ADESUA 47
Ayɛ Krado Kyɛ Ɛkɔbɔ Asu Anaa?
Ɛnate Bible ne bɔ esua naso asua nningyein pẽe afa Yehowa nwo. Na ɛbɔ wɔnwo mmɔden kyɛ ɛkɔyɛ nzakraeɛ, kyɛbɔ ɛkɔfa bɔ esua ne kɔyɛ adwuma ɔ. Nakoso, ebia nikyeebie wɔ berɛ bɔ osi wɔ atẽe, maa yeti ɛngora nyira wɔnwo so ma Yehowa na abɔ asu. Adesua he kɔmaa ekonwu nningyein bɔ ɔkɔhora kosi wɔ atẽe kyɛ ɛkɔbɔ asu ɔne kyɛbɔ ɛkɔhora koli so ɔ.
1. Niswa yeɛ odikyɛ enya nimdeɛ kodwu kora na abɔ asu?
Sɛ ɛkɔbɔ asu a, odikyɛ enya “nahorɛ nanwo nimdeɛ” kora. (1 Timoteo 2:4) Ɛhe ngyere kyɛ odikyɛ enya Bible nanu nzɛmmisa mukoraati nwo mmuaeɛ kora na abɔ asu. Kristofoɛ bɔ babɔ asu bahyɛ ne po té sua nikye. (Kolosefoɛ 1:9, 10) Nakoso yenwo hia kyɛ, odikyɛ enya Bible nu mvitiaseɛ ngyerɛkyerɛ biemɔ nwo ndeaseɛ. Asafo nanu mbanyi kɔboka wɔ maa ekonya nimdeɛ bɔ ɔte sɔ ne.
2. Agyirɛ bɔ yenwo hia beni yeɛ odikyɛ etu kora na abɔ asu ɔ?
Kora bɔ ɛkɔbɔ asu ne, odikyɛ “ɛsakra . . . na ɛtwẽ wɔnwo fi wɔ bɔne nwo.” (Kenga Asomafoɛ Ne Nnwumaa 3:19.) Ɛhe kyire kyɛ odikyɛ enu wɔnwo koraa wɔ bɔne biala bɔ ayɛ nanwo, na ɛserɛ Yehowa kyɛ ɔfa hyɛ wɔ. Odikyɛ esa koso po nneyɛe tɛɛ biala, na enya ɔpɛ kyɛ ɛkɔyɛ nikyee bɔ ɔsɔ Nyameɛpiri nye ɔ. Bɔ ɔboka so biekũ ne, odikyɛ ɛhyɛ yebo fa wɔnwo wura asafo dwumadié biala nu, tekyɛ asafo nhyiamu bɔ ɛkɔhɔ ɔne wɔnwo bɔ ɛkɔfa kowura asɛnga adwuma nu kyɛ dawurubɔniɛ bɔ ɔbɔlle asu ɔ.
3. Nzuati yeɛ ɔnzɛkyɛ ɛmaa esuroen twẽ wɔ sa ɔ?
Ebiemɔ suro kyɛ ebia ne bangora baani ɛbɔ bɔ bahyɛ Yehowa naso. Ɔte nahorɛ sɔ, ofikyɛ ɔtɔ mmerɛ bie a ekoli mvomsoɛ, mmienzua ne mmrasua nahorɛfoɛ bɔ bɛnwo dwirɛ wɔ Bible nanu ne po lili mvomsoɛ. Nakoso, Yehowa nnea atẽe kyɛ y’asomvoɛ kɔyɛ pɛ. (Kenga Edwein 103:13, 14.) Sɛ ɛbɔ mmɔden yɛ bɔ ɔtengyɛ a, yenye gye! Ɔkɔboka wɔ. Nahorɛ nu ne, Yehowa ma yɛ awerɛhyɛmuɛ kyɛ, nikyee biala ne berɛ “bɔ ɔkɔhora kɔtete yɛ kofi [ye] dɔ nwo ɔ.”—Kenga Romanfoɛ 8:38, 39.
SUA PẼE BOKASO
Nea kyɛbɔ ɛkɔhora koli nningyein bɔ ɔkɔhora kɔsi w’atẽe wɔ asubɔ nwo, na ɔngɔmaa engonwu Yehowa yé naso, ɔne kyɛbɔ ekolé ye mmokalɛ kɔto nu ɔ.
4. Nwu Yehowa yé
Nzuati yeɛ yenwo hia kyɛ enwu Yehowa yé kora na abɔ asu ɔ? Odikyɛ ɛnwu ye yé, ɛdɔ ye na ɛyɛ nikyee bɔ ɔkɔsɔ yenye ɔ. Bɔ VIDIO ne na nea nikyee bɔ Bible asuafoɛ bɔ bɛwɔ ewiase mukoraati ne ahora ayɛ wɔ asubɔ nwo ɔ. Na susu nzɛmmisa bɔ olili so he anwo.
Wɔ vidio nanu ne, nzu yeɛ ɔbokale agoragora biemɔ maa besiesiele bɛnwo bɛmane asubɔ ɔ?
Kenga Romanfoɛ 12:2, na susu nzɛmmisa hemɔ anwo:
Edwirɛ bɔ Bible ne kã, ɔne nahorɛ dwirɛ bɔ Yehowa Adanzefoɛ kyirekyire ne, aso w’adwene nu yɛ wɔ nnaa wɔ yenwo anaa?
Sɛ sɔ yeɛ ɔte a, nzu yeɛ ɛkɔhora kɔyɛ wɔ yenwo ɔ?
