ADESUA 10
DWEIN 31 O Wo ne Onyankopɔn Nnantew!
Nya Yehowa Ne Yesu Adwene Wɔ Nningyein Nwo
‘Na kyɛbɔ Kristo nwuni amaneɛ wɔ anwoɔnaen nu ne, ɛmɔ koso, ɔsɛ kyɛ ɛmɔnya sɔ adwene ne ná ɛmɔmia ɛmɔ nye.’—1 PET. 4:1.
BƆ ADESŨA NE KƆHÃ YENWO DWIRƐ Ɔ
Kyɛbɔ né Yesu susu nningyein nwo ne, yɛkɔnea bɔ somafoɛ Petro sua fili nu, ɔne bɔ yɛkoso yɛkɔhora yekosua yekofi nu ɔ.
1-2. Sɛ bɛkã kyɛ yɛlɔ Yehowa a okyire sɛɛ, na nzu yeɛ Yesu yɛ fahyirele sɔ ɔ?
YESU hane nikyeebie bie bɔ yenwo hia paa wɔ Mose Mmraa nanu nanwo dwirɛ. Ɔhane kyɛ: “Fa w’ahone amukoraa ne wɔ kra amukoraa ne w’anwoserɛ amukoraa ne w’adwene amukoraa kuro Awurade wɔ Nyameɛ dwirɛ.” (Luka 10:27) Ɛhe kyire kyɛ odikyɛ yɛfa nikyeebiala bɔ yele ye ne yɛsõ Yehowa yɛfa yekyire kyɛ yɛdɔ ye. Ebie yeɛ ole bɔ yɛnye gye yenwo, kyɛbɔ yesi yɛte nga, kyɛbɔ yesusu nningyein nwo, ɔne y’anwoserɛ. Nahorɛ dwirɛ yeɛ ole kyɛ, adwene bɔ Yehowa le ye wɔ nningyein nwo ne, yɛngɔhora yegonwu ye mukoraati. Nakoso ɔnate kyɛ Yesu suesuane ye Baba pɛpɛɛpɛ nati, sɛ yenwu “Kristo adwene” a, ɔkɔmaa yekonwu Nyameɛ adwene wɔ nningyein nwo.—1 Kor. 2:16.
2 Yesu fale ye adwene mukoraati lɔle Yehowa. Né ɔse bɔ Nyameɛ pena kyɛ ɔyɛ ɔ, yeti né wasi ye hue kyɛ sɛ okonwu amaneɛ po a, ɛhene alaa yeɛ ɔkɔyɛ ɔ. Ɔnate ɛhene ati, Nyameɛ apɛdeɛ bɔ ɔkɔyɛ ne, né yenwo hia ye tra nikyeebiala.
3. Nzu yeɛ somafoɛ Petro sua fili Yesu berɛ ɔ, na nzu yeɛ ɔhahyirele ye mmango Kristofoɛ nemɔ kyɛ bɛyɛ ɔ? (1 Petro 4:1)
3 Petro ne asomafoɛ bɔ baha ne, benyane yenwo atee ne Yesu bɔle paa, na ɛhene maa benwuni kyɛbɔ né osusu nningyein nwo ɔ. Petro krataa bɔ olimoa bɔ Yehowa maa ɔhworɔle nanu ne, ɔhahyirele Kristofoɛ kyɛ bemia bɛnye kyɛ bekonya adwene bɔ Kristo le ye ne bie. (Kenga 1 Petro 4:1.) Mmerɛ bɔ Petro hane kyɛ “bemia bɛnye” ne, ebiaa kyɛbɔ né sogyafoɛ boa bɛnwo kɔ kõɛ nanwo dwirɛ yeɛ né ɔwɔ ye tianu ɔ. Yeti sɛ Kristofoɛ nya Yesu adwene ne bie a, ɔkɔboka bɛ maa bekomia bɛnye bɛkɔhõ bekotia bɛ sintɔ bɔ ɔtwetwe bɛ kyɛ bɛɛyɛ bɔne, ɔne Satan wiase ne.—2 Kor. 10:3-5; Ɛfe. 6:12.
