Nnɛtwe W’asubɔ Sa!

1. Nzuati yeɛ odikyɛ ɛbɔ asu ɔ?

YEHOWA, Nyameɛ bɔ wama wɔ ngoa ne nikyee pá biala ne, aso ele ɔdɔ ma ye? Sɛ sɔ a, yede nzu yeɛ ɛkɔyɛ kɔfa kohyire sɔ ɔ? Atee pá bɔ ɛkɔhora kɔfa so kɔyɛ sɔ yeɛ ole kyɛ ekoyira wɔnwo so kɔma ye, na abɔ asu. Sɛ ɛyɛ sɔ a, ɛkɔɔboka Yehowa abusua naso. Ɛhe kɔmaa Yehowa bɔ ɔte wɔ Baba ne wɔ Damvo ne, ɔkɔbɔ wɔnwo waen na wanea wɔ so, ofikyɛ aayɛ ye deɛ. (Edw. 73:24; Yes. 43:​1, 2) Sɛ eyira wɔnwo so na ɛbɔ asu koso a, ɔkɔmaa ekonya nhyiraa bie; ɛhene yeɛ ole daa ngoa.—1 Pet. 3:21.

2. Nzu yeɛ yekosusu yenwo wɔ adesua he anu ɔ?

² Aso nikyeebie ti, wayɛ se wama wɔ kyɛ ɛkɔbɔ asu anaa? Yede nna wɔ ngome yeɛ ele sɔ haw ne ɔ. Ebiemɔ koso, né odikyɛ bɛsesã b’abrabɔ, ɔne kyɛbɔ besusu nningyein nwo ne kora né bahora babɔ asu. Kesaalae sɔ mmenia nemɔ fa anigye ne anwokeka bɛsõ Yehowa. Wɔ asomafoɛ nemɔ aberɛ so koso ebiemɔ bɔle asu. Yede, nzu yeɛ ɛkɔhora kosua kofi bɛ berɛ ɔ? Ɛmɔma yɛnea ɔhaw bɔ beyiale, ɔne bɔ yɛkɔhora yekosua yekofi bɔ bɛyɛle nanu ɔ.

SAMARIAFOƐ NEMƆ BƆLE ASU

3. Nzu yeɛ né wamaa wayɛ se wama Samariafoɛ nemɔ kyɛ bɛkɔbɔ asu ɔ?

³ Yesu aberɛ so ne, né Samariafoɛ nemɔ te nyamesom kue bie bɔ ɔwɔ Yudea sorɔ dɔ. Né benu pee nala te Sɛkem ne Samaria mandanu berɛ. Né Samariafoɛ nemɔ de di kyɛ Bible nu nwomaa nnu bɔ olimoa, bɔ yeɛ ole Gyenesise kodwu Deuteronomi ne de, ofi Nyameɛ berɛ, na ebiaa Yosua nwomaa ne koso boka so. Yeti sɛ né bɛkɔhora bɛkɔbɔ asu a, né odikyɛ bede Nyameɛ Dwirɛ namu bɛto nu. Nyameɛ bɔhyɛ bɔ ɔwɔ Deuteronomi 18:​18, 19 nati, né bɛnea atee kyɛ Mɛsaya ne kɔwa. (Yoh. 4:25) Nakoso sɛ né bɛkɔhora bɛkɔbɔ asu a, né odikyɛ bede bɛto nu kyɛ Yesu yeɛ ole Mɛsaya ne, na “Samariafoɛ pee” nala yɛle sɔ. (Yoh. 4:39) Benu biemɔ koso, ɛpɔen bɔ né ɔla Samariafoɛ ne Yudafoɛ afia ne, né odikyɛ bɛbɔ mmɔden kyɛ bekoli so.—Luka 9:​52-54.