5. Di nningyein bɔ ɔkɔhora kosi wɔ atẽe wɔ asubɔ nwo naso
Sɛ yesi gyinaeɛ kyɛ yɛkoyira yɛngõa so yɛkɔma Yehowa na yɛbɔ asu a, yɛkɔyia ɔhaw pẽe. Sɛ ɛpena yenwo nneasoɛ a, bɔ VIDIO ne, na susu nzɛmmisa bɔ olili so he anwo.
Wɔ vidio nanu ne, akwanzideɛ beni yeɛ ne odikyɛ Narangerel di so kora na wahora wasõ Yehowa ɔ?
Sɛɛ yeɛ ɔdɔ bɔ ole ma Yehowa ne bokale ye maa ɔhora lili sɔ akwanzideɛ naso ɔ?
Kenga Anyandera 29:25 ɔne 2 Timoteo 1:7, na susu nzɛmmisa he anwo:
Nzu yeɛ ɔma yɛ akokoduro maa yɛfa yedi akwanzideɛ biala so ɔ?
6. Fa wɔnwo to Yehowa mmokalɛ so
Yehowa kɔboka wɔ maa ɛkɔyɛ bɔ ɔsɔ yenye ɔ. Bɔ VIDIO ne, na susu nzɛmmisa bɔ olili so he anwo.
Wɔ vidio nanu ne, nzu yeɛ ne osi Bible suaniɛ ne atẽe, maa yeti ɔmbena kyɛ ɔkɔbɔ asu ɔ?
Nzu yeɛ osuane bɔ ɔbokale ye maa owurale anwotɔsoɛ bɔ ole ye wɔ Yehowa nu ne serɛ ɔ?
Kenga Aizaya 41:10, 13, na susu nzɛmmisa he anwo:
Nzuati yeɛ ɛkɔhora konya awerɛhyɛmuɛ kyɛ, ɛkɔhora koli ɛbɔ bɔ ɛhyɛle wɔ w’anwosohyira nu naso ɔ?
7. Má anisɔ ne ɔdɔ bɔ ele ma Yehowa nanu yɛse
Mmerɛ dodoɔ bɔ edwenedwene ɔdɔ bɔ Yehowa le ma wɔ nanwo ne, ɔkɔmaa ɛkɔla ye ase na ekosi wɔ hue kyɛ ɛkɔsõ ye daa. Kenga Edwein 40:5, na susu nzɛmmisa he anwo:
Nhyiraa bɔ ofi Yehowa berɛ beni yeɛ wɔnye gye yenwo paa ɔ?
Né diyifoɛ Yeremia dɔ Yehowa ne ye Dwirɛ ne, na yenye sɔle yenwo atẽe bɔ ne ole ye kyɛ Yehowa dumaa la ye so ne. Ɔhãne kyɛ: “Wɔ dwirɛ yeɛ ɔmaa medi ahurusi wɔ m’ahõne nu ɔ, ofikyɛ wɔ dumaa la me so, O Yehowa Nyameɛpiri.” (Yeremia 15:16) Ye nzɛmmisa hemɔ noa:
Nzuati yeɛ ɔte yenwo atẽe pirikua paa kyɛ, yɛkɔyɛ Yehowa Adanzefoɛ nanu kõ ɔ?
Aso ɛpena kyɛ ɛbɔ asu bayɛ Yehowa Adanzefoɛ nanu kõ anaa?
Nikyee bie wɔ berɛ bɔ osi w’atẽe kyɛ ɛkɔbɔ asu anaa?
Esusu kyɛ nzu yeɛ odikyɛ ɛyɛ kora na ahora adwu botaeɛ bɔ yeɛ ole asubɔ nanwo ɔ?
EBIEMƆ KÃ KYƐ: “Menné menni kyɛ ngɔhora ngɔdwu asɛyɛdeɛ bɔ ɔwɔ asubɔ nwo nanwo.”
Sɔ yeɛ ɛte ngã anaa?
YEMUABƆLƐ
Ɔnate Yehowa mmokalɛ so, ɛkɔhora ekoli nikyee biala bɔ osi wɔ atẽe kyɛ ɛkɔbɔ asu naso.
Ndimu
Niswa yeɛ odikyɛ enya Bible nu nimdeɛ kodwu kora na abɔ asu ɔ?
Nzakraeɛ ahoroɛ beni yeɛ odikyɛ ɛyɛ kora na ahora abɔ asu ɔ?
Nzuati ɔnzɛkyɛ ɛmaa esuroen si wɔ atẽe kyɛ ɛkɔbɔ asu ɔ?
NEA ƐHE KOSO
Nea nikyee bɔ gyinaeɛ bɔ asi kyɛ ɛkɔbɔ asu ne gyĩ so ɔ.
“Ayɛ Krado Kyɛ Ɛkɔbɔ Asu Anaa?” (The Watchtower, March 2020)
Sua kyɛbɔ ɛkɔhora koli ɔhaw bɔ osi wɔ atẽe wɔ asubɔ nwo naso ɔ.
“Nzu Yeɛ Osi M’atẽe Kyɛ Nnɛmaa Me Bɔ Asu Ɔ?” (The Watchtower, March 2019)
Nea kyɛbɔ bĩaa bie hora lili nningyein bɔ ne enu yɛse bɔ ne osi y’atẽe kyɛ ɔkɔbɔ asu naso ɔ.
Ahyɛaseɛ ne, né bĩaa bie bɔ bɛfrɛ ye Ataa mbena kyɛ ɔbɔ asu. Nea bɔ ɔhãne ye maa osili gyinaeɛ bɔ yenwo hia he ɔ.