Sɛ Ɛbɔ Asu Yie A, Kɔso ‘Di Yesu Si’

1-2. Sɛ ebie bɔ asu a, nhyiraa beni yeɛ onya ye ɔ?

NIKYEE biala nne berɛ bɔ ɔyɛ anigye tra kyɛ, ɛkɔbɔ asu kɔɔboka Yehowa abusũa naso ɔ. Ɔte yenwo atẽe pirikua paa kyɛ, ebie ne Yehowa kɔfa adamvoa ɔ. Né Dawide le sɔ adwene ne bie, yeti ɔhãne kyɛ: “Bɛ bɔ ɛneanea nu ɛtwe bɛ bata wɔ nwo, kyɛ bɛɛtena w’abrannaa nu ne, benya saleɛ.”—Edw. 65:4.

² Nná ebiala mbaen yeɛ Yehowa ne ye fa adamvoa ɔ, na mmom kyɛbɔ yenwuni ye wɔ adesũa bɔ olimoa nanu ne, mmenia bɔ bɛbɔ mmɔden kyɛ bɛkɔhwẽ bekopingye Yehowa ne, yeɛ ye koso, ɔne bɛ fa adamvoa ɔ. (Yak. 4:8) Sɛ ɛhyɛ Yehowa bɔ kyɛ ɛkɔsõ ye, na ɛbɔ asu a, ɔmaa enya yenwo atẽe pingye ye paa. Sɛ ɛyɛ sɔ a, Yehowa koso ahyɛ bɔ kyɛ, ‘okohwie saleɛ kogua wɔ so maa okobu kɔfa so.’—Mal. 3:10; Yer. 17:​7, 8.

3. Kristofoɛ bɔ bahyɛ Yehowa bɔ kyɛ bɛkɔsõ ye, na babɔ asu ne, nzu yeɛ odikyɛ bɛkɔso bɛyɛ ɔ? (Nworɛ Dwirɛhanɛniɛ 5:​4, 5)

³ Sɛ ɛbɔ asu yie a, bekye bɔ né ahyɛ ngõa nwo amirikatulɛ nabo ɔ. Yeti ɛhẽne sĩ ne, odikyɛ ɛyere wɔnwo paa kyɛ ɛkɔhɔso kɔyɛ bɔ Yehowa kuro ɔ, ɔmva yenwo ne nzɔhwɛ biala bɔ ɔkɔto wɔ ne. (Kenga Nworɛ Dwirɛhanɛniɛ 5:​4, 5.) Afei koso, ɔnate kyɛ aayɛ Yesu sũaniɛ nati, odikyɛ ɛbɔ mmɔden kyɛ ekosuesũa ye wɔ nikyee biala nu. (Mat. 28:​19, 20; 1 Pet. 2:21) Bɔ yɛbaasusu yenwo wɔ adesũa he anu ne kɔboka wɔ maa ɛkɔyɛ sɔ.

KƆSO ‘DI YESU SI,’ ƆMVA YENWO NE NZƆHWƐ BIALA BƆ ƆKƆTO WƆ NE

4. Sɛ Bible ne kã kyɛ bɛbɔ beli Yesu sĩ ne, ‘bɛfa bɛ asɛndua’ a, okyire sɛɛ? (Luka 9:23)

⁴ Sɛ ɛbɔ asu yie a, nnenya adwene kyɛ kesaalae de, ɔhaw biala ngɔto wɔ kõ. Nahorɛ dwirɛ yeɛ ole kyɛ, Yesu hãne kyɛ bɛbɔ bɛkɔyɛ ye asũafoɛ ne, odikyɛ ‘bɛfa bɛ asɛndua daa biala.’ (Kenga Luka 9:23.) Bɔ ɛhẽne kyire yeɛ ole kyɛ, odikyɛ bɛnea atẽe kyɛ bɛkɔhora bekonwu amaneɛ. Sɔ dwirɛ bɔ Yesu hãne ne, aso né okyire kyɛ bɛbɔ bɛkɔɔyɛ ye asũafoɛ ne, bekonwu amaneɛ mmerɛ biala anaa? Daabi, ɔtte sɔ koraa. Bɔ né Yesu kyire yeɛ ole kyɛ, nhyiraa bɔ sɛ ebie bɔ asu a okonya ye ne sĩ ne, nzɔhwɛ ahoroɛ kɔto ye. Nzɔhwɛ ahoroɛ bɔ ɔte sɔ ne, enu bie wɔ berɛ a, ɔkɔhora kɔmaa yekonwu amaneɛ paa.—2 Tim. 3:12.

