Aso Ɛmaa Wɔnye Sɔ Bɔ Ele Ye Ɔ?

1. Sɛ bɛkã kyɛ ebie nye sɔ bɔ ole ye a okyire sɛɛ, na nzu yeɛ ongyire ɔ?

SƐ BƐKÃ kyɛ ebie nye sɔ bɔ ole ye a, okyire sɛɛ? Bɔ okyire yeɛ ole kyɛ ɔpene bɔ ole ye naso, ɔfa ye adwene sie nhyiraa bɔ wanya naso, na ɛhene maa yɛsoanu dwo ye. Yesɔ nati sɛ olle nikyeebie a, ɔmma ɔnyɛ ye yea. Nakoso sɛ ebie nye sɔ bɔ ole ye a, ɛhene ngyire kyɛ ɔnzɛkyɛ ɔyere yenwo wɔ nningyein biemɔ nwo. Ebie yeɛ ole kyɛ, ɔtte mvomsoɛ kyɛ Kristoniɛ bie kɔyere yenwo kyɛ ɔkɔhɔ ye nyunu wɔ asafo nanu ɔ. (Rom. 12:1; 1 Tim. 3:1) Nakoso sɛ wanwondɛ alaa na yesa hanne yenwo atee bɔ ɔpena ne a, ɔngɔma ɛhene ngobu ye aba nu.

2. Sɛ ebie amma yenye anzɔ bɔ ole ye a, nzuati yeɛ ɔyɛ suro ɔ?

² Sɛ ebie nye nzɔ bɔ ole ye a, ɔmaa ɔngora nzi gyinayɛɛ pá. Ebiemɔ wɔ berɛ a, ɔnate kyɛ bɛnye nzɔ bɔ bele ye nati, bɛfa mmerɛ pee bɛyɛ adwuma bɛpena esikaa bɛfa bɛtotɔ nningyein bɔ bɛnhyɛda benhia ɔ. Bɔ ɔyɛ aworabɔ yeɛ ole kyɛ, Kristofoɛ biemɔ awua sikaa ne nningyein foforɛ biemɔ. Sɛ bɛyɛ sɔ a, ebiaa bɔ bɛkã yeɛ ole kyɛ, ‘Ɛhe de ɔyɛ sɛɛ alaa a me yeɛ ɔkɔɔyɛ me deɛ ɔ, yeti sɛ mefa a ɔtte hwee,’ anaa ‘Mefa, na siɛ ye mafa bie masi ye gyanu.’ Nakoso, awue biala te bɔne, na Yehowa nye ngye yenwo. (Any. 30:9) Ebiemɔ koso, yenwo atee bɔ bɛpena ye wɔ asafo nanu bɔ bannya ye nati, wayɛ bɛ yea alaa maa bayakyi Yehowa soen po. (Gal. 6:9) Yede, nzu paa yeɛ ɔkɔmaa ebie bɔ wayira yenwo so wama Yehowa ne kɔyɛ sɔ ɔ? Bɔ ɔte yeɛ ole kyɛ, ebiaa wamma yenye anzɔ bɔ ole ye ne.

3. Edwirɛ bɔ ɔwɔ Filipifoɛ 4:​11, 12 ne, nzu yeɛ yɛkɔhora yekosua yekofi nu ɔ?

³ Yɛmu yɛkɔhora yɛkɔmaa yenye kɔsɔ bɔ yele ye ɔ. Somafoɛ Pɔɔlo hworɔle kyɛ: “Masua maa wakokwa me, bɔ tebea biala bɔ nwɔ nu ne mema me nye gye ɔ.” (Kenga Filipifoɛ 4:​11, 12.) Ɔtworɔ sɔ dwirɛ ne, né ɔla prisa. Nakoso ɛhene po ne, né ole anigye, ofikyɛ né wasua maa wakokwa ye kyɛ ɔkɔmaa yenye kɔsɔ bɔ ole ye biala. Sɛ ɔyɛ se kyɛ yɛkɔmaa yɛnye kɔsɔ bɔ yele ye a, Pɔɔlo dwirɛ ne kɔhora kɔboka maa yɛkɔyɛ sɔ. Nahorɛ nu, ɔlla se kyɛ yɛkɔmaa yɛnye kɔsɔ bɔ yele ye ɔ, yeti sana yɛyere yɛnwo yesua. Yɛkɔyɛ ye sɛ? Adesua he kɔmaa yekonwu subaen bɔ yenya ye a, ɔkɔboka yɛ maa yɛkɔyɛ sɔ ɔ.

