunɛ piri ne kɔhyɛ yebo ne, mmenia bɔ bɛmva bɛnwo bennwura amanyɔnzɛm nu ne, bɛnwo kɔhyere bɛ paa wɔ asetena nu. (Kenga Nyekyire 13:16, 17.) Sɛ ɔba sɔ a, ebia yeliemamɔ kohia yɛ mmokalɛ kora né bahora bagyina ɔhaw bɔ ɔte sɔ nemɔ noa. Ɔngɔhyɛ koraa, Yesu Kristo bɔ ɔte yɛ hene ne, okoobu mmenia ndɛen. Yeti sɛ yenwu mmenia anwumvoin ɛnnɛ a, ye koso okonwu yɛ anwumvoin, na ɔkɔmaa yɛkɔhɔ “Nyameɛ Ahennie” nanu.—Mat. 25:34-40.

FI WAHÕNE NU DƆ ALIEMAAMƆ

13. Kyɛbɔ Romanfoɛ 15:7 maa yenwu ye ne, nzu yeɛ ɔbokale tete Kristofoɛ nemɔ maa bɛhɔle so benyane asomdwee wɔ asafo nanu ɔ?

¹³ Tete Kristofoɛ asafo nanu ne, né mmeni pẽe se kyɛ bele ɔdɔ bɛma bɛnwo paa. Nakoso né ɔlla ase mma bɛ kyɛ bɛkɔyɛ sɔ. Bɔ yeti yeɛ ɔte sɔ yeɛ ole kyɛ, né benu biemɔ te Yudafoɛ bɔ né bɛse Mose Mmraa nanu dwirɛ yé paa. Né benu biemɔ koso fi maen foforɛ so, yeti né ɔsõno b’amammerɛ. Wɔ asafo nanu ne, né Kristofoɛ nanu biemɔ te ngoaa, na né ebiemɔ koso le ngoaa bɔ bewura bɛ bo ɔ. Yede, nzu yeɛ ɔbokale bɛ maa bɛhɔle so benyane ɔdɔ bɛmane bɛnwo ɔ? Somafoɛ Pɔɔlo hyɛle bɛ ngunaen kyɛ: “Ɛmɔle ɛmɔnwo ɛmɔnwo bɛto nu.” (Kenga Romanfoɛ 15:7.) Sɔ dwirɛ bɔ Pɔɔlo hãne ne, nzu yeɛ né ɔpena kyire ɔ? Edwirɛ bɔ behyirele yebo, “ɛmɔle ɛmɔnwo” ne, bɔ okyire yeɛ ole kyɛ ebie kɔfa ebie adamvoa, anaakyɛ ɔkɔto yesa kɔfrɛ sona ne kɔhɔ ye awuro ɔ. Ɛhe anwo nneasoɛ yeɛ ole mmerɛ bɔ Filemɔn akoaa Onesimo nwatili bɔ né ɔpena kyɛ osá kɔ Filemɔn berɛ ne. Pɔɔlo hãhyirele Filemɔn kyɛ: “Dé ye nyemene so.” (Flm. 17) Apolo koso, “Kristo nwo ngyerɛkyerɛ kãa bie yeɛ né ɔse ɔ.” Yeti Akwila ne Prisila fa ye bokale bɛ so, na “bɛne ye hɔle b’awuro.” (Aso. 18:26) Ɛhe maa yenwu kyɛ, ɔmva yenwo kyɛ né ɔsõno Kristofoɛ nemɔ amammerɛ, ɔne nekaa bɔ befi ne, belɛle bɛnwo ne bɛnwo bɛtole nu, na bɛmaa aliemaamɔ nwuni kyɛ bekuro bɛ dwirɛ. Ɛhẽne maa benyane asomdwee.