4. Sɛ ɛnea Asomafoɛ 8:​5, 6, 14 ne a, edwirɛ bɔ Filipo hahyirele Samariafoɛ nemɔ ne, nzu yeɛ bɛyɛ bɛfale yenwo ɔ?

⁴ Nzu yeɛ ɔbokale Samariafoɛ nemɔ maa bɛbɔle asu ɔ? Mmerɛ bɔ Filipo hane “Kristo nwo dwirɛ” hyirele Samariafoɛ ne, benu biemɔ ‘sɔle Nyameɛ dwirɛ nanu.’ (Kenga Asomafoɛ 8:​5, 6, 14.) Né Filipo te Yudaniɛ, nakoso betiele ye. Ɔkɔyɛ kyɛ né banwu ye wɔ tworɔnzɛm nanu kyɛ Nyameɛ nyeye mmenia nu. (Deut. 10:​17-19) Kristo nwo dwirɛ biala bɔ Filipo hahyirele bɛ ne, “betiele ye,” na benwuni adanzeɛ pefee bɔ okyire kyɛ Nyameɛ boka ye so. Filipo yɛle nzɛngyerɛnneɛ pee. Ebie yeɛ ole kyɛ ɔsale anwonyerɛ, na otuli sunzummɔne.—Aso. 8:7.

5. Nzu yeɛ ɛkɔhora kosua kofi Samariafoɛ nemɔ berɛ ɔ?

⁵ Nningyein bɔ né ɔkɔhora kosi Samariafoɛ nemɔ asubɔ atee ne, ebie yeɛ ole mmenia nu nyeyemuɛ. Afei koso, né bɛttele Kristo nwo ngyerɛkyerɛ lle. Nakoso bamma sɔ haw nemɔ anzi b’atee. Tworɔnzɛm ne kã kyɛ: “Mmerɛ bɔ belele Filipo nzɛmba bɔ ɔfa Nyameɛ ahennie ne, ɔne Yesu Kristo dumaa nwo belili nen, mmienzua ne mmrasua maa bɛbɔle bɛ asu.” (Aso. 8:12) Mmerɛ bɔ Samariafoɛ nemɔ nwuni kyɛ bɔ Filipo kã ne te nahorɛ ne, bamma nikyeebiala anzi b’asubɔ atee. Aso ede di kyɛ Nyameɛ Dwirɛ ne te nahorɛ? Na ɔdɔ kaenn bɔ Yesu hane kyɛ ye asuafoɛ kɔla ye ali ne, ɛhene yeɛ enwu ye kyɛ Yehowa Adanzefoɛ da ye ali ne anaa? (Yoh. 13:35) Yesɔ de a, nnɛmaa nikyeebiala si w’asubɔ atee, na nya gyidie kyɛ Yehowa koyira wɔ.

6. Sɛɛ yeɛ Ruben dwirɛ ne kɔboka wɔ ɔ?

⁶ Ruben fi Germany, na ye abusuafoɛ te Yehowa Adanzefoɛ. Nakoso onyini kãa ne, né ye adwene yɛ ye kyɛ gyamia Yehowa nne berɛ. Yede nzu yeɛ ɔbokale ye ɔ? Onwuni kyɛ nimdeɛ bɔ ole ye ne, waha kãa, yeti osili gyinayɛɛ kyɛ ɔkɔyɛ nhwehwɛmuɛ kɔhɔ siɛ. Ɔhane kyɛ: “Me bɔbɔ nzuane nikye, na bɔ né ɔkye m’adwene ne, nyɛle nu nhwehwɛmuɛ. Ngyerɛkyerɛ bɔ yeɛ ole kyɛ mmenia fi ngaka nu ne, né odikyɛ mesua yenwo dwirɛ pee.” Nwomaa bɔ ɔkengale yeɛ ole Is There a Creator Who Cares About You? Sɔ nwomaa ne bokale Ruben maa onyane gyidie bɔ nu yɛ se wɔ Yehowa nu. Ɔhahyirele yenwo kyɛ: ‘Sãa Yehowa wɔ berɛ amba!’ Mmerɛ bɔ Ruben hɔle asafo ne adwumayɛbea ti ne, onwuni ngabonu bɔ ɔwɔ aliemaamɔ bɔ bɛwɔ wiase mukoraati afia ne, na yenye gyele ɛhene anwo paa. Osa hɔle Germany ne, wangyɛ biala ɔbɔle asu. Sɔ mmerɛ ne, né wali afoɛ 17. Wɔ koso, bɔ mmɔden kyɛ ɛkɔyɛ nningyein bɔ asua nanwo nhwehwɛmuɛ wɔ yɛ nwomaa ahoroɛ nanu. Sɛ w’adwene nu yɛ wɔ naa a, nikyee bɔ ɔkɔboka wɔ paa yeɛ ole “nimdeɛ” bɔ odi mu. (Ɛfe. 4:​13, 14) Ɔdɔ ne ngabonu bɔ ɔwɔ Yehowa Adanzefoɛ afia ne, sɛ ɛte yenwo dwirɛ, na enwu kyɛbɔ aliemaamɔ da ye ali wɔ w’asafo nu a, ɔkɔmaa ɔdɔ bɔ ele ma yeliemamɔ bɔ bɛwɔ ewiase mukoraati ne kɔyɛ piri.

