Aboa Wɔnwo Kyɛ Ɛkɔhyɛ Yehowa Bɔ Kyɛ Ɛkɔsõ Ye Anaa?

1-2. Koraka ebie kɔbɔ asu ne, nzu yeɛ odikyɛ odimoa yɛ ɔ?

KƆYƐ afoɛ nnu bɔ wapɛ nu ne, mmenia kɔbo miliɔn kõ yeɛ babɔ asu baayɛ Yehowa Adanzefoɛ ɔ. Sɔ mmenia ne, benu pẽe wɔ berɛ a, bɛte kyɛ sũaniɛ Timoteo. ‘Ofi bɛ ngwadaa nu’ yeɛ basuã Yehowa nwo nikyee ɔ. (2 Tim. 3:​14, 15) Benu biemɔ koso wɔ berɛ a, benyini kora yeɛ bɛbaasũa Yehowa nwo nikyee bɛbɔ asu ɔ. Maame bie po de, ɔhyɛle yebo ne Yehowa Adanzefoɛ sũane nikyee ne, né wabɔ aworowaa, na ɔbɔle asu ne, né wali afoɛ 97!

² Sɛ ɛte ebie bɔ ɛne Yehowa Adanzefoɛ sũa nikyee, anaa w’awofoɛ bɔ bɛte Yehowa Adanzefoɛ yeɛ bɛne wɔ sũa Bible ne a, aso esusu yenwo kyɛ sɛ enyane a, ahãa abɔ asu hɔ ɔ? Sɛ sɔ a, yede yɛyɛ wɔ mo, ayɛ nikyee paa. Nakoso koraka ɛkɔbɔ asu ne, odikyɛ edimoa hyɛ Yehowa bɔ kyɛ ɛkɔyɛ bɔ okuro ɔ. Adesũa he kɔboka yɛ maa yekonwu bɔ sɔ dwirɛ ne kyire ɔ. Afei koso, ɔkɔboka wɔ maa ekonwu bɔ yeti yeɛ ɔnzɛkyɛ esuro kyɛ ɛkɔhyɛ Yehowa bɔ kyɛ ɛkɔsõ ye, na abɔ asu ɔ.

SƐ BƐKÃ KYƐ EBIE AHYƐ YEHOWA BƆ A, OKYIRE SƐƐ?

3. Mmenia bɔ Bible ne kã kyɛ bɛhyɛle Yehowa bɔ ne, benu bie yeɛ ole nwamɔ?

³ Wɔ Bible nanu ne, sɛ bɛkã kyɛ ebie ahyɛ Yehowa bɔ a, bɔ okyire yeɛ ole kyɛ sɔ sona ne atu yenwo asie berɛ kyɛ ɔkɔyɛ nningyein pɔtẽe bie kɔma Yehowa. Né Yisraelfoɛ nemɔ ahyɛ Yehowa bɔ kyɛ bɛkɔsõ ye. Benu biemɔ wɔ berɛ a, Yehowa fale adwuma bie wurale bɛsa. Sɔ mmenia nemɔ, benu kõ yeɛ ole Aarɔn. Né ɔbɔ abotire bɔ bafa esikaa kɔkorɛ bayɛ, bɔ ɔte “krongronyɛlɛ kyerɛ” ɔ. Ɛhẽne kyire kyɛ, né Yehowa afa awura yesa kyɛ ɔyɛ sɔfo panyi ma Yisraelfoɛ nemɔ. (Lew. 8:9) Nasritefoɛ nemɔ koso, bɛhyɛle Yehowa bɔ kyɛ bɛkɔyɛ nningyein pɔtẽe bie bɛkɔma ye. Edwirɛ “Nasiritefoɛ” ne, ofi Hebri dwirɛ bɔ yeɛ ole nazirʹ nu, na okyire “Ebie Bɔ Baye Ye Basie Ahameɛ,” anaa “Bɔ Watu Yenwo Wasie Berɛ Ɔ.” Sɛ né ebie hyɛ bɔ kyɛ ɔkɔyɛ Nasiriteniɛ a, né odikyɛ odi yenwo mmraa bɔ ɔwɔ Mose Mmraa nanu naso.—Num. 6:​2-8.