5. Bɛbɔ bɛfa nningyein bɛbɔ afɔleɛ ne, nhyiraa beni yeɛ Yesu ahyɛ bɔ kyɛ bɛsa kɔhã ye ɔ?

⁵ Ɔnate Nyameɛ Ahennie ne bɔ ɛpena kyɛ ɛfa w’adwene sie so nati, ebia wamaa w’abusũafoɛ tane wɔ nye. Anaa adwuma bie bɔ ahãa ɔkɔmaa ekonya esikaa pẽe ne, afa abɔ afɔleɛ. (Mat. 6:33) Sɛ sɔ a, nya gyidie kyɛ, Yehowa nwu bɔ ayɛ ne mukoraati. (Heb. 6:10) Afei koso, ebia anwu ye kyɛ edwirɛ bɔ Yesu hãne he te nahorɛ. Ɔhãne kyɛ: “Ebiala nne berɛ bɔ ɔnate me ne nzɛmba ne ati wayakyi awuro, anaa aliɛmaa mmienzua, anaa aliɛmaa mmrasua, anaa seɛ, anaa niɛ, [anaa yeɛ], anaa mmaa, anaa aseɛ mɔ berɛ, bɔ ongonya sua mɔ, ne aliɛmaa mmienzua, ne aliɛmaa mmrasua, ne niɛ mɔ, ne mmaa, ne aseɛ mɔ mmɔhoɛ ɛyaa, bɔ ndaneanyeɛ koso boka so, wɔ kekesaala ye wiase ye anu ɔ; ɔne daa ngoa wɔ wiase bɔ ɔ́ba ne anu ɔ.” (Mak. 10:​29, 30) Nahorɛ dwirɛ yeɛ ole kyɛ, nhyiraa bɔ wɔsa ahã ye ne, ɔte piri koraa tra nikyee biala bɔ afa abɔ afɔleɛ ɔ.—Edw. 37:4.

6. Sɛ ɛbɔ asu yie po a, nzuati yeɛ odikyɛ ɛyere wɔnwo kyɛ ɛkɔhɔso koli “anwoɔnaen akɔnnɔ” so ɔ?

⁶ Sɛ ɛbɔ asu yie po a, odikyɛ ɛyere wɔnwo paa kora né ahora ali “anwoɔnaen akɔnnɔ” so. (1 Yoh. 2:16) Bɔ yeti yeɛ ɔte sɔ yeɛ ole kyɛ, ɛte Adam bosoniɛ bɔ bɔne wɔ wɔnwo ɔ. Sɛ odwu mmerɛ bie a, ɛkɔhora konya adwene bɔ somafoɛ Paul nyane ne bie. Ɔhãne kyɛ: “Ofikyɛ me nye gye Nyameɛ mmeraa nwo wɔ me nu paa. Nakoso menwu mmeraa foforɛ bie wɔ me nwonaen akwaa nu, bɔ ɔko tia mmeraa bɔ ɔwɔ m’adwene nu ɔ, bɔ ɔkye me nnure ma bɔne mmeraa bɔ ɔwɔ me nwonaen akwaa nu ɔ.” (Rom. 7:​22, 23) Ɔnate kyɛ odwu mmerɛ bie a, ɔyɛ se kyɛ ɛkɔyɛ bɔ ɔte pá nati, w’aba nu kɔhora kobu. Nakoso, sɛ ɛkɔso fa w’adwene sie ɛbɔ bɔ ɛhyɛle Yehowa kyɛ ɛkɔsõ ye naso a, ɔkɔboka wɔ maa ɛkɔyɛ bɔ Yehowa kuro ɔ, mmerɛ bɔ ebie pena kyɛ ɛyɛ nikyeebie bɔ ɔttemaye ne. Yede, nzuati yeɛ yɛkã sɔ ɔ?