NNƐYƐ BONIAYƐ

4. Sɛ yɛmaa yɛnye sɔ bɔ yele ye a, sɛɛ yeɛ ɔmaa yɛnye gye ɔ? (1 Tɛsalonikafoɛ 5:18)

⁴ Sɛ yɛmaa yɛnye sɔ bɔ yele ye a, ɔmaa yɛnye gye. (Kenga 1 Tɛsalonikafoɛ 5:18.) Ebie yeɛ ole kyɛ, sɛ yɛmaa yɛnye sɔ nningyein bɔ ɔboka yɛ maa yɛkora yɛtena ngoa nu ne a, ɔngɔma yɛngɔha yɛnwo wɔ nningyein biemɔ bɔ yenyane ahaa yekuro, nakoso yelle ye nanwo. Afei koso, sɛ yɛmaa yɛnye sɔ yenwo atee bɔ yele ye wɔ asafo nanu ne a, ɔkɔmaa yɛkɔyere yɛnwo yɛkɔyɛ ye yé, tra kyɛ daa yɛkɔdwene foforɛ bie bɔ yɛpena nanwo ɔ. Bible ne maa yenwu ye kyɛ yenwo hia paa kyɛ yɛkɔla Yehowa ase wɔ yɛ mbaeɛ nu. Yeti sɛ yɛmaa yɛnye sɔ bɔ yele a, yekonya “Nyameɛ asomdwee bɔ ɔbo ndeaseɛ amukoraa so ne.”—Flp. 4:​6, 7.

5. Né odikyɛ ahaa Yisraelfoɛ nemɔ maa bɛnye sɔ bɔ bele ye ɔ. Nzuati ɔ? (Nea foto ne koso.)

⁵ Ma yɛnea bɔ ɔtole Yisraelfoɛ nemɔ ɔ. Mmerɛ bɔ né bɛnate ɛserɛ so ne, bɛdwudwole bɛkomvi abo betiale Yehowa kyɛ, aleɛ bɔ né bedi ye wɔ Egypt ne, bennya bie benni wɔ ɛserɛ naso. (Num. 11:​4-6) Ɔwɔ nu, né ɛserɛ naso asetena ɔlla ase, nakoso nzu yeɛ ahaa ɔkɔboka bɛ maa bɛnye kɔsɔ bɔ né bele ye ne ɔ? Odikyɛ ahaa bɛkae nningyein bɔ né Yehowa ayɛ ama bɛ ne, na bɛda ye ase. Ebie yeɛ ole kyɛ, mmerɛ bɔ né bɛte ngoaa wɔ Egpyt bɔ né bɛdi bɛnye ne, Yehowa fale ɔhaw buru wale bɛ pɔfoɛ nemɔ aso. Egyptfoɛ nemɔ yakyili bɛ kyɛ bɛhɔ ne koso, Yisraelfoɛ nemɔ lɛle dwetɛ, esikaa kɔkorɛ, ɔne ndaadeɛ pee befili bɛ berɛ. Yeti bɛyɛle ‘bɛ dosodoso.’ (Ɛks. 12:​35, 36) Afei koso, mmerɛ bɔ Egyptfoɛ nemɔ foane Yisraelfoɛ nemɔ beedwuli Ɛpo Kɔkorɛ ne noa ne, Yehowa pakyele nzue nanu maa bɛfale nu bɛhɔle. Bɛnate ɛserɛ so ne koso, daabiala né ɔma bɛ mana maa bedi. Yede, nzu paa yeɛ né ɔha Yisraelfoɛ nemɔ ɔ? Nna kyɛ né bennya aleɛ benni, na mmom bamma bɛnye anzɔ nningyein bɔ né Yehowa ayɛ ama bɛ ne.