4. (a) Sɛ bɛkã kyɛ ebie ahyɛ Yehowa bɔ a, nzu yeɛ okyire ɔ? (b) Sɛ bɛkã kyɛ ebie “apa yenwo si” a, okyire sɛɛ? (Nea foto ne koso.)

⁴ Sɛ ɛhyɛ Yehowa bɔ kyɛ ɛkɔsõ ye a, bɔ okyire yeɛ ole kyɛ, ale ato nu kyɛ ɛkɔyɛ Yesu sũaniɛ. Afei bɔ Nyameɛ kuro ne, ɛkɔmaa yenwo kohia wɔ kɔtra nikyee foforɛ biala wɔ w’asetena nu. Yede, nzu biekũ yeɛ ɔboka ɛhe aso ɔ? Yesu hãne kyɛ: “Sɛ ebie kuro kyɛ odi me si a, maa ɔpa ye nwo si.” (Mat. 16:24) Greek dwirɛ bɔ behyirele yebo “ɔpa yenwo si” ne, bɔ okyire yeɛ ole kyɛ, “sona ne kɔfa nningyein biemɔ bɔ yenye gye yenwo ne kɔto ahãmeɛ.” Yeti sɛ enya hyɛ Yehowa bɔ kyɛ ɛkɔsõ ye a, odikyɛ ɛyere wɔnwo kyɛ ɛkɔyɛ bɔ okuro ɔ. (2 Kor. 5:​14, 15) Ebie yeɛ ole kyɛ, ɛkɔhwẽ wɔnwo kofi “anwoɔnaen dwumadie,” bɔ ebie yeɛ ole adwamamɔ nanwo. (Gal. 5:​19-21; 1 Kor. 6:18) Sɛ ɛyɛ sɔ a, okyire kyɛ afa mmraa bie akyekye wɔnwo anaa? Sɛ ɛdɔ Yehowa, na ede to nu kyɛ ye mmraa yeɛ ɔkɔboka wɔ a, yede engonya sɔ adwene ne llé. (Edw. 119:97; Yes. 48:​17, 18) Aliemaa bie bɔ bɛfrɛ ye Nicholas hãne kyɛ: “Ɛkɔhora kobu Yehowa mmraa tekyɛ ebie bɔ ɔla prisã bɔ ɔngora nyɛ bɔ okuro ɔ, anaakyɛ ɛkɔhora kobu ye kyɛ buralɛ bɔ bafa bale gyata bue bie anwo kyɛbɔ ɔkɔyɛ a, bengonya wɔ ngɔhye wɔ ɔ.”

5. (a) Sɛ ɛpena kyɛ ɛhyɛ Yehowa bɔ kyɛ ɛkɔsõ ye a, ɛkɔyɛ ye sɛ? (b) Sɛ ebie hyɛ Yehowa bɔ kyɛ ɔkɔsõ ye a, nzuati yeɛ ɛhẽne te sorongo wɔ asubɔ nwo ɔ? (Nea foto ne koso.)