7. Ɛbɔ bɔ ahyɛ Yehowa kyɛ ɛkɔsõ ye ne, sɛɛ yeɛ ɔkɔboka wɔ maa ɛkɔhɔso koli nahorɛ kɔma ye ɔ?

⁷ Sɛ ɛhyɛ Yehowa bɔ kyɛ ɛkɔsõ ye a, né apa wɔnwo sĩ. Bɔ sɔ dwirɛ ne kyire yeɛ ole kyɛ, nningyein biemɔ bɔ ekuro, nakoso Yehowa nye ngye yenwo ne, ɛkɔyakyi ye yɛlɛ. (Mat. 16:24) Yesɔ nati, sɛ nzɔhwɛ bie to wɔ a, nna sɔ mmerɛ ne yeɛ ɛbaadwene yenwo kyɛ, ɛyɛ bɔ Yehowa kuro, anaakyɛ ɛyɛ bɔ wɔbɔbɔ ekuro ɔ. Ofikyɛ ɛse bɔ odikyɛ ɛyɛ ne dada; yeɛ ole kyɛ ekoli nahorɛ kɔma Yehowa. Sɛ ɛyɛ sɔ a, okyire kyɛ, asua atafe so kyɛ, ɔmva yenwo ne bɔ ɔkɔto wɔ biala ne, ekoli nahorɛ kɔma Yehowa tekyɛ Yob. Nzɔhwɛ bɔ ɔtole ye ne, né yenoa yɛ se paa, nakoso ɔhora hãne kyɛ, “Me nahorɛlilɛ de, mengɔyakyi nu.”—Yob 27:5.

8. Ɛbɔ bɔ ahyɛ Yehowa kyɛ ɛkɔsõ ye ne, sɛ ɛkɔso dwenedwene yenwo a, sɛɛ yeɛ ɔkɔboka wɔ ɔ?

⁸ Ɛbɔ bɔ ahyɛ Yehowa kyɛ ɛkɔsõ ye ne, sɛ ɛkɔso dwenedwene yenwo a, ɔkɔboka wɔ maa ekonya anwoserɛ kɔfa kɔyɛ bɔ Yehowa kuro, mmerɛ bɔ nzɔhwɛ bie ato wɔ ne. Yɛfa ye kyɛ anya ebie ahũ anaa ɔye nwo akɔnnɔ. Aso ɛkɔyɛ nningyein biemɔ bɔ okyire kyɛ ekuro ye anaa? Ɔnate kyɛ ahyɛ Yehowa bɔ nati, ɛngɔyɛ sɔ llé! Sɛ ɔba sɔ a, nningyein bɔ ɔte sɔ nwo adwenedwene ngɔhyɛ wɔ so, na ɛhẽne kɔmaa wɔnwo kɔtɔ wɔ. Yeti ‘ɛkɔmakye kofi bɔnefoɛ atẽe so.’—Any. 4:​14, 15.