6. Yɛkɔyɛ sɛɛ né yahora yahyire nningyein nwo anisɔ?

⁶ Ɛkɔyɛ sɛɛ né amaa wɔnye asɔ bɔ ele ye ɔ? Bɔ olimoa ne, daabiala bɔ ɔhɔleso wɔ kyẽa nanu bɔ ɔmaa wɔnye gyele ne, ɛyɛ a dwenedwene yenwo. Ɛkɔhora kɔhworɔ nningyein nyɔ anaa nza bie bɔ ɔmaa wɔnye gyele paa ne kɔto berɛ. (Awu. 3:​22, 23) Bɔ ɔtɔ so nyɔ, nnɛyɛ boniayɛ. Sɛ mmenia yɛ nikyee ma wɔ a, da b’ase. Afei bɔ ɔtra yemu ne, da Yehowa ase kyẽa biala. (Edw. 75:1) Bɔ ɔtɔ so nza, fa wɔnwo bɔ mmenia bɔ bekyire nningyein nwo anisɔ ne, na ɔkɔmaa wɔ koso ɛkɔyɛ sɔ ala. Ofikyɛ bɛnwa sɛ mako amui pingye kɔkorɛ a, ɔngyɛ né waboro. (Deut. 1:​26-28; 2 Tim. 3:​1, 2, 5) Sɛ yekyire nningyein nwo anisɔ a, ɔkɔmaa yɛngɔfa y’adwene yengosie bɔ yelle ye naso pee.

7. Nzu yeɛ ɔbokale Aci maa yenye sɔle bɔ ole ye ɔ, na nzu yeɛ ofili nu wale ɔ?

⁷ Ɛmɔma yɛnea aliemaa brasua bie bɔ bɛfrɛ ye Aci bɔ ɔwɔ Indonesia ne. Ɔhane kyɛ: “Mmerɛ bɔ COVID-19 anwonyerɛ ne wale ne, nhyɛle yebo mvale menwo ndotole aliemaa biemɔ nwo, na ɛhene ati né nné anigye.” (Gal. 6:4) Yede, nzu yeɛ ɔbokale ye maa ɔsesane ye adwene ɔ? Ɔhane kyɛ: “Nningyein pá bɔ Yehowa yɛ ma me kyẽa biala, ɔne nhyiraa bɔ ɔnate ye ahyehyɛdeɛ bɔ nwɔ nu nati manya ye ne, nhyɛle yebo kyɛ medwenedwene yenwo. Afei nnale Yehowa ase wɔ ɛhe mukoraati nwo, na ɛhene maa nza nyane anigye.” Sɛ enwu ye kyɛ wɔ koso ɛpena yɛ boniayɛ a, ɛkɔhora kosuesua bɔ aliemaa brasua ne yɛle ne, na ɔkɔmaa wɔnye kɔsɔ bɔ ele ye ɔ.