⁵ Sɛ ɛpena kyɛ ɛhyɛ Yehowa bɔ kyɛ ɛkɔsõ ye a, ɛkɔyɛ ye sɛ? Bɔ ɛkɔyɛ yeɛ ole kyɛ, ɛkɔbɔ mbaeɛ kɔhã kohyire Yehowa kyɛ ye ngome yeɛ ɛkɔsõ ye ɔ, na ɛkɔyɛ bɔ okuro ɔ. Sɛ ɛyɛ sɔ a, okyire kyɛ ofi sɔ mmerɛ ne bɔ ɔkɔ ne, ɛkã kyire Yehowa kyɛ ɛkɔfa “w’ahone amukoraa ne wɔ kra amukoraa ne w’adwene amukoraa ne w’anwoserɛ amukoraa” kohuro ye dwirɛ. (Mak. 12:30) Mbaeɛ bɔ ɔte sɔ ne, bɛmmɔ bɛmma ebie, na mmom wɔ bɔbɔ yeɛ odikyɛ ɛbɔ ɔ. Nakoso asubɔ de, bɛyɛ ye wɔ mmenia nu, na ɛhẽne maa ebiala nwu ye kyɛ, ahyɛ Yehowa bɔ kyɛ ɛkɔsõ ye. Sɛ ɛbɔ sɔ mbaeɛ ne a, okyire kyɛ ata Yehowa ndaen, yeti ɔnzɛkyɛ ɛfa di angorɛ. Ofikyɛ Yehowa nea atẽe kyɛ ekoli sɔ dwirɛ bɔ ahã naso.—Nwo. 5:​4, 5.

NZUATI YEƐ ODIKYƐ ƐHYƐ YEHOWA BƆ KYƐ ƐKƆSÕ YE Ɔ?

6. Nzu yeɛ ɔmaa ebie hyɛ Yehowa bɔ kyɛ ɔkɔsõ ye ɔ?

⁶ Ɔdɔ bɔ ele ma Yehowa ne, ɛhẽne yeɛ ɔmaa ɛhyɛ ye bɔ kyɛ ɛkɔsõ ye ɔ. Nna Yehowa dumaa mbaen bɔ ɛtele ne, yeɛ ɔmaa enyane ɔdɔ mane ye ɔ. Na mmom Yehowa nwo nikyee bɔ esũane ne, yeɛ waboka wɔ maa anya “nimdeɛ mmorosoɛ,” ɔne “sunzum nu ndeaseɛ amukoraa” ɔ. (Kol. 1:9) Bible ne bɔ eguso esũa ne, waboka wɔ maa ale ato nu kyɛ, (1) Yehowa te ebie bɔ ɔwɔ berɛ ɔ, (2) ye yeɛ ɔmaa bɛhworɔle Bible ne ɔ, (3) ɔnate ye ahyehyɛdeɛ naso yeɛ ɔmaa bɔ wabɔ yeti anu kyɛ ɔkɔyɛ ne ba nu ɔ.

7. Nzu yeɛ odikyɛ ebie dimoa yɛ kora, na wahyɛ Nyameɛ bɔ kyɛ ɔkɔsõ ye ɔ?

⁷ Bɛbɔ bɛhyɛ Yehowa bɔ kyɛ bɛkɔsõ ye ne, odikyɛ bɛte nahorɛ dwirɛ ahoroɛ bɔ ɔwɔ Bible nanu nabo, na bɛfa bɛbɔ bɛ bra. Afei koso, bɔ basũa bafi Bible nanu ne, bɛbɔ mmɔden kyɛ bɛkɔhã yenwo dwirɛ bekohyire mmenia. (Mat. 28:​19, 20) Nningyein bɔ basũa bafi Bible nanu ne, wamaa banya ɔdɔ pirikua bama Yehowa, na ɛhẽne ati yeɛ bɛpena kyɛ bɛhyɛ ye bɔ kyɛ bɛkɔsõ ye ne. Wɔ koso, sɔ yeɛ ɛpena kyɛ ɛyɛ anaa? Sɛ ele ɔdɔ bɔ ɔte sɔ ma Yehowa a, ɛhẽne yeɛ ɔkɔhã wɔ maa ɛkɔhyɛ ye bɔ kyɛ ɛkɔsõ ye, na abɔ asu ɔ. Na mmom, nna kyɛ ɛyɛ sɔ fa sɔ sona bɔ ɔne wɔ sũa Bible, anaa w’awofoɛ nye. Afei koso, ɔnzɛkyɛ enya adwene kyɛ wɔ damvomɔ bɔ asu, yeti yeɛ wɔ koso ɛpena kyɛ ɛbɔ asu ɔ.