SƆƆLO BƆ OFI TAASO NE BƆLE ASU

7. Adwene beni yeɛ né odikyɛ Sɔɔlo nya ye ɔ?

⁷ Ma yɛnea Sɔɔlo bɔ ofi Taaso ne koso. Né ɔbɔ yenwo mmɔden wɔ Yudasom nu, na né wale dumaa paa wɔ Yudafoɛ nemɔ nu. (Gal. 1:13, 14; Flp. 3:5) Sɔ mmerɛ ne, né Yudafoɛ nanu pee nwu ye kyɛ Kristofoɛ nemɔ te awaefoɛ. Ɛhene ati Sɔɔlo tuli yenye siele bɛ so paa. Né ye adwene yɛ ye kyɛ ɔyɛ Nyameɛ apɛdeɛ. (Aso. 8:3; 9:​1, 2; 26:​9-11) Yeti sɛ né ɔkɔhora kole Yesu koli, na wabɔ asu waayɛ Kristoniɛ a, né odikyɛ ode to nu kyɛ ye koso bɛkɔtane yenye.

8. (a) Nzu yeɛ ɔbokale Sɔɔlo maa ɔbɔle asu ɔ? (b) Sɛ ɛnea Asomafoɛ 22:​12-16 ne a, sɛɛ yeɛ Anania bokale Sɔɔlo ɔ? (Nea foto ne koso.)

⁸ Nzu yeɛ ɔbokale Sɔɔlo maa ɔbɔle asu ɔ? Yesu bɔ bahyɛ ye animnyam ne yele yenwo ali hyirele Sɔɔlo, na ɛhene maa yenye sini. (Aso. 9:​3-9) Ɛhene ati wannidi ɛlɛsa, na ɔkɔyɛ kyɛ né ɔdwenedwene bɔ wasi nanwo. Sɔɔlo le tole nu kyɛ Yesu yeɛ ole Mɛsaya ne, na ye asuafoɛ ne yeɛ bɛso Nyameɛ nahorɛ nu ɔ. Ebiaa mmerɛ bɔ Sɔɔlo kaele kyɛ, ɔboka so bie yeɛ bɛhuni Setefano ne, ɔyɛle ye yea paa. (Aso. 22:20) Ɛlɛsa si ne, asuafoɛ nanu kõ bɔ bɛfrɛ ye Anania wale Sɔɔlo berɛ, na ɔmaa osa nwuni nikye. Afei ɔhahyirele ye kyɛ ɔma bɛbɔ ye asu wɔ ɛberɛ ala. (Kenga Asomafoɛ 22:​12-16.) Sɔɔlo tiele bɔ ɔhane ne, na ɔmaa bɛbɔle ye asu.—Aso. 9:​17, 18.