4. Nzu yeɛ yekosusu yenwo wɔ adesua he anu ɔ?
4 Yɛbaanea kyɛbɔ né Yesu susu nningyein nwo, ɔne bɔ yɛkɔyɛ yɛkɔfa yekosuesua ye ɔ. Yekonwu (1) kyɛbɔ yekonya Yehowa adwene, na wamaa yɛne aliemaamɔ adwene ayɛ kõ, (2) kyɛbɔ yɛkɔbrɛ yɛnwo ase, ɔne (3) kyɛbɔ sɛ yɛbɔ Yehowa mbaeɛ a, ɔboka yɛ maa yɛnye da berɛ ɔ.
NYA YEHOWA ADWENE
5. Mmerɛ bie, nzu yeɛ Petro yɛle bɔ okyire kyɛ né olle Yehowa adwene ɔ?
5 Mmerɛ bie, Petro annya Yehowa adwene wɔ edwirɛ bie anwo. Ɛmɔma yɛnea bɔ osili ɔ. Né Yesu ahahyire ye asomafoɛ nemɔ kyɛ odikyɛ ɔkɔ Yerusalem maa asɔfo mbanyi nemɔ kye ye, bɛyɛ ye ayayadeɛ, na beku ye. (Mat. 16:21) Yesu yeɛ né ole Mɛsaya ne, ná ne Yisraelfoɛ nemɔ nye la ye so kyɛ ɔbaale bɛ. Ɛhene ati ebiaa né ɔyɛ se ma Petro kyɛ okole koli kyɛ Yehowa kɔma atee maa bekohu ye ɔ. (Mat. 16:16) Yeti ɔfale ye hɔle ahameɛ, na ɔhahyirele ye kyɛ: “Nyameɛ pa gua, Awurade! Ɛhe ngɔto wɔ le!” (Mat. 16:22) Ɔnate kyɛ Petro annya Yehowa adwene wɔ edwirɛ nanwo nati, ɔne Yesu anyɛ adwene.
6. Sɛɛ yeɛ Yesu hyirele kyɛ ole Yehowa adwene ɔ?
6 Yesu de, né ɔne ye Baba bɔ ɔwɔ anwuro ne adwene te kõ. Yeti ɔhahyirele Petro kyɛ: “Dwɔso berɛ kɔ dɔ, Abɔnzam! Ɛte sundidua ma me; ofikyɛ nna Nyameɛ adwene yeɛ ɛdwene ɔ, na mmom ɛdwene kuro sona adwene.” (Mat. 16:23) Ebiaa adwene pá yeɛ Petro fa hane sɔ ɔ, nakoso Yesu anne bɔ ɔhane ne wando nu. Ofikyɛ nna bɔ né Yehowa kuro yeɛ ole kyɛ Yesu kɔyɛ bɔ ɔkɔmaa yenwo kɔtɔ ye wɔ aseɛ he aso. Sɔ kyẽa ne, Petro nwuni ye paa kyɛ sãa odikyɛ onya Nyameɛ adwene wɔ nningyein nwo. Yɛkoso yɛkɔhora yekosua nikyee yekofi nu.
7. Nzu yeɛ Petro yɛ fahyirele kyɛ afei de né wanya Yehowa adwene ɔ? (Nea foto bɔ ɔwɔ ne.)
7 Siɛ ye, Petro lale ye ali kyɛ ɔpena kyɛ onya Yehowa adwene wɔ nningyein nwo. Né mmerɛ aso kyɛ Nyameɛ maa maenmaensofoɛ nemɔ baboka ye mmenia so. Yeti ɔmaa Petro ɔɔhane nzɛmba ne hyirele Kɔneleo bɔ né ɔte maenmaensoniɛ ne. Ɛhene maa ɔɔbokale maenmaensofoɛ bɔ belimoa bɛɛyɛle Kristofoɛ naso. Né Yudafoɛ ne maenmaensofoɛ nemɔ nyɛ hwee mmɔ nu, yeti né odikyɛ Petro sesa adwene bɔ ole ye wɔ bɛnwo ne kora né wahora wahã nzɛmba ne wahyire bɛ. Mmerɛ bɔ Petro nwuni Nyameɛ adwene wɔ edwirɛ nanwo ne, ɔmaa ɔsesane ye adwene. Yeti mmerɛ bɔ Kɔneleo hane kyɛ ɔbra ye awuro ne, ‘wambopo ye ti.’ (Aso. 10:28, 29) Ɔhane nzɛmba ne hyirele Kɔneleo ne bɛbɔ bɛwɔ ye awuro ne, na bɛbɔle asu.—Aso. 10:21-23, 34, 35, 44-48.