8. Sɛ ɛdwenedwene nningyein bɔ Yehowa ayɛ ama wɔ nanwo a, sɛɛ yeɛ ɔkɔhyɛ wɔ ngunaen maa ɛkɔhyɛ ye bɔ kyɛ ɛkɔsõ ye ɔ? (Edwein 116:​12-14)

⁸ Sɛ ɛdwenedwene nningyein bɔ Yehowa ayɛ ama wɔ nanwo a, ɛhẽne kɔhã wɔ maa ɛkɔhyɛ ye bɔ kyɛ ɛkɔsõ ye. (Kenga Edwein 116:12-14.) Bible ne kã Yehowa nwo dwirɛ kyɛ, ye berɛ yeɛ “akyɛdeɛ paa amukoraa ne akyɛdeɛ bɔ odi mu amukoraa” fi ɔ. (Yak. 1:17) Akyɛdeɛ bɔ ɔte piri paa bɔ Yehowa afa ama yɛ, yeɛ ole Ɔwa Yesu, bɔ ɔmaa owu mane yɛ ne. Ɔnate Yesu wue nati, wamaa ahora ɛne Yehowa afa adamvoa, na asa anya anyelasoɛ kyɛ ɛkɔtena ase daa kyẽabie. (1 Yoh. 4:​9, 10, 19) Sɛ ɛhyɛ Yehowa bɔ kyɛ ɛkɔsõ ye a, ɔte atẽe kõ bɔ ɛkɔfa so kɔla ye ase wɔ nningyein bɔ wayɛ wama wɔ ne mukoraati nwo ɔ. Sɔ nningyein ne bie yeɛ ole ɔdɔ bɔ wala ye ali wahyire wɔ, ɔne nhyiraa bɔ wamaa anya ye ne. (Deut. 16:17; 2 Kor. 5:15) Bɔ yɛkɔhora yɛkɔyɛ yɛkɔfa yekohyire kyɛ yɛnye sɔ bɔ Yehowa ayɛ ama yɛ ne, ekonwu bie wɔ Nya Asetena Nu Anigye Daa! nwomaa ne, adesũa 46, porɛ 4 nanu. Bafa minit nzã vidio bie baboka so. Ye dwirɛti yeɛ ole, Fa Wɔ Akyɛdeɛ Ma Nyameɛpiri.

ABOA WƆNWO KYƐ ƐKƆHYƐ YEHOWA BƆ KYƐ ƐKƆSÕ YE, NA ABƆ ASU HƆ Ɔ?

9. Nzuati yeɛ odikyɛ ebie to ye boase kora, na wahyɛ Yehowa bɔ kyɛ ɔkɔsõ ye ɔ?

⁹ Bɔ yahã ne mukoraati sĩ ne, ebia wɔde enwu wɔnwo kyɛ, ɛyɛlle ahoboa kyɛ ɛkɔhyɛ Yehowa bɔ, na abɔ asu. Ebia enwu ye kyɛ, odikyɛ ɛkɔso yɛ nzakrayɛɛ biemɔ kyɛbɔ ɔkɔyɛ a, ɛkɔhora kɔyɛ bɔ Yehowa kuro ɔ. Anaa odikyɛ ɛyere wɔnwo sũa nikye kyɛbɔ ɔkɔyɛ a, wɔ gyidie kɔyɛ se ɔ. (Kol. 2:​6, 7) Yɛ Bible asũafoɛ, ɔne ngwalaa bɔ b’awofoɛ ne bɛ sũa nikyee ne, ɔsono ebiala ne ye nimdeɛ, ɔne mmerɛ bɔ ɔpena kyɛ ɔhyɛ Yehowa bɔ kyɛ ɔkɔsõ ye, na wabɔ asu ɔ. Ɛhẽne ati, koraka ɛkɔhyɛ Yehowa bɔ kyɛ ɛkɔsõ ye ne, to wɔ boase yɛ nzakrayɛɛ wɔ w’asetena nu, na nnɛfa wɔnwo toto ebie.—Gal. 6:​4, 5.