9. Sɛ ɛkɔso dwenedwene ɛbɔ bɔ ahyɛ Yehowa nanwo a, sɛɛ yeɛ ɔkɔboka wɔ maa ekonya mmerɛ kɔsõ ye ɔ?

⁹ Yɛfa ye kyɛ anya adwuma bie, nakoso sɔ adwuma ne, ɔkɔmaa ɔkɔyɛ se kɔma wɔ kyɛ ɛkɔhora kɔhɔ asafo nhyiamu daa. Sɛ ɔba sɔ a, nzu yeɛ ɛkɔyɛ ɔ? Ɛhe de, nna bekye bɔ ɛbaadwene yenwo ɔ, ofikyɛ alimoa asusu yenwo dada kyɛ, sɛ enya adwuma bie bɔ ɔte sɔ a, ɛngɔyɛ. Yeti engolle ngɔto nu kyɛ ɛkɔyɛ sɔ adwuma ne, na yesĩ ne abɔ mbaeɛ kyɛ, Yehowa boka wɔ ma enya mmerɛ bɔ ɛkɔfa kɔsõ ye ɔ. Sɛ ɛyɛ sɔ a, ɔkɔmaa ekosuesũa bɔ Yesu yɛle ne. Né ɔpena kyɛ ɔyɛ bɔ ye Baba kuro mmerɛ biala. Wɔ koso ɛkɔhora kɔyɛ sɔ ala, na ɛhẽne kɔboka wɔ maa ɛkɔyɛ bɔ Yehowa kuro ɔ.—Mat. 4:10; Yoh. 8:29.

10. Sɛ ɛbɔ asu yie a, sɛɛ yeɛ Yehowa kɔboka wɔ maa ɛkɔhɔso ‘koli Yesu si’ ɔ?

¹⁰ Sɛ nzɔhwɛ bie to wɔ, na ɛkɔso yɛ bɔ Yehowa kuro a, okyire kyɛ ɛpena kyɛ ɛkɔso ‘di Yesu si.’ Sɛ ɛyɛ sɔ a, ɛkɔhora konya gyidie kyɛ Yehowa kɔboka wɔ. Bible ne kã kyɛ: “Ɔnate kyɛ Nyameɛ di nahorɛ ne ati, ɔngɔma ate ngɔma nzɔhwɛ bɔ ɔbo ɛmɔ anwoserɛ so ngɔto ɛmɔ. Na mmom, okohyire ɛmɔ atee bɔ ɛmɔkɔfa so bekɔnwati bekofi nzɔhwɛ ne anu ɔ, amaa ɛmɔahora bagyina ye noa.”—1 Kor. 10:13.

BƆ ƆKƆBOKA WƆ MAA ƐKƆHƆSO KOLI YESU SI Ɔ

11. Nningyein bɔ ɔkɔboka yɛ maa yɛkɔhɔso yekoli Yesu si ne, enu kõ yeɛ ole beni? (Nea foto ne koso.)

¹¹ Yesu fili ye ahõne mukoraati nu sõne Yehowa, na né ɔmva ye mbaeɛ nni angorɛ. Ɛhẽne yeɛ ɔmaa opingyele Yehowa paa ɔ. (Luka 6:12) Sɛ ɛbɔ asu yie a, nikyee kõ bɔ ɔkɔboka wɔ paa maa ɛkɔhɔso koli Yesu sĩ yeɛ ole kyɛ, ɛkɔyɛ nningyein biemɔ bɔ ɔkɔmaa ekopingye Yehowa ɔ. Bible ne kã kyɛ: “Nakoso bɔ yanya ye dada ne, ɛ́mɔma yɛhɔ so yɛsɔ nu bum.” (Flp. 3:16) Aliemaa biemɔ wɔ berɛ a, bɛfa bɛ mmerɛ pẽe bɛsõ Yehowa, na ebia ɛkɔte bɔ bayɛ nanwo dwirɛ. Ebie yeɛ ole kyɛ, ebia bahɔ Ahennie Nanwo Nzɛmbahãnɛfoɛ Sukuu, anaakyɛ, batu bahɔ nekaa bɔ behia mmeni pẽe maa bɛyɛ asɛnga adwuma ne. Sɛ ɛkɔhora kosuesũa bɔ bɛyɛle ne a, yede yɛ ye sɔ. Ofikyɛ bɛbɔ bɛsõ Yehowa ne, bɔ bekuro yeɛ ole kyɛ, bɛkɔfa mmerɛ pẽe bɛkɔyɛ asɛnga adwuma ne. (Aso. 16:9) Nakoso, sɛ enwu ye kyɛ ɛngɔhora ngɔyɛ sɔ kesaalae a, nnɛmaa w’aba nu bu, ofikyɛ bɔ yenwo hia paa yeɛ ole kyɛ, ɛkɔhɔso kɔsõ Yehowa ɔ. (Mat. 10:22) Kae kyɛ, bɔ ɛkora fi w’ahõne mukoraati nu yɛ ma Yehowa ne, ɛhẽne yeɛ yenye gye yenwo ɔ. Sɛ ɛyɛ sɔ a, ɔkɔboka wɔ maa sɛ ɛbɔ asu yie a, ɛkɔhɔso koli Yesu sĩ.—Edw. 26:1.