Petro awa Kɔneleo awuro berɛ (Nea ngyekyɛmuɛ 7)
8. Yɛkɔyɛ sɛɛ né yahyire kyɛ yele Yehowa adwene wɔ nningyein nwo? (1 Petro 3:8)
8 Afoɛ pee si ne, Petro tuli oliema Kristofoɛ nemɔ foɛ kyɛ ‘benya adwene ko.’ (Kenga 1 Petro 3:8.) Yɛkoso sɛ yesua Bible ne a, ɔkɔboka yɛ maa yekonya Yehowa adwene, na ɛhene kɔmaa yɛne aliemaamɔ adwene kɔyɛ kõ. Yesu hyɛle ye asuafoɛ nemɔ ngunaen kyɛ bɛfa Nyameɛ Ahennie ne belimoa wɔ b’asetena nu. (Mat. 6:33) Ɛhene ati, ebiaa aliemaa bie bɔ ɛne ye wɔ asafo kõ anu kɔhã kohyire wɔ kyɛ ɔpena kyɛ ɔyɛ mmerɛ mukoraati soen adwuma ne bie. Kyɛ ahaa ekotu ye foɛ kyɛ ɔpena bra bie bɔ, kyɛbɔ ɔkɔyɛ a okosi ye yé kyẽabie ne, odikyɛ yɛkamvo ye wɔ bɔ wafa wasie yenye so nanwo, na yɛnea bɔ yɛkɔyɛ yɛkɔfa yɛkɔboka ye ɔ.
BRƐ WƆNWO ASE
9-10. Nzu yeɛ Yesu yɛ fahyirele kyɛ ɔbrɛ yenwo ase paa ɔ?
9 Kɔngɔen bɔ aleɛ kye maa bekũ Yesu ne, ɔmaa Petro ne asomafoɛ bɔ baha ne suane nikyee titire bie fale anwobrɛaseɛ nwo. Aleɛ bɔ ɔpɛ yebo bɔ né ɔne bɛ koli ye sɔ nɔsoa ne, ɔhahyirele Petro ne Yohane kyɛ bɛɛyɛ yenwo ndotoyɛɛ. Ɔkɔyɛ kyɛ mmerɛ bɔ bɛyɛ ndotoyɛɛ ne, bɛneane kyɛ nzasrɛ, ayaa, ɔne nzue wɔ berɛ, kyɛbɔ ɔkɔyɛ a, bɛkɔfa bekonwunzi bɛbɔ bɛkɔwa ne gya bo kora né badidi. Nakoso sɛ bɛbayia nu a, nwa yeɛ né ɔkɔyɛ sɔ adwuma bɔ ɔba ase he ɔ?