FA W’ADWENE SIE BƆ ELE YE NASO, NA BRƐ WƆNWO ASE

8. Nzu yeɛ ɔtole Baruku ɔ?

⁸ Baruku bɔ né ɔte diyifoɛ Yeremia tworɔfoɛ ne koso, odwuli mmerɛ bie ne, wamma yenye anzɔ bɔ ole ye ɔ. Né Yehowa afa awura ye sa kyɛ ɔboka Yeremia ma ɔbɔ Yisraelfoɛ bɔ né bɛte boniayɛ, ná bɛso yɛ se ne kɔkɔ, na né sɔ adwuma ne yɛ se. Kyɛ ahaa ɔkɔfa ye adwene kosie bɔ né Yehowa pena kyɛ ɔyɛ naso ne, bɔ ye bɔbɔ ɔpena kyɛ onya ye ne mmom yeɛ né ye adwene wɔ so ɔ. Yehowa nate Yeremia so hahyirele ye kyɛ: ‘Nningyein mbiri mbiri yeɛ ɛpena ma wɔ nwo ɔ. Yakyi ye penanɛ.’ (Yer. 45:​3-5) Atee bie aso ne, né Yehowa kã kyire ye kyɛ: “Ma wɔnye sɔ bɔ ele ye ɔ.” Baruku tiele sɔ afutue ne, na ɔhɔle so yɛle Yehowa damvo.

9. Kyɛbɔ 1 Korintofoɛ 4:​6, 7 kã ne, sɛ yele anwobrɛaseɛ a, nzu yeɛ yekonwu ye ɔ? (Nea foto ne koso.)

⁹ Odwu mmerɛ bie a, Kristoniɛ bie kɔhora konya adwene kyɛ, ye yeɛ ahaa ɔfata kyɛ onya yenwo atee bie ɔ. Ebiaa né ole adom akyɛdeɛ bie, okuro adwuma, na osa le suahu pee. Nakoso ɛkɔnea ne, né yenwo atee bɔ ɔpena ne, waali sona foforɛ sa nu. Ɔba ye sɔ a, nzu yeɛ ɔkɔboka ye na wamma ɛhe anha ye ɔ? Ɔkɔhora kosusu edwirɛ bɔ somafoɛ Pɔɔlo hane ye wɔ 1 Korintofoɛ 4:​6, 7 nanwo. (Kenga.) Yenwo atee biala bɔ yekonya ye, anaa adom akyɛdeɛ biala bɔ yele ye ne, Yehowa yeɛ wafa wama yɛ ɔ. Nna kyɛ yɛte pá yɛtra ebiemɔ ti yeɛ wafa wama yɛ ɔ, na mmom ɛlolɛ mbaen yeɛ walo yɛ ɔ.—Rom. 12:​3, 6; Ɛfe. 2:​8, 9.

10. Yɛkɔyɛ sɛɛ né yabrɛ yɛnwo ase?

¹⁰ Sɛ yɛdwenedwene nneasoɛ bɔ Yesu yɛle nanwo a, ɔkɔboka yɛ maa yɛkɔbrɛ yɛnwo ase. Kɔngɔen bɔ onwunzini ye asomafoɛ nemɔ gyabo ne, ɛmɔma yesusu bɔ osili nanwo kãa. Somafoɛ Yohane hworɔle kyɛ: ‘Né Yesu se kyɛ [1] Baba ne afa nningyein amukoraa wawura ye sa, [2] ofi Baba ne berɛ yeɛ ɔwale ɔ, yeɛ [3] ɔ́kɔ Baba ne berɛ. Nakoso ɔhyɛle ye bo nwunzini asuafoɛ nemɔ bɛ gya bo.’ (Yoh. 13:​3-5) Né ahaa Yesu kɔhora kɔhã yegya kɔto so, na wanwondɛ kyɛ asomafoɛ ne mmom beenwunzi yegya bo. Nakoso mmerɛ bɔ né ɔwɔ aseɛ so ne, wannya adwene kyɛ ɔte Nyameɛ Awa nati, odikyɛ yenwo tɔ ye mmerɛ biala. (Luka 9:58) Né Yesu brɛ yenwo ase, na né yenye sɔ bɔ ole ye ɔ. Ɛhe te nneasoɛ kama paa bɔ wayɛ wama yɛ ɔ.—Yoh. 13:15.