14. Nzu yeɛ Anna ne ohũ yɛle fahyirele kyɛ bekuro aliemaamɔ dwirɛ ɔ?

¹⁴ Yɛ koso, yɛkɔhora yɛkɔto yɛsa yɛkɔfrɛ aliemaamɔ mmrienzua ne mmrasua maa bɛkɔwa yɛ awuro, na ɛhẽne kɔboka yɛ maa yɛne bɛ kɔfa adamvoa. (2 Kor. 6:11-13) Ɛmɔma yɛnea bɔ Anna ne ohũ yɛle wɔ ɛhe anwo ɔ. Bɛfale bɛ bɛwale West Africa kyɛ bɛɛyɛ nzɛmbatrɛlɛfoɛ. Beedwuli West Africa ne, waangyɛ yeɛ COVID-19 anwonyerɛ ne wale ɔ. Ɛhẽne ati, né ɔyɛ se kyɛ bɛne aliemaamɔ koyia nu wɔ Ahennie Asa so ɔ. Yede, né ɔkɔyɛ sɛɛ na bamaa aliemaamɔ anwu kyɛ bekuro bɛ dwirɛ? Bɔ bɛyɛle yeɛ ole kyɛ, bɛfrɛle aliemaamɔ wɔ video call so, na bɛne bɛ bɔle ngɔmmɔ. Ɛhẽne maa benwuni aliemaamɔ yé paa. Bɔ nzɛmbatrɛlɛfoɛ nemɔ yɛle ne, ɔhãne aliemaamɔ ahõne paa. Yeti daa né aliemaamɔ koso frɛ bɛ wɔ fon so bɛne bɛ bɔ ngɔmmɔ. Yede, nzu yeɛ ɔbokale Anna ne ohũ maa bɛlale ɔdɔ bɔ ɔte sɔ ali ɔ? Anna hãne kyɛ, “Mmerɛ bie bɔ wapɛ nu ne, aliemaa biemɔ yɛle nikyeebie bɔ okyire kyɛ bekuro me ne m’abusũa dwirɛ. Ɛhẽne yeɛ ɔbokale me maa nyɛle nikyee bɔ ɔte sɔ mane aliemaamɔ mva ngyirele kyɛ mekuro bɛ dwirɛ ne.”

15. Sɛɛ yeɛ Vanessa dwirɛ ne maa enwu bɔ yeti yeɛ odikyɛ ɛdɔ aliemaamɔ ɔ? (Nea foto ne koso.)

¹⁵ Sɛ yɛnea asafo bɔ yenu pẽe nala wɔ nu ne a, ɔsõno aliemaamɔ subaen, ɔne bɛ amammerɛ. Sɛ yɛfa y’adwene yesie subaen pá bɔ yeliemamɔ le ye naso a, ɔkɔmaa yekohuro bɛ dwirɛ, na yɛne bɛ kɔyɛ kõ. Vanessa wɔ New Zealand. Ɔnate aliemaa biemɔ subaen ti, né ɔyɛ se ma ye kyɛ ɔkɔhã kɔhɔ bɛnwo wɔ asafo nanu. Yede, nzu yeɛ ɔbokale ye ɔ? Kyɛ ahãa ɔkɔhwẽ yenwo kofi aliemaamɔ bɔ bɛte sɔ nanwo ne, ɔbɔle mmɔden kyɛ ɔne bɛ kɔbonu kɔyɛ nningyein kyɛbɔ ɔkɔyɛ a, okonwu bɛ yé ɔ. Sɔ bɔ ɔyɛle ne maa onwuni kyɛ, aliemaamɔ le subaen pá bie wɔ bɛnwo, na ɛhẽne ati yeɛ Yehowa kuro bɛ dwirɛ ne. Vanessa hãne kyɛ: “Ofi mmerɛ bɔ mehũ ɔɔyɛle manzin soneafoɛ ne, yayia aliemaamɔ pẽe bɔ ɔsõno ebiala ne ye subaen ɔ. Nakoso ɔnyɛ se mma me kyɛ ngɔfa bɛ adamvoa. Bɔ manwu ye yeɛ ole kyɛ, Yehowa yeɛ wahwẽ aliemaamɔ wawa asafo nanu ɔ. Ɔmva yenwo kyɛ ɔsõno ebiala ne ye amammerɛ, ɔne kyɛbɔ ye subaen si te ne, Yehowa kuro benu biala dwirɛ. Yeti odikyɛ mekoso memaa aliemaamɔ mukoraati nwu kyɛ medɔ bɛ.” Kyɛbɔ Yehowa dɔ aliemaamɔ ne, yɛkoso odikyɛ yɛdɔ bɛ, na yɛmaa yɛnye gye subaen pá bɔ bele ye nanwo.—2 Kor. 8:24.

