Atẽe Beni Yeɛ Bafa So Bahã Edwirɛ Pá Ne Ɔ?

Yehowa nate ye Ahennie naso kɔye yɛ haw mukoraati kofi berɛ ɛlɛsaen ala. Odikyɛ ebiala te sɔ dwirɛ ne, na wahora wanya so mvasoɛ. Yesu pena kyɛ ye sĩlilɛfoɛ ne kã sɔ dwirɛ he kyire ebiala! (Mateo 28:​19, 20) Atẽe beni yeɛ Yehowa Adanzefoɛ faso di ahyɛdeɛ bɔ Yesu famane naso ɔ?

1. Sɛɛ yeɛ edwirɛ bɔ ɔwɔ Mateo 24:​14 ne awa nu ɛnnɛ ɔ?

Yesu hãne kyɛ: “Bɛkɔhã ahennie nanwo nzɛmba wɔ ewiase mukoraati.” (Mateo 24:​14) Yehowa Adanzefoɛ fa anigye yɛ sɔ adwuma bɔ yenwo hia he. Yɛkã nzɛmba ne wɔ dwudwolɛ kɔbo 1,000 nu wɔ ewiase mukoraati! Odé mmɔdenbɔ kora na ahyehyɛdeɛ bie ahora ayɛ sɔ adwuma pirikua he. Nakoso sɛ Yehowa sa nne nu a, sona mmɔdenbɔ ngɔhora ngɔyɛ ɛhe.

2. Mmɔdenbɔ beni yeɛ yebɔ kora na mmenia ahora te nzɛmba ne ɔ?

Yɛkã nzɛmba ne wɔ nekaa biala bɔ yekonya sona ɔ. Kyɛbɔ Kristofoɛ bɔ bɛtenane ase tete ne yɛle ne, yɛkoso yɛkã nzɛmba ne wɔ “awuro awuro nu.” (Asomafoɛ Ne Nnwumaa 5:​42) Sɔ atẽe he bɔ yɛfa so ne boka maa yɛkã edwirɛ ne yekyire mmenia pẽe afoɛ biala. Ɔnate kyɛ yɛndaa ndo mmenia pẽe nala wɔ awuro nati, ɛyɛ a, yɛkã nzɛmba ne wɔ dwaaso koso. Daabiala yɛpena yenwo atẽe bɔ yɛkɔfa yɛkɔhã Yehowa ne y’atirimbɔ nwo dwirɛ yehyire afoforɛ.

3. Nwamɔ yeɛ ɔte bɛ asɛyɛdeɛ kyɛ bɛkã nzɛmba ne ɔ?

Ɔte nahorɛ Kristofoɛ mukoraati asɛyɛdeɛ kyɛ, bɛkɔhã nzɛmba ne bekohyire afoforɛ. Yɛndoto y’asɛyɛdeɛ he ase koraa. Ɔnate kyɛ mmenia ngõa la asane nu nati, yɛbɔ mmɔden yɛkã nzɛmba ne, kyɛbɔ yɛ tebea kɔma y’atẽe ɔ. (Kenga 1 Timoteo 4:​16.) Bɛndua yɛ kerɛ wɔ sɔ adwuma he anwo, ofikyɛ Bible ne kã kyɛ: “Ɛmɔ nyane ye mbaen, ɛmɔfa bɛma mbaen.” (Mateo 10:​7, 8) Nna ebiala yeɛ yenye gye edwirɛ bɔ yɛkã nanwo. Nakoso yɛkɔso yekã ofikyɛ nzɛmba ne boka yɛ sõen so, na ɔmaa Yehowa nye gye.

SUA PẼE BOKASO

4. Yɛbɔ mmɔden kyɛ yɛsa kɔhã mmenia mukoraati

VIDIO: Bahã Nzɛmba Ne “Baadwu Aseɛ Noa Dɔ” (7:33)

• Ɛte ngã sɛ́, wɔ mmɔden bɔ Yehowa Adanzefoɛ bɔ kyɛ bɛkɔhã nzɛmba ne ɔ?

Kenga Mateo 22:​39 ɔne Romanfoɛ 10:​13-​15, na susu nzɛmmisa hemɔ anwo:

• Sɛɛ yeɛ nzɛmba bɔ yɛkã ne da yali kyɛ, yɛdɔ yɛ biengõ sona ɔ?

• Sɛɛ yeɛ Yehowa tengã wɔ bɛbɔ bɛkã nzɛmba nanwo ɔ? ​—Nea ngyekyɛmuɛ 15.

