Ɛse Nikyeebie?

Nzu yeɛ ɔmaa yenwu kyɛ né dwein nwo hia tete Yisraelfoɛ nemɔ paa ɔ?

WƆ TETE Yisraelfoɛ amammerɛ nu ne, né dwein te nikyee bɔ yenwo hia paa. Bible ne taa kã mmenia bɔ né bɛfa komviɛ ne edweintolɛ nwo nningyein bɛto dwein nanwo dwirɛ. Nahorɛ dwirɛ yeɛ ole kyɛ, Bible ne bue pirikua nala de, ɔte edwein ngome. Ɛhe anu bie yeɛ ole Edwein, Edwein Nu Dwein, ɔne Awuye nwomaa ne. Nwomaa bie kã kyɛ: “Wɔ tete Yisraelfoɛ nemɔ aberɛ so ne, Bible ne maa yenwu kyɛ ne bɛfa edwein bedi dwumaa paa wɔ b’asetena nu.” (Music in Biblical Life)

Né bɛfa dwein bedi dwumaa wɔ bɛ daa daa asetena nu. Né Yisraelfoɛ nemɔ to dwein bɛfa bekyire kyɛ bɛnye agye. (Yes. 30:29) Sɛ né bɛ́fa ɔhene bie besie bia so, bedi aluolue, anaa sogyafoɛ di ngunim wɔ kõɛ nu a, né mmrasua nemɔ fa akasaa bɛto dwein, na né bɛfa anigye besi abilie. (Mae. 11:34; 1 Sam. 18:​6, 7; 1 Ahe. 1:​39, 40) Afei koso, sɛ né ebie wu a, né Yisraelfoɛ nemɔ to awuye dwein bɛfa bekyire kyɛ bɛ wora abɔ. (2 Abe. 35:25) Nwomaa bie kã kyɛ: “Ne Yisraelfoɛ nemɔ kuro dwein paa.” (McClintock and Strong’s Cyclopedia)

Né bɛto dwein wɔ ahemvie. Né Yisrael ahemvo nemɔ kuro dwein paa. Ɔhene Sɔɔlo maa Dawide wale ye ahemvie ɔɔtole dwein mane ye. (1 Sam. 16:​18, 23) Nziɛen bɔ Dawide bɔbɔ ɔɔyɛle ɔhene ne, ɔyɛle edweintolɛ nwo nningyein, ɔhworɔle dwein bɔ ɔyɛ fɛ, na ɔhyehyɛle dweintolɛ kue maa behuli dwein wɔ Yehowa asɔre awuro berɛ. (2 Abe. 7:6; Amo. 6:5) Ɔhene Solomon koso, né ole mmrienzua ne mmrasua bɔ né bɛto dwein wɔ ye ahemvie berɛ ɔ.—Nwo. 2:8.

Né bɛfa dwein bedi dwumaa wɔ bɛ soen nu. Né Yisraelfoɛ nemɔ to dwein bɛfa bɛso Yehowa, na né ɔte nikyee bɔ né yenwo hia bɛ paa ɔ. Nahorɛ dwirɛ yeɛ ole kyɛ, dweintolɛfoɛ 4,000 yeɛ né bɛto dwein wɔ Yerusalem asɔre awuro berɛ ɔ. (1 Abe. 23:5) Né bɛbɔ firikyiwa, adengum ne sangoo. (2 Abe. 5:12) Nakoso ɔtte sɔ dweintolɛfoɛ hemɔ ngome yeɛ né bɛto dwein bɛfa bɛsõ Yehowa ɔ. Sɛ né Yisraelfoɛ nemɔ kɔ Yerusalem kyɛ bɛkwaali afoɛnoa aluolue ne a, ɔkɔyɛ kyɛ né bɛto dwein biemɔ. Né bɛfrɛ ye Dwein Bɔ Bɛfa Bɛfo Bokaa Ɔ. (Edw. 120-134) Yudafoɛ abakɔsɛm maa yenwu kyɛ, sɛ né Yisraelfoɛ nemɔ di Abɔtra aluolue ne a, né bɛto dwein biemɔ bɔ bɛfrɛ ye Hallel Dwein.a

Dwein te nikyee bɔ yenwo té hia bɛbɔ bɛso Nyameɛ ne paa. (Yak. 5:13) Yeti yɛto dwein, ofikyɛ ɔboka soen bɔ yɛfa yɛma Yehowa naso. (Ɛfe. 5:19) Sɛ yɛne yeliemamɔ bonu to dwein a, ɔboka maa yepingye yɛnwo. (Kol. 3:16) Afei ɔkora maa yenya anwoserɛ yɛfa yegyina yɛ haw noa. (Aso. 16:25) Amba, dwein te atee ko bɔ yɛfa so yekyire kyɛ yɛdɔ Yehowa, na yele yenu gyidie ɔ.