10. Sɛ enwu ye kyɛ ɛboalle wɔnwo kyɛ, ɛkɔhyɛ Yehowa bɔ na abɔ asu a, nzu yeɛ ɛkɔhora kɔyɛ ɔ? (Sa kenga edwirɛ bɔ yenwa, “Bɛbɔ B’awofoɛ Te Yehowa Adanzefoɛ” bɔ ɔwɔ alaka nanu ne.)

¹⁰ Sɛ enwu ye kyɛ, ɛyɛlle ahoboa kyɛ ɛkɔhyɛ Yehowa bɔ kyɛ ɛkɔsõ ye a, nnɛmaa w’aba nu bu, na mmom yere wɔnwo kyɛ ɛkɔyɛ sɔ. Bɔ mbaeɛ srɛ Yehowa kyɛ ɔboka wɔ kyɛbɔ ɔkɔyɛ a, ɛkɔhora kɔyɛ nzakrayɛɛ biala bɔ yenwo hia wɔ w’asetena nu ɔ. (Flp. 2:13; 3:16) Sɛ ɛbɔ mbaeɛ bɔ ɔte sɔ a, nya gyidie kyɛ Yehowa kotie.—1 Yoh. 5:14.

BƆ ƆMAA EBIEMƆ SURO KYƐ BƐKƆHYƐ YEHOWA BƆ, NA BABƆ ASU Ɔ

11. Nzuati yeɛ odikyɛ enya gyidie kyɛ, Yehowa kɔboka wɔ maa ɛkɔyɛ bɔ okuro ɔ?

¹¹ Ebiemɔ wɔ berɛ a, benwu ye kyɛ bɛkɔhora bɛkɔhyɛ Yehowa bɔ na babɔ asu, nakoso besuro kyɛ bɛkɔyɛ sɔ. Nzuati ɔ? B’adwene yɛ bɛ kyɛ, sɛ bɛbɔ asu beyie a, ebia na baayɛ bɔne pirikua bie maa batu bɛ bafi asafo nanu. Sɛ ele adwene bɔ ɔte sɔ a, yede kã w’ahone to wɔ kunu, ofikyɛ Yehowa kɔboka wɔ maa ɛkɔhora kɔbɔ ‘bra bɔ ɔfata ye, ná ɔsɔ ye nye’ ɔ. (Kol. 1:10) Yehowa aboka mmeni pẽe maa bahɔso bayɛ bɔ okuro ɔ, yeti wɔ koso ɔboka wɔ. (1 Kor. 10:13) Ɛhẽne ati yeɛ ɔmva yenwo kyɛ yɛte mmenia bɔ bɔne wɔ yɛnwo ne, mmeni pẽe bɔ bɛbɔ asu ne, benu kãabie yeɛ betu bɛ befi asafo nanu ɔ. Yehowa boka bɛbɔ bɛsõ ye ne maa bɛkɔso bedi nahorɛ bɛma ye.

12. Nzu yeɛ ɔkɔboka yɛ maa yɛkɔhora yɛkɔhwẽ yɛnwo yekofi bɔne nwo ɔ?

¹² Ɔnate kyɛ yɛte sona bɔ bɔne wɔ yɛnwo nati, yɛkɔhora yekoli mvomsoɛ mmerɛ biala. (Yak. 1:14) Nakoso kyɛ ɛkɔyɛ bɔne, anaa ɛngɔyɛ ne de, ogyĩ wɔ bɔbɔ wɔ so. Ofikyɛ ebie ngɔhora ngɔkyekye wɔsa ngogua wɔsĩ kyɛ ɛyɛ bɔne. Ebiemɔ kyire kyɛ ɔnate kyɛ bɔne wɔ yɛnwo nati, sɛ nikyeebie ba wɔ tianu kyɛ ɛyɛ bɔne a, kyɛbɔ ɔte biala ɛkɔyɛ. Nakoso sɔ dwirɛ ne tte nahorɛ, ofikyɛ sɛ ɛyere wɔnwo a, ɛkɔhora kɔyɛ bɔ ɔte pá ɔ. Bɔ ɔkɔboka wɔ maa ɛkɔhora kɔyɛ sɔ yeɛ ole kyɛ, ɛkɔhɔso kɔbɔ mbaeɛ, ɛkɔkenga Bible ne mmerɛ biala, na ahɔ asafo nhyiamu. Afei koso, yere wɔnwo yɛ asɛnga adwuma ne. Sɛ ɛkɔso yɛ sɔ nningyein hemɔ a, Yehowa kɔboka wɔ maa ɛkɔhora kɔyɛ bɔ okuro ɔ.—Gal. 5:16.