10 Yesu yɛle nikyeebie bɔ okyire kyɛ ɔbrɛ yenwo ase, na ɛhene yɛle ye asomafoɛ nemɔ nwanwa paa. Yeɛ ole kyɛ, adwuma bɔ né ahaa akoaa yeɛ odikyɛ ɔyɛ ne, ye bɔbɔ ɔyɛle. Ɔyele ye ataadeɛ guale berɛ na ɔfale nzasrɛ pɛle yebo. Afei ohwiele nzue guale ayaa nu, na ɔhyɛle yebo nwunzini bɛ gyabo. (Yoh. 13:4, 5) Yesu nwunzini asomafoɛ 12 ne mukoraati gya bo, na Yudase bɔ né ɔkɔye ye kɔma ne po, né ɔboka so. Né ɛhe tte adwuma ba, nakoso ɔnate kyɛ né Yesu brɛ yenwo ase nati ɔyɛle. Afei ɔtole yeboase bisale bɛ kyɛ: ‘Naa ɛmɔanwu bɔ mayɔ mama ɛmɔ ne? Ɛmɔfrɛ me Kyerɛkyerɛniɛ ne Awurade, na bɔ ɛmɔkã ne ɔte nahorɛ, ofikyɛ nde sɔ. Na me bɔ nde ɛmɔ Awurade ne Kyerɛkyerɛniɛ ne, sɛ manwunzi ɛmɔ gya bo a, ye de ɔsɛ kyɛ ɛmɔnwunzinwunzi ɛmɔ nwo gya bo.’—Yoh. 13:12-14.
Anwobrɛaseɛ kora gyina berɛ ma adwene bɔ yele yɛma mmenia, ɔne yɛbɔbɔ yɛnwo ɔ
11. Nzu yeɛ Petro yɛ fahyirele kyɛ né wasua kyɛbɔ ɔkɔbrɛ yenwo ase ɔ? (1 Petro 5:5) (Nea foto ne koso.)
11 Petro suesuane anwobrɛaseɛ bɔ Yesu lale ye ali ne bie. Yesu fili aseɛ so hɔle anwuro ne si ne, Petro yɛle anwanwadeɛ fasale biaa bie anwonyerɛ. Né sɔ biaa ne te bubuaniɛ fi mmerɛ bɔ bɛwole ye ɔ. (Aso. 1:8, 9; 3:2, 6-8) Sɔ anwanwadeɛ bɔ Petro yɛle ne, ɔmaa mmeni pee bepu bɛɛneane ye. (Aso. 3:11) Maen bɔ né Petro fi nu ne, sɛ mmenia kora yɛ nikyeebie a, né bɛfa bɛhoahoa bɛnwo. Yeti ye koso né ɔkɔfa bɔ wayɛ ne kɔhoahoa yenwo anaa? Daabi wanyɛ sɔ, na mmom ofili anwobrɛaseɛ nu hwene mmenia nemɔ adwene hɔle Yehowa ne Yesu so. Ɔhane kyɛ: ‘Ɔnate Yesu dumaa nu, ye dumaa nu gyidie so, yeɛ wama sɔ bubuaniɛ he bɔ ɛmɔnwu ye, ná ɛmɔse ye ne wanya anwoserɛ ɔ.’ (Aso. 3:12-16) Petro krataa bɔ ɔhworɔ ɔɔmane Kristofoɛ nanu ne, ɔhane kyɛ: “Ɛ́mɔfa anwobrɛaseɛ bɛ́hera.” Sɔ dwirɛ bɔ ɔfa yɛle adwuma ne, ɔmaa yɛkae kyɛbɔ Yesu fale nzasrɛ pɛle yenu, na onwunzini asomafoɛ nemɔ gya bo ne.—Kenga 1 Petro 5:5.
Mmerɛ bɔ Petro sale ebie anwonyerɛ ne, ofili anwobrɛaseɛ nu fale yenwo animnyam mane Yehowa ne Yesu. Yɛkoso sɛ yɛbrɛ yɛnwo ase a, yɛngɔnea atee kyɛ mmenia kɔhoahoa yɛ mmerɛ bɔ yayɛ nikyee pá bie ne (Nea ngyekyɛmuɛ 11-12)