12-13. Sɛ enwu ye kyɛ anwokekã bɔ ɛfa sõ Yehowa ne ahɔ ase a, nzu yeɛ odikyɛ ɛyɛ ɔ? (1 Korintofoɛ 9:​16, 17) (Kenga edwirɛ bɔ yeɛ ole, “Kɔso Tu Amirika Ne” bɔ ɔwɔ alaka nanu ne.)

¹² Ebia ɛbɔle asu yiele ne, anwu ye kyɛ sɛ ɛbɔ mbaeɛ a, edwirɛ kõ ne ala yeɛ daa ɛkã ɔ, anigye bɔ ɛfa yɛ asɛnga adwuma naso ate, na sɛ ɛkenga Bible ne koso a, ɔnyɛ wɔ fɛ kõ kyɛ dáa ne. Sɛ ɔba sɔ a, nzu yeɛ ɛkɔyɛ ɔ? Nnenya adwene kyɛ kesaalae de, Yehowa mva ye honhom ne mmoka wɔ kõ. Ɔnate kyɛ ɛte sona nati, anwokekã bɔ ɛfa sõ Yehowa ne, ɛso kɔhora kɔte. Sɛ enwu ye sɔ a, dwenedwene bɔ somafoɛ Pɔɔlo yɛle nanwo. Né ɔyere yenwo kyɛ okosuesũa Yesu, nakoso né ɔse kyɛ sɛ odwu mmerɛ bie a, ɔkɔyɛ se kɔma ye kyɛ ɔkɔyɛ sɔ ɔ. (Kenga 1 Korintofoɛ 9:​16, 17.) Ɔhãne kyɛ: “Nakoso sɛ nna me bɔbɔ me pɛ yeɛ mefa mekã hɔ a, nzaade bɔ bafa bawura me sa ne ala yeɛ meyɔ ne.” Ɛhe kyire kyɛ, sɛ ne ɔyɛ se ma somafoɛ Pɔɔlo kyɛ ɔkɔyɛ asɛnga adwuma ne po a, né ɔyere yenwo yɛ.

¹³ Wɔ koso ɔnate kyɛ ɛte sona, bɔ bɔne wɔ wɔnwo nati, sɛ odwu mmerɛ bie a, ɔkɔhora kɔyɛ se kɔma wɔ kyɛ, ɛkɔyɛ bɔ odikyɛ ɛyɛ ye wɔ Yehowa sõen nu ne. Nakoso sɛ ɔba sɔ na emia wɔnye a, ɔkɔmaa sɔ nningyein nemɔ yɛlɛ kosa kɔyɛ wɔ fɛ. Kae kyɛ, sɛ ɛyere wɔnwo kenga Bible ne kyẽa biala, ɛbɔ mbaeɛ, ɛkɔ asafo nhyiamu, na ɛyere wɔnwo yɛ asɛnga adwuma ne a, ɔkɔboka wɔ maa ɛkɔhɔso koli Yesu sĩ mmerɛ bɔ abɔ asu ayie ne. Sɛ ɛyɛ sɔ a, ɔkɔhyɛ aliemaamɔ ngunaen paa.—1 Tɛs. 5:11.

