NGAEBƆ MA BƐBƆ BAWA NHYIAMU NE

ATTENDANTS Bɛbɔ bede ɛwɔfoɛ ne kɔboka wɔ. Yɛsrɛ kyɛ, akwangyerɛ biala bɔ bɛkɔfa bɛkɔma wɔ kɔfa nekaa bɔ ɛkɔfa wɔ káa kosie, nekaa bɔ mmenia fa, ɔne bia bɔ ɛkɔyakyi kɔto berɛ kɔma ebie nwo ne, tie bɛ.

ASUBƆ Bɛkɔyakyi bia wɔ anyunu berɛ bɛkɔma bɛbɔ bɛkɔbɔ asu ne, sana bahyire kyɛ bɛngɔyɛ ye sɔ. Odikyɛ asubɔfoɛ ne batena anyunu berɛ kora ná asubɔ dwudwolɛ ne ahɔso Fue ngyerɛmɔ. Ebiala fa nzaserɛ ɔne ataadeɛ bɔ ɔfata ma asubɔ ne bra.

NDOBOA AHOROƐ Yafa esikaa pẽe yayɛ nhyiamu he anwo ndotoeɛ maa yanya bia bɔ yɛkɔtena so, ngaen, vidio nwo nningyein, ɔne nningyein foforɛ bɔ ɔkɔboka maa nhyiamu ne kɔyɛ anigye na yahora y’apingye Yehowa yé ɔ. Ndoboa bɔ ɛmɔfi ɛmɔ ahõne nu bɛye ne yeɛ ɔboka maa yetua kerɛ bɔ yɛbɔ ne ɔ, na yɛfa bie koso yɛboka wiase mukoraati sõen adwuma ne. Bɔ ɔkɔyɛ na waboka wɔ ne, bafa ndoboa alaka bɔ bahwerɔ yenwo basiesie apata nabo. Ɛkɔhora koso kɔfa intanɛt so kɔye ndoboa wɔ donate.jw.org. Yɛnye gye ndoboa biala bɔ ɛmɔkɔye nanwo. Akwangyerɛ Kue ne nye sɔ ɛmɔ pɛ nu bɔ ɛmɔfi bɛboka Ahennie adwuma ne paa.

NEKAA BƆ BEDÉ AYIRE Yɛsrɛ wɔ, hyɛ ye nzorɛ kyɛ, bɔ wafokyɛ, ɔne bɔ wapira mbofirenu wɔ nhyiamu nabo ngome, yeɛ odikyɛ ɔkɔ berɛ ɔ.

NEKAA BƆ BƐFA NIKYEE BƆ WAMINI BƐKƆ Ɔ Nikyee biala bɔ wamini bɔ anwui ne, fakɔ berɛ. Sɛ wɔ nikyee bie mini a, kɔ berɛ na kohyire kyɛbɔ osi te ɔ. Akwalaa biala bɔ okomini bɔ wɔnye kɔpɛ ye so ne, fa ye kɔ berɛ. Bɔ ɔkɔyɛ na ammva adesoa biala anndo ebiala so ne, yɛsrɛ wɔ, ma wɔnye hɔ wɔ mmaamɔ nwo, na ma bɛtena wɔnwo.

NEKAA BƆ ƐKƆTENA Yɛsrɛ wɔ, ɛyɛ a, dwene afoforɛ nwo. Kae kyɛ, ɛkɔhora kɔyakyi bia kɔma w’abusuafoɛ, bɛbɔ ɛne bɛ tenane káa nu, bɛbɔ ɛne bɛ te awuro anaa wɔ Bible asuafoɛ ngome. Yɛsrɛ kyɛ, sɛ essiele bia mane ebie a, nnɛfa hwee to so.

ATUNWOAMA ADWUMA Sɛ ɛpena kyɛ ɛboka nhyiamu nabo adwuma ne bie a, yɛsrɛ kyɛ, kɔ bɛbɔ bɛnea amaneɛbɔ ne atunwoama adwuma so nekaa berɛ.

NHYIAMU TITIRE

Sukuu Bɔ Bɛyɛ Bɛma Ahennie Nzɛmbakãfoɛ Atẽepakyelɛfoɛ bɔ banya afoɛ 23 kodwu 65 bɔ bɛnye gye yenwo kyɛ bɛkɔyɛ pẽe wɔ bɛ sõen adwuma nu ne, bɛkɔhora bɛkɔwa nhyiamu bɔ bɛkɔyɛ bɛkɔma bɛbɔ bɛpena yenwo atẽe bɛkɔ Ahennie Nzɛmbakãfoɛ Sukuu Kwasida yia ne bie. Bɛkɔma mmerɛ, ɔne nekaa deinn bɔ bɛkɔyɛ ye nanwo ngaebɔ.