5. Yɛte Nyameɛpiri mmiengo adwumayɛfoɛ

Osuanwu pẽe kyire kyɛ Yehowa yeɛ okyire y’adwuma ne atẽe ɔ. Kyɛ nneasoɛ ne, wɔ New Zealand ne, aliemaa bɔ bɛfrɛ ye Paul lili maame bie adanzeɛ mmerɛ bɔ ɔyɛ awuro awuro asɛnga adwuma eyia bie ne. Sɔ ngyerɛmɔ nala, né maame ne afa Nyameɛpiri dumaa Yehowa ne abɔ mbaeɛ kyɛ, ɔma ebie bra ye brɛ. “Nnɔnhwere nza sĩ ne,” Paul hãne kyɛ, “Ne me gyi ye anoa sĩ.”

Kenga 1 Korintofoɛ 3:​9, na susu nzɛmmisa he anwo:

• Sɛɛ yeɛ osuanwu ahoroɛ tekyɛ bɔ osili New Zealand ne maa yenwu kyɛ, Yehowa yeɛ okyire asɛnga adwuma ne atẽe ɔ?

Kenga Asomafoɛ Ne Nnwumaa 1:​8, na afei susu nzɛmmisa he anwo:

• Nzuati yeɛ yehia Yehowa mmokalɛ, na yahora yayɛ asɛnga adwuma ne ɔ?

Ɛse?

Wɔ yɛ dapɛen afĩa nhyiamu bɔ yɛyɛ ye dapɛen biala nanu ne, yenya ndeteɛ bɔ ɔboka yɛ maa yɛyɛ asɛnga adwuma ne ɔ. Sɛ anya yenwo atẽe ahɔ sɔ nhyiamu ahoroɛ ne bie a, sɛɛ yeɛ ɛte ngã wɔ sɔ ndeteɛ he anwo ɔ?

6. Yetie Nyameɛpiri ahyɛdeɛ bɔ ɔkã kyɛ, yɛhã nzɛmba ne

Wɔ tete mmerɛ na nune, pɔfoɛ bɔle mmɔden kyɛ bɛkɔmaa Yesu sĩlilɛfoɛ kɔyakyi asɛnga adwuma ne. Tete Kristofoɛ ne bɔle mmɔden kyɛ, bɛkɔbɔ yenwo atẽe bɔ bele ye kyɛ bɛkɔhã nzɛmba nanwo waen, “yeti bɛfa besiele berɛ . . . wɔ mmraa atẽe so.” (Filipifoɛ 1:7) Sɔ ala yeɛ Yehowa adanzefoɛ koso yɛ ye ɛnnɛ ɔ.a

VIDIO: Yɛfale Mmraa Atẽe So Yɛbɔle Nzɛmba Nanwo Waen (2:28)

Kenga Asomafoɛ Ne Nnwumaa 5:​27-​42, na susu nzɛmmisa he anwo:

• Nzuati yeɛ yɛngɔ yakyi edwirɛ pá ne hãnɛ ɔ? ​—Nea ngyekyemuɛ 29, 38, ɔne 39.

YEMUABƆLƐ

Yesu hã hyirɛle ye sĩlilɛfoɛ kyɛ bɛhã nzɛmba ne wɔ ewiase mukoraati. Yehowa boka ye mmenia maa bɛyɛ sɔ adwuma he.

Ndimu

• Atẽe beni aso yeɛ yɛfa so yɛkã nzɛmba ne wɔ ewiase mukoraati ɔ?

• Sɛɛ yeɛ asɛnga adwuma ne da y’ali kyɛ yɛdɔ yɛ biengo sona ɔ?

• Aso esusu kyɛ asɛnga adwuma ne kɔhora kɔmaa wɔnye kɔgye anaa? Nzuati ɔ?

NEA ƐHE KOSO

Nea kyɛbɔ Yehowa Adanzefoɛ kã nzɛmba ne kyire mmenia wɔ nguro mbiri nu ɔ.

Asɛnga adwuma Titire Bɔ Ɔhɔle So Wɔ Paris 5:​11

Sɛɛ yeɛ Yehowa Adanzefoɛ ahora ahã nzɛmba ne ahyire atubrafoɛ ɔ?

Kyɛbɔ Nzɛmba Ne Bɔ Atubrafoɛ Ate Ne Amaa B’ahõne Atɔ Bɛ Kunu Ɔ 5:​59

Tie kyɛbɔ ebie hyirehyirɛle bɔ yeti yeɛ asɛnga adwuma bɔ ɔfale ye mmerɛ mukoraati yɛle ne maa yenye gyele ɔ.

Menye Gyele Kyɛ Mvale Sɔ Botaeɛ He Nziele Menye So Ɔ 6:​29

Sua ngunim ahoroɛ bɔ yali wɔ kɔɔt bɔ wamaa yɛhora yɛtrɛ asɛnga adwuma nanu nanwo nikye.

“Ahennie Nanwo Nzɛmbakãfoɛ Fale Bɛ Dwirɛ Hɔle Kɔɔt” (God’s Kingdom Rules!, chapter 13)