9. Nzu yeɛ ɛkɔhora kosua kofi Sɔɔlo dwirɛ nanu ɔ?

⁹ Yɛkɔhora yekosua nningyein pee yekofi Sɔɔlo dwirɛ nanu. Né ahaa ɔkɔhora kɔmaa anwomasoɛ anaa sona nwo suronyi kosi ye asubɔ atee, nakoso wanyɛ sɔ. Ɔnate kyɛ né ɔbrɛ yenwo ase nati, ɔsesane ye abrabɔ kyɛbɔ ɔkɔyɛ a, ɔkɔɔyɛ Kristoniɛ ɔ. (Aso. 26:​14, 19) Né ɔse ye paa kyɛ, sɛ ɔbayɛ Kristoniɛ a bɛkɔtane yenye, nakoso né wasi ye hue kyɛ ɔkɔyɛ sɔ. (Aso. 9:​15, 16; 20:​22, 23) Ye asubɔ si ne oyiale ɔhaw pee, nakoso ɔfale yenwo tole Yehowa so, na ɛhene maa ɔhora gyinane yenoa. (2 Kor. 4:​7-10) Wɔ koso, sɛ ɛbɔ asu bayɛ Yehowa Danzeniɛ a, ebiaa ekoyia ɔhaw, anaa bɛkɔsɔ wɔ gyidie bɛkɔnea. Nakoso nya gyidie kyɛ Nyameɛ ne Yesu kɔboka wɔ maa ekogyina yenoa, na ahora ali nahorɛ ama bɛ.—Flp. 4:13.

10. Sɛɛ yeɛ bɔ Anna yɛle ne kɔhora kɔboka wɔ ɔ?

¹⁰ Bɛtetele Anna wɔ Eastern Europe. Ye maame bɔle asu ɔɔyɛle Yehowa Danzeniɛ si ne, ɔhahyirele ye baba kyɛ, ɔpena kyɛ yekoso osua Bible ne, na ye baba penene so. Sɔ mmerɛ ne, né wali afoɛ 9. Nakoso mmerɛ bɔ b’abusuafoɛ bɔ bɛne bɛ te awuro kõ anu ne nwuni ye sɔ ne, bɛnye angye yenwo. Né benwu ye kyɛ ɔte animguaseɛ kyɛ ebie kɔyakyi soen bɔ ye nanamɔ wɔ nu ne. Anna nyane afoɛ 12 ne, ɔhahyirele ye baba kyɛ ɔpena kyɛ ɔbɔ asu. Nakoso né ye baba pena kyɛ onwu ye kyɛ, ye bɔbɔ yeɛ ɔpena kyɛ ɔbɔ asu, anaa ebie yeɛ ɔhyɛ ye ɔ. Ɔhahyirele ye baba kyɛ: “Medɔ Yehowa ti yeɛ mepena kyɛ meyɛ sɔ ɔ.” Yeti ye baba tele yebo. Ye asubɔ si ne, ye abusuafoɛ nemɔ fale ɔhaw pee wale ye so. Benu kõ po hahyirele ye kyɛ: “Kyɛ ɛkɔyɛ Yehowa Danzeniɛ de, sɛ ɛfa bɔle brabɔne anaa ɛfa none dwɔt po a, ahaa ɔte pá.” Yede nzu yeɛ ɔbokale Anna maa ɔhora gyinane yenoa ɔ? Ɔhane kyɛ: “Yehowa mane me anwoserɛ, na me maame ne me baba koso anyakyi me nu koraa.” Mmerɛ biala bɔ Anna konwu ye kyɛ Yehowa aboka ye ne, né ɔtworɔ to berɛ. Bɔ ɔkɔyɛ né ye wora amvi bɔ Yehowa ayɛ ama ye ne, ɔwɔ nu alaa ne waanea bɔ wahworɔ wato berɛ nanu. Wɔ koso, sɛ esuro kyɛ mmenia kodwɔso kotia wɔ a, kae kyɛ Yehowa ta wɔ si.—Heb. 13:6.