13. Nzu yeɛ Yosef yɛle bɔ yɛkɔhora yekosuesũa ɔ?

¹³ Sɛ edimoa susu bɔ ɛkɔyɛ, mmerɛ bɔ nzɔhwɛ bie awa wɔ so nanwo a, ɔkɔboka wɔ maa ɛkɔhora kɔyɛ bɔ Yehowa kuro ɔ. Bible ne kã mmeni pẽe bɔ ɔmva yenwo kyɛ bɔne wɔ bɛnwo ne, bɛhora bɛyɛle sɔ nanwo dwirɛ. Ebie yeɛ ole kyɛ, Pɔtifa aye yɛle ye adwene kyɛ ɔkɔlakalaka Yosef maa ɔne ye kɔla, nakoso né Yosef se bɔ odikyɛ ɔyɛ ɔ. Bible ne kã kyɛ “Yosef ambene,” ofikyɛ ɔhãne kyɛ: “Nzu ati yeɛ nyɔ sɔ amumuyɛɛ piri ye na nyɔ bɔne ndia Nyameɛ ɔ?” (Gye. 39:​8-10) Nikyee biala kyire kyɛ, né Yosef se bɔ odikyɛ ɔyɛ kora yeɛ Pɔtifa aye ne so ye nea ɔ. Ɔnate ɛhẽne ati, mmerɛ bɔ nzɔhwɛ ne wale Yosef so ne, ɔhora gyinane yenoa.

14. Sɛ nzɔhwɛ bie to yɛ a, yɛkɔyɛ sɛɛ né yahora yali nahorɛ yama Yehowa?

¹⁴ Yede, ɛkɔyɛ sɛɛ na ahora asuesũa bɔ Yosef yɛle ne? Dimoa susu bɔ ɛkɔyɛ mmerɛ bɔ nzɔhwɛ bie ato wɔ nanwo. Boa wɔnwo kyɛ, sɛ ebie fa nningyein bɔ Yehowa nguro ne bie so wɔ nea a, ɛkɔhwẽ wɔnwo kofi yenwo ndɛ, na ɛngɔdwenedwene sɔ nningyein nanwo po. (Edw. 97:10; 119:165) Sɛ ɛyɛ sɔ a, ɔkɔboka wɔ maa ɛkɔhora koli nahorɛ kɔma Yehowa, mmerɛ bɔ nzɔhwɛ bie ato wɔ ne. Ofikyɛ alimoa aboa wɔnwo asie.

15. Nzu yeɛ sɛ ebie yɛ a, okyire kyɛ ‘yenye aboro ɔpena’ Yehowa boso ɔ? (Hebrifoɛ 11:6)

¹⁵ Ebia wɔ de, ede to nu kyɛ nahorɛ sõen nala yeɛ anwu ye ne, na ekuro kyɛ ekofi w’ahõne mukoraati nu kɔsõ Yehowa. Nakoso ɛhe mukoraati sĩ ne, ɔyɛ se ma wɔ kyɛ, ɛkɔhyɛ Yehowa bɔ kyɛ ɛkɔsõ ye, na abɔ asu. Sɛ sɔ a, yede suesũa bɔ Ɔhene Dawide yɛle ne, na srɛ Yehowa kyɛ: “Ao Nyameɛ, neanea me nu, ná nwu m’ahone nu dwirɛ; so me nea, ná nwu me ti anu adwene. Nea sɛ bra tɛɛ bie wɔ me nu a, na di me nyunu fa me fa atee bɔ ɔla berɛ afebɔɔ ne aso.” (Edw. 139:​23, 24) Mmɔden biala bɔ ɛbɔ kyɛ ɛkɔhora kɔhyɛ Yehowa bɔ, na abɔ asu ne, okyire kyɛ ‘wɔnye aboro ɛpena yebo so,’ yeti okoyira wɔ.—Kenga Hebrifoɛ 11:6.