“Ɛ́MƆNEANEA ƐMƆ AHONE NU BƐNEA . . . Ɛ́MƆSO ƐMƆ NWO BƐNEA”

14. Ɔwɔ nu alaa a, edwirɛ benimɔ yeɛ odikyɛ ebisa wɔnwo ɔ, na nzuati ɔ? (2 Korintofoɛ 13:5)

¹⁴ Sɛ ɛbɔ asu yie a, odikyɛ ɛkɔso neanea w’ahõne nu nea kyɛ, gyidie bɔ né ele ye ne, sɔ alaa yeɛ ɔte anaa. (Kenga 2 Korintofoɛ 13:5.) Ɔwɔ nu alaa a, susu yenwo nea kyɛ ɛbɔ mbaeɛ daa, ɛkenga Bible ne dwenedwene yenwo, na ɛkɔ asafo nhyiamu ne asɛnga anaa. Sɛ enwu ye kyɛ, anigye bɔ né ɛfa yɛ sɔ nningyein hemɔ naso ate a, yede pena atẽe ahoroɛ bɔ ɛkɔfa so kosa kɔyɛ maa ɔkɔyɛ wɔ fɛ ɔ. Yeti ɛkɔhora kobisa wɔnwo kyɛ: ‘Nahorɛ dwirɛ bɔ ɔwɔ Bible nanu ne, mekora mekyirekyire nu mekyire mmenia anaa? Atẽe beni yeɛ ngɔhora ngɔfa so ngɔyɛ asɛnga adwuma ne maa ye yɛlɛ kɔyɛ me fɛ ɔ? Ɛyɛ a mebɔ nningyein pɔtẽe nwo mbaeɛ anaa? Atẽe bɔ mefa so mebɔ mbaeɛ ne, okyire kyɛ Yehowa yeɛ mefa menwo meto ye so anaa? Nde ebie bɔ mekɔ asafo nhyiamu mmerɛ biala anaa? Sɛ mekɔ asafo nhyiamu a, ngɔyɛ sɛɛ né mafa m’adwene masie dwumadie naso, na mahora mama mmuayɛɛ?’

15-16. Kyɛbɔ aliemaa bie hora gyinane nzɔhwɛ bie bɔ ɔtole ye ne noa ne, nzu yeɛ asuã afi nu ɔ?

¹⁵ Yenwo hia paa kyɛ, ekonwu mmerɛyɛlɛ bɔ ɔwɔ wɔnwo ne. Edwirɛ bɔ ɔtole aliemaa bie bɔ bɛfrɛ ye Robert ne maa yenwu ye kyɛ, sɛ ɛyɛ sɔ a, ɔkɔboka wɔ paa. Ɔhãne kyɛ: “Nyane kɔyɛ afoɛ 20 ne, né meyɛ adwuma bie. Ɛlɛhõ bie bɔ yɛpɔnone adwuma ne, taluwa bie bɔ mene ye yɛ adwuma hãhyirele me kyɛ, yɛhɔ ye awuro na yɛɛgye yɛnye. Ahyɛaseɛ ne, né mennwu bɔ ngã ɔ. Nakoso nzieɛn, ngã ngyirele ye pein kyɛ mengɔhɔ, na mmaa onwuni bɔ yeti yeɛ mekã sɔ ne.” Robert yɛle nikyee paa kyɛ wanni taluwa ne sĩ, ɔne ye bangɔ ɔ. Nakoso nzieɛn bɔ né ɔdwenedwene bo osili nanwo ne, onwuni kyɛ né ahãa odikyɛ ɔma taluwa ne mmuayɛɛ ndɛ. Ɔhãne kyɛ: “Mangora maanyɛ nikyebie mamva edwirɛ nanwo ndɛ kyɛbɔ Yosef yɛle, mmerɛ bɔ né Pɔtifa aye ne lakalaka ye ne. (Gye. 39:​7-9) Ɔyɛle me nwanwa paa kyɛ ɛberɛ ne ala, mangora mangã mangyire taluwa ne kyɛ mengɔhɔ ɔ. Bɔ osili ne maa nwuni kyɛ, kyɛbɔ mene Yehowa afĩa si te ne, odikyɛ memaa enu yɛ se paa.”