KƆNELEO BƆLE ASU

11. Nzuati yeɛ né ɔkɔhora kɔyɛ se kɔma Kɔneleo kyɛ ɔkɔbɔ asu?

¹¹ Bible ne kã Kɔneleo koso nwo dwirɛ. Né ɔte Roman “asraafoɛ ɛyaa so panyi.” (Aso. 10:1) Ɔnate poos bɔ né ole ye nati, ɔkɔyɛ kyɛ né ɔte sona titire paa wɔ sogyafoɛ nanu, na né wale dumaa koso. Ne ‘osa yɛ adɔeɛ’ paa. (Aso. 10:2) Yehowa somane somafoɛ Petro kyɛ ɔɔhã nzɛmba ne hyire ye. Poos bɔ né Kɔneleo le ye nati, ɔyɛle se mane ye kyɛ ɔkɔbɔ asu anaa?

12. Nzu yeɛ ɔmaa Kɔneleo bɔle asu ɔ?

¹² Nzu yeɛ ɔmaa Kɔneleo bɔle asu ɔ? Tworɔnzɛm ne kã kyɛ, né “ɔne ye awuro ama mukoraati besuro Nyameɛ.” Afei koso né ɔtaa bɔ Nyameɛ mbaeɛ. (Aso. 10:2) Mmerɛ bɔ Petro hane nzɛmba ne hyirele Kɔneleo ne, ɔne ye abusua mukoraati nyane gyidie wɔ Yesu nu, na ɛberɛ nala bɛbɔle asu. (Aso. 10:​47, 48) Aporowaa biala nne yenwo kyɛ, né Kɔneleo asi ye hue kyɛ ɔkɔyɛ nzakrayɛɛ biala bɔ ohia, kyɛbɔ ɔkɔyɛ a, ɔne ye abusua kɔbɔ nu kɔsõ Yehowa ɔ.—Yos. 24:15; Aso. 10:​24, 33.

13. Nzu yeɛ yɛkɔhora yekosua yekofi Kɔneleo dwirɛ nanu ɔ?

¹³ Kɔneleo tebea ne, né wayɛ kyɛ Sɔɔlo deɛ ne bie. Ɔnate poos bɔ né ole ye nati, né ahaa ɔkɔhora kɔyɛ se kɔma ye kyɛ ɔkɔɔyɛ Kristoniɛ. Nakoso wannyɛ sɔ. Wɔ koso, odikyɛ ɛyɛ nzakrayɛɛ mbiri mbiri bie wɔ w’asetena nu kora né ahora abɔ asu anaa? Sɛ sɔ yeɛ wɔ tebea ne te a, Yehowa kɔboka wɔ. Mmɔden bɔ ɛbɔ kyɛ ɛkɔfa Bible nu dwirɛ kɔbɔ wɔ bra, na wamaa ahora asõ ye ne, okoyira so paa.

14. Bɔ Tsuyoshi yɛle ne, sɛɛ yeɛ ɔkɔhora kɔboka wɔ ɔ?

¹⁴ Tsuyoshi fi Japan. Ye koso né odikyɛ ɔyɛ nzakrayɛɛ biemɔ wɔ ye adwuma nu kora né wahora wabɔ asu. Né ɔyɛ adwuma wɔ sukuu bie bɔ wale dumaa paa nu, na sɛ hɛdmasta ne nne berɛ a, ye yeɛ né ɔwɔ berɛ ɔ. Né bekyire kyɛbɔ bɛfa flawɛs bɛbɔ dakurehyin wɔ sukuu nu berɛ. Sɛ ɛsɛen bie ba, na sɛ hɛdmasta ne annya atee wangɔanyɛ Buddha soen nu amammerɛ nemɔ a, Tsuyoshi yeɛ né okosi ye gyanu ɔ. Nakoso, mmerɛ bɔ Tsuyoshi suane tebea bɔ awufoɛ wɔ nu nanwo nikye ne, onwuni kyɛ sɛ ɔkɔso yɛ sɔ Buddhafoɛ amammerɛ nemɔ a, ɔngɔhora ngɔbɔ asu. Yeti osili gyinayɛɛ kyɛ ɔngɔyɛ sɔ amammerɛ ne kõ. (2 Kor. 6:​15, 16) Tsuyoshi ne hɛdmasta ne bɔle edwirɛ nanwo ngɔmmɔ. Yede nzu yeɛ ofili nu wale ɔ? Hɛdmasta ne maa ɔtoale so yɛle ye adwuma ne, na wamma wannyɛ sɔ amammerɛ ne kõ. Ɔhyɛle yebo kyɛ osua Bible ne, kɔyɛ afoɛ kõ si yeɛ ɔbɔle asu ɔ.a Sɛ asu bɔ ɛpena kyɛ ɛbɔ nati, odikyɛ ɛyɛ nzakrayɛɛ bie wɔ w’adwuma nu a, nya gydie kyɛ Yehowa kɔmaa ɛne w’abusua sa kɔhã bɔ ɛmɔhia ɔ.—Edw. 127:2; Mat. 6:33.