11. Sɛɛ yeɛ anwobrɛaseɛ aboka Dennis maa yenye asɔ bɔ ole ye ɔ?

¹¹ Dennis wɔ Netherlands, na wabɔ mmɔden kyɛ okosuesua Yesu anwobrɛaseɛ ne bie, nakoso onwu ye kyɛ ɔlla ase. Ɔhane kyɛ: “Odwu mmerɛ bie na ebie nya yenwo atee bie bɔ ahaa mepena a, ɛyɛ a né sona ne nwo yɛ me ahi. Menwu ye sɔ a, mesua anwobrɛaseɛ nwo nikyee. Tworɔnzɛm biemɔ bɔ ɔfa anwobrɛaseɛ nwo ne, mafa magua nekaabie wɔ JW Library^® naso kyɛbɔ ɔkɔyɛ a, mepena a ngonwu ye ndɛ ɔ. Tɔɔk biemɔ bɔ ɔfa anwobrɛaseɛ nwo ne, mahwe bie magua me fon naso bɔ metaa mebɔ metie ɔ.a Maanwu ye kyɛ adwuma biala bɔ yɛyɛ ye wɔ asafo nanu ne, yɛyɛ yɛfa yɛhyɛ Yehowa animnyam na ɔtte yɛ bɔbɔ. Adwuma ne, ye piri paa ne de Yehowa yeɛ ɔyɛ ɔ, na yɛde kãa bie yeɛ yɛyɛ yɛfa yɛboka ye ɔ.” Sɛ yenwo atee bie bɔ ɛpena ne, wɔsa anga ye na yenwo dwirɛ ha wɔ a, bɔ mmɔden brɛ wɔnwo ase. Ɛyɛ sɔ a, ɔkɔmaa ɛne Yehowa afia kɔyɛ kama, na wɔnye kɔgye.—Yak. 4:​6, 8.

DWENEDWENE ANYELASOƐ BƆ ELE YE NANWO

12. Nzu yeɛ Yehowa nwa ɔkɔyɛ kɔma yɛ, bɔ sɛ yɛdwenedwene yenwo a ɔkɔboka yɛ ɔ? (Yesaya 65:​21-25)

¹² Sɛ yɛdwenedwene bɔ Yehowa afa ahyɛ yɛ bɔ kyẽabie nanwo a, ɔkɔmaa yɛnye kɔsɔ bɔ yele ye ɔ. Yehowa maa diyifoɛ Yesaya hworɔle edwirɛ bie. Sɔ dwirɛ ne maa yenwu kyɛ, ɔwɔ nu kyɛ kesaalae de asetena nu ayɛ se, nakoso Yehowa nwa ɔkɔye yɛ haw mukoraati kofi berɛ. (Kenga Yesaya 65:​21-25.) Sɔ mmerɛ ne, yekonya awuro bɔ ɔyɛ nyemene yɛkɔtena nu, yekonya adwuma pá yɛkɔyɛ, na yekonya aleɛ bɔ ɔyɛ fɛ bɔ anwoserɛ wɔ nu koso yekoli. Afei, yɛ kunu ngɔtete yɛ kyɛ edwirɛ tɛɛ bie kɔto yɛne yɛ mmaamɔ. (Yes. 32:​17, 18; Hes. 34:25) Nahorɛ dwirɛ yeɛ ole kyɛ nningyein pá la yɛ nyunu!