16. Wɔ amaneɛnwunɛ piri nanu ne, nzuati yeɛ yenwo kohia kyɛ yefi y’ahõne mukoraati nu yekuro yeliemamɔ dwirɛ ɔ? (Nea foto ne koso.)

¹⁶ Wɔ amaneɛnwunɛ piri nanu ne, nikyee kõ bɔ yenwo kohia paa yeɛ ole ɔdɔ bɔ yele yɛma aliemaamɔ ne. Sɛɛ yeɛ Yehowa kɔbɔ yɛnwo waen wɔ amaneɛnwunɛ piri nanu ɔ? Mmerɛ bɔ bɛto bewurale tete Babilɔn so ne, Yehowa hãhyirele ye mmenia bɔ né bɛwɔ berɛ ne kyɛ: “Me maen, bra baawura wɔ pumbu nemɔ nu, ná toto wɔnwo anoa nu, fa wɔnwo fea kãa kɔpem kyɛ ahõnehulɛ ne kɔtɔ nzue nu ɔ.” (Yes. 26:20) Nahorɛ dwirɛ yeɛ ole kyɛ, sɛ amaneɛnwunɛ piri ne ba a, ebia bɛkɔma yɛ akwangyerɛ bɔ ɔte sɔ ala. Sɔ edwirɛ “pumbu” bɔ ɔwɔ tworɔnzɛm nanu ne, ɔkɔhora kogyina berɛ kɔma asafo ahoroɛ bɔ yɛwɔ nu ne. Yehowa ahyɛ yɛ bɔ kyɛ, sɛ yɛne aliemaamɔ kã yɛnwo yɛbɔ nu yɛsõ ye wɔ amaneɛnwunɛ piri nanu a, ɔkɔbɔ yɛnwo waen. Yeti, ɛnnɛ paa yeɛ odikyɛ yɛyere yɛnwo kyɛ yɛkɔmaa aliemaamɔ konwu kyɛ yekuro bɛ dwirɛ ɔ! Sɛ yɛyɛ sɔ a, ɛhẽne yeɛ ɔkɔboka yɛ maa yekonya ngõa ɔ.

ƐMƆBOA ƐMƆNWO BESIE

17. Sɛ yɛboa yɛnwo yesie a, sɛɛ yeɛ ɔkɔboka yɛ wɔ amaneɛnwunɛ piri nanu ɔ?

¹⁷ Sɛ “AWURADE kyẽa piri” ne ba a, mmeni pẽe bɔ bɛwɔ ewiase ne, bekonwu amaneɛ. (Sef. 1:14, 15) Yɛbɔ yɛsõ Yehowa ne, yɛkoso yekonwu amaneɛ. Nakoso sɛ yɛboa yɛnwo yesie a, yɛ kunu ngɔtete yɛ sɔ mmerɛ ne, na ɛhẽne kɔmaa yɛkɔboka afoforɛ koso. Yeti sɛ ɔhaw bie to yɛ ɛnnɛ a, ɛmɔma yemia yɛnye yegyina yenoa. Sɛ edwirɛ bie to yeliemamɔ maa bɛkɔ anwokyere nu a, odikyɛ yenwu bɛ anwumvoin, na yɛboka bɛ maa bɛsa kã bɔ behia ɔ. Afei koso sɛ yefi y’ahõne mukoraati nu yɛdɔ yeliemamɔ ɛnnɛ a, ɔngɔyɛ se ngɔma yɛ kyɛ yɛkɔla ɔdɔ ali yekohyire bɛ sɔ mmerɛ ne ɔ. Sɛ yɛyɛ sɔ a, Yehowa koyira yɛ, na ɔkɔmaa yekonya ngõa yɛkɔhɔ ewiase foforɛ nanu. Sɔ mmerɛ ne, atorɛngyɛm biala ngɔto yɛ, na yengonwu amaneɛ kõ.—Yes. 65:17.