KORINTOFOƐ NEMƆ BƆLE ASU

15. Nzu yeɛ né ɔkɔhora kosi Korintofoɛ ne asubɔ atee?

¹⁵ Tete Korinto kuro ne de, né mmenia se kyɛ bekuro anwonyadeɛ, na ne bɛ bra koso asɛkye. Né benu pee abrabɔ nzɔ Nyameɛ nye. Yeti sɛ né ebie pena kyɛ ɔsõ Yehowa wɔ berɛ a, né ɔkɔyɛ se kɔma ye paa. Nakoso mmerɛ bɔ somafoɛ Pɔɔlo hɔle berɛ, na ɔhane Kristo nwo nzɛmba ne hyirele bɛ ne, “Korintofoɛ pee bɔ bɛtele Pɔɔlo dwirɛ ne koso, bele belili, na bɛ mukoraa bɛmaa bɛbɔle bɛ asu.” (Aso. 18:​7-11) Yesi ne, Awurade Yesu Kristo yele yenwo ali hyirele Pɔɔlo wɔ nnaleɛ nu, na ɔhahyirele ye kyɛ: “Nne mmenia pee wɔ kuro ye anu.” Ɛhene ati Pɔɔlo fale afoɛ kõ ne bue hane nzɛmba ne hyirele bɛ.

16. Nzu yeɛ ɔbokale Korintofoɛ ne biemɔ maa bɛhora bɛbɔle asu ɔ? (2 Korintofoɛ 10:​4, 5)

¹⁶ Nzu yeɛ ɔbokale Korintofoɛ nemɔ maa bɛbɔle asu ɔ? (Kenga 2 Korintofoɛ 10:​4, 5.) Nyameɛ dwirɛ ne, ɔne ye honhom krongron ne yeɛ ɔbokale bɛ maa bɛhora bɛsesane b’abrabɔ koraa ɔ. (Heb. 4:12) Korintofoɛ bɔ belɛle Kristo nwo nzɛmba ne bɛtole nu ne, né subaen biemɔ ale ndii wɔ bɛnu. Ebie yeɛ ole nzaa bolɛ, awue, mmrienzua bɔ bɛne mmrienzua da, ɔne mmrasua bɔ bɛne mmrasua da. Nakoso bɛhora bɛyakyili ye mukoraati.—1 Kor. 6:​9-11.b

17. Nzu yeɛ ɛkɔhora kosua kofi Korintofoɛ nemɔ dwirɛ nanu ɔ?

¹⁷ Kae kyɛ, sɛ né Korintofoɛ nanu biemɔ kɔhora kɔɔyɛ Kristofoɛ a, né odikyɛ betu subaen bɔ wale ndii wɔ benu nabo. Nakoso bannya adwene kyɛ ɔyɛ se soma, na mmom atee bɔtɔfee bɔ ɔkɔ daa ngoa nu ne, bɛbɔle mmɔden kyɛ bɛkɔfa so. (Mat. 7:​13, 14) Wɔ koso, ɛbɔ mmɔden kyɛ ekoli subammɔne bie so, na wamaa ahora abɔ asu anaa? Yede, nnɛmaa w’abanu bu. Srɛ Yehowa kyɛ ɔfa ye honhom krongron ne boka wɔ, kyɛbɔ ɔkɔyɛ a ɛkɔhora kɔhwe wɔnwo kofi yenwo ɔ.