13. Gyidie bɔ yele ye wɔ Yehowa bɔhyɛ nu ne, yɛkɔyɛ sɛɛ né yamaa nu ayɛ se?

¹³ Gyidie bɔ yele ye wɔ Yehowa bɔhyɛ nu ne, sɔ mmerɛ he paa yeɛ odikyɛ yɛmaa nu yɛ se ɔ. Nzuati ɔ? Ofikyɛ yɛte “ayieleɛ mmerɛ” nanu, na yenu biala fa ɔhaw “bɔ nu yɛ se” nu. (2 Tim. 3:1) Nakoso kyẽa biala, Yehowa ma yɛ akwangyerɛ ne anwoserɛ, na osa boka yɛ maa yɛkora yegyina bɔ yɛfa nu ne noa. (Edw. 145:14) Afei koso, anyelasoɛ bɔ yele ne boka yɛ mmerɛ bɔ yahɔ ɔhaw bie nu, na y’abanu ammu. Ebiaa ɔnate ehiaa ti, ɛfɛ dee kora né ahora anea w’abusua. Aso ɛhene kyire kyɛ ekoli hiaa sɔ tonn anaa? Daabi, ɔtte sɔ. Yehowa ahyɛ bɔ kyɛ ɔkɔma wɔ nningyein pee maa okobu wɔ so wɔ Paradise. (Edw. 9:18; 72:​12-14) Ebiaa daa né wɔnwo tutu wɔ, ele adwene nu anwonyerɛ bie, anaa anwonyerɛ foforɛ bie aatena wɔ so bɔ ɔngɔ lle ɔ. Aso ɛhe kyire kyɛ, ɛkɔfɛ sɔ alaa bɔ wɔnwo ngɔtɔ wɔ lle anaa? Ɔtte sɔ koraa. Ofikyɛ sɛ yɛkɔ Nyameɛ ewiase foforɛ nanu a, ewue ne anwonyerɛ boso komini koraa. (Nye. 21:​3, 4) Ɔnate sɔ anyelasoɛ nati, sɛ nningyein ngɔ yé po a, yɛmma adwenedwene nhyɛ yɛ so, na yɛmvɛ yaa. Yeti sɛ mmenia ne yɛ anni ye yé, yɛnwoniɛ bie wu, anwonyerɛ teetee yɛ, anaa yɛfa ɔhaw foforɛ bie nu po a, yɛnye kɔhora kɔgye. Nzuati ɔ? Ofikyɛ ɔhaw bɔ yɛfa nu ne, sɛ nu yɛ se sɛɛ po a, yɛse kyɛ ‘ɔwɔ berɛ mmerɛ kãa bie,’ na sɛ yɛkɔ ewiase foforɛ nanu a, yemukoraati kofi berɛ.—2 Kor. 4:​17, 18.

14. Anyelasoɛ bɔ yele ye ne, yɛkɔyɛ sɛɛ né yamaa nu ayɛ se?

¹⁴ Yɛ anyelasoɛ nati, yɛnye sɔ bɔ yele ye ɔ. Yede yɛkɔyɛ sɛɛ né yamaa nu ayɛ se? Sɛ nikyee wɔ dede, na ebie pena kyɛ onwu ye yé a, ebiaa sana owura spɛɛs. Sɔ ala yeɛ anyelasoɛ bɔ yele ye ne, sɛ nu kɔyɛ se a, sana yɛyɛ nningyein biemɔ kora. Ɛhene kɔboka yɛ maa yɛkɔfa ye kyɛ yɛwɔ Paradise. Sɛ ɔte sikasɛm nwo dadwene yeɛ wahyɛ yɛ so a, yɛkɔhora yɛkɔdwenedwene kyɛbɔ y’asetena kɔyɛ mmerɛ bɔ ehiaa ne ahokyere afi berɛ nanwo. Ebiaa yɛ koso yenwo atee bie bɔ yɛpena ye wɔ asafo nanu bɔ yenyanne nanwo dwirɛ ha yɛ paa. Sɛ sɔ a, yenwo atee bɔ yekonya yɛkɔfa yɛkɔsõ Yehowa daa mmerɛ bɔ bɔne biala nne yɛnwo ne, yɛkɔhora yɛkɔdwenedwene yenwo. Sɛ yɛyɛ sɔ a, yenwo atee bɔ yɛsa hanne ye ne, yɛngɔfa yɛngɔha yɛnwo. (1 Tim. 6:19) Ɔhaw bɔ yɛfa nu nati, ebiaa ahyɛaseɛ ne de ɔkɔyɛ se kyɛ yɛkɔdwenedwene nhyiraa bɔ yekonya ye kyẽabie nanwo. Nakoso sɛ yamma y’abanu ammu, na yɛkɔso yɛdwenedwene yenwo a, okodwu nekaa bie ne, ye yɛlɛ ngɔyɛ se ngɔma yɛ.

