Ngaebɔ Ma Bɛbɔ Bawa Nhyiamu Ne

ATƐNDANTFOƐ Atɛndantfoɛ ne yeɛ bekohyire wɔ nekaa bɔ ɛkɔtena, nekaa bɔ ɛkɔfa wɔ kar kosie, ɔne nekaa bɔ odikyɛ mmenia fa ɔ. Yeti yɛsrɛ wɔ, ɛyɛ a, tie bɛ.

ASUBƆ Bɛkɔyakyi bia wɔ anyunu berɛ bɛkɔma bɛbɔ bɛkɔbɔ asu ne, sana ebia bahyire kyɛ bɛtena nekaa foforɛ. Bɛbɔ bɛkɔbɔ asu ne, odikyɛ bɛbatena anyunu berɛ kora, né asubɔ dwudwolɛ ne ahyɛ yebo Fue ngyerɛmɔ ne. Odikyɛ bɛfa nzaserɛ bɛba, na ataadeɛ bɔ bɛkɔfa bɛkɔbɔ asu ne koso, odikyɛ ɔyɛ bɔ ɔfata ɔ.

NDOBOA Bafa esikaa pee yeɛ bayɛ nhyiamu he anwo nhyehyɛɛ kyɛbɔ ɔkɔyɛ a, yekonya bia bɔ yɛkɔtena so, ngaen bɔ bɛfa bɛbɔ dwein ne vidio, ɔne nningyein foforɛ bɔ ɔkɔboka maa nhyiamu ne kɔyɛ anigye, na wamaa yahora yahwe yapingye Yehowa ɔ. Ndoboa bɔ efi wɔ ahone nu ye ne boka maa betua kerɛ bɔ babɔ ne, na yɛfa bie koso yɛboka adwuma bɔ yɛyɛ ye wɔ ewiase mukoraati ne. Bafa ndoboa alaka bɔ bahwerɛ yenwo basiesie nekaa biemɔ wɔ apata nabo, yeti sɛ ɛpena kyɛ ɛye ndoboa a, ɛkɔhora kɔfa kɔtonu. Ɛkɔhora koso kɔfa intanɛt so kɔye ndoboa wɔ donate.jw.org so. Yɛnye sɔ ɛmɔ ndoboa ne paa. Akwangyerɛ Kue ne koso da ɛmɔ ase paa kyɛ ɛmɔfi ɛmɔ ahone nu bɛye ndoboa bɛfa bɛboka Ahennie adwuma ne ɔ.

NEKAA BƆ BEDE AYIRÉ Ebie bɔ ɔkɔfokyɛ anaa okopira wɔ nhyiamu he abo ne ngome yeɛ odikyɛ ɔkɔ berɛ kode ayiré ɔ.

NEKAA BƆ BƐPENA NIKYEE BƆ WAMINI Nikyee biala bɔ ɛkɔfa ye wɔ ase bɔ ɔtte wɔ deɛ ne, yɛsrɛ wɔ, fakɔ berɛ. Sɛ wɔ nikyee bie mini a, kɔ berɛ na kohyire kyɛbɔ osi te ɔ, na sɛ ɔwɔ berɛ a, bɛkɔfa bɛkɔma wɔ. Sɛ ɛte kyɛ akwalaa bie amini, na wɔnye pɛ yeso wɔ apata nabo a, fa ye kɔ berɛ. Nakoso sɛ ɛmaa wɔnye kɔ wɔ mmaamɔ nwo a, ɔkɔboka bɛbɔ bɛyɛ adwuma wɔ berɛ ne, na ɔngɔma bɛngɔfɛ pee.

NEKAA BƆ ƐKƆTENA Ɛkɔhora kɔyakyi bia kɔto berɛ kɔma w’abusuafoɛ, bɛbɔ ɛne bɛ tenane kar nu, bɛbɔ ɛne bɛ te awuro kõ anu, anaa wɔ Bible asuafoɛ. Yɛsrɛ kyɛ, bia bɔ sona biala ɔtte so ne, nnɛfa nikyefee to so. Sɛ ɛyɛ sɔ a, okohyire kyɛ ɛdwene sona nwo.

ADWUMA BƆ BƐYƐ YE WƆ NHYIAMU NABO Ɛkɔhora kɔyɛ adwuma bɔ bɛyɛ ye wɔ nhyiamu nabo ne bie. Nakoso, odikyɛ edimoa bisa yenwo atee fi bɛbɔ bɛnea so ne berɛ.

Yehowa Adanzefoɛ Akwangyerɛ Kue ne yeɛ bɛyɛle yenwo nhyehyɛɛ ɔ