12. Yɛkɔyɛ sɛɛ né yahɔ so yabrɛ yɛnwo ase kyɛbɔ Petro yɛle ne?
12 Yɛkoso, yɛkɔhora yekosuesua Petro anwobrɛaseɛ ne bie. Ɛmɔma yɛkae kyɛ, nna ebie noa dwudwolɛ ngome yeɛ okyire kyɛ ɔbrɛ yenwo ase ɔ. Edwirɛ anwobrɛaseɛ bɔ Petro fayɛle adwuma ne, ɔkora koso gyina berɛ ma kyɛbɔ yebu yɛnwo, ɔne kyɛbɔ yebu mmenia ɔ. Ɔdɔ bɔ yele yɛma Yehowa, ɔne kyɛbɔ yekuro mmenia dwirɛ ne, ɛhene yeɛ ɔkã yɛ maa yɛboka bɛ ɔ, na mmom nna kyɛ yɛpena kyɛ bɛkamvo yɛ ti ɔ. Sɛ yefi y’ahone mukoraati nu yɛsõ Yehowa, na yɛboka aliemaamɔ mmerɛ po bɔ mmenia nnwu bɔ yɛyɛ ne a, okyire kyɛ yɛbrɛ yɛnwo ase.—Mat. 6:1-4.
MA ‘WƆNYE LA BERƐ’
13. Sɛ bɛkã kyɛ ebie nye la berɛ a, okyire sɛɛ?
13 Sɛ bɛkã kyɛ ebie ‘nye la berɛ’ a, okyire sɛɛ? (1 Pet. 4:7) Kristoniɛ bɔ yenye la berɛ ne, sɛ osi gyinayɛɛ bie a, ɔfa ye adwene sie bɔ ɔyɛ a ɔkɔmaa Yehowa nye kɔgye naso. Sɔ Kristoniɛ ne, onwu ye kyɛ adamvoa bɔ ɔne Yehowa afa ne, ɛhene yeɛ yenwo hia tra nikyeebiala wɔ ye asetena nu ɔ. Afei koso, ommu yenwo ndra so, na ode to nu kyɛ nna nikyeebiala yeɛ ɔse ɔ. Ebieku koso, ɔkɔso bɔ Yehowa mbaeɛ fakyire kyɛ ɔfa yenwo to ye so.a
14. Mmerɛ bie, nzu yeɛ Petro yɛle bɔ okyire kyɛ wamva yenwo wando Yehowa so ɔ?
14 Kɔngɔen bɔ aleɛ kye maa bekũ Yesu ne, ɔhahyirele ye asuafoɛ nemɔ kyɛ: “Me nwo kɔyɛ sundidua kɔma ɛmɔ amukoraa ɛnɛ kɔngɔen ye.” Né Petro de yenwo di, yeti ɔhane kyɛ: “Sɛ wɔ nwo kɔyɛ sundidua kɔma bɛ mukoraa po a, me de, ɔngɔyɛ sundidua ngɔma me le!” Sɔ kɔngɔen ne, Yesu tuli ye asuafoɛ nanu biemɔ foɛ kyɛ: “Ɛ́mɔwɛne ná ɛ́mɔbɔ mbaeɛ.” (Mat. 26:31, 33, 41) Sɛ Petro tiele sɔ afutue ne a, ahaa okonya akokoduro kɔfa kɔla yenwo ali kyɛ ɔboka Yesu asuafoɛ nemɔ aso. Nakoso ɔnate kyɛ wangora wanyɛ sɔ nati, ɔyele Yesu mane, na siɛ ye ye wora bɔle paa.—Mat. 26:69-75.
15. Kɔngɔen bɔ aleɛ kye maa bekũ Yesu ne, nzu yeɛ ɔyɛle bɔ ɔbokale ye ɔ?
15 Yesu fale yenwo mukoraati tole Yehowa so. Ɔwɔ nu kyɛ né bɔne biala nne yenwo de, nakoso ɔhɔle so bɔle mbaeɛ. Ɛhene maa onyane akokoduro fayɛle bɔ né Yehowa pena kyɛ ɔyɛ ne. (Mat. 26:39, 42, 44; Yoh. 18:4, 5) Sɔ nikyee ne bɔ Petro nwuni ye wɔ Yesu nwo ne, ye wora amvi ye lle.