18. Sɛɛ yeɛ bɔ Monika yɛle ne kɔhora kɔboka wɔ ɔ?

¹⁸ Monika fi Georgia. Sɛ né ɔkɔhora kɔbɔ asu a, né odikyɛ ɔyakyi dwudwolɛ fiɛ, ɔne nningyein tɛɛ bɔ né ɔfa gyegye yenye ne. Ɔhane kyɛ: “Mmerɛ bɔ né nde abayaa ne, mbaeɛ yeɛ ɔbokale me ɔ. Né Yehowa se kyɛ mepena kyɛ meyɛ bɔ ɔtengyɛ ɔ, yeti daa né ɔboka me.” Monika bɔle asu ne, né wali afoɛ 16. Wɔ koso, odikyɛ ɛtwe wɔnwo fi nningyein biemɔ nwo, kyɛbɔ ɔkɔyɛ a ɛkɔhora kɔsõ Yehowa yé anaa? Yede kɔso srɛ Yehowa kyɛ ɔma wɔ anwoserɛ bɔ ɛkɔfa kɔyɛ sɔ nzakrayɛɛ nemɔ. Sɛ ɛyɛ sɔ a, Yehowa kɔfa ye honhom ne kɔboka wɔ maa ɔkɔbo so.—Yoh. 3:34.

WƆ GYIDIE KƆHORA KOTUTU MMOKAA

19. Nzu yeɛ ɔkɔboka wɔ maa ekoli ɔhaw ahoroɛ bɔ wayɛ kyɛ mmokaa naso ɔ? (Nea foto ne koso.)

¹⁹ Nikyee bɔ wamaa wayɛ se wama wɔ kyɛ ɛkɔbɔ asu ne, sɛ ɔte sɛɛ po a, nya gyidie kyɛ Yehowa kuro wɔ dwirɛ, na ɔpena kyɛ ɛbaboka ye abusua naso. Yesu hahyirele ye asuafoɛ ne biemɔ kyɛ: “Sɛ ɛmɔle gyidie bɔ ye piri te kyɛ sinapi baa ko a, ahaa ɛmɔkɔhã bekohyire bokaa he kyɛ, ‘Tutu fi wa kɔ dɔ,’ na ye bo kotutu; na ahaa nikyee biala ngɔyɛ se ngɔma ɛmɔ.” (Mat. 17:20) Bɛbɔ Yesu hane sɔ dwirɛ ne hyirele bɛ ne, né bɛne ye natele hyɛlle biala, yeti né odikyɛ bɛkɔso bɛmaa bɛ gyidie ne nyi. Nakoso Yesu maa benwuni ye kyɛ, sɛ bɛyere bɛnwo benya gyidie kãa bie po a, ɔhaw ahoroɛ bɔ wayɛ kyɛ mmokaa ne, Yehowa kɔboka bɛ maa bekoli so. Wɔ koso, Yehowa kɔboka wɔ.

20. Kristofoɛ bɔ bɛtenane ase tete ne, ɔne bɛbɔ bɛwɔ berɛ ɛnnɛ ne, sɛɛ yeɛ b’asetena nu dwirɛ ne ahyɛ wɔ ngunaen ɔ?

²⁰ Sɛ enwu bɔ wasi w’asubɔ atee ne a, nnɛtenatena yenwo; yɛ yenwo adwuma ndɛ. Kristofoɛ bɔ bɛtenane ase tete ne, ɔne bɛbɔ bɛwɔ berɛ ɛnnɛ ne asetena nu dwirɛ kɔboka wɔ paa. Ɔkɔhyɛ wɔ ngunaen, na wamaa anya anwoserɛ bɔ ɛkɔfa koli wɔ haw naso ɔ. Ma bɛ suahu ne boka wɔ maa eyira wɔnwo so ma Yehowa, na ɛbɔ asu. Sɛ ɛkora si sɔ gyinayɛɛ ne a, engonu wɔnwo lle!