15. Edwirɛ bɔ Christa hane ne, nzu yeɛ esua fi nu ɔ?

¹⁵ Christa ahũ yeɛ ole Dennis bɔ yalimoa yahã yenwo dwirɛ ne. Ɛmɔma yɛnea kyɛbɔ anyelasoɛ bɔ ole ye ne aboka ye ɔ. Ɔhane kyɛ: “Anwonyerɛ bie wɔ me so bɔ ɔmaa mengora nate ɔ. Yeti sɛ nnde wheelchair nu a, ne nna bɛen so, na daa né menwo tutu me. Ɛlɛsa ye, me dɔkta hahyirele me kyɛ kyɛbɔ nningyein si kɔ ne de, ɔtte nikyee bɔ menwo baatɔ me ɔ. Ɔhane sɔ ne, ngane ye wɔ metianu kyɛ, ‘Ye de ɔnze bɔ Yehowa baayɛ ma me kyẽabie ɔ.’ Mefa m’adwene mesie m’anyelasoɛ naso, na ɛhene ati nne asomdwee. Kesaalae de, ɛyealɛ bɔ mefa nu ne amaa mamia paa. Nakoso mese kyɛ ewiase foforɛ nanu ne, menye kɔgye!”

“BƐ BƆ BESURO YE NE, HWEE NHIA BƐ”

16. Nzu yeɛ ɔmaa Ɔhene Dawide hora hane kyɛ, bɛbɔ besuro Yehowa ne, “hwee nhia bɛ” ɔ?

¹⁶ Sɛ yɛmaa yɛnye sɔ bɔ yele ye po a, ɛhene ngyire kyɛ ɔhaw biala ngɔto yɛ. Ɔhene Dawide sɔa, ye mmaamɔ kɔyɛ kyɛ nza wuli. Nakoso, nna ɛhene angome, na mmom mmenia pɛle dwirɛ tole ye so, ye damvomɔ yele ye mane, na Ɔhene Sɔɔlo koso yɛle dee kyɛ okohũ ye. Ɔmva yenwo ne sɔ haw ne mukoraati ne, ɔhane Yehowa nwo dwirɛ kyɛ: “Bɛ bɔ besuro ye ne, hwee nhia bɛ.” (Edw. 34:​9, 10) Nzu yeɛ ɔmaa ɔhora hane sɔ ɔ? Ofikyɛ né ɔse kyɛ, ɔyɛ sɛɛ alaa a bɛbɔ bɛsõ Yehowa ne, bɛkɔfa ɔhaw nu, nakoso bɔ behia ne de, ɔngɔbɔ bɛ lle. (Edw. 145:16) Yɛ koso yɛkɔhora yekonya gyidie kyɛ ɔmva yenwo ne ɔhaw biala bɔ ɔkɔto yɛ ne, Yehowa ngɔyakyi yɛnu, na ɛhene maa y’ahone tɔ yɛkunu.

17. Nzuati yeɛ asi wɔ hue kyɛ ɛkɔmaa wɔnye kɔsɔ bɔ ele ye ɔ?

¹⁷ Yehowa pena kyɛ yɛnye gye. (Edw. 131:​1, 2) Yeti bɔ mmɔden kyɛ ɛkɔmaa wɔnye kɔsɔ bɔ ele ye ɔ. Sɛ anyɛ boniayɛ, ɛfa w’adwene sie bɔ ele ye naso, ɛbrɛ wɔnwo ase, na ɛdwenedwene anyelasoɛ bɔ ele ye nanwo a, ɔkɔmaa ɛkɔhora kɔhã kyɛ: “Amba, menye sɔ bɔ nne ye ɔ.”—Edw. 16:​5, 6.