16. Sɛɛ yeɛ Petro hyirele kyɛ né waayɛ ebie bɔ yenye la berɛ ɔ? (1 Petro 4:7)
16 Siɛ ye, né Petro mva mbaeɛ nni angorɛ koraa. Mmerɛ bɔ betingyele Yesu ne, ɔhyɛle Petro ne asomafoɛ bɔ baha ne bɔ kyɛ honhom krongron kɔwa bɛ so, na wamaa bahora bahã nzɛmba ne. Nakoso ɔhahyirele bɛ kyɛ, bɛnwondɛ wɔ Yerusalem kodwu kyɛ bɛsa kɔhã honhom krongron ne. (Luka 24:49; Aso. 1:4, 5) Mmerɛ bɔ né bɛnwondɛ ne, nzu yeɛ Petro yɛle ɔ? Ɔne ye mmango Kristofoɛ nemɔ ‘tuli bɛ nwo besiele berɛ bɛbɔle mbaeɛ.’ (Aso. 1:13, 14) Ɛhene si ne, Petro hyɛle oliema Kristofoɛ nemɔ ngunaen wɔ ye krataa bɔ olimoa nanu kyɛ, bɛma bɛnye la berɛ, ná bɛhɔso bɛbɔ mbaeɛ. (Kenga 1 Petro 4:7.) Petro fale yenwo tole Yehowa so, na ɔhyɛle oliemamɔ bɔ bɛwɔ asafo nanu ne ngunaen.—Gal. 2:9.
17. Sɛ yɛse nikyeebie yɛ dada po a, nzu yeɛ odikyɛ yɛkɔso yɛyɛ ɔ? (Nea foto ne koso.)
17 Sɛ ebie nye kɔla berɛ a, odikyɛ ɔkɔso bɔ Yehowa mbaeɛ. Sɛ yɛse nikyeebie yɛ dada po a, odikyɛ yɛkɔso yɛfa yɛnwo yɛto Yehowa so, na yɛbɔ ye mbaeɛ. Sɛ yesi gyinayɛɛ biemɔ bɔ yenwo hia paa a, odikyɛ yɛbɔ Yehowa mbaeɛ yɛfa yɛpena ye akwangyerɛ, na yenya gyidie kyɛ ye yeɛ ɔse bɔ ɔte pá ma yɛ ɔ.
Petro bɔle Yehowa mbaeɛ, na ɔfale yenwo tole ye so. Yɛkoso sɛ yesi gyinayɛɛ ahoroɛ bɔ yenwo hia, ná yɛbɔ Yehowa mbaeɛ kyɛ ɔboka yɛ a, okyire kyɛ yɛnye la berɛ (Nea ngyekyɛmuɛ 17)b
18. Yɛkɔyɛ sɛɛ né yahɔso yanya Yehowa adwene wɔ nningyein nwo?
18 Ɔyɛ yɛ fɛ paa kyɛ Yehowa abɔ yɛ wɔ atee bie aso bɔ ɔmaa yɛkora yɛda ye subaen ne bie ali ɔ. (Gye. 1:26) Ɔwɔ nu, yɛngɔhora yengosuesua Yehowa pɛpɛɛpɛ. (Yes. 55:9) Nakoso kyɛbɔ Petro yɛle ne, yɛkoso yɛkɔhora yekonya Yehowa adwene wɔ nningyein nwo. Yede ɛmɔma yɛhɔso yenya Yehowa adwene, yɛbrɛ yɛnwo ase, na yɛma yɛnye la berɛ.
DWEIN 30 M’agya, Me Nyankopɔn, ne M’adamfo
a Kyɛbɔ yɛkɔmaa yɛnye kɔla berɛ ne, sɛ ɛpena nu ngyirekyiremuɛ pee a, kenga Bible Mu Nsɛm a Wɔakyerɛkyerɛ Mu, edwirɛ bɔ yeɛ ole 2 Timoteo 1:7 a Wɔakyerɛkyerɛ Mu—“Onyankopɔn Amma Yɛn Ehu Honhom” ne. Ekonwu ye wɔ jw.org anaa JW Library® so.
b BƆ FOTO NE KÃ YENWO DWIRƐ Ɔ: Aliemaa brasua bie kwaayɛ intaview, na ɔbɔ mbaeɛ.