KƆSO TWẼ PINGYE YEHOWA

16-17. Bɛbɔ b’awofoɛ wɔ asafo nanu ne, nzu yeɛ ɔmaa yenwu ye kyɛ, bɛ koso Yehowa yeɛ ɔtwẽ bɛ ɔ? (Yohane 6:44)

¹⁶ Yesu hãne kyɛ, koraka ebie kɔhora kɔɔyɛ ye suaniɛ ne, sana Yehowa twẽ sɔ sona ne. (Kenga Yohane 6:44.) Wɔde, susu bɔ sɔ dwirɛ ne kyire nanwo nea. Ebiala bɔ Yehowa kɔhwẽ ye kyɛ ɔɔyɛ Yesu suaniɛ ne, okyire kyɛ wanwu nikyee pá bie wɔ sɔ sona nanwo. Bɛbɔ Yehowa twẽ bɛ ne, bɛte mmenia bɔ “ye ahone la bɛ nwo ɔ.” (Deut. 7:6) Yeti wɔ koso, ɛla Yehowa ahõne so paa.

¹⁷ Ebia wɔde, ɛne w’awofoɛ yeɛ bɛwɔ asafo nanu ɔ. Yeti ɛkɔhora konya adwene kyɛ, ɔnate kyɛ w’awofoɛ wɔ asafo nanu nati, yeɛ wɔ koso ɛsõ Yehowa ɔ, na mmom nna Yehowa yeɛ wahwẽ wɔ ɔ. Sɛ sɔ yeɛ w’adwene yɛ wɔ a, yede kae kyɛ Bible ne kã kyɛ: “Ɛmɔhwe bepingye Nyameɛ, na ye koso ɔkɔhwe kopingye ɛmɔ.” (Yak. 4:8; 1 Abe. 28:9) Yeti ɔnate kyɛ wɔ bɔbɔ ahwẽ apingye Nyameɛ nati, yeɛ ye koso wahwẽ wapingye wɔ ɔ, na ɔtte kyɛ w’awofoɛ te Yehowa Adanzefoɛ nati ɔ. Yeti bɛbɔ b’awofoɛ wɔ asafo nanu, ɔne bɛbɔ b’awofoɛ nne asafo nanu ne mukoraati, Yehowa yeɛ wahwẽ bɛ ɔ. Yeti sɛ ebie yere yenwo kyɛ ɔkɔhwẽ kopingye Yehowa a, ye koso, ɔkɔhwẽ kopingye sɔ sona ne, kyɛbɔ Yakobo 4:8 kã ne.—Fatoto 2 Tɛsalonikafoɛ 2:13 nanwo.

18. Nzu yeɛ yekosusu yenwo wɔ adesũa bɔ oliberɛ nanu ɔ? (Edwein 40:8)

¹⁸ Sɛ ɛhyɛ Yehowa bɔ kyɛ ɛkɔsõ ye, na ɛbɔ asu a, okyire kyɛ esuesũa Yesu. Yesu fili ye ahõne mukoraati nu fale yenwo mane ye Baba kyɛ, ɔkɔyɛ nikyee biala bɔ okuro ɔ. (Kenga Edwein 40:8; Heb. 10:7) Yede sɛ ɛbɔ asu yie a, nzu yeɛ ɔkɔboka wɔ maa ɛkɔhɔso koli nahorɛ kɔma Yehowa ɔ? Yekosusu ɛhẽne anwo wɔ adesũa bɔ oliberɛ nanu.