¹⁶ Kyɛbɔ Robert neaneane ye ahõne nu nwuni mmerɛyɛlɛ bɔ ɔwɔ yenwo ne, sɛ wɔ koso ɛyɛ sɔ a, ɔkɔboka wɔ paa. Sɛ nzɔhwɛ bie to wɔ, na ɛkora gyina yenoa po a, yesĩ ne ɛkɔhora kobisa wɔnwo kyɛ, ‘Aso ngora nzili gyinayɛɛ ndɛ kyɛ ngɔyɛ bɔ Yehowa kuro anaa?’ Sɛ enwu ye kyɛ odikyɛ ɛyere wɔnwo mmerɛ foforɛ a, nnɛmaa w’aba nu bu. Na mmom ma ɔyɛ wɔ fɛ kyɛ, ahora anwu mmerɛyɛlɛ bɔ ɔwɔ wɔnwo ne ɔ. Afei yere wɔnwo yɛ nningyein bɔ ɔkɔboka wɔ maa ɛkɔyɛ bɔ Yehowa kuro ɔ.—Edw. 139:​23, 24.

17. Edwirɛ bɔ ɔtole Robert ne, sɛɛ yeɛ né ɔfa Yehowa dumaa nanwo ɔ?

¹⁷ Bɔ ɔtole Robert ne, yɛkɔhora yekosũa nikyee foforɛ yekofi nu. Ɔtoale ye dwirɛ naso kyɛ: “Mmerɛ bɔ ngã ngyirele taluwa ne kyɛ mene ye ngɔhɔ ne, nzieɛn ye ɔhãhyirele me kyɛ, ‘Ɛyɛle nikyee paa kyɛ ɛne me angɔ ɔ!’ Yeti mmisale ye bɔ yeti yeɛ ɔkã sɔ ɔ. Yeɛ ɔhãne kyɛ mmerɛ bie, ye damvo bie bɔ né ɔte Yehowa Danzeniɛ hãhyirele ye kyɛ, Yehowa Adanzefoɛ mmrandeɛ ne ndaluwa de, bemu bɛyɛ bɔne bɛfea. Yeti sɛ ebie nya lakalaka bɛ pɛ, né beli yesĩ. Yeti ɔhãhyirele ye damvo ne kyɛ, sɛ sɔ a, yede okoso me kɔnea. Mmerɛ bɔ ɔhãne sɔ ne, ɔyɛle me fɛ paa kyɛ ngora nhyɛle Yehowa animnyam ɔ.”

18. Sɛ ɛbɔ asu yie a, nzu yeɛ ɛpena kyɛ ɛkɔso yɛ ɔ? (Kenga edwirɛ bɔ yeɛ ole, “Edwirɛ Biemɔ Bɔ Ɔkɔboka Wɔ Ɔ” bɔ ɔwɔ alaka nanu ne.)

¹⁸ Sɛ ɛhyɛ Yehowa bɔ kyɛ ɛkɔsõ ye na ɛbɔ asu a, ɛmaa onwu ye kyɛ ɔmva yenwo ne bɔ okosi biala ne, ɛpena kyɛ ye dumaa nanwo te. Nya gyidie kyɛ nzɔhwɛ bɔ ɛfa nu, ɔne mmɔden bɔ ɛbɔ kyɛ ekogyina ye noa ne, Yehowa nwu ye mukoraati, yeti okoyira wɔ. Afei nwu ye kyɛ, Yehowa kɔfa ye honhom krongron ne kɔboka wɔ maa ɛkɔhora kɔyɛ bɔ okuro ɔ. (Luka 11:​11-13) Sɛ ɛbɔ asu yie a, Yehowa kɔboka wɔ maa ɛkɔhɔso koli